৬. কদম্বপুপ্ফিযত্থেরঅপদানৰণ্ণনা

হিমৰন্তস্সাৰিদূরেতিআদিকং আযস্মতো কদম্বপুপ্ফিযত্থেরস্স অপদানং. অযম্পি পুরিমজিনৰরেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সম্মাসম্বুদ্ধসুঞ্ঞে লোকে একস্মিং কুলে নিব্বত্তো ৰুদ্ধিমন্ৰায ঘরাৰাসং ৰসন্তো তত্থ আদীনৰং দিস্ৰা ঘরাৰাসং পহায তাপসপব্বজ্জং পব্বজিত্ৰা হিমৰন্তসমীপে কুক্কুটে নাম পব্বতে অস্সমং কত্ৰা ৰিহাসি. সো তত্থ সত্ত পচ্চেকবুদ্ধে দিস্ৰা পসন্নমানসো পুপ্ফিতং কদম্বপুপ্ফং ওচিনিত্ৰা তে পচ্চেকবুদ্ধে পূজেসি. তেপি ‘‘ইচ্ছিতং পত্থিত’’ন্তিআদিনা অনুমোদনং অকংসু.

৩০. সো তেন পুঞ্ঞেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে সাৰত্থিযং কুলগেহে নিব্বত্তো ৰুদ্ধিমন্ৰায সত্থু ধম্মদেসনং সুত্ৰা পটিলদ্ধসদ্ধো পব্বজিত্ৰা নচিরস্সেৰ অরহা হুত্ৰা পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো হিমৰন্তস্সাৰিদূরেতিআদিমাহ. তং ৰুত্তত্থমেৰ. কুক্কুটো নাম পব্বতোতি তস্স উভোসু পস্সেসু কুক্কুটচূল়াকারেন পব্বতকূটানং ৰিজ্জমানত্তা কুক্কুটোতি সঙ্খং গতো. পকারেন তিরো হুত্ৰা পতিট্ঠহতীতি পব্বতো. তম্হি পব্বতপাদম্হীতি তস্মিং পব্বতসমীপে. সত্ত বুদ্ধা ৰসন্তীতি সত্ত পচ্চেকবুদ্ধা তস্মিং কুক্কুটপব্বতপাদে পণ্ণসালাযং ৰসন্তীতি অত্থো.

৩১. দীপরাজংৰ উগ্গতন্তি দীপানং রাজা দীপরাজা, সব্বেসং দীপানং জলমানানং তারকানং রাজা চন্দোতি অত্থো. অথ ৰা সব্বেসু জম্বুদীপপুব্বৰিদেহঅপরগোযানউত্তরকুরুসঙ্খাতেসু চতূসু দীপেসু দ্ৰিসহস্সপরিত্তদীপেসু চ রাজা আলোকফরণতো চন্দো দীপরাজাতি ৰুচ্চতি, তং নভে উগ্গতং চন্দং ইৰ পুপ্ফিতং ফুল্লিতং কদম্বরুক্খং দিস্ৰা ততো পুপ্ফং ওচিনিত্ৰা উভোহি হত্থেহি পগ্গয্হ পকারেন গহেত্ৰা সত্ত পচ্চেকবুদ্ধে সমোকিরিং সুট্ঠু ওকিরিং, আদরেন পূজেসিন্তি অত্থো. সেসং উত্তানত্থমেৰাতি.

কদম্বপুপ্ফিযত্থেরঅপদানৰণ্ণনা সমত্তা.