৭. তিণসূলকত্থেরঅপদানৰণ্ণনা

হিমৰন্তস্সাৰিদূরেতিআদিকং আযস্মতো তিণসূলকত্থেরস্স অপদানং. অযম্পি থেরো পুরিমজিনৰরেসু কতপুঞ্ঞসম্ভারো উপ্পন্নুপ্পন্নভৰে কুসলানি উপচিনন্তো সিখিস্স ভগৰতো কালে কুলগেহে নিব্বত্তো ঘরাৰাসং সণ্ঠপেত্ৰা তত্থ দোসং দিস্ৰা তং পহায তাপসপব্বজ্জং পব্বজিত্ৰা ৰসন্তো হিমৰন্তসমীপে ভূতগণে নাম পব্বতে ৰসন্তং একতং ৰিৰেকমনুব্রূহন্তং সিখিং সম্বুদ্ধং দিস্ৰা পসন্নমানসো তিণসূলপুপ্ফং গহেত্ৰা পাদমূলে পূজেসি. বুদ্ধোপি তস্স অনুমোদনং অকাসি.

৩৫. সো তেন পুঞ্ঞেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে সাৰত্থিযং ৰিভৰসম্পন্নে একস্মিং কুলে নিব্বত্তো ৰুদ্ধিমন্ৰায সাসনে পসন্নো পব্বজিত্ৰা উপনিস্সযসম্পন্নত্তা নচিরস্সেৰ অরহত্তং পাপুণিত্ৰা পুব্বকম্মং সরিত্ৰা সোমনস্সপ্পত্তো পুব্বচরিতাপদানং পকাসেন্তো হিমৰন্তস্সাৰিদূরেতিআদিমাহ. ভূতগণো নাম পব্বতোতি ভূতগণানং দেৰযক্খসমূহানং আৰাসভূতত্তা ভৰনসদিসত্তা অৰিরূল়্হভাৰেন পৰত্তত্তা চ ভূতগণো নাম পব্বতো, তস্মিং একো অদুতিযো জিনো জিতমারো বুদ্ধো ৰসতে দিব্বব্রহ্মঅরিযইরিযাপথৰিহারেহি ৰিহরতীতি অত্থো.

৩৬. একূনসতসহস্সং, কপ্পং ন ৰিনিপাতিকোতি তেন তিণসূলপুপ্ফপূজাকরণফলেন নিরন্তরং একূনসতসহস্সকপ্পানং অৰিনিপাতকো চতুরাপাযৰিনিমুত্তো সগ্গসম্পত্তিভৰমেৰ উপপন্নোতি অত্থো. সেসং সুৰিঞ্ঞেয্যমেৰাতি.

তিণসূলকত্থেরঅপদানৰণ্ণনা সমত্তা.