১৪. সোভিতৰগ্গো

১. সোভিতত্থেরঅপদানৰণ্ণনা

পদুমুত্তরো নাম জিনোতিআদিকং আযস্মতো সোভিতত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে একস্মিং কুলগেহে নিব্বত্তো ৰিঞ্ঞুতং পত্তো ঘরাৰাসং সণ্ঠপেত্ৰা একদিৰসং সত্থারা ধম্মে দেসিযমানে সোমনস্সেন পসন্নমানসো নানপ্পকারেহি থোমেসি. সো তেনেৰ সোমনস্সেন কালং কত্ৰা দেৰেসু নিব্বত্তো তত্থ দিব্বসুখং অনুভৰিত্ৰা মনুস্সেসু চ মনুস্সসুখং অনুভৰিত্ৰা ইমস্মিং বুদ্ধুপ্পাদে সাৰত্থিযং কুলগেহে নিব্বত্তো সত্তৰস্সিকোৰ পব্বজিত্ৰা নচিরস্সেৰ ছল়ভিঞ্ঞো অরহা অহোসি.

১. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পদুমুত্তরো নাম জিনোতিআদিমাহ. তং সব্বং হেট্ঠা ৰুত্তনযত্তা সুৰিঞ্ঞেয্যমেৰাতি.

সোভিতত্থেরঅপদানৰণ্ণনা সমত্তা.

২. সুদস্সনত্থেরঅপদানৰণ্ণনা

ৰিত্থতায নদীতীরেতিআদিকং আযস্মতো সুদস্সনত্থেরস্স অপদানং. অযম্পি পুরিমজিনৰরেসু কতাধিকারো তত্থ তত্থ ভৰে কতপুঞ্ঞূপচযো সিখিস্স ভগৰতো কালে কুলগেহে নিব্বত্তো ৰুদ্ধিপ্পত্তো ঘরাৰাসং সণ্ঠপেত্ৰা ৰসন্তো ৰিত্থতায নাম গঙ্গায সমীপে পিলক্খুফলিতং পরিযেসন্তো তস্সা তীরে নিসিন্নং জলমানঅগ্গিসিখং ইৰ সিখিং সম্মাসম্বুদ্ধং দিস্ৰা পসন্নমানসো কেতকীপুপ্ফং ৰণ্টেনেৰ ছিন্দিত্ৰা পূজেন্তো এৰমাহ – ‘‘ভন্তে, যেন ঞাণেন ত্ৰং এৰং মহানুভাৰো সব্বঞ্ঞুবুদ্ধো জাতো, তং ঞাণং অহং পূজেমী’’তি. অথ ভগৰা অনুমোদনমকাসি. সো তেন পুঞ্ঞেন দেৰমনুস্সেসু জাতো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো সত্থরি পসন্নো পব্বজিত্ৰা নচিরস্সেৰ অরহা অহোসি.

১০. সো অত্তনো কতকুসলং সরিত্ৰা সোমনস্সজাতো পুব্বচরিতাপদানং পকাসেন্তো ৰিত্থতায নদীতীরেতিআদিমাহ. তত্থ ৰিত্থতাযাতি ৰিত্থরতি পত্থরতি ৰিত্থিণ্ণা হোতীতি ৰিত্থতা, নদন্তি সদ্দং করোন্তি ইতা গতা পৰত্তাতি নদী, নদিং তরন্তা এতং পত্ৰা তিণ্ণা নাম হোন্তীতি তীরং, তস্সা ৰিত্থতায নদিযা তীরে তীরসমীপেতি অত্থো. কেতকিং পুপ্ফিতং দিস্ৰাতি কুচ্ছিতাকারেন গণ্হন্তানং হত্থং কণ্ডকো ছিন্দতি ৰিজ্ঝতীতি কেতং, কেতস্স এসা কেতকীপুপ্ফং, তং দিস্ৰা ৰণ্টং ছিন্দিত্ৰাতি সম্বন্ধো.

১১. সিখিনো লোকবন্ধুনোতি সিখী ৰুচ্চতি অগ্গি, সিখীসদিসা নীলপীতাদিভেদা জলমানা ছব্বণ্ণঘনরংসিযো যস্স সো সিখী, লোকস্স সকললোকত্তযস্স বন্ধু ঞাতকোতি লোকবন্ধু, তস্স সিখিনো লোকবন্ধুনো কেতকীপুপ্ফং ৰণ্টে ছিন্দিত্ৰা পূজেসিন্তি সম্বন্ধো. সেসং উত্তানত্থমেৰাতি.

সুদস্সনত্থেরঅপদানৰণ্ণনা সমত্তা.

৩. চন্দনপূজনকত্থেরঅপদানৰণ্ণনা

চন্দভাগানদীতীরেতিআদিকং আযস্মতো চন্দনপূজনকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অত্থদস্সিস্স ভগৰতো কালে হিমৰন্তে চন্দভাগানদিযা সমীপে কিন্নরযোনিযং নিব্বত্তো পুপ্ফভক্খো পুপ্ফনিৰসনো চন্দনঅগরুআদীসু গন্ধৰিভূসিতো হিমৰন্তে ভুম্মদেৰতা ৰিয উয্যানকীল়জলকীল়াদিঅনেকসুখং অনুভৰন্তো ৰাসং কপ্পেসি. তদা অত্থদস্সী ভগৰা তস্সানুকম্পায হিমৰন্তং গন্ত্ৰা আকাসতো ওরুয্হ সঙ্ঘাটিং পঞ্ঞাপেত্ৰা নিসীদি. সো কিন্নরো তং ভগৰন্তং ৰিজ্জোতমানং তত্থ নিসিন্নং দিস্ৰা পসন্নমানসো সুগন্ধচন্দনেন পূজেসি. তস্স ভগৰা অনুমোদনং অকাসি.

১৭. সো তেন পুঞ্ঞেন তেন সোমনস্সেন যাৰতাযুকং ঠত্ৰা ততো চুতো দেৰলোকে নিব্বত্তো অপরাপরং ছ কামাৰচরসম্পত্তিযো অনুভৰিত্ৰা মনুস্সেসু চক্কৰত্তিরজ্জপদেসরজ্জসম্পত্তিযো অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো পব্বজিত্ৰা নচিরস্সেৰ অরহত্তং পত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো চন্দভাগানদীতীরেতিআদিমাহ. তত্থ চন্দং মনং রুচিং অজ্ঝাসযং ঞত্ৰা ৰিয জাতোতি চন্দো. চন্দমণ্ডলেন পসন্ননিম্মলোদকেন উভোসু পস্সেসু মুত্তাদলসদিসসন্থরধৰলপুলিনতলেন চ সমন্নাগতত্তা চন্দেন ভাগা সদিসাতি চন্দভাগা, তস্সা চন্দভাগায নদিযা তীরে সমীপেতি অত্থো. সেসং সব্বং হেট্ঠা ৰুত্তনযত্তা সুৰিঞ্ঞেয্যমেৰাতি.

চন্দনপূজনকত্থেরঅপদানৰণ্ণনা সমত্তা.

অট্ঠমভাণৰারৰণ্ণনা সমত্তা.

৪. পুপ্ফচ্ছদনিযত্থেরঅপদানৰণ্ণনা

সুনন্দো নাম নামেনাতিআদিকং আযস্মতো পুপ্ফচ্ছদনিযত্থেরস্স অপদানং. অযম্পি পুরিমবুদ্ধেসু কতাধিকারো অনেকেসু ভৰেসু ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে ব্রাহ্মণকুলে নিব্বত্তো ৰিঞ্ঞুতং পত্ৰা সকসিপ্পেসু নিপ্ফত্তিং পত্তো মহাভোগো মহাযসো দানাভিরতো অহোসি. একদিৰসং সো ‘‘সকলজম্বুদীপে ইমে যাচকা নাম ‘অহং দানং ন লদ্ধোস্মী’তি ৰত্তুং মা লভন্তূ’’তি মহাদানং সজ্জেসি. তদা পদুমুত্তরো ভগৰা সপরিৰারো আকাসেন গচ্ছতি. ব্রাহ্মণো তং দিস্ৰা পসন্নচিত্তো সকসিস্সে পক্কোসাপেত্ৰা পুপ্ফানি আহরাপেত্ৰা আকাসে উক্খিপিত্ৰা পূজেসি. তানি সকলনগরং ছাদেত্ৰা সত্ত দিৰসানি অট্ঠংসু.

২৬. সো তেন পুঞ্ঞকম্মেন দেৰমনুস্সেসু সুখং অনুভৰিত্ৰা ইমস্মিং বুদ্ধুপ্পাদে সাৰত্থিযং একস্মিং কুলগেহে নিব্বত্তো সদ্ধাজাতো পব্বজিত্ৰা খুরগ্গেযেৰ অরহত্তং পত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো সুনন্দো নাম নামেনাতিআদিমাহ. তং হেট্ঠা ৰুত্তনযত্তা সুৰিঞ্ঞেয্যমেৰাতি.

পুপ্ফচ্ছদনিযত্থেরঅপদানৰণ্ণনা সমত্তা.

৫. রহোসঞ্ঞকত্থেরঅপদানৰণ্ণনা

হিমৰন্তস্সাৰিদূরেতিআদিকং আযস্মতো রহোসঞ্ঞকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো একস্মিং বুদ্ধসুঞ্ঞকালে মজ্ঝিমদেসে ব্রাহ্মণকুলে নিব্বত্তো ৰুদ্ধিমন্ৰায সকসিপ্পেসু নিপ্ফত্তিং পত্ৰা তত্থ সারং অপস্সন্তো কেৰলং উদরং পূরেত্ৰা কোধমদমানাদযো অকুসলেযেৰ দিস্ৰা ঘরাৰাসং পহায হিমৰন্তং পৰিসিত্ৰা ইসিপব্বজ্জং পব্বজিত্ৰা অনেকতাপসসতপরিৰারো ৰসভপব্বতসমীপে অস্সমং মাপেত্ৰা তীণি ৰস্সসহস্সানি হিমৰন্তেযেৰ ৰসমানো ‘‘অহং এত্তকানং সিস্সানং আচরিযোতি সম্মতো গরুট্ঠানিযো গরুকাতব্বো ৰন্দনীযো, আচরিযো মে নত্থী’’তি দোমনস্সপ্পত্তো তে সব্বে সিস্সে সন্নিপাতেত্ৰা বুদ্ধানং অভাৰে নিব্বানাধিগমাভাৰং পকাসেত্ৰা সযং এককো রহো ৰিৰেকট্ঠানেৰ নিসিন্নো বুদ্ধস্স সম্মুখা নিসিন্নো ৰিয বুদ্ধসঞ্ঞং মনসি করিত্ৰা বুদ্ধারম্মণং পীতিং উপ্পাদেত্ৰা সালাযং পল্লঙ্কং আভুজিত্ৰা নিসিন্নো কালং কত্ৰা ব্রহ্মলোকে নিব্বত্তি.

৩৪. সো তত্থ ঝানসুখেন চিরং ৰসিত্ৰা ইমস্মিং বুদ্ধুপ্পাদে কুলগেহে নিব্বত্তো কামেসু অনল্লীনো সত্তৰস্সিকো পব্বজিত্ৰা খুরগ্গেযেৰ অরহত্তং পত্ৰা ছল়ভিঞ্ঞো হুত্ৰা পুব্বেনিৰাসঞাণেন অত্তনো পুব্বকম্মং সরিত্ৰা সঞ্জাতসোমনস্সো পুব্বচরিতাপদানং পকাসেন্তো হিমৰন্তস্সাৰিদূরেতিআদিমাহ. ৰসভো নাম পব্বতোতি হিমৰন্তপব্বতং ৰিনা সেসপব্বতানং উচ্চতরভাৰেন সেট্ঠতরভাৰেন ৰসভোতি সঙ্খং গতো পব্বতোতি অত্থো. সেসং সব্বত্থ উত্তানত্থমেৰাতি.

রহোসঞ্ঞকত্থেরঅপদানৰণ্ণনা সমত্তা.

৬. চম্পকপুপ্ফিযত্থেরঅপদানৰণ্ণনা

কণিকারংৰ জোতন্তন্তিআদিকং আযস্মতো চম্পকপুপ্ফিযত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰেস্সভুস্স ভগৰতো কালে ব্রাহ্মণকুলে নিব্বত্তো ৰুদ্ধিপ্পত্তো সকসিপ্পেসু নিপ্ফত্তিং পত্ৰা তত্থ সারং অপস্সন্তো ঘরাৰাসং পহায তাপসপব্বজ্জং পব্বজিত্ৰা ৰনন্তরে ৰসন্তো ৰেস্সভুং ভগৰন্তং উদ্দিস্স সিস্সেহি আনীতেহি চম্পকপুপ্ফেহি পূজেসি. ভগৰা অনুমোদনং অকাসি. সো তেনেৰ কুসলেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পাপুণিত্ৰা পুব্বৰাসনাবলেন ঘরাৰাসে অনল্লীনো পব্বজিত্ৰা নচিরস্সেৰ অরহা অহোসি.

৪১. সো অপরভাগে অত্তনো পুব্বপুঞ্ঞকম্মং সরিত্ৰা সোমনস্সজাতো পুব্বচরিতাপদানং পকাসেন্তো কণিকারংৰ জোতন্তন্তিআদিমাহ. তত্থ কণিকারন্তি সকলপত্তপলাসানি পরিভজ্জ পাতেত্ৰা পুপ্ফগহণসমযে কণ্ণিকাবদ্ধো হুত্ৰা পুপ্ফমকুল়ানং গহণতো কণ্ণিকাকারেন পকতোতি কণিকারো, ‘‘কণ্ণিকারো’’তি ৰত্তব্বে নিরুত্তিনযেন একস্স পুব্ব ণ-কারস্স লোপং কত্ৰা ‘‘কণিকার’’ন্তি ৰুত্তন্তি দট্ঠব্বং. তং পুপ্ফিতং কণিকাররুক্খং ইৰ জোতন্তং বুদ্ধং অদ্দসন্তি অত্থো. সেসং উত্তানত্থমেৰাতি.

চম্পকপুপ্ফিযত্থেরঅপদানৰণ্ণনা সমত্তা.

৭. অত্থসন্দস্সকত্থেরঅপদানৰণ্ণনা

ৰিসালমাল়ে আসীনোতিআদিকং আযস্মতো অত্থসন্দস্সকত্থেরস্স অপদানং. অযম্পি পুরিমবুদ্ধেসু কতাধিকারো অনেকেসু অত্তভাৰেসু কতপুঞ্ঞূপচযো পদুমুত্তরস্স ভগৰতো কালে ব্রাহ্মণকুলে নিব্বত্তো ৰুদ্ধিমন্ৰায সকসিপ্পেসু নিপ্ফত্তিং পত্তো তত্থ সারং অপস্সন্তো গেহং পহায হিমৰন্তং গন্ত্ৰা রমণীযে ঠানে পণ্ণসালং কত্ৰা পটিৰসতি, তদা সত্তানুকম্পায হিমৰন্তমাগতং পদুমুত্তরভগৰন্তং দিস্ৰা পসন্নমানসো পঞ্চঙ্গসমন্নাগতো ৰন্দিত্ৰা থুতিৰচনেহি থোমেসি. সো তেন পুঞ্ঞেন যাৰতাযুকং কত্ৰা কালঙ্কত্ৰা ব্রহ্মলোকূপগো অহোসি. সো অপরভাগে ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো সত্থু ধম্মদেসনং সুত্ৰা পটিলদ্ধসদ্ধো পব্বজিত্ৰা অরহত্তং পাপুণি.

৪৭. সো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো ৰিসালমাল়ে আসীনোতিআদিমাহ. তত্থ ৰিসালমাল়েতি ৰিসালং পত্থটং ৰিত্থিণ্ণং মহন্তং মাল়ং ৰিসালমাল়ং, তস্মিং ৰিসালমাল়ে আসীনো নিসিন্নো অহং লোকনাযকং অদ্দসন্তি সম্বন্ধো. তেসং সুৰিঞ্ঞেয্যমেৰাতি.

অত্থসন্দস্সকত্থেরঅপদানৰণ্ণনা সমত্তা.

৮. একপসাদনিযত্থেরঅপদানৰণ্ণনা

নারদো ইতি মে নামন্তিআদিকং আযস্মতো একপসাদনিযত্থেরস্স অপদানং. অযম্পি পুরিমবুদ্ধেসু কতাধিকারো অনেকাসু জাতীসু কতকুসলো অত্থদস্সিস্স ভগৰতো কালে ব্রাহ্মণকুলে নিব্বত্তো কেসৰোতি পাকটো হুত্ৰা ৰিঞ্ঞুতং পত্ৰা ঘরাৰাসং পহায পব্বজিত্ৰা ৰসন্তো একদিৰসং সত্থু ধম্মদেসনং সুত্ৰা পসন্নমানসো অঞ্জলিং পগ্গয্হ অতিৰিয পীতিসোমনস্সজাতো পক্কামি. সো যাৰতাযুকং ঠত্ৰা তেনেৰ সোমনস্সেন কালং কত্ৰা দেৰেসু নিব্বত্তো তত্থ দিব্বসম্পত্তিং অনুভৰিত্ৰা মনুস্সেসু উপ্পন্নো তত্থ সম্পত্তিযো অনুভৰিত্ৰা ইমস্মিং বুদ্ধুপ্পাদে অঞ্ঞতরস্মিং কুলগেহে নিব্বত্তো ৰুদ্ধিপ্পত্তো সত্থরি পসীদিত্ৰা পব্বজিতো নচিরস্সেৰ অরহা অহোসি.

৫৫. সো অপরভাগে অত্তনো কতকুসলকম্মং সরিত্ৰা সোমনস্সজাতো পুব্বচরিতাপদানং পকাসেন্তো নারদো ইতি মে নামন্তিআদিমাহ. তত্থ নারদোতি জাতিৰসেন সুদ্ধসরীরত্তা নত্থি রজো ধূলি মলং এতস্সাতি নারদো, জ-কারস্স দ-কারং কত্ৰা নারদোতি কুলদত্তিকং নামং. কেসৰোতি কিসৰচ্ছগোত্তে জাতত্তা কেসৰো নারদকেসৰো ইতি মং জনা ৰিদূ জানন্তীতি অত্থো. সেসং পাকটমেৰাতি.

একপসাদনিযত্থেরঅপদানৰণ্ণনা সমত্তা.

৯. সালপুপ্ফদাযকত্থেরঅপদানৰণ্ণনা

মিগরাজা তদা আসিন্তিআদিকং আযস্মতো সালপুপ্ফদাযকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে কতকুসলসঞ্চযো কেনচি কম্মচ্ছিদ্দেন হিমৰন্তে সীহযোনিযং নিব্বত্তো অনেকসীহপরিৰারো ৰিহাসি. তদা সিখী ভগৰা তস্সানুকম্পায হিমৰন্তং অগমাসি. সীহো তং উপগতং দিস্ৰা পসন্নমানসো সাখাভঙ্গেন সকণ্ণিকসালপুপ্ফং গহেত্ৰা পূজেসি. ভগৰা তস্স অনুমোদনং অকাসি.

৬০. সো তেন পুঞ্ঞেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰিঞ্ঞুতং পত্ৰা সত্থরি পসন্নো পব্বজিত্ৰা অরহত্তং পত্তো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো মিগরাজা তদা আসিন্তিআদিমাহ. তত্থ মরণং গচ্ছন্তীতি মিগা, অথ ৰা ঘাসং মগ্গন্তি গৰেসন্তীতি মিগা, মিগানং রাজা মিগরাজা. সকলচতুপ্পদানং রাজভাৰে সতিপি গাথাবন্ধসুখত্থং মিগে আদিং কত্ৰা মিগরাজাতি ৰুত্তং. যদা ভগৰন্তং দিস্ৰা সপুপ্ফং সালসাখং ভঞ্জিত্ৰা পূজেসিং, তদা অহং মিগরাজা অহোসিন্তি অত্থো.

৬২. সকোসং পুপ্ফমাহরিন্তি সকণ্ণিকং সালপুপ্ফং আহরিং পূজেসিন্তি অত্থো. সেসং উত্তানত্থমেৰাতি.

সালপুপ্ফদাযকত্থেরঅপদানৰণ্ণনা সমত্তা.

১০. পিযালফলদাযকত্থেরঅপদানৰণ্ণনা

পরোধকো তদা আসিন্তিআদিকং আযস্মতো পিযালফলদাযকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিখিস্স ভগৰতো কালে নেসাদকুলে নিব্বত্তো হিমৰন্তে একস্মিং পব্ভারে মিগে ৰধিত্ৰা জীৰিকং কপ্পেত্ৰা ৰসতি. তস্মিং কালে তত্থ গতং সিখিং ভগৰন্তং দিস্ৰা পসন্নমানসো সাযং পাতং নমস্সমানো কঞ্চি দেয্যধম্মং অপস্সন্তো মধুরানি পিযালফলানি উচ্চিনিত্ৰা অদাসি. ভগৰা তানি পরিভুঞ্জি. সো নেসাদো বুদ্ধারম্মণায পীতিযা নিরন্তরং ফুট্ঠসরীরো পাপকম্মে ৰিরত্তচিত্তো মূলফলাহারো নচিরস্সেৰ কালং কত্ৰা দেৰলোকে নিব্বত্তি.

৬৬. সো তত্থ দিব্বসম্পত্তিযো অনুভৰিত্ৰা মনুস্সেসু চ অনেকৰিধসম্পত্তিযো অনুভৰিত্ৰা ইমস্মিং বুদ্ধুপ্পাদে গহপতিকুলে নিব্বত্তো ৰিঞ্ঞুতং পত্তো ঘরাৰাসং সণ্ঠপেত্ৰা তত্থ অনভিরতো গেহং পহায সত্থু সন্তিকে পব্বজিত্ৰা ৰিপস্সনং ৰড্ঢেত্ৰা নচিরস্সেৰ অরহত্তং পত্তো অত্তনো কতফলদানকম্মং সরিত্ৰা সোমনস্সজাতো পুব্বচরিতাপদানং পকাসেন্তো পরোধকো তদা আসিন্তিআদিমাহ. তত্থ যদা অহং পিযালফলং দত্ৰা চিত্তং পসাদেসিং, তদা অহং পরোধকো আসিন্তি সম্বন্ধো. পরোধকোতি পরসত্তরোধকো ৰিহেসকো. ‘‘পররোধকো’’তি ৰত্তব্বে পুব্বস্স র-কারস্স লোপং কত্ৰা ‘‘পরোধকো’’তি ৰুত্তং.

৬৯. পরিচারিং ৰিনাযকন্তি তং নিব্বানপাপকং সত্থারং, ‘‘ভন্তে, ইমং ফলং পরিভুঞ্জথা’’তি পৰারিং নিমন্তেসিং আরাধেসিন্তি অত্থো. সেসং সুৰিঞ্ঞেয্যমেৰাতি.

পিযালফলদাযকত্থেরঅপদানৰণ্ণনা সমত্তা.

চুদ্দসমৰগ্গৰণ্ণনা সমত্তা.