১৫. ছত্তৰগ্গো

১. অতিছত্তিযত্থেরঅপদানৰণ্ণনা

পরিনিব্বুতে ভগৰতীতিআদিকং আযস্মতো অতিছত্তিযত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অত্থদস্সিস্স ভগৰতো কালে একস্মিং কুলগেহে নিব্বত্তো ধরমানস্স ভগৰতো অদিট্ঠত্তা পরিনিব্বুতকালে ‘‘অহো মম পরিহানী’’তি চিন্তেত্ৰা ‘‘মম জাতিং সফলং করিস্সামী’’তি কতসন্নিট্ঠানো ছত্তাধিছত্তং কারেত্ৰা তস্স ভগৰতো সরীরধাতুং নিহিতধাতুগব্ভং পূজেসি. অপরভাগে পুপ্ফচ্ছত্তং কারেত্ৰা তমেৰ ধাতুগব্ভং পূজেসি. সো তেনেৰ পুঞ্ঞেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে গহপতিকুলে নিব্বত্তো ৰিঞ্ঞুতং পত্তো সত্থরি পসন্নো পব্বজিত্ৰা কম্মট্ঠানং গহেত্ৰা ৰাযমন্তো নচিরস্সেৰ অরহত্তং পাপুণি.

১. সো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পরিনিব্বুতে ভগৰতীতিআদিমাহ. তত্থ ছত্তাতিছত্তন্তি ছাদিযতি সংৰরিযতি আতপাদিন্তি ছত্তং, ছত্তস্স অতিছত্তং ছত্তস্স উপরি কতছত্তং ছত্তাতিছত্তং, ছত্তস্স উপরূপরি ছত্তন্তি অত্থো. থূপম্হি অভিরোপযিন্তি থূপিযতি রাসিকরীযতীতি থূপো, অথ ৰা থূপতি থিরভাৰেন ৰুদ্ধিং ৰিরূল়্হিং ৰেপুল্লং আপজ্জমানো পতিট্ঠাতীতি থূপো, তস্মিং থূপম্হি মযা কারিতং ছত্তং উপরূপরি ঠপনৰসেন অভি ৰিসেসেন আরোপযিং পূজেসিন্তি অত্থো.

২. পুপ্ফচ্ছদনং কত্ৰানাতি ৰিকসিতেহি সুগন্ধেহি অনেকেহি ফুপ্ফেহি ছদনং ছত্তুপরি ৰিতানং কত্ৰা পূজেসিন্তি অত্থো. সেসং সব্বত্থ উত্তানত্থমেৰাতি.

অতিছত্তিযত্থেরঅপদানৰণ্ণনা সমত্তা.

২. থম্ভারোপকত্থেরঅপদানৰণ্ণনা

নিব্বুতে লোকনাথম্হীতিআদিকং আযস্মতো থম্ভারোপকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ধম্মদস্সিস্স ভগৰতো কালে কুলগেহে নিব্বত্তো সদ্ধো পসন্নো পরিনিব্বুতে ভগৰতি তস্স ভগৰতো ধাতুগব্ভমাল়কে থম্ভং নিখনিত্ৰা ধজং আরোপেসি. বহূনি জাতিসুমনপুপ্ফানি গন্থিত্ৰা নিস্সেণিযা আরোহিত্ৰা পূজেসি.

৫. সো যাৰতাযুকং ঠত্ৰা কালং কত্ৰা দেৰমনুস্সেসু সংসরন্তো উভযসম্পত্তিযো অনুভৰিত্ৰা সব্বত্থ পূজিতো ইমস্মিং বুদ্ধুপ্পাদে একস্মিং কুলগেহে নিব্বত্তো দহরকালতো পভুতি পূজনীযো সাসনে বদ্ধসদ্ধো পব্বজিত্ৰা সহ পটিসম্ভিদাহি অরহত্তং পত্তো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো নিব্বুতে লোকনাথম্হীতিআদিমাহ. তত্থ নিব্বুতে লোকনাথম্হীতি সকললোকস্স নাথে পধানভূতে পটিসরণে চ সত্থরি খন্ধপরিনিব্বানেন নিব্বুতে নিব্বুতদীপসিখা ৰিয অদস্সনং গতেতি অত্থো. ধম্মদস্সীনরাসভেতি চতুসচ্চধম্মং পস্সতীতি ধম্মদস্সী, অথ ৰা সতিপট্ঠানাদিকে সত্ততিংসবোধিপক্খিযধম্মে দস্সনসীলো পস্সনসীলোতি ধম্মদস্সী, নরানং আসভো পৰরো উত্তমোতি নরাসভো, ধম্মদস্সী চ সো নরাসভো চেতি ধম্মদস্সীনরাসভো, তস্মিং ধম্মদস্সীনরাসভে. আরোপেসিং ধজং থম্ভন্তি চেতিযমাল়কে থম্ভং নিখনিত্ৰা তত্থ ধজং আরোপেসিং বন্ধিত্ৰা ঠপেসিন্তি অত্থো.

৬. নিস্সেণিং মাপযিত্ৰানাতি নিস্সায তং ইণন্তি গচ্ছন্তি আরোহন্তি উপরীতি নিস্সেণি, তং নিস্সেণিং মাপযিত্ৰা কারেত্ৰা বন্ধিত্ৰা থূপসেট্ঠং সমারুহিন্তি সম্বন্ধো. জাতিপুপ্ফং গহেত্ৰানাতি জাযমানমেৰ জনানং সুন্দরং মনং করোতীতি জাতিসুমনং, জাতিসুমনমেৰ পুপ্ফং ‘‘জাতিসুমনপুপ্ফ’’ন্তি ৰত্তব্বে গাথাবন্ধসুখত্থং সুমনসদ্দস্স লোপং কত্ৰা ‘‘জাতিপুপ্ফ’’ন্তি ৰুত্তং, তং জাতিসুমনপুপ্ফং গহেত্ৰা গন্থিত্ৰা থূপম্হি আরোপযিং, আরোপেত্ৰা পূজেসিন্তি অত্থো. সেসং সুৰিঞ্ঞেয্যমেৰাতি.

থম্ভারোপকত্থেরঅপদানৰণ্ণনা সমত্তা.

৩. ৰেদিকারকত্থেরঅপদানৰণ্ণনা

নিব্বুতে লোকনাথম্হীতিআদিকং আযস্মতো ৰেদিকারকত্থেরস্স অপদানং. অযম্পি পুরিমজিনৰরেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পিযদস্সিস্স ভগৰতো কালে ৰিভৰসম্পন্নে একস্মিং কুলে নিব্বত্তো ৰিঞ্ঞুতং পত্ৰা ঘরাৰাসং সণ্ঠপেত্ৰা নিব্বুতে সত্থরি পসন্নো তস্স চেতিযে ৰলযং কারেসি, সত্তহি রতনেহি পরিপূরেত্ৰা মহাপূজং কারেসি. সো তেন পুঞ্ঞেন দেৰমনুস্সেসু সংসরন্তো অনেকেসু জাতিসতসহস্সেসু পূজনীযো মহদ্ধনো মহাভোগো উভযসুখং অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰিভৰসম্পন্নো পব্বজিত্ৰা ৰাযমন্তো নচিরস্সেৰ অরহা অহোসি.

১০. সো একদিৰসং অত্তনো পুব্বে কতকুসলং সরিত্ৰা সোমনস্সজাতো পুব্বচরিতাপদানং পকাসেন্তো নিব্বুতে লোকনাথম্হীতিআদিমাহ. তং হেট্ঠা ৰুত্তত্থমেৰ. পিযদস্সীনরুত্তমেতি পিযং সোমনস্সাকারং দস্সনং যস্স সো পিযদস্সী, আরোহপরিণাহদ্ৰত্তিংসমহাপুরিসলক্খণঅসীতানুব্যঞ্জনব্যামপ্পভামণ্ডলেহি সাধু মহাজনপ্পসাদং জনযনাকারদস্সনোতি অত্থো. নরানং উত্তমোতি নরুত্তমো, পিযদস্সী চ সো নরুত্তমো চেতি পিযদস্সীনরুত্তমো, তস্মিং পিযদস্সীনরুত্তমে নিব্বুতে ধাতুগব্ভম্হি মুত্তৰেদিং অহং অকাসিন্তি সম্বন্ধো. পুপ্ফাধারত্থায পরিযোসানে ৰেদিকাৰলযং অকাসিন্তি অত্থো.

১১. মণীহি পরিৰারেত্ৰাতি মণতি জোততি পভাসতীতি মণি, অথ ৰা জনানং মনং পূরেন্তো সোমনস্সং করোন্তো ইতো গতো পৰত্তোতি মণি, জাতিরঙ্গমণিৰেল়ুরিযমণিআদীহি অনেকেহি মণীহি কতৰেদিকাৰলযং পরিৰারেত্ৰা উত্তমং মহাপূজং অকাসিন্তি অত্থো. সেসং উত্তানত্থমেৰাতি.

ৰেদিকারকত্থেরঅপদানৰণ্ণনা সমত্তা.

৪. সপরিৰারিযত্থেরঅপদানৰণ্ণনা

পদুমুত্তরো নাম জিনোতিআদিকং আযস্মতো সপরিৰারিযত্থেরস্স অপদানং. অযম্পি পুরিমবুদ্ধেসু কতাধিকারো অনেকাসু জাতীসু ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে কুলগেহে নিব্বত্তো ৰিঞ্ঞুতং পত্তো মহদ্ধনো মহাভোগো অহোসি. অথ পদুমুত্তরে ভগৰতি পরিনিব্বুতে মহাজনো তস্স ধাতুং নিদহিত্ৰা মহন্তং চেতিযং কারেত্ৰা পূজেসি. তস্মিং কালে অযং উপাসকো তস্সুপরি চন্দনসারেন চেতিযঘরং করিত্ৰা মহাপূজং অকাসি. সো তেনেৰ পুঞ্ঞেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিমন্ৰায কুসলং কত্ৰা সদ্ধায সাসনে পব্বজিত্ৰা নচিরস্সেৰ অরহা অহোসি.

১৫-৮. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পদুমুত্তরো নাম জিনোতিআদিমাহ. তত্থ ওমত্তন্তি লামকভাৰং নীচভাৰং দুক্খিতভাৰং ৰা ন পস্সামি ন জানামি, ন দিট্ঠপুব্বো মযা নীচভাৰোতি অত্থো. সেসং পাকটমেৰাতি.

সপরিৰারিযত্থেরঅপদানৰণ্ণনা সমত্তা.

৫. উমাপুপ্ফিযত্থেরঅপদানৰণ্ণনা

নিব্বুতে লোকমহিতেতিআদিকং আযস্মতো উমাপুপ্ফিযত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে কুলগেহে নিব্বত্তো ৰুদ্ধিপ্পত্তো ঘরাৰাসং সণ্ঠপেত্ৰা ৰসন্তো নিব্বুতস্স ভগৰতো চেতিযমহে ৰত্তমানে ইন্দনীলমণিৰণ্ণং উমাপুপ্ফং গহেত্ৰা পূজেসি. সো তেন পুঞ্ঞেন সুগতীসুযেৰ সংসরন্তো দিব্বমানুসসম্পত্তিযো অনুভৰিত্ৰা উপ্পন্নুপ্পন্নভৰে বহুলং নীলৰণ্ণো জাতিসম্পন্নো ৰিভৰসম্পন্নো অহোসি. সো ইমস্মিং বুদ্ধুপ্পাদে ৰিভৰসম্পন্নে একস্মিং কুলগেহে নিব্বত্তো ৰিঞ্ঞুতং পত্ৰা সদ্ধাজাতো পব্বজিতো নচিরস্সেৰ অরহত্তং পাপুণি.

২১. সো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো নিব্বুতে লোকমহিতেতিআদি ৰুত্তং. তত্থ লোকমহিতেতি লোকেহি মহিতো পূজিতোতি লোকমহিতো, তস্মিং লোকমহিতে সিদ্ধত্থম্হি ভগৰতি পরিনিব্বুতেতি সম্বন্ধো. আহুতীনংপটিগ্গহেতি আহুতিনো ৰুচ্চন্তি পূজাসক্কারা, তেসং আহুতীনং পটিগ্গহেতুং অরহতীতি আহুতীনংপটিগ্গহো, অলুত্তকিতন্তসমাসো, তস্মিং আহুতীনংপটিগ্গহে ভগৰতি পরিনিব্বুতেতি অত্থো.

২২. উমাপুপ্ফন্তি উদ্ধমুদ্ধং নীলপভং মুঞ্চমানং পুপ্ফতি ৰিকসতীতি উমাপুপ্ফং, তং উমাপুপ্ফং গহেত্ৰা চেতিযে পূজং অকাসিন্তি অত্থো. সেসং উত্তানত্থমেৰাতি.

উমাপুপ্ফিযত্থেরঅপদানৰণ্ণনা সমত্তা.

৬. অনুলেপদাযকত্থেরঅপদানৰণ্ণনা

অনোমদস্সীমুনিনোতিআদিকং আযস্মতো অনুলেপদাযকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অনোমদস্সিস্স ভগৰতো কালে কুলগেহে নিব্বত্তো মহদ্ধনো মহাভোগো তস্স ভগৰতো বোধিরুক্খস্স ৰেদিকাৰলযং কারেত্ৰা সুধাকম্মঞ্চ কারেত্ৰা ৰালুকসন্থরণং দদ্দল়্হমানং রজতৰিমানমিৰ কারেসি. সো তেন পুঞ্ঞেন সুখপ্পত্তো উপ্পন্নুপ্পন্নভৰে রজতৰিমানরজতগেহরজতপাসাদেসু সুখমনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্ৰা সত্থরি পসন্নো পব্বজিত্ৰা ৰিপস্সনমনুযুত্তো নচিরস্সেৰ অরহা অহোসি.

২৬. সো অপরভাগে ‘‘কিং নু খো কুসলং কত্ৰা মযা অযং ৰিসেসো অধিগতো’’তি পুব্বেনিৰাসানুস্সতিঞাণেন পটিপাটিযা অনুস্সরিত্ৰা পুব্বে কতকুসলং জানিত্ৰা সোমনস্সজাতো পুব্বচরিতাপদানং পকাসেন্তো অনোমদস্সীমুনিনোতিআদিমাহ. তত্থ অনোমং অলামকং দস্সনং দস্সনীযং সরীরং যস্স সো অনোমদস্সী, দ্ৰত্তিংসমহাপুরিসলক্খণঅসীতানুব্যঞ্জনব্যামপ্পভাসমুজ্জলৰিরাজিতসরীরত্তা সুন্দরদস্সনোতি অত্থো. সুধায পিণ্ডং দত্ৰানাতি বোধিঘরে ৰেদিকাৰলযং কারেত্ৰা সকলে বোধিঘরে সুধালেপনং কত্ৰাতি অত্থো. পাণিকম্মং অকাসহন্তি সারকট্ঠেন ফলকপাণিযো কত্ৰা তাহি পাণীহি মট্ঠকম্মং অকাসিন্তি অত্থো. সেসং সুৰিঞ্ঞেয্যমেৰাতি.

অনুলেপদাযকত্থেরঅপদানৰণ্ণনা সমত্তা.

৭. মগ্গদাযকত্থেরঅপদানৰণ্ণনা

উত্তরিত্ৰান নদিকন্তিআদিকং আযস্মতো মগ্গদাযকত্থেরস্স অপদানং. অযম্পি পুরিমজিনৰরেসু কতাধিকারো অনেকেসু ভৰেসু নিব্বানাধিগমত্থায পুঞ্ঞানি উপচিনন্তো সিদ্ধত্থস্স ভগৰতো কালে লোকসম্মতে কুলে নিব্বত্তো ৰুদ্ধিমন্ৰায ঘরাৰাসং ৰসন্তো একদিৰসং ভগৰন্তং একং নদিং উত্তরিত্ৰা ৰনন্তরং গচ্ছন্তং দিস্ৰা পসন্নমানসো ‘‘ইদানি মযা ভগৰতো মগ্গং সমং কাতুং ৰট্টতী’’তি চিন্তেত্ৰা কুদালঞ্চ পিটকঞ্চ আদায ভগৰতো গমনমগ্গং সমং কত্ৰা ৰালুকং ওকিরিত্ৰা ভগৰতো পাদে ৰন্দিত্ৰা, ‘‘ভন্তে, ইমিনা মগ্গালঙ্কারকরণেন নিব্বত্তনিব্বত্তট্ঠানে পূজনীযো ভৰেয্যং, নিব্বানঞ্চ পাপুণেয্য’’ন্তি পত্থনং অকাসি. ভগৰা ‘‘যথাধিপ্পাযং সমিজ্ঝতূ’’তি অনুমোদনং ৰত্ৰা পক্কামি.

৩২-৩. সো তেন পুঞ্ঞেন দেৰমনুস্সেসু সংসরন্তো সব্বত্থ পূজিতো অহোসি. ইমস্মিং পন বুদ্ধুপ্পাদে পাকটে একস্মিং কুলে নিব্বত্তো সত্থরি পসন্নো পব্বজিত্ৰা ৰিপস্সনং ৰড্ঢেত্ৰা নচিরস্সেৰ অরহত্তং পত্ৰা অত্তনো পুব্বকম্মং পচ্চক্খতো ঞত্ৰা সোমনস্সজাতো পুব্বচরিতাপদানং পকাসেন্তো উত্তরিত্ৰান নদিকন্তিআদিমাহ. তত্থ নদতি সদ্দং করোতি গচ্ছতীতি নদী, নদীযেৰ নদিকা, তং নদিকং উত্তরিত্ৰা অতিক্কমিত্ৰাতি অত্থো. কুদালপিটকমাদাযাতি কু ৰুচ্চতি পথৰী, তং ৰিদালনে পদালনে ছিন্দনে অলন্তি কুদালং, পিটকং ৰুচ্চতি পংসুৰালিকাদিৰাহকং, তালপণ্ণৰেত্তলতাদীহি কতভাজনং, কুদালঞ্চ পিটকঞ্চ কুদালপিটকং, তং আদায গহেত্ৰাতি অত্থো. সেসং উত্তানত্থমেৰাতি.

মগ্গদাযকত্থেরঅপদানৰণ্ণনা সমত্তা.

৮. ফলকদাযকত্থেরঅপদানৰণ্ণনা

যানকারো পুরে আসিন্তিআদিকং আযস্মতো ফলকদাযকত্থেরস্স অপদানং. অযম্পি পুরিমবুদ্ধেসু কতাধিকারো অনেকেসু অত্তভাৰেসু কতপুঞ্ঞসম্ভারো সিদ্ধত্থস্স ভগৰতো কালে ৰড্ঢকিকুলে নিব্বত্তো রতনত্তযে পসন্নো চন্দনেন আলম্বনফলকং কত্ৰা ভগৰতো অদাসি. ভগৰা তস্সানুমোদনং অকাসি.

৩৭. সো তেন পুঞ্ঞেন দেৰমনুস্সেসু সংসরন্তো সব্বত্থ কালে চিত্তসুখপীণিতো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্ৰা সত্থু ধম্মদেসনং সুত্ৰা সঞ্জাতপ্পসাদো পব্বজিত্ৰা ৰাযমন্তো নচিরস্সেৰ সহ পটিসম্ভিদাহি অরহত্তং পত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো যানকারো পুরে আসিন্তিআদিমাহ. তত্থ যানকারোতি যন্তি এতেন ইচ্ছিতিচ্ছিতট্ঠানন্তি যানং, তং করোতীতি যানকারো, পুরে বুদ্ধদস্সনসমযে অহং যানকারো আসিং অহোসিন্তি অত্থো. চন্দনং ফলকং কত্ৰাতি চন্দতি পরিল়াহং ৰূপসমেতীতি চন্দনং. অথ ৰা চন্দন্তি সুগন্ধৰাসনত্থং সরীরং ৰিলিম্পন্তি এতেনাতি চন্দনং, তং আলম্বনফলকং কত্ৰা. লোকবন্ধুনোতি সকললোকস্স বন্ধু ঞাতিভূতোতি লোকবন্ধু, তস্স লোকবন্ধুনো সত্থুস্স অদাসিন্তি অত্থো. সেসং সুৰিঞ্ঞেয্যমেৰাতি.

ফলকদাযকত্থেরঅপদানৰণ্ণনা সমত্তা.

৯. ৰটংসকিযত্থেরঅপদানৰণ্ণনা

সুমেধো নাম নামেনাতিআদিকং আযস্মতো ৰটংসকিযত্থেরস্স অপদানং. অযম্পি পুরিমমুনিন্দেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সুমেধস্স ভগৰতো কালে কুলগেহে নিব্বত্তো ৰিঞ্ঞুতং পত্তো ঘরাৰাসং সণ্ঠপেত্ৰা তত্থ আদীনৰং দিস্ৰা গেহং পহায তাপসপব্বজ্জং পব্বজিত্ৰা মহাৰনে ৰিহাসি. তস্মিং সমযে সুমেধো ভগৰা ৰিৰেককামতায তং ৰনং সম্পাপুণি. অথ সো তাপসো ভগৰন্তং দিস্ৰা পসন্নমানসো ৰিকসিতং সল়লপুপ্ফং গহেত্ৰা ৰটংসকাকারেন গন্থেত্ৰা ভগৰতো পাদমূলে ঠপেত্ৰা পূজেসি. ভগৰা তস্স চিত্তপ্পসাদত্থায অনুমোদনমকাসি. সো তেন পুঞ্ঞেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে ৰিভৰসম্পন্নে কুলে জাতো ৰুদ্ধিমন্ৰায সদ্ধো পসন্নো পব্বজিত্ৰা নচিরস্সেৰ অরহা অহোসি.

৪৩. সো অপরভাগে পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো সুমেধো নাম নামেনাতিআদি ৰুত্তং. ৰিৰেকমনুব্রূহন্তোতি জনাকিণ্ণতং পহায জনৰিৰেকং চিত্তৰিৰেকঞ্চ অনুব্রূহন্তো ৰড্ঢেন্তো বহুলীকরোন্তো মহাৰনং অজ্ঝোগাহি পাৰিসীতি অত্থো. সেসং উত্তানত্থমেৰাতি.

ৰটংসকিযত্থেরঅপদানৰণ্ণনা সমত্তা.

১০. পল্লঙ্কদাযকত্থেরঅপদানৰণ্ণনা

সুমেধস্স ভগৰতোতিআদিকং আযস্মতো পল্লঙ্কদাযকত্থেরস্স অপদানং. অযম্পি পুরিমবুদ্ধেসু কতাধিকারো অনেকেসু ভৰেসু নিব্বানাধিগমত্থায কতপুঞ্ঞূপচযো সুমেধস্স ভগৰতো কালে গহপতিকুলে নিব্বত্তো ৰুদ্ধিমন্ৰায মহাভোগসম্পন্নো সত্থরি পসীদিত্ৰা ধম্মং সুত্ৰা তস্স সত্থুনো সত্তরতনমযং পল্লঙ্কং কারেত্ৰা মহন্তং পূজং অকাসি. সো তেন পুঞ্ঞেন দেৰমনুস্সেসু সংসরন্তো সব্বত্থ পূজিতো অহোসি. সো অনুক্কমেন ইমস্মিং বুদ্ধুপ্পাদে ৰিভৰসম্পন্নে একস্মিং কুলে নিব্বত্তো ৰিঞ্ঞুতং পত্তো ঘরাৰাসং সণ্ঠপেত্ৰা সত্থু ধম্মদেসনং সুত্ৰা পসন্নো পব্বজিত্ৰা নচিরস্সেৰ অরহত্তং পত্ৰা পুব্বে কতপুঞ্ঞনামেন পল্লঙ্কদাযকত্থেরোতি পাকটো অহোসি. হেট্ঠা ৰিয উপরিপি পুব্বে কতপুঞ্ঞনামেন থেরানং নামানি এৰমেৰ ৰেদিতব্বানি.

৪৭. সো একদিৰসং অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো সুমেধস্স ভগৰতোতিআদিমাহ. পল্লঙ্কো হি মযা দিন্নোতি পল্লঙ্কং ঊরুবদ্ধাসনং কত্ৰা যত্থ উপৰীসন্তি নিসীদন্তি, সো পল্লঙ্কোতি ৰুচ্চতি, সো পল্লঙ্কো সত্তরতনমযো মযা দিন্নো পূজিতোতি অত্থো. সউত্তরসপচ্ছদোতি সহ উত্তরচ্ছদেন সহ পচ্ছদেন সউত্তরসপচ্ছদো, উপরিৰিতানং বন্ধিত্ৰা আসনং উত্তমৰত্থেহি অচ্ছাদেত্ৰাতি অত্থো. সেসং পাকটমেৰাতি.

পল্লঙ্কদাযকত্থেরঅপদানৰণ্ণনা সমত্তা.

পন্নরসমৰগ্গৰণ্ণনা সমত্তা.