১০. পদুমপূজকত্থেরঅপদানৰণ্ণনা

হিমৰন্তস্সাৰিদূরেতিআদিকং আযস্মতো পদুমপূজকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে ব্রাহ্মণকুলে নিব্বত্তো ৰিঞ্ঞুতং পত্ৰা সকসিপ্পে নিপ্ফত্তিং পত্ৰা তত্থ সারং অপস্সন্তো বুদ্ধুপ্পত্তিতো পুরেতরং উপ্পন্নত্তা ওৰাদানুসাসনং অলভিত্ৰা ঘরাৰাসং পহায ইসিপব্বজ্জং পব্বজিত্ৰা হিমৰন্তস্স অৰিদূরে গোতমকং নাম পব্বতং নিস্সায অস্সমং কারেত্ৰা পঞ্চাভিঞ্ঞা অট্ঠ সমাপত্তিযো নিব্বত্তেত্ৰা ঝানসুখেনেৰ ৰিহাসি. তদা পদুমুত্তরো ভগৰা বুদ্ধো হুত্ৰা সত্তে সংসারতো উদ্ধরন্তো তস্সানুকম্পায হিমৰন্তং অগমাসি. তাপসো ভগৰন্তং দিস্ৰা পসন্নমানসো সকসিস্সে সমানেত্ৰা তেহি পদুমপুপ্ফানি আহরাপেত্ৰা পূজেসি. সো তেন পুঞ্ঞেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে সাৰত্থিযং কুলগেহে নিব্বত্তো সদ্ধো পসন্নো পব্বজিত্ৰা নচিরস্সেৰ অরহা অহোসি.

৯৭. সো অত্তনো পুঞ্ঞকম্মং সরিত্ৰা সোমনস্সজাতো পুব্বচরিতাপদানং পকাসেন্তো হিমৰন্তস্সাৰিদূরেতিআদিমাহ. গোতমো নাম পব্বতোতি অনেকেসং যক্খদেৰতানং আৰাসভাৰেন অধিট্ঠানৰসেন গোতমস্স ভৰনত্তা গোতমোতি পাকটো অহোসি. পৰত্ততি তিট্ঠতীতি পব্বতো. নাগরুক্খেহি সঞ্ছন্নোতি রুহতি তিট্ঠতীতি রুক্খো. অথ ৰা পথৰিং খনন্তো উদ্ধং রুহতীতি রুক্খো, নানা অনেকপ্পকারা চম্পককপ্পূরনাগঅগরুচন্দনাদযো রুক্খাতি নানারুক্খা, তেহি নানারুক্খেহি সঞ্ছন্নো পরিকিণ্ণো গোতমো পব্বতোতি সম্বন্ধো. মহাভূতগণালযোতি ভৰন্তি জাযন্তি উপ্পজ্জন্তি ৰড্ঢন্তি চাতি ভূতা, মহন্তা চ তে ভূতা চাতি মহাভূতা, মহাভূতানং গণো সমূহোতি মহাভূতগণো, মহাভূতগণস্স আলযো পতিট্ঠাতি মহাভূতগণালযো.

৯৮. ৰেমজ্ঝম্হি চ তস্সাসীতি তস্স গোতমস্স পব্বতস্স ৰেমজ্ঝে অব্ভন্তরে অস্সমো অভিনিম্মিতো নিপ্ফাদিতো কতোতি অত্থো. সেসং উত্তানমেৰাতি.

পদুমপূজকত্থেরঅপদানৰণ্ণনা সমত্তা.

তেরসমৰগ্গৰণ্ণনা সমত্তা.