৮. মগ্গসঞ্ঞকত্থেরঅপদানৰণ্ণনা

পদুমুত্তরবুদ্ধস্সাতিআদিকং আযস্মতো মগ্গসঞ্ঞকত্থেরস্স অপদানং. অযম্পি পুরিমবুদ্ধেসু কতাধিকারো ততো ওরং তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে হিমৰন্তে দেৰপুত্তো হুত্ৰা নিব্বত্তো অরঞ্ঞং গন্ত্ৰা মগ্গমূল়্হানং মগ্গং গৰেসন্তানং তস্স সাৰকানং ভোজেত্ৰা মগ্গং আচিক্খি. সো তেন পুঞ্ঞেন দেৰমনুস্সসম্পত্তিমনুভৰিত্ৰা উপ্পন্নুপ্পন্নভৰে সব্বত্থ অমূল়্হো সঞ্ঞৰা অহোসি. অথ ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো ঘরাৰাসে অনল্লীনো পব্বজিত্ৰা নচিরস্সেৰ অরহা অহোসি.

৬৬. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পদুমুত্তরবুদ্ধস্সাতিআদিমাহ. সাৰকা ৰনচারিনোতি ভগৰতো ৰুত্তৰচনং সম্মা আদরেন সুণন্তীতি সাৰকা, অথ ৰা ভগৰতো দেসনানুসারেন ঞাণং পেসেত্ৰা সদ্ধম্মং সুণন্তীতি সাৰকা. ৰনচারিনো ৰনে ৰিচরণকা সাৰকা ৰিপ্পনট্ঠা মগ্গমূল়্হা মহাঅরঞ্ঞে অন্ধাৰ চক্খুৰিরহিতাৰ অনুসুয্যরে ৰিচরন্তীতি সম্বন্ধো. সেসং সব্বত্থ উত্তানমেৰাতি.

মগ্গসঞ্ঞকত্থেরঅপদানৰণ্ণনা সমত্তা.