৮. আসনুপট্ঠাহকত্থেরঅপদানৰণ্ণনা

কাননং ৰনমোগ্গয্হাতিআদিকং আযস্মতো আসনুপট্ঠাহকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অত্থদস্সিস্স ভগৰতো কালে কুলগেহে নিব্বত্তো ঘরাৰাসং ৰসন্তো তত্থ দোসং দিস্ৰা ঘরাৰাসং পহায তাপসপব্বজ্জং পব্বজিত্ৰা হিমৰন্তে ৰসন্তো তত্থ সম্পত্তং ভগৰন্তং দিস্ৰা পসন্নো সীহাসনং অদাসি, তত্থ নিসিন্নং ভগৰন্তং মালাকলাপং গহেত্ৰা পূজেত্ৰা তং পদক্খিণং কত্ৰা পক্কামি. সো তেন পুঞ্ঞেন দেৰমনুস্সেসু সংসরন্তো নিব্বত্তনিব্বত্তভৰে উচ্চকুলিকো ৰিভৰসম্পন্নো অহোসি. সো কালন্তরেন ইমস্মিং বুদ্ধুপ্পাদে কুলগেহে নিব্বত্তো ৰুদ্ধিমন্ৰায সত্থরি পসীদিত্ৰা পব্বজিতো নচিরস্সেৰ অরহা অহোসি.

৪৭. সো অরহা সমানো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো কাননং ৰনমোগ্গয্হাতিআদিমাহ. তং সব্বং হেট্ঠা ৰুত্তত্থমেৰাতি.

আসনুপট্ঠাহকত্থেরঅপদানৰণ্ণনা সমত্তা.