৩-১০. আনন্দত্থেরঅপদানৰণ্ণনা
আরামদ্ৰারা নিক্খম্মাতিআদিকং আযস্মতো আনন্দত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে হংসৰতীনগরে সত্থু ৰেমাতিকভাতা হুত্ৰা নিব্বত্তি. সুমনোতিস্স নামং অহোসি. পিতা পনস্স নন্দরাজা নাম. সো অত্তনো পুত্তস্স সুমনকুমারস্স ৰযপ্পত্তস্স হংসৰতীনগরতো ৰীসযোজনসতে ঠানে ভোগনগরং অদাসি. সো কদাচি কদাচি আগন্ত্ৰা সত্থারঞ্চ পিতরঞ্চ পস্সতি. তদা রাজা সত্থারঞ্চ সতসহস্সপরিমাণং ভিক্খুসঙ্ঘঞ্চ সযমেৰ সক্কচ্চং উপট্ঠহি, অঞ্ঞেসং উপট্ঠাতুং ন দেতি.
তেন সমযেন পচ্চন্তো কুপিতো অহোসি. কুমারো তস্স কুপিতভাৰং রঞ্ঞো অনারোচেত্ৰা সযমেৰ তং ৰূপসমেসি. তং সুত্ৰা রাজা তুট্ঠমানসো ‘‘ৰরং তে তাৰ দম্মি, গণ্হাহী’’তি আহ. কুমারো ‘‘সত্থারং ভিক্খুসঙ্ঘঞ্চ তেমাসং উপট্ঠহন্তো জীৰিতং অৰঞ্ঝং কাতুং ইচ্ছামী’’তি আহ. ‘‘এতং ন সক্কা, অঞ্ঞং ৰদেহী’’তি. ‘‘দেৰ, খত্তিযানং দ্ৰে কথা নাম নত্থি, এতং মে দেহি, ন ময্হং অঞ্ঞেনত্থো, সচে সত্থা অনুজানাতি, দিন্নমেৰা’’তি. সো ‘‘সত্থু চিত্তং জানিস্সামী’’তি ৰিহারং গতো. তেন চ সমযেন ভগৰা গন্ধকুটিং পৰিট্ঠো হোতি. সো ভিক্খূ উপসঙ্কমিত্ৰা ‘‘অহং, ভন্তে, ভগৰন্তং দস্সনায আগতো, দস্সেথ ম’’ন্তি. ভিক্খূ ‘‘সুমনো নাম থেরো সত্থু উপট্ঠাকো, তস্স সন্তিকং গচ্ছাহী’’তি আহংসু. সো থেরস্স সন্তিকং গন্ত্ৰা ‘‘সত্থারং, ভন্তে, দস্সেথা’’তি আহ. অথ থেরো তস্স পস্সন্তস্সেৰ পথৰিযং নিমুজ্জিত্ৰা ভগৰন্তং উপসঙ্কমিত্ৰা ‘‘রাজপুত্তো, ভন্তে, তুম্হাকং দস্সনায আগতো’’তি আহ. ‘‘তেন হি ভিক্খু বহি আসনং পঞ্ঞপেহী’’তি. থেরো পুনপি বুদ্ধাসনং গহেত্ৰা অন্তোগন্ধকুটিযং নিমুজ্জিত্ৰা তস্স পস্সন্তস্স বহিপরিৰেণে পাতুভৰিত্ৰা গন্ধকুটিপরিৰেণে আসনং পঞ্ঞাপেসি. কুমারো তং দিস্ৰা ‘‘মহন্তো ৰতাযং ভিক্খূ’’তি চিত্তং উপ্পাদেসি.
ভগৰাপি গন্ধকুটিতো নিক্খমিত্ৰা পঞ্ঞত্তাসনে নিসীদি. রাজপুত্তো সত্থারং ৰন্দিত্ৰা পটিসন্থারং কত্ৰা ‘‘অযং, ভন্তে, থেরো তুম্হাকং সাসনে ৰল্লভো মঞ্ঞে’’তি? ‘‘আম, কুমার, ৰল্লভো’’তি. ‘‘কিং কত্ৰা, ভন্তে, এস ৰল্লভো’’তি? ‘‘দানাদীনি পুঞ্ঞানি কত্ৰা’’তি. ‘‘ভগৰা, অহম্পি অযং থেরো ৰিয অনাগতে বুদ্ধসাসনে ৰল্লভো হোতুকামো’’তি সো বুদ্ধপ্পমুখস্স সঙ্ঘস্স সত্তাহং খন্ধাৰারে ভত্তং দত্ৰা সত্তমে দিৰসে, ‘‘ভন্তে, মযা পিতু সন্তিকা তুম্হাকং তেমাসং পটিজগ্গনৰরো লদ্ধো, তেমাসং মে ৰস্সাৰাসং অধিৰাসেথা’’তি ৰত্ৰা সত্থু অধিৰাসনং ৰিদিত্ৰা সপরিৰারং ভগৰন্তং গহেত্ৰা যোজনে যোজনে সত্থু ভিক্খুসঙ্ঘস্স চ ৰসনানুচ্ছৰিকে ৰিহারে কারেত্ৰা তত্থ তত্থ ৰসাপেন্তো অত্তনো ৰসনট্ঠানসমীপে সতসহস্সেন কীতে সোভননামকে উয্যানে সতসহস্সেন কারিতং ৰিহারং পৰেসাপেত্ৰা –
‘‘সতসহস্সেন মে কীতং, সতসহস্সেন কারিতং;
সোভনং নাম উয্যানং, পটিগ্গণ্হ মহামুনী’’তি. –
উদকং পাতেসি. সো ৰস্সূপনাযিকদিৰসে সত্থু মহাদানং পৰত্তেত্ৰা ‘‘ইমিনা নীহারেন দানং দদেয্যাথা’’তি পুত্তদারে অমচ্চে চ দানে কিচ্চকরণে চ নিযোজেত্ৰা সযং সুমনত্থেরস্স ৰসনট্ঠানসমীপেযেৰ ৰসন্তো এৰং অত্তনো ৰসনট্ঠানে সত্থারং তেমাসং উপট্ঠহি. উপকট্ঠায পন পৰারণায গামং পৰিসিত্ৰা সত্তাহং মহাদানং পৰত্তেত্ৰা সত্তমে দিৰসে সত্থু ভিক্খুসঙ্ঘস্স চ পাদমূলে তিচীৰরে ঠপেত্ৰা ৰন্দিত্ৰা ‘‘ভন্তে, যদেতং মযা খন্ধাৰারতো পট্ঠায পুঞ্ঞং কতং, ন তং সক্কসম্পত্তিআদীনং অত্থায কতং, অথ খো অহম্পি সুমনত্থেরো ৰিয অনাগতে একস্স বুদ্ধস্স উপট্ঠাকো ৰল্লভো ভৰেয্য’’ন্তি পত্থনং অকাসি. সত্থা তস্স অনন্তরাযতং দিস্ৰা ব্যাকরিত্ৰা পক্কামি.
সো তস্মিং বুদ্ধুপ্পাদে ৰস্সসতসহস্সং পুঞ্ঞানি কত্ৰা ততো পরম্পি তত্থ তত্থ ভৰে উল়ারানি পুঞ্ঞকম্মানি উপচিনিত্ৰা দেৰমনুস্সেসু সংসরন্তো কস্সপভগৰতো কালে কুলগেহে নিব্বত্তো ৰিঞ্ঞুতং পত্ৰা একস্স থেরস্স পিণ্ডায চরতো পত্তগ্গহণত্থং উত্তরসাটকং কত্ৰা পূজং অকাসি. পুন সগ্গে নিব্বত্তিত্ৰা ততো চুতো বারাণসিরাজা হুত্ৰা অট্ঠ পচ্চেকবুদ্ধে দিস্ৰা তে ভোজেত্ৰা অত্তনো মঙ্গলুয্যানে অট্ঠ পণ্ণসালাযো কারেত্ৰা তেসং নিসীদনত্থায অট্ঠ সব্বরতনমযপীঠে চেৰ মণিআধারকে চ পটিযাদেত্ৰা দসৰস্সসহস্সানি উপট্ঠানং অকাসি, এতানি পাকটানি.
কপ্পসতসহস্সং পন তত্থ তত্থ ভৰে পুঞ্ঞানি উপচিনন্তো অম্হাকং বোধিসত্তেন সদ্ধিং তুসিতপুরে নিব্বত্তিত্ৰা ততো চুতো অমিতোদনসক্কস্স গেহে নিব্বত্তিত্ৰা সব্বে ঞাতকে আনন্দিতে করোন্তো জাতোতি আনন্দোত্ৰেৰ নামং লভি. সো অনুক্কমেন ৰযপ্পত্তো কতাভিনিক্খমনে সম্মাসম্বোধিং পত্ৰা পৰত্তিতৰরধম্মচক্কে পঠমং কপিলৰত্থুং গন্ত্ৰা ততো নিক্খমন্তে ভগৰতি তস্স পরিৰারত্থং পব্বজিতুং নিক্খমন্তেহি ভদ্দিযাদীহি সদ্ধিং নিক্খমিত্ৰা ভগৰতো সন্তিকে পব্বজিত্ৰা আযস্মতো পুণ্ণস্স মন্তাণিপুত্তস্স সন্তিকে ধম্মকথং সুত্ৰা সোতাপত্তিফলে পতিট্ঠহি.
তেন চ সমযেন ভগৰতো পঠমবোধিযং ৰীসতিৰস্সানি অনিবদ্ধা উপট্ঠাকা অহেসুং. একদা নাগসমালো পত্তচীৰরং গহেত্ৰা ৰিচরতি, একদা নাগিতো, একদা উপৰানো, একদা সুনক্খত্তো, একদা চুন্দো সমণুদ্দেসো, একদা সাগতো, একদা মেঘিযো, তে যেভুয্যেন সত্থু চিত্তং নারাধযিংসু. অথেকদিৰসং ভগৰা গন্ধকুটিপরিৰেণে পঞ্ঞত্তৰরবুদ্ধাসনে ভিক্খুসঙ্ঘপরিৰুতো নিসিন্নো ভিক্খূ আমন্তেসি – ‘‘অহং, ভিক্খৰে, ইদানি মহল্লকো একচ্চে ভিক্খূ ‘ইমিনা মগ্গেন গচ্ছামী’তি ৰুত্তে অঞ্ঞেন মগ্গেন গচ্ছন্তি, একচ্চে ময্হং পত্তচীৰরং ভূমিযং নিক্খিপন্তি, ময্হং নিবদ্ধুপট্ঠাকং একং ভিক্খুং ৰিজানথা’’তি. তং সুত্ৰা ভিক্খূনং ধম্মসংৰেগো উদপাদি. অথাযস্মা সারিপুত্তো উট্ঠায ভগৰন্তং ৰন্দিত্ৰা ‘‘অহং, ভন্তে, তুম্হে উপট্ঠহিস্সামী’’তি আহ. তং ভগৰা পটিক্খিপি. এতেনুপাযেন মহামোগ্গল্লানং আদিং কত্ৰা সব্বে মহাসাৰকা ‘‘অহং উপট্ঠহিস্সামি, অহং উপট্ঠহিস্সামী’’তি উট্ঠহিংসু ঠপেত্ৰা আযস্মন্তং আনন্দং. তেপি ভগৰা পটিক্খিপি.
আনন্দো পন তুণ্হীযেৰ নিসীদি. অথ নং ভিক্খূ আহংসু – ‘‘আৰুসো, ত্ৰম্পি সত্থু উপট্ঠাকট্ঠানং যাচাহী’’তি. ‘‘যাচিত্ৰা লদ্ধুপট্ঠানং নাম কীদিসং হোতি? সচে রুচ্চতি, সত্থা সযমেৰ ৰক্খতী’’তি. অথ ভগৰা – ‘‘ন, ভিক্খৰে, আনন্দো অঞ্ঞেহি উস্সাহেতব্বো, সযমেৰ জানিত্ৰা মং উপট্ঠহিস্সতী’’তি আহ. ততো ভিক্খূ ‘‘উট্ঠেহি, আৰুসো আনন্দ, সত্থারং উপট্ঠাকট্ঠানং যাচাহী’’তি আহংসু. থেরো উট্ঠহিত্ৰা ‘‘সচে মে, ভন্তে, ভগৰা অত্তনা লদ্ধং পণীতং চীৰরং ন দস্সতি, পণীতং পিণ্ডপাতং ন দস্সতি, একগন্ধকুটিযং ৰসিতুং ন দস্সতি, নিমন্তনং গহেত্ৰা ন গমিস্সতি, এৰাহং ভগৰন্তং উপট্ঠহিস্সামী’’তি আহ. ‘‘এত্তকে গুণে লভতো সত্থু উপট্ঠানং কো ভারো’’তি উপৰাদমোচনত্থং ইমে চত্তারো পটিক্খেপা, ‘‘সচে, ভন্তে, ভগৰা মযা গহিতং নিমন্তনং গমিস্সতি, সচাহং দেসন্তরতো আগতাগতে তাৰদেৰ দস্সেতুং লভামি, যদা মে কঙ্খা উপ্পজ্জতি, তাৰদেৰ ভগৰন্তং উপসঙ্কমিত্ৰা পুচ্ছিতুং লভামি, সচে ভগৰা পরম্মুখা দেসিতং ধম্মং পুন ময্হং ব্যাকরিস্সসি, এৰাহং ভগৰন্তং উপট্ঠহিস্সামি’’. ‘‘এত্তকম্পি সত্থু সন্তিকে অনুগ্গহং ন লভতী’’তি উপৰাদমোচনত্থঞ্চেৰ ধম্মভণ্ডাগারিকভাৰপরিপূরণত্থঞ্চ ইমা চতস্সো যাচনাতি ইমে অট্ঠ ৰরে গহেত্ৰা নিবদ্ধুপট্ঠাকো অহোসি. তস্সেৰ ঠানন্তরস্স অত্থায কপ্পসতসহস্সং পূরিতানং পারমীনং ফলং পাপুণি.
সো উপট্ঠাকট্ঠানং লদ্ধদিৰসতো পট্ঠায দসবলং দুৰিধেন উদকেন তিৰিধেন দন্তকট্ঠেন হত্থপাদপরিকম্মেন পিট্ঠিপরিকম্মেন গন্ধকুটিপরিৰেণসম্মজ্জনেনাতি এৰমাদীহি কিচ্চেহি উপট্ঠহন্তো – ‘‘ইমায নাম ৰেলায সত্থু ইদং নাম লদ্ধুং ৰট্টতি, ইদং নাম কাতুং ৰট্টতী’’তি দিৰসভাগং সন্তিকাৰচরো হুত্ৰা রত্তিভাগে মহন্তং দণ্ডদীপিকং গহেত্ৰা গন্ধকুটিপরিৰেণং নৰৰারে অনুপরিযাযতি সত্থরি পক্কোসন্তে পটিৰচনদানায, থিনমিদ্ধৰিনোদনত্থং. অথ নং সত্থা জেতৰনে অরিযগণমজ্ঝে নিসিন্নো অনেকপরিযাযেন পসংসিত্ৰা বহুস্সুতানং সতিমন্তানং গতিমন্তানং ধিতিমন্তানং উপট্ঠাকানঞ্চ ভিক্খূনং অগ্গট্ঠানে ঠপেসি.
এৰং সত্থারা পঞ্চসু ঠানেসু এতদগ্গে ঠপিতো চতূহি অচ্ছরিযব্ভূতধম্মেহি সমন্নাগতো সত্থু ধম্মকোসারক্খো অযং মহাথেরো সেখোৰ সমানো সত্থরি পরিনিব্বুতে হেট্ঠা ৰুত্তনযেন ভিক্খূহি সমুত্তেজিতো দেৰতায চ সংৰেজিতো ‘‘স্ৰেযেৰ চ দানি ধম্মসঙ্গীতি কাতব্বা, ন খো পন মেতং পতিরূপং, য্ৰাযং সেখো সকরণীযো অসেখেহি থেরেহি সদ্ধিং ধম্মং গাযিতুং সন্নিপাতং গন্তু’’ন্তি সঞ্জাতুস্সাহো ৰিপস্সনং পট্ঠপেত্ৰা বহুদেৰ রত্তিং ৰিপস্সনায কম্মং করোন্তো চঙ্কমে ৰীরিযসমতং অলভিত্ৰা ততো ৰিহারং পৰিসিত্ৰা সযনে নিসীদিত্ৰা সযিতুকামো কাযং আৰট্টেসি. অপত্তঞ্চ সীসং বিম্বোহনং, পাদা চ ভূমিতো মুত্তমত্তা, একস্মিং অন্তরে অনুপাদায আসৰেহি চিত্তং ৰিমুচ্চি, ছল়ভিঞ্ঞো অহোসি.
৬৪৪. এৰং ছল়ভিঞ্ঞাদিগুণপটিমণ্ডিতো উপট্ঠাকাদিগুণেহি এতদগ্গট্ঠানং পত্তো অত্তনো পুব্বকম্মং সরিত্ৰা সোমনস্সৰসেন পুব্বচরিতাপদানং দস্সেন্তো আরামদ্ৰারা নিক্খম্মাতিআদিমাহ. তত্থ আরামদ্ৰারাতি সব্বসত্তানং ধম্মদেসনত্থায ৰিহারদ্ৰারতো নিক্খমিত্ৰা বহিদ্ৰারসমীপে কতমণ্ডপমজ্ঝে সুপঞ্ঞত্তৰরবুদ্ধাসনে নিসিন্নো পদুমুত্তরো নাম মহামুনি সম্মাসম্বুদ্ধো. ৰস্সন্তো অমতং ৰুট্ঠিন্তি ধম্মদেসনামহাঅমতধারাহি ধম্মৰস্সং ৰস্সন্তো. নিব্বাপেসি মহাজনন্তি মহাজনস্স চিত্তসন্তানগতকিলেসগ্গিং নিব্বাপেসি ৰূপসমেসি, মহাজনং নিব্বানামতপানেন সন্তিং সীতিভাৰং পাপেসীতি অত্থো.
৬৪৫. সতসহস্সং তে ধীরাতি পরিৰারসম্পত্তিং দস্সেন্তো আহ. ছহি অভিঞ্ঞাহি ইদ্ধিৰিধাদিঞাণকোট্ঠাসেহি সমন্নাগতা অনেকসতসহস্সচক্কৰাল়েসু খণেন গন্তুং সমত্থাহি ইদ্ধীহি সমন্নাগতত্তা মহিদ্ধিকাতে ধীরা সতসহস্সখীণাসৰা ছাযাৰ অনপাযিনীতি কত্থচি অনপগতা ছাযা ইৰ তং সম্বুদ্ধং পদুমুত্তরং ভগৰন্তং পরিৰারেন্তি পরিৰারেত্ৰা ধম্মং সুণন্তীতি অত্থো.
৬৪৬. হত্থিক্খন্ধগতো আসিন্তি তদা ভগৰতো ধম্মদেসনাসমযে অহং হত্থিপিট্ঠে নিসিন্নো আসিং অহোসিন্তি অত্থো. সেতচ্ছত্তং ৰরুত্তমন্তি পত্থেতব্বং উত্তমং সেতচ্ছত্তং মম মত্থকে ধারযন্তো হত্থিপিট্ঠে নিসিন্নোতি সম্বন্ধো. সুচারুরূপং দিস্ৰানাতি সুন্দরং চারুং মনোহররূপৰন্তং ধম্মং দেসিযমানং সম্বুদ্ধং দিস্ৰা মে ময্হং ৰিত্তি সন্তুট্ঠি সোমনস্সং উদপজ্জথ উপ্পজ্জতীতি অত্থো.
৬৪৭. ওরুয্হ হত্থিক্খন্ধম্হাতি তং ভগৰন্তং নিসিন্নং দিস্ৰা হত্থিপিট্ঠিতো ওরুয্হ ওরোহিত্ৰা নরাসভং নরৰসভং উপগচ্ছিং সমীপং গতোতি অত্থো. রতনমযছত্তং মেতি রতনভূসিতং মে ময্হং ছত্তং বুদ্ধসেট্ঠস্স মত্থকে ধারযিন্তি সম্বন্ধো.
৬৪৮. মম সঙ্কপ্পমঞ্ঞাযাতি ময্হং পসাদেন উপ্পন্নং সঙ্কপ্পং ঞত্ৰা ইসীনং অন্তরে মহন্তভূতো সো পদুমুত্তরো ভগৰা. তং কথং ঠপযিত্ৰানাতি তং অত্তনা দেসিযমানং ধম্মকথং ঠপেত্ৰা মম ব্যাকরণত্থায ইমা গাথা অভাসথ কথেসীতি অত্থো.
৬৪৯. কথন্তি চে? যো সোতিআদিমাহ. সোণ্ণালঙ্কারভূসিতং ছত্তং যো সো রাজকুমারো মে মত্থকে ধারেসীতি সম্বন্ধো. তমহং কিত্তযিস্সামীতি তং রাজকুমারং অহং কিত্তযিস্সামি পাকটং করিস্সামি. সুণোথ মম ভাসতোতি ভাসন্তস্স মম ৰচনং সুণোথ ওহিতসোতা মনসি করোথাতি অত্থো.
৬৫০. ইতো গন্ত্ৰা অযং পোসোতি অযং রাজকুমারো ইতো মনুস্সলোকতো চুতো তুসিতং গন্ত্ৰা আৰসিস্সতি তত্থ ৰিহরিস্সতি. তত্থ অচ্ছরাহি পুরক্খতো পরিৰারিতো তুসিতভৰনসম্পত্তিং অনুভোস্সতীতি সম্বন্ধো.
৬৫১. চতুত্তিংসক্খত্তুন্তি তুসিতভৰনতো চৰিত্ৰা তাৰতিংসভৰনে উপ্পন্নো চতুত্তিংসৰারে দেৰিন্দো দেৰরজ্জং করিস্সতীতি সম্বন্ধো. বলাধিপো অট্ঠসতন্তি তাৰতিংসভৰনতো চুতো মনুস্সলোকে উপ্পন্নো বলাধিপো চতুরঙ্গিনিযা সেনায অধিপো পধানো অট্ঠসতজাতীসু পদেসরাজা হুত্ৰা ৰসুধং অনেকরতনৰরং পথৰিং আৰসিস্সতি পুথব্যং ৰিহরিস্সতীতি অত্থো.
৬৫২. অট্ঠপঞ্ঞাসক্খত্তুন্তি অট্ঠপঞ্ঞাসজাতীসু চক্কৰত্তী রাজা ভৰিস্সতীতি অত্থো. মহিযা সকলজম্বুদীপপথৰিযা ৰিপুলং অসঙ্খ্যেয্যং পদেসরজ্জং কারযিস্সতি.
৬৫৪. সক্যানং কুলকেতুস্সাতি সক্যরাজূনং কুলস্স ধজভূতস্স বুদ্ধস্স ঞাতকো ভৰিস্সতীতি অত্থো.
৬৫৫. আতাপীতি ৰীরিযৰা. নিপকোতি নেপক্কসঙ্খাতায পঞ্ঞায সমন্নাগতো. বাহুসচ্চেসু বহুস্সুতভাৰেসু পিটকত্তযধারণেসু কোৰিদো ছেকো. নিৰাতৰুত্তি অনৰঞ্ঞত্তিকো অথদ্ধো কাযপাগব্বিযাদিথদ্ধভাৰৰিরহিতো সব্বপাঠী সকলপিটকত্তযধারী ভৰিস্সতীতি সম্বন্ধো.
৬৫৬. পধানপহিতত্তো সোতি সো আনন্দত্থেরো ৰীরিযকরণায পেসিতচিত্তো. উপসন্তো নিরূপধীতি রাগূপধিদোসূপধিমোহূপধীহি ৰিরহিতো, সোতাপত্তিমগ্গেন পহাতব্বকিলেসানং পহীনত্তা উপসন্তো সন্তকাযচিত্তো.
৬৫৭. সন্তি আরঞ্ঞকাতি অরঞ্ঞে ভৰা মহাৰনে জাতা. সট্ঠিহাযনাতি সট্ঠিৰস্সকালে হাযনবলা. তিধা পভিন্নাতি অক্খিকণ্ণকোসসঙ্খাতেহি তীহি ঠানেহি ভিন্নমদা. মাতঙ্গাতি মাতঙ্গহত্থিকুলে জাতা. ঈসাদন্তাতি রথীসাসদিসদন্তা. উরূল়্হৰা রাজৰাহনা. কুঞ্জরসঙ্খাতা নাগা হত্থিরাজানো সন্তি সংৰিজ্জন্তি যথা, তথা সতসহস্সসঙ্খ্যা খীণাসৰসঙ্খাতা পণ্ডিতা মহিদ্ধিকা অরহন্তনাগা সন্তি, সব্বে তে অরহন্তনাগা বুদ্ধনাগরাজস্স. ন হোন্তি পণিধিম্হি তেতি তে পণিধিম্হি তাদিসা ন হোন্তি, কিং সব্বে তে ভযভীতা সকভাৰেন সণ্ঠাতুং অসমত্থাতি অত্থো. সেসং ৰুত্তনযত্তা উত্তানত্থমেৰাতি.
আনন্দত্থেরঅপদানৰণ্ণনা সমত্তা.
এত্তাৰতা পঠমা বুদ্ধৰগ্গৰণ্ণনা সমত্তা.
পঠমো ভাগো নিট্ঠিতো.
নমো তস্স ভগৰতো অরহতো সম্মাসম্বুদ্ধস্স