সত্তকৰণ্ণনা

৩৩০. ইতি ছক্কৰসেন সামগ্গিরসং দস্সেত্ৰা ইদানি সত্তকৰসেন দস্সেতুং পুন দেসনং আরভি.

তত্থ সম্পত্তিপটিলাভট্ঠেন সদ্ধাৰ ধনং সদ্ধাধনং. এস নযো সব্বত্থ. পঞ্ঞাধনং পনেত্থ সব্বসেট্ঠং. পঞ্ঞায হি ঠত্ৰা তীণি সুচরিতানি পঞ্চসীলানি দসসীলানি পূরেত্ৰা সগ্গূপগা হোন্তি, সাৰকপারমীঞাণং, পচ্চেকবোধিঞাণং, সব্বঞ্ঞুতঞ্ঞাণঞ্চ পটিৰিজ্ঝন্তি. ইমাসং সম্পত্তীনং পটিলাভকারণতো পঞ্ঞা ‘‘ধন’’ন্তি ৰুত্তা. সত্তপি চেতানি লোকিযলোকুত্তরমিস্সকানেৰ কথিতানি. বোজ্ঝঙ্গকথা কথিতাৰ.

সমাধিপরিক্খারাতি সমাধিপরিৰারা. সম্মাদিট্ঠাদীনি ৰুত্তত্থানেৰ. ইমেপি সত্ত পরিক্খারা লোকিযলোকুত্তরাৰ কথিতা.

অসতং ধম্মা অসন্তা ৰা ধম্মা লামকা ধম্মাতি অসদ্ধম্মা. ৰিপরিযাযেন সদ্ধম্মা ৰেদিতব্বা. সেসমেত্থ উত্তানত্থমেৰ. সদ্ধম্মেসু পন সদ্ধাদযো সব্বেপি ৰিপস্সকস্সেৰ কথিতা. তেসুপি পঞ্ঞা লোকিযলোকুত্তরা. অযং ৰিসেসো.

সপ্পুরিসানং ধম্মাতি সপ্পুরিসধম্মা. তত্থ সুত্তগেয্যাদিকং ধম্মং জানাতীতি ধম্মঞ্ঞূ. তস্স তস্সেৰ ভাসিতস্স অত্থং জানাতীতি অত্থঞ্ঞূ. ‘‘এত্তকোম্হি সীলেন সমাধিনা পঞ্ঞাযা’’তি এৰং অত্তানং জানাতীতি অত্তঞ্ঞূ. পটিগ্গহণপরিভোগেসু মত্তং জানাতীতি মত্তঞ্ঞূ. অযং কালো উদ্দেসস্স, অযং কালো পরিপুচ্ছায, অযং কালো যোগস্স অধিগমাযাতি এৰং কালং জানাতীতি কালঞ্ঞূ. এত্থ চ পঞ্চ ৰস্সানি উদ্দেসস্স কালো. দস পরিপুচ্ছায. ইদং অতিসম্বাধং. দস ৰস্সানি পন উদ্দেসস্স কালো. ৰীসতি পরিপুচ্ছায. ততো পরং যোগে কম্মং কাতব্বং. অট্ঠৰিধং পরিসং জানাতীতি পরিসঞ্ঞূ. সেৰিতব্বাসেৰিতব্বং পুগ্গলং জানাতীতি পুগ্গলঞ্ঞূ.

৩৩১. নিদ্দসৰত্থূনীতি নিদ্দসাদিৰত্থূনি. নিদ্দসো ভিক্খু, নিব্বীসো, নিত্তিংসো, নিচ্চত্তালীসো, নিপ্পঞ্ঞাসো ভিক্খূতি এৰং ৰচনকারণানি. অযং কির পঞ্হো তিত্থিযসমযে উপ্পন্নো. তিত্থিযা হি দসৰস্সকালে মতং নিগণ্ঠং নিদ্দসোতি ৰদন্তি. সো কির পুন দসৰস্সো ন হোতি. ন কেৰলঞ্চ দসৰস্সোৰ. নৰৰস্সোপি…পে… একৰস্সোপি ন হোতি. এতেনেৰ নযেন ৰীসতিৰস্সাদিকালেপি মতং নিব্বীসো, নিত্তিংসো, নিচ্চত্তালীসো, নিপ্পঞ্ঞাসোতি ৰদন্তি. আযস্মা আনন্দো গামে ৰিচরন্তো তং কথং সুত্ৰা ৰিহারং গন্ত্ৰা ভগৰতো আরোচেসি. ভগৰা আহ –

‘‘ন ইদং, আনন্দ, তিত্থিযানং অধিৰচনং মম সাসনে খীণাসৰস্সেতং অধিৰচনং. খীণাসৰো হি দসৰস্সকালে পরিনিব্বুতো পুন দসৰস্সো ন হোতি. ন কেৰলঞ্চ দসৰস্সোৰ, নৰৰস্সোপি…পে… একৰস্সোপি. ন কেৰলঞ্চ একৰস্সোৰ, দসমাসিকোপি…পে… একমাসিকোপি. একদিৰসিকোপি. একমুহুত্তোপি ন হোতি এৰ. কস্মা? পুন পটিসন্ধিযা অভাৰা. নিব্বীসাদীসুপি এসেৰ নযো. ইতি ভগৰা মম সাসনে খীণাসৰস্সেতং অধিৰচন’’ন্তি –

ৰত্ৰা যেহি কারণেহি সো নিদ্দসো হোতি, তানি দস্সেতুং সত্ত নিদ্দসৰত্থূনি দেসেতি. থেরোপি তমেৰ দেসনং উদ্ধরিত্ৰা সত্ত নিদ্দসৰত্থূনি ইধাৰুসো, ভিক্খু, সিক্খাসমাদানেতিআদিমাহ. তত্থ ইধাতি ইমস্মিং সাসনে. সিক্খাসমাদানে তিব্বচ্ছন্দো হোতীতি সিক্খত্তযপূরণে বহলচ্ছন্দো হোতি. আযতিঞ্চ সিক্খাসমাদানে অৰিগতপেমোতি অনাগতে পুনদিৰসাদীসুপি সিক্খাপূরণে অৰিগতপেমেন সমন্নাগতো হোতি. ধম্মনিসন্তিযাতি ধম্মনিসামনায. ৰিপস্সনাযেতং অধিৰচনং. ইচ্ছাৰিনযেতি তণ্হাৰিনযনে. পটিসল্লানেতি একীভাৰে. ৰীরিযারম্ভেতি কাযিকচেতসিকস্স ৰীরিযস্স পূরণে. সতিনেপক্কেতি সতিযঞ্চেৰ নেপক্কভাৰে চ. দিট্ঠিপটিৰেধেতি মগ্গদস্সনে. সেসং সব্বত্থ ৰুত্তনযেনেৰ ৰেদিতব্বং.

সঞ্ঞাসু অসুভানুপস্সনাঞাণে সঞ্ঞা অসুভসঞ্ঞা. আদীনৰানুপস্সনাঞাণে সঞ্ঞা আদীনৰসঞ্ঞা নাম. সেসা হেট্ঠা ৰুত্তা এৰ. বলসত্তকৰিঞ্ঞাণট্ঠিতিসত্তকপুগ্গলসত্তকানি ৰুত্তনযানেৰ. অপ্পহীনট্ঠেন অনুসযন্তীতি অনুসযা. থামগতো কামরাগো কামরাগানুসযো. এস নযো সব্বত্থ. সংযোজনসত্তকং উত্তানত্থমেৰ.