নিস্সরণিযছক্কৰণ্ণনা

৩২৬. নিস্সরণিযা ধাতুযোতি নিস্সটধাতুযোৰ. পরিযাদায তিট্ঠতীতি পরিযাদিযিত্ৰা হাপেত্ৰা তিট্ঠতি. ‘মা হেৰন্তিস্স ৰচনীযো’তি যস্মা অভূতং ব্যাকরণং ব্যাকরোতি, তস্মা মা এৰং ভণীতি ৰত্তব্বো. যদিদং মেত্তাচেতোৰিমুত্তীতি যা অযং মেত্তাচেতোৰিমুত্তি, ইদং নিস্সরণং ব্যাপাদস্স, ব্যাপাদতো নিস্সটাতি অত্থো. যো পন মেত্তায তিকচতুক্কজ্ঝানতো ৰুট্ঠিতো সঙ্খারে সম্মসিত্ৰা ততিযমগ্গং পত্ৰা ‘‘পুন ব্যাপাদো নত্থী’’তি ততিযফলেন নিব্বানং পস্সতি, তস্স চিত্তং অচ্চন্তং নিস্সরণং ব্যাপাদস্স. এতেনুপাযেন সব্বত্থ অত্থো ৰেদিতব্বো.

অনিমিত্তা চেতোৰিমুত্তীতি অরহত্তফলসমাপত্তি. সা হি রাগনিমিত্তাদীনঞ্চেৰ রূপনিমিত্তাদীনঞ্চ নিচ্চনিমিত্তাদীনঞ্চ অভাৰা ‘‘অনিমিত্তা’’তি ৰুত্তা. নিমিত্তানুসারীতি ৰুত্তপ্পভেদং নিমিত্তং অনুসরতীতি নিমিত্তানুসারী.

অস্মীতি অস্মিমানো. অযমহমস্মীতি পঞ্চসু খন্ধেসু অযং নাম অহং অস্মীতি এত্তাৰতা অরহত্তং ব্যাকতং হোতি. ৰিচিকিচ্ছাকথংকথাসল্লন্তি ৰিচিকিচ্ছাভূতং কথংকথাসল্লং. ‘মা হেৰন্তিস্স ৰচনীযো’তি সচে তে পঠমমগ্গৰজ্ঝা ৰিচিকিচ্ছা উপ্পজ্জতি, অরহত্তব্যাকরণং মিচ্ছা হোতি, তস্মা মা অভূতং ভণীতি ৰারেতব্বো. অস্মিমানসমুগ্ঘাতোতি অরহত্তমগ্গো. অরহত্তমগ্গফলৰসেন হি নিব্বানে দিট্ঠে পুন অস্মিমানো নত্থীতি অরহত্তমগ্গো অস্মিমানসমুগ্ঘাতোতি ৰুত্তো.