ছক্কৰণ্ণনা

৩২৩. ইতি পঞ্চকৰসেন সামগ্গিরসং দস্সেত্ৰা ইদানি ছক্কৰসেন দস্সেতুং পুন দেসনং আরভি. তত্থ অজ্ঝত্তিকানীতি অজ্ঝত্তজ্ঝত্তিকানি. বাহিরানীতি ততো অজ্ঝত্তজ্ঝত্ততো বহিভূতানি. ৰিত্থারতো পন আযতনকথা ৰিসুদ্ধিমগ্গে কথিতাৰ. ৰিঞ্ঞাণকাযাতি ৰিঞ্ঞাণসমূহা. চক্খুৰিঞ্ঞাণন্তি চক্খুপসাদনিস্সিতং কুসলাকুসলৰিপাকৰিঞ্ঞাণং. এস নযো সব্বত্থ. চক্খুসম্ফস্সোতি চক্খুনিস্সিতো সম্ফস্সো. সোতসম্ফস্সাদীসুপি এসেৰ নযো. মনোসম্ফস্সোতি ইমে দস সম্ফস্সে ঠপেত্ৰা সেসো সব্বো মনোসম্ফস্সো নাম. ৰেদনাছক্কম্পি এতেনেৰ নযেন ৰেদিতব্বং. রূপসঞ্ঞাতি রূপং আরম্মণং কত্ৰা উপ্পন্না সঞ্ঞা. এতেনুপাযেন সেসাপি ৰেদিতব্বা. চেতনাছক্কেপি এসেৰ নযো. তথা তণ্হাছক্কে.

অগারৰোতি গারৰৰিরহিতো. অপ্পতিস্সোতি অপ্পতিস্সযো অনীচৰুত্তি. এত্থ পন যো ভিক্খু সত্থরি ধরমানে তীসু কালেসু উপট্ঠানং ন যাতি. সত্থরি অনুপাহনে চঙ্কমন্তে সউপাহনো চঙ্কমতি, নীচে চঙ্কমন্তে উচ্চে চঙ্কমতি, হেট্ঠা ৰসন্তে উপরি ৰসতি, সত্থুদস্সনট্ঠানে উভো অংসে পারুপতি, ছত্তং ধারেতি, উপাহনং ধারেতি, নহাযতি, উচ্চারং ৰা পস্সাৰং ৰা করোতি. পরিনিব্বুতে পন চেতিযং ৰন্দিতুং ন গচ্ছতি, চেতিযস্স পঞ্ঞাযনট্ঠানে সত্থুদস্সনট্ঠানে ৰুত্তং সব্বং করোতি, অযং সত্থরি অগারৰো নাম. যো পন ধম্মস্সৰনে সংঘুট্ঠে সক্কচ্চং ন গচ্ছতি, সক্কচ্চং ধম্মং ন সুণাতি, সমুল্লপন্তো নিসীদতি, সক্কচ্চং ন গণ্হাতি, ন ৰাচেতি, অযং ধম্মে অগারৰো নাম. যো পন থেরেন ভিক্খুনা অনজ্ঝিট্ঠো ধম্মং দেসেতি, নিসীদতি, পঞ্হং কথেতি, ৰুড্ঢে ভিক্খূ ঘট্টেন্তো গচ্ছতি, তিট্ঠতি, নিসীদতি, দুস্সপল্লত্থিকং ৰা হত্থপল্লত্থিকং ৰা করোতি, সঙ্ঘমজ্ঝে উভো অংসে পারুপতি, ছত্তুপাহনং ধারেতি, অযং সঙ্ঘে অগারৰো নাম. একভিক্খুস্মিম্পি হি অগারৰে কতে সঙ্ঘে অগারৰো কতোৰ হোতি. তিস্সো সিক্খা পন অপূরযমানোৰ সিক্খায অগারৰো নাম. অপ্পমাদলক্খণং অননুব্রূহযমানো অপ্পমাদে অগারৰো নাম. দুৰিধম্পি পটিসন্থারং অকরোন্তো পটিসন্থারে অগারৰো নাম. ছ গারৰা ৰুত্তপ্পটিপক্খৰসেন ৰেদিতব্বা.

সোমনস্সূপৰিচারাতি সোমনস্সসম্পযুত্তা ৰিচারা. সোমনস্সট্ঠানিযন্তি সোমনস্সকারণভূতং. উপৰিচরতীতি ৰিতক্কেন ৰিতক্কেত্ৰা ৰিচারেন পরিচ্ছিন্দতি. এস নযো সব্বত্থ. দোমনস্সূপৰিচারাপি এৰমেৰ ৰেদিতব্বা. তথা উপেক্খূপৰিচারা. সারণীযধম্মা হেট্ঠা ৰিত্থারিতা. দিট্ঠিসামঞ্ঞগতোতি ইমিনা পন পদেন কোসম্বকসুত্তে পঠমমগ্গো কথিতো. ইধ চত্তারোপি মগ্গা.