সোমনস্সপটিলাভকথাৰণ্ণনা

৩৬৮. ৰেদপটিলাভন্তি তুট্ঠিপটিলাভং. দেৰাসুরসঙ্গামোতি দেৰানঞ্চ অসুরানঞ্চ সঙ্গামো. সমুপব্যূল়্হোতি সমাপন্নো নলাটেন নলাটং পহরণাকারপ্পত্তো ৰিয. এতেসং কির কদাচি মহাসমুদ্দপিট্ঠে সঙ্গামো হোতি তত্থ পন ছেদনৰিজ্ঝনাদীহি অঞ্ঞমঞ্ঞং ঘাতো নাম নত্থি, দারুমেণ্ডকযুদ্ধং ৰিয জযপরাজযমত্তমেৰ হোতি. কদাচি দেৰা জিনন্তি, কদাচি অসুরা. তত্থ যস্মিং সঙ্গামে দেৰা পুন অপচ্চাগমনায অসুরে জিনিংসু, তং সন্ধায তস্মিং খো পন ভন্তেতিআদিমাহ. উভযমেতন্তি উভযং এতং. দুৰিধম্পি ওজং এত্থ দেৰলোকে দেৰাযেৰ পরিভুঞ্জিস্সন্তীতি এৰমস্স আৰজ্জন্তস্স বলৰপীতিসোমনস্সং উপ্পজ্জি. সদণ্ডাৰচরোতি সদণ্ডাৰচরকো, দণ্ডগ্গহণেন সত্থগ্গহণেন সদ্ধিং অহোসি, ন নিক্খিত্তদণ্ডসত্থোতি দস্সেতি. একন্তনিব্বিদাযাতি একন্তেনেৰ ৰট্টে নিব্বিন্দনত্থাযাতি সব্বং মহাগোৰিন্দসুত্তে ৰুত্তমেৰ.

৩৬৯. পৰেদেসীতি কথেসি দীপেসি. ইধেৰাতি ইমস্মিঞ্ঞেৰ ওকাসে. দেৰভূতস্স মে সতোতি দেৰস্স মে সতো. পুনরাযু চ মে লদ্ধোতি পুন অঞ্ঞেন কম্মৰিপাকেন মে জীৰিতং লদ্ধন্তি, ইমিনা অত্তনো চুতভাৰং চেৰ উপপন্নভাৰঞ্চ আৰিকরোতি.

দিৰিযা কাযাতি দিব্বা অত্তভাৰা. আযুং হিত্ৰা অমানুসন্তি দিব্বং আযুং জহিত্ৰা. অমূল়্হো গব্ভমেস্সামীতি নিযতগতিকত্তা অমূল়্হো হুত্ৰা. যত্থ মে রমতী মনোতি যত্থ মে মনো রমিস্সতি, তত্থেৰ খত্তিযকুলাদীসু গব্ভং উপগচ্ছিস্সামীতি সত্তক্খত্তুং দেৰে চ মানুসে চাতি ইমমত্থং দীপেতি.

ঞাযেন ৰিহরিস্সামীতি মনুস্সেসু উপপন্নোপি মাতরং জীৰিতা ৰোরোপনাদীনং অভব্বত্তা ঞাযেন কারণেন সমেন ৰিহরিস্সামীতি অত্থো.

সম্বোধি চে ভৰিস্সতীতি ইদং সকদাগামিমগ্গং সন্ধায ৰদতি, সচে সকদাগামী ভৰিস্সামীতি দীপেতি. অঞ্ঞাতা ৰিহরিস্সামীতি অঞ্ঞাতা আজানিতুকামো হুত্ৰা ৰিহরিস্সামি. স্ৰেৰ অন্তো ভৰিস্সতীতি সো এৰ মে মনুস্সলোকে অন্তো ভৰিস্সতীতি.

পুন দেৰো ভৰিস্সামি, দেৰলোকস্মিং উত্তমোতি পুন দেৰলোকস্মিং উত্তমো সক্কো দেৰানমিন্দো ভৰিস্সামীতি ৰদতি.

অন্তিমে ৰত্তমানম্হীতি অন্তিমে ভৰে ৰত্তমানে. সো নিৰাসো ভৰিস্সতীতি যে তে আযুনা চ পঞ্ঞায চ অকনিট্ঠা জেট্ঠকা সব্বদেৰেহি পণীততরা দেৰা, অৰসানে মে সো নিৰাসো ভৰিস্সতি. অযং কির ততো সক্কত্তভাৰতো চুতো তস্মিং অত্তভাৰে অনাগামিমগ্গস্স পটিলদ্ধত্তা উদ্ধংসোতো অকনিট্ঠগামী হুত্ৰা অৰিহাদীসু নিব্বত্তন্তো অৰসানে অকনিট্ঠে নিব্বত্তিস্সতি. তং সন্ধায এৰমাহ. এস কির অৰিহেসু কপ্পসহস্সং ৰসিস্সতি, অতপ্পেসু দ্ৰে কপ্পসহস্সানি, সুদস্সেসু চত্তারি কপ্পসহস্সানি, সুদস্সীসু অট্ঠ, অকনিট্ঠেসু সোল়সাতি একতিংস কপ্পসহস্সানি ব্রহ্মআযুং অনুভৰিস্সতি. সক্কো দেৰরাজা অনাথপিণ্ডিকো গহপতি ৰিসাখা মহাউপাসিকাতি তযোপি হি ইমে একপ্পমাণআযুকা এৰ, ৰট্টাভিরতসত্তা নাম এতেহি সদিসা সুখভাগিনো নাম নত্থি.

৩৭০. অপরিযোসিতসঙ্কপ্পোতি অনিট্ঠিতমনোরথো. যস্সু মঞ্ঞামি সমণেতি যে চ সমণে পৰিৰিত্তৰিহারিনোতি মঞ্ঞামি.

আরাধনাতি সম্পাদনা. ৰিরাধনাতি অসম্পাদনা. ন সম্পাযন্তীতি সম্পাদেত্ৰা কথেতুং ন সক্কোন্তি.

আদিচ্চবন্ধুনন্তি আদিচ্চোপি গোতমগোত্তো, ভগৰাপি গোতমগোত্তো, তস্মা এৰমাহ. যং করোমসীতি যং পুব্বে ব্রহ্মুনো নমক্কারং করোম. সমং দেৰেহীতি দেৰেহি সদ্ধিং, ইতো পট্ঠায ইদানি অম্হাকং ব্রহ্মুনো নমক্কারকরণং নত্থীতি দস্সেতি. সামং করোমাতি নমক্কারং করোম.

৩৭১. পরামসিত্ৰাতি তুট্ঠচিত্তো সহাযং হত্থেন হত্থম্হি পহরন্তো ৰিয পথৰিং পহরিত্ৰা, সক্খিভাৰত্থায ৰা পহরিত্ৰা ‘‘যথা ত্ৰং নিচ্চলো, এৰমহং ভগৰতী’’তি. অজ্ঝিট্ঠপঞ্হাতি অজ্ঝেসিতপঞ্হা পত্থিতপঞ্হা. সেসং সব্বত্থ উত্তানমেৰাতি.

ইতি সুমঙ্গলৰিলাসিনিযা দীঘনিকাযট্ঠকথাযং

সক্কপঞ্হসুত্তৰণ্ণনা নিট্ঠিতা.