৫. জনৰসভসুত্তৰণ্ণনা

নাতিকিযাদিব্যাকরণৰণ্ণনা

২৭৩-২৭৫. এৰং মে সুতন্তি জনৰসভসুত্তং. তত্রাযং অনুত্তানপদৰণ্ণনা – পরিতো পরিতো জনপদেসূতি সমন্তা সমন্তা জনপদেসু. পরিচারকেতি বুদ্ধধম্মসঙ্ঘানং পরিচারকে. উপপত্তীসূতি ঞাণগতিপুঞ্ঞানং উপপত্তীসু. কাসিকোসলেসূতি কাসীসু চ কোসলেসু চ, কাসিরট্ঠে চ কোসলরট্ঠে চাতি অত্থো. এস নযো সব্বত্থ. অঙ্গমগধযোনককম্বোজঅস্সকঅৰন্তিরট্ঠেসু পন ছসু ন ব্যাকরোতি. ইমেসং পন সোল়সন্নং মহাজনপদানং পুরিমেসু দসসুযেৰ ব্যাকরোতি. নাতিকিযাতি নাতিকগামৰাসিনো.

তেনাতি তেন অনাগামিআদিভাৰেন. সুত্ৰাতি সব্বঞ্ঞুতঞ্ঞাণেন পরিচ্ছিন্দিত্ৰা ব্যাকরোন্তস্স ভগৰতো পঞ্হাব্যাকরণং সুত্ৰা তেসং অনাগামিআদীসু নিট্ঠঙ্গতা হুত্ৰা. তেন অনাগামিআদিভাৰেন অত্তমনা অহেসুং. অট্ঠকথাযং পন তেনাতি তে নাতিকিযাতি ৰুত্তং. এতস্মিং অত্থে ন-কারো নিপাতমত্তং হোতি.

আনন্দপরিকথাৰণ্ণনা

২৭৭. ভগৰন্তং কিত্তযমানরূপোতি অহো বুদ্ধো, অহো ধম্মো, অহো সঙ্ঘো; অহো ধম্মো স্ৰাক্খাতোতি এৰং কিত্তযন্তোৰ কালমকাসি. বহুজনো পসীদেয্যাতি অম্হাকং পিতা মাতা ভাতা ভগিনী পুত্তো ধীতা সহাযকো, তেন অম্হেহি সদ্ধিং একতো ভুত্তা, একতো সযিতা, তস্স ইদঞ্চিদঞ্চ মনাপং অকরিম্হ, সো কির অনাগামী সকদাগামী সোতাপন্নো; অহো সাধু, অহো সুট্ঠূতি এৰং বহুজনো পসাদং আপজ্জেয্য.

২৭৮. গতিন্তি ঞাণগতিং. অভিসম্পরাযন্তি ঞাণাভিসম্পরাযমেৰ. অদ্দসা খোতি কিত্তকে জনে অদ্দস? চতুৰীসতিসতসহস্সানি.

২৭৯. উপসন্তপদিস্সোতি উপসন্তদস্সনো. ভাতিরিৰাতি অতিৰিয ভাতি, অতিৰিয ৰিরোচতি. ইন্দ্রিযানন্তি মনচ্ছট্ঠানং ইন্দ্রিযানং. অদ্দসং খো অহং আনন্দাতি নেৰ দস, ন ৰীসতি, ন সতং, ন সহস্সং, অনূনাধিকানি চতুৰীসতিসতসহস্সানি অদ্দসন্তি আহ.

জনৰসভযক্খৰণ্ণনা

২৮০. দিস্ৰা পন মে এত্তকো জনো মং নিস্সায দুক্খা পমুত্তোতি বলৰসোমনস্সং উপ্পজ্জি, চিত্তং পসীদি, চিত্তস্স পসন্নত্তা চিত্তসমুট্ঠানং লোহিতং পসীদি, লোহিতস্স পসন্নত্তা মনচ্ছট্ঠানি ইন্দ্রিযানি পসীদিংসূতি সব্বমিদং ৰত্ৰা অথ খো আনন্দাতিআদিমাহ. তত্থ যস্মা সো ভগৰতো ধম্মকথং সুত্ৰা দসসহস্সাধিকস্স জনসতসহস্সস্স জেট্ঠকো হুত্ৰা সোতাপন্নো জাতো, তস্মা জনৰসভোতিস্স নামং অহোসি.

ইতো সত্তাতি ইতো দেৰলোকা চৰিত্ৰা সত্ত. ততো সত্তাতি ততো মনুস্সলোকা চৰিত্ৰা সত্ত. সংসারানি চতুদ্দসাতি সব্বাপি চতুদ্দসখন্ধপটিপাটিযো. নিৰাসমভিজানামীতি জাতিৰসেন নিৰাসং জানামি. যত্থ মে ৰুসিতং পুরেতি যত্থ দেৰেসু চ ৰেস্সৰণস্স সহব্যতং উপগতেন মনুস্সেসু চ রাজভূতেন ইতো অত্তভাৰতো পুরেযেৰ মযা ৰুসিতং. পুরে এৰং ৰুসিতত্তা এৰ চ ইদানি সোতাপন্নো হুত্ৰা তীসু ৰত্থূসু বহুং পুঞ্ঞং কত্ৰা তস্সানুভাৰেন উপরি নিব্বত্তিতুং সমত্থোপি দীঘরত্তং ৰুসিতট্ঠানে নিকন্তিযা বলৰতায এত্থেৰ নিব্বত্তো.

২৮১. আসা চ পন মে সন্তিট্ঠতীতি ইমিনাহং সোতাপন্নোতি ন সুত্তপ্পমত্তোৰ হুত্ৰা কালং ৰীতিনামেসিং. সকদাগামিমগ্গত্থায পন মে ৰিপস্সনা আরদ্ধা. অজ্জেৰ অজ্জেৰ পটিৰিজ্ঝিস্সামীতি এৰং সউস্সাহো ৰিহরামীতি দস্সেতি. যদগ্গেতি লট্ঠিৰনুয্যানে পঠমদস্সনে সোতাপন্নদিৰসং সন্ধায ৰদতি. তদগ্গে অহং, ভন্তে, দীঘরত্তং অৰিনিপাতো অৰিনিপাতং সঞ্জানামীতি তংদিৰসং আদিং কত্ৰা, অহং, ভন্তে, পুরিমং চতুদ্দসঅত্তভাৰসঙ্খাতং দীঘরত্তং অৰিনিপাতো লট্ঠিৰনুয্যানে সোতাপত্তিমগ্গৰসেন অধিগতং অৰিনিপাতধম্মতং সঞ্জানামীতি অত্থো. অনচ্ছরিযন্তি অনুঅচ্ছরিযং. চিন্তযমানং পুনপ্পুনং অচ্ছরিযমেৰিদং যং কেনচিদেৰ করণীযেন গচ্ছন্তো ভগৰন্তং অন্তরামগ্গে অদ্দসং. ইদম্পি অচ্ছরিযং যঞ্চ ৰেস্সৰণস্স মহারাজস্স সযংপরিসায ভাসতো ভগৰতো দিট্ঠসদিসমেৰ সম্মুখা সুতং. দ্ৰে পচ্চযাতি অন্তরামগ্গে দিট্ঠভাৰো চ ৰেস্সৰণস্স সম্মুখা সুতং আরোচেতুকামতা চ.

দেৰসভাৰণ্ণনা

২৮২. সন্নিপতিতাতি কস্মা সন্নিপতিতা? তে কির চতূহি কারণেহি সন্নিপতন্তি. ৰস্সূপনাযিকসঙ্গহত্থং, পৰারণাসঙ্গহত্থং, ধম্মসৰনত্থং, পারিচ্ছত্তককীল়ানুভৰনত্থন্তি. তত্থ স্ৰে ৰস্সূপনাযিকাতি আসাল়্হীপুণ্ণমায দ্ৰীসু দেৰলোকেসু দেৰা সুধম্মায দেৰসভায সন্নিপতিত্ৰা মন্তেন্তি অসুকৰিহারে একো ভিক্খু ৰস্সূপগতো, অসুকৰিহারে দ্ৰে তযো চত্তারো পঞ্চ দস ৰীসতি তিংসং চত্তালীসং পঞ্ঞাসং সতং সহস্সং ভিক্খূ ৰস্সূপগতা, এত্থেত্থ ঠানে অয্যানং আরক্খং সুসংৰিহিতং করোথাতি এৰং ৰস্সূপনাযিকসঙ্গহো কতো হোতি.

তদাপি এতেনেৰ কারণেন সন্নিপতিতা. ইদং তেসং হোতি আসনস্মিন্তি ইদং তেসং চতুন্নং মহারাজানং আসনং হোতি. এৰং তেসু নিসিন্নেসু অথ পচ্ছা অম্হাকং আসনং হোতি.

যেনত্থেনাতি যেন ৰস্সূপনাযিকত্থেন. তং অত্থং চিন্তযিত্ৰা তং অত্থং মন্তযিত্ৰাতি তং অরঞ্ঞৰাসিনো ভিক্খুসঙ্ঘস্স আরক্খত্থং চিন্তযিত্ৰা. এত্থেত্থ ৰুট্ঠভিক্খুসঙ্ঘস্স আরক্খং সংৰিদহথাতি চতূহি মহারাজেহি সদ্ধিং মন্তেত্ৰা. ৰুত্তৰচনাপি তন্তি তেত্তিংস দেৰপুত্তা ৰদন্তি, মহারাজানো ৰুত্তৰচনা নাম. তথা তেত্তিংস দেৰপুত্তা পচ্চানুসাসন্তি, ইতরে পচ্চানুসিট্ঠৰচনা নাম. পদদ্ৰযেপি পন তন্তি নিপাতমত্তমেৰ. অৰিপক্কন্তাতি অগতা.

২৮৩. উল়ারোতি ৰিপুলো মহা. দেৰানুভাৰন্তি যা সা সব্বদেৰতানং ৰত্থালঙ্কারৰিমানসরীরানং পভা দ্ৰাদস যোজনানি ফরতি. মহাপুঞ্ঞানং পন সরীরপ্পভা যোজনসতং ফরতি. তং দেৰানুভাৰং অতিক্কমিত্ৰা.

ব্রহ্মুনো হেতং পুব্বনিমিত্তন্তি যথা সূরিযস্স উদযতো এতং পুব্বঙ্গমং এতং পুব্বনিমিত্তং যদিদং অরুণুগ্গং, এৰমেৰ ব্রহ্মুনোপি এতং – ‘‘পুব্বনিমিত্ত’’ন্তি দীপেতি.

সনঙ্কুমারকথাৰণ্ণনা

২৮৪. অনভিসম্ভৰনীযোতি অপত্তব্বো, ন তং দেৰা তাৰতিংসা পস্সন্তীতি অত্থো. চক্খুপথস্মিন্তি চক্খুপসাদে আপাথে ৰা. সো দেৰানং চক্খুস্স আপাথে সম্ভৰনীযো পত্তব্বো ন হোতি, ন অভিভৰতীতি ৰুত্তং হোতি. হেট্ঠা হেট্ঠা হি দেৰতা উপরূপরি দেৰানং ওল়ারিকং কত্ৰা মাপিতমেৰ অত্তভাৰং পস্সিতুং সক্কোন্তি, ৰেদপটিলাভন্তি তুট্ঠিপটিলাভং. অধুনাভিসিত্তো রজ্জেনাতি সম্পতি অভিসিত্তো রজ্জেন. অযং পনত্থো দুট্ঠগামণিঅভযৰত্থুনা দীপেতব্বো –

সো কির দ্ৰত্তিংস দমিল়রাজানো ৰিজিত্ৰা অনুরাধপুরে পত্তাভিসেকো তুট্ঠসোমনস্সেন মাসং নিদ্দং ন লভি, ততো – ‘‘নিদ্দং ন লভামি, ভন্তে’’তি ভিক্খুসঙ্ঘস্স আচিক্খি. তেন হি, মহারাজ, অজ্জ উপোসথং অধিট্ঠাহীতি. সো চ উপোসথং অধিট্ঠাসি. সঙ্ঘো গন্ত্ৰা – ‘‘চিত্তযমকং সজ্ঝাযথা’’তি অট্ঠ আভিধম্মিকভিক্খূ পেসেসি. তে গন্ত্ৰা – ‘‘নিপজ্জ ত্ৰং, মহারাজা,’’তি ৰত্ৰা সজ্ঝাযং আরভিংসু. রাজা সজ্ঝাযং সুণন্তোৰ নিদ্দং ওক্কমি. থেরা – রাজানং মা পবোধযিত্থাতি পক্কমিংসু. রাজা দুতিযদিৰসে সূরিযুগ্গমনে পবুজ্ঝিত্ৰা থেরে অপস্সন্তো – ‘‘কুহিং অয্যা’’তি পুচ্ছি. তুম্হাকং নিদ্দোক্কমনভাৰং ঞত্ৰা গতাতি. নত্থি, ভো, ময্হং অয্যকস্স দারকানং অজাননকভেসজ্জং নাম, যাৰ নিদ্দাভেসজ্জম্পি জানন্তি যেৰাতি আহ.

পঞ্চসিখোতি পঞ্চসিখগন্ধব্বসদিসো হুত্ৰা. পঞ্চসিখগন্ধব্বদেৰপুত্তস্স কির সব্বদেৰতা অত্তভাৰং মমাযন্তি. তস্মা ব্রহ্মাপি তাদিসংযেৰ অত্তভাৰং নিম্মিনিত্ৰা পাতুরহোসি. পল্লঙ্কেন নিসীদীতি পল্লঙ্কং আভুজিত্ৰা নিসীদি.

ৰিস্সট্ঠোতি সুমুত্তো অপলিবুদ্ধো. ৰিঞ্ঞেয্যোতি অত্থৰিঞ্ঞাপনো. মঞ্জূতি মধুরো মুদু. সৰনীযোতি সোতব্বযুত্তকো কণ্ণসুখো. বিন্দূতি একগ্ঘনো. অৰিসারীতি সুৰিসদো অৰিপ্পকিণ্ণো. গম্ভীরোতি নাভিমূলতো পট্ঠায গম্ভীরসমুট্ঠিতো, ন জিৰ্হাদন্তওট্ঠতালুমত্তপ্পহারসমুট্ঠিতো. এৰং সমুট্ঠিতো হি অমধুরো চ হোতি, ন চ দূরং সাৰেতি. নিন্নাদীতি মহামেঘমুদিঙ্গসদ্দো ৰিয নিন্নাদযুত্তো. অপিচেত্থ পচ্ছিমং পচ্ছিমং পদং পুরিমস্স পুরিমস্স অত্থোযেৰাতি ৰেদিতব্বো. যথাপরিসন্তি যত্তকা পরিসা, তত্তকমেৰ ৰিঞ্ঞাপেতি. অন্তো পরিসাযং যেৰস্স সদ্দো সম্পরিৰত্ততি, ন বহিদ্ধা ৰিধাৰতি. যে হি কেচীতি আদি বহুজনহিতায পটিপন্নভাৰদস্সনত্থং ৰদতি. সরণং গতাতি ন যথা ৰা তথা ৰা সরণং গতে সন্ধায ৰদতি. নিব্বেমতিকগহিতসরণে পন সন্ধায ৰদতি. গন্ধব্বকাযং পরিপূরেন্তীতি গন্ধব্বদেৰগণং পরিপূরেন্তি. ইতি অম্হাকং সত্থু লোকে উপ্পন্নকালতো পট্ঠায ছ দেৰলোকাদীসু পিট্ঠং কোট্টেত্ৰা পূরিতনাল়ি ৰিয সরৰননল়ৰনং ৰিয চ নিরন্তরং জাতপরিসাতি আহ.

ভাৰিতইদ্ধিপাদৰণ্ণনা

২৮৭. যাৰসুপঞ্ঞত্তা চিমে তেন ভগৰতাতি তেন ময্হং সত্থারা ভগৰতা যাৰ সুপঞ্ঞত্তা যাৰ সুকথিতা. ইদ্ধিপাদাতি এত্থ ইজ্ঝনট্ঠেন ইদ্ধি, পতিট্ঠানট্ঠেন পাদাতি ৰেদিতব্বা. ইদ্ধিপহুতাযাতি ইদ্ধিপহোনকতায. ইদ্ধিৰিসৰিতাযাতি ইদ্ধিৰিপজ্জনভাৰায, পুনপ্পুনং আসেৰনৰসেন চিণ্ণৰসিতাযাতি ৰুত্তং হোতি. ইদ্ধিৰিকুব্বনতাযাতি ইদ্ধিৰিকুব্বনভাৰায, নানপ্পকারতো কত্ৰা দস্সনত্থায. ছন্দসমাধিপ্পধানসঙ্খারসমন্নাগতন্তিআদীসু ছন্দহেতুকো ছন্দাধিকো ৰা সমাধি ছন্দসমাধি, কত্তুকম্যতাছন্দং অধিপতিং করিত্ৰা পটিলদ্ধসমাধিস্সেতং অধিৰচনং. পধানভূতা সঙ্খারা পধানসঙ্খারা. চতুকিচ্চসাধকস্স সম্মপ্পধানৰীরিযস্সেতং অধিৰচনং. সমন্নাগতন্তি ছন্দসমাধিনা চ পধানসঙ্খারেন চ উপেতং. ইদ্ধিপাদন্তি নিপ্ফত্তিপরিযাযেন ইজ্ঝনট্ঠেন ৰা, ইজ্ঝন্তি এতায সত্তা ইদ্ধা ৰুদ্ধা উক্কংসগতা হোন্তীতি ইমিনা ৰা পরিযাযেন ইদ্ধীতি সঙ্খ্যং গতানং অভিঞ্ঞাচিত্তসম্পযুত্তানং ছন্দসমাধিপধানসঙ্খারানং অধিট্ঠানট্ঠেন পাদভূতো সেসচিত্তচেতসিকরাসীতি অত্থো. ৰুত্তঞ্হেতং – ‘‘ইদ্ধিপাদোতি তথাভূতস্স ৰেদনাক্খন্ধো, সঞ্ঞাক্খন্ধো, সঙ্খারক্খন্ধো ৰিঞ্ঞাণক্খন্ধো’’তি (ৰিভ. ৪৩৪). ইমিনা নযেন সেসেসুপি অত্থো ৰেদিতব্বো. যথেৰ হি ছন্দং অধিপতিং করিত্ৰা পটিলদ্ধসমাধি ছন্দসমাধীতি ৰুত্তো, এৰং ৰীরিযং, চিত্তং, ৰীমংসং অধিপতিং করিত্ৰা পটিলদ্ধসমাধি ৰীমংসাসমাধীতি ৰুচ্চতি. অপিচ উপচারজ্ঝানং পাদো, পঠমজ্ঝানং ইদ্ধি. সউপচারং পঠমজ্ঝানং পাদো, দুতিযজ্ঝানং ইদ্ধীতি এৰং পুব্বভাগে পাদো, অপরভাগে ইদ্ধীতি এৰমেত্থ অত্থো ৰেদিতব্বো. ৰিত্থারেন ইদ্ধিপাদকথা ৰিসুদ্ধিমগ্গে চ ৰিভঙ্গট্ঠকথায চ ৰুত্তা.

কেচি পন ‘‘নিপ্ফন্না ইদ্ধি. অনিপ্ফন্নো ইদ্ধিপাদো’’তি ৰদন্তি, তেসং ৰাদমদ্দনত্থায অভিধম্মে উত্তরচূল়িকৰারো নাম আভতো – ‘‘চত্তারো ইদ্ধিপাদা ছন্দিদ্ধিপাদো, ৰীরিযিদ্ধিপাদো, চিত্তিদ্ধিপাদো, ৰীমংসিদ্ধিপাদো. তত্থ কতমো ছন্দিদ্ধিপাদো? ইধ ভিক্খু যস্মিং সমযে লোকুত্তরং ঝানং ভাৰেতি নিয্যানিকং অপচযগামিং দিট্ঠিগতানং পহানায পঠমায ভূমিযা পত্তিযা ৰিৰিচ্চেৰ কামেহি পঠমং ঝানং উপসম্পজ্জ ৰিহরতি দুক্খাপটিপদং দন্ধাভিঞ্ঞং. যো তস্মিং সমযে ছন্দো ছন্দিকতা কত্তুকম্যতা কুসলো ধম্মচ্ছন্দো, অযং ৰুচ্চতি ছন্দিদ্ধিপাদো, অৰসেসা ধম্মা ছন্দিদ্ধিপাদসম্পযুত্তা’’তি (ৰিভ. ৪৫৮). ইমে পন লোকুত্তরৰসেনেৰ আগতা. তত্থ রট্ঠপালত্থেরো ছন্দং ধুরং কত্ৰা লোকুত্তরং ধম্মং নিব্বত্তেসি. সোণত্থেরো ৰীরিযং ধুরং কত্ৰা, সম্ভূতত্থেরো চিত্তং ধুরং কত্ৰা, আযস্মা মোঘরাজা ৰীমংসং ধুরং কত্ৰাতি.

তত্থ যথা চতূসু অমচ্চপুত্তেসু ঠানন্তরং পত্থেত্ৰা রাজানং উপনিস্সায ৰিহরন্তেসু একো উপট্ঠানে ছন্দজাতো রঞ্ঞো অজ্ঝাসযঞ্চ রুচিঞ্চ ঞত্ৰা দিৰা চ রত্তো চ উপট্ঠহন্তো রাজানং আরাধেত্ৰা ঠানন্তরং পাপুণি. যথা সো, এৰং ছন্দধুরেন লোকুত্তরধম্মনিব্বত্তকো ৰেদিতব্বো.

একো পন – ‘‘দিৰসে দিৰসে উপট্ঠাতুং কো সক্কোতি, উপ্পন্নে কিচ্চে পরক্কমেন আরাধেস্সামী’’তি কুপিতে পচ্চন্তে রঞ্ঞা পহিতো পরক্কমেন সত্তুমদ্দনং কত্ৰা ঠানন্তরং পাপুণি. যথা সো, এৰং ৰীরিযধুরেন লোকুত্তরধম্মনিব্বত্তকো ৰেদিতব্বো.

একো – ‘‘দিৰসে দিৰসে উপট্ঠানম্পি উরেন সত্তিসরপটিচ্ছন্নম্পি ভারোযেৰ, মন্তবলেন আরাধেস্সামী’’তি খত্তৰিজ্জায কতপরিচযত্তা মন্তসংৰিধানেন রাজানং আরাধেত্ৰা ঠানন্তরং পাপুণাতি. যথা সো, এৰং চিত্তধুরেন লোকুত্তরধম্মনিব্বত্তকো ৰেদিতব্বো.

অপরো – ‘‘কিং ইমেহি উপট্ঠানাদীহি, রাজানো নাম জাতিসম্পন্নস্স ঠানন্তরং দেন্তি, তাদিসস্স দেন্তো ময্হং দস্সতী’’তি জাতিসম্পত্তিমেৰ নিস্সায ঠানন্তরং পাপুণি, যথা সো, এৰং সুপরিসুদ্ধং ৰীমংসং নিস্সায ৰীমংসধুরেন লোকুত্তরধম্মনিব্বত্তকো ৰেদিতব্বো.

অনেকৰিহিতন্তি অনেকৰিধং. ইদ্ধিৰিধন্তি ইদ্ধিকোট্ঠাসং.

তিৰিধওকাসাধিগমৰণ্ণনা

২৮৮. সুখস্সাধিগমাযাতি ঝানসুখস্স মগ্গসুখস্স ফলসুখস্স চ অধিগমায. সংসট্ঠোতি সম্পযুত্তচিত্তো. অরিযধম্মন্তি অরিযেন ভগৰতা বুদ্ধেন দেসিতং ধম্মং. সুণাতীতি সত্থু সম্মুখা ভিক্খুভিক্খুনীআদীহি ৰা দেসিযমানং সুণাতি. যোনিসো মনসিকরোতীতি উপাযতো পথতো কারণতো ‘অনিচ্চ’ন্তিআদিৰসেন মনসি করোতি. ‘‘যোনিসো মনসিকারো নাম উপাযমনসিকারো পথমনসিকারো, অনিচ্চে অনিচ্চন্তি দুক্খে দুক্খন্তি অনত্তনি অনত্তাতি অসুভে অসুভন্তি সচ্চানুলোমিকেন ৰা চিত্তস্স আৰট্টনা অন্ৰাৰট্টনা আভোগো সমন্নাহারো মনসিকারো, অযং ৰুচ্চতি যোনিসোমনসিকারো’’তি. এৰং ৰুত্তে যোনিসোমনসিকারে কম্মং আরভতীতি অত্থো. অসংসট্ঠোতি ৰত্থুকামেহিপি কিলেসকামেহিপি অসংসট্ঠো ৰিহরতি. উপ্পজ্জতি সুখন্তি উপ্পজ্জতি পঠমজ্ঝানসুখং. সুখা ভিয্যো সোমনস্সন্তি সমাপত্তিতো ৰুট্ঠিতস্স ঝানসুখপচ্চযা অপরাপরং সোমনস্সং উপ্পজ্জতি. পমুদাতি তুট্ঠাকারতো দুব্বলপীতি. পামোজ্জন্তি বলৰতরং পীতিসোমনস্সং. পঠমো ওকাসাধিগমোতি পঠমজ্ঝানং পঞ্চনীৰরণানি ৰিক্খম্ভেত্ৰা অত্তনো ওকাসং গহেত্ৰা তিট্ঠতি, তস্মা ‘‘পঠমো ওকাসাধিগমো’’তি ৰুত্তং.

ওল়ারিকাতি এত্থ কাযৰচীসঙ্খারা তাৰ ওল়ারিকা হোন্তু, চিত্তসঙ্খারা কথং ওল়ারিকাতি? অপ্পহীনত্তা. কাযসঙ্খারা হি চতুত্থজ্ঝানেন পহীযন্তি, ৰচীসঙ্খারা দুতিযজ্ঝানেন, চিত্তসঙ্খারা নিরোধসমাপত্তিযা. ইতি কাযৰচীসঙ্খারেসু পহীনেসুপি তে তিট্ঠন্তিযেৰাতি পহীনে উপাদায অপ্পহীনত্তা ওল়ারিকা নাম জাতা. সুখন্তি নিরোধা ৰুট্ঠহন্তস্স উপ্পন্নং চতুত্থজ্ঝানিকফলসমাপত্তিসুখং. সুখা ভিয্যো সোমনস্সতি ফলসমাপত্তিতো ৰুট্ঠিতস্স অপরাপরং সোমনস্সং. দুতিযো ওকাসাধিগমোতি চতুত্থজ্ঝানং সুখং দুক্খং ৰিক্খম্ভেত্ৰা অত্তনো ওকাসং গহেত্ৰা তিট্ঠতি, তস্মা ‘‘দুতিযো ওকাসাধিগমো’’তি ৰুত্তং. দুতিযততিযজ্ঝানানি পনেত্থ চতুত্থে গহিতে গহিতানেৰ হোন্তীতি ৰিসুং ন ৰুত্তানীতি.

ইদং কুসলন্তিআদীসু কুসলং নাম দসকুসলকম্মপথা. অকুসলন্তি দসঅকুসলকম্মপথা. সাৰজ্জদুকাদযোপি এতেসং ৰসেনেৰ ৰেদিতব্বা. সব্বঞ্চেৰ পনেতং কণ্হঞ্চ সুক্কঞ্চ সপ্পটিভাগঞ্চাতি কণ্হসুক্কসপ্পটিভাগং. নিব্বানমেৰ হেতং অপ্পটিভাগং. অৰিজ্জা পহীযতীতি ৰট্টপটিচ্ছাদিকা অৰিজ্জা পহীযতি. ৰিজ্জা উপ্পজ্জতীতি অরহত্তমগ্গৰিজ্জা উপ্পজ্জতি. সুখন্তি অরহত্তমগ্গসুখঞ্চেৰ ফলসুখঞ্চ. সুখা ভিয্যো সোমনস্সন্তি ফলসমাপত্তিতো ৰুট্ঠিতস্স অপরাপরং সোমনস্সং. ততিযো ওকাসাধিগমোতি অরহত্তমগ্গো সব্বকিলেসে ৰিক্খম্ভেত্ৰা অত্তনো ওকাসং গহেত্ৰা তিট্ঠতি, তস্মা ‘‘ততিযো ওকাসাধিগমো’’তি ৰুত্তো. সেসমগ্গা পন তস্মিং গহিতে অন্তোগধা এৰাতি ৰিসুং ন ৰুত্তা.

ইমে পন তযো ওকাসাধিগমা অট্ঠতিংসারম্মণৰসেন ৰিত্থারেত্ৰা কথেতব্বা. কথং? সব্বানি আরম্মণানি ৰিসুদ্ধিমগ্গে ৰুত্তনযেনেৰ উপচারৰসেন চ অপ্পনাৰসেন চ ৰৰত্থপেত্ৰা চতুৰীসতিযা ঠানেসু পঠমজ্ঝানং ‘‘পঠমো ওকাসাধিগমো’’তি কথেতব্বং. তেরসসু ঠানেসু দুতিযততিযজ্ঝানানি, পন্নরসসু ঠানেসু চতুত্থজ্ঝানঞ্চ নিরোধসমাপত্তিং পাপেত্ৰা ‘‘দুতিযো ওকাসাধিগমো’’তি কথেতব্বং. দস উপচারজ্ঝানানি পন মগ্গস্স পদট্ঠানভূতানি ততিযং ওকাসাধিগমং ভজন্তি. অপিচ তীসু সিক্খাসু অধিসীলসিক্খা পঠমং ওকাসাধিগমং ভজতি, অধিচিত্তসিক্খা দুতিযং, অধিপঞ্ঞাসিক্খা ততিযন্তি এৰং সিক্খাৰসেনপি কথেতব্বং. সামঞ্ঞফলেপি চূল়সীলতো যাৰ পঠমজ্ঝানা পঠমো ওকাসাধিগমো, দুতিযজ্ঝানতো যাৰ নেৰসঞ্ঞানাসঞ্ঞাযতনা দুতিযো, ৰিপস্সনাতো যাৰ অরহত্তা ততিযো ওকাসাধিগমোতি এৰং সামঞ্ঞফলসুত্তন্তৰসেনপি কথেতব্বং. তীসু পন পিটকেসু ৰিনযপিটকং পঠমং ওকাসাধিগমং ভজতি, সুত্তন্তপিটকং দুতিযং, অভিধম্মপিটকং ততিযন্তি এৰং পিটকৰসেনপি কথেতব্বং.

পুব্বে কির মহাথেরা ৰস্সূপনাযিকায ইমমেৰ সুত্তং পট্ঠপেন্তি. কিং কারণা? তীণি পিটকানি ৰিভজিত্ৰা কথেতুং লভিস্সামাতি. তেপিটকেন হি সমোধানেত্ৰা কথেন্তস্স দুক্কথিতন্তি ন সক্কা ৰত্তুং. তেপিটকং ভজাপেত্ৰা কথিতমেৰ ইদং সুত্তং সুকথিতং হোতীতি.

চতুসতিপট্ঠানৰণ্ণনা

২৮৯. কুসলস্সাধিগমাযাতি মগ্গকুসলস্স চেৰ ফলকুসলস্স চ অধিগমত্থায. উভযম্পি হেতং অনৰজ্জট্ঠেন খেমট্ঠেন ৰা কুসলমেৰ. তত্থ সম্মাসমাধিযতীতি তস্মিং অজ্ঝত্তকাযে সমাহিতো একগ্গচিত্তো হোতি. বহিদ্ধা পরকাযে ঞাণদস্সনং অভিনিব্বত্তেতীতি অত্তনো কাযতো পরস্স কাযাভিমুখং ঞাণং পেসেতি. এস নযো সব্বত্থ. সব্বত্থেৰ চ সতিমাতি পদেন কাযাদিপরিগ্গাহিকা সতি, লোকোতি পদেন পরিগ্গহিতকাযাদযোৰ লোকো. চত্তারো চেতে সতিপট্ঠানা লোকিযলোকুত্তরমিস্সকা কথিতাতি ৰেদিতব্বা.

সত্তসমাধিপরিক্খারৰণ্ণনা

২৯০. সমাধিপরিক্খারাতি এত্থ তযো পরিক্খারা. ‘‘রথো সীলপরিক্খারো ঝানক্খো চক্কৰীরিযো’’তি (সং. নি. ৫.৪) হি এত্থ অলঙ্কারো পরিক্খারো নাম. ‘‘সত্তহি নগরপরিক্খারেহি সুপরিক্খতং হোতী’’তি (অ. নি. ৭.৬৭) এত্থ পরিৰারো পরিক্খারো নাম. ‘‘গিলানপচ্চযজীৰিতপরিক্খারো’’তি (দী. নি. ৩.১৮২) এত্থ সম্ভারো পরিক্খারো নাম. ইধ পন পরিৰারপরিক্খারৰসেন ‘‘সত্ত সমাধিপরিক্খারা’’তি ৰুত্তং. পরিক্খতাতি পরিৰারিতা. অযং ৰুচ্চতি সো অরিযো সম্মাসমাধীতি অযং সত্তহি রতনেহি পরিৰুতো চক্কৰত্তী ৰিয সত্তহি অঙ্গেহি পরিৰুতো ‘‘অরিযো সম্মাসমাধী’’তি ৰুচ্চতি. সউপনিসো ইতিপীতি সউপনিস্সযো ইতিপি ৰুচ্চতি, সপরিৰারো যেৰাতি ৰুত্তং হোতি. সম্মাদিট্ঠিস্সাতি সম্মাদিট্ঠিযং ঠিতস্স. সম্মাসঙ্কপ্পো পহোতীতি সম্মাসঙ্কপ্পো পৰত্ততি. এস নযো সব্বপদেসু. অযং পনত্থো মগ্গৰসেনাপি ফলৰসেনাপি ৰেদিতব্বো. কথং? মগ্গসম্মাদিট্ঠিযং ঠিতস্স মগ্গসম্মাসঙ্কপ্পো পহোতি…পে… মগ্গঞাণে ঠিতস্স মগ্গৰিমুত্তি পহোতি. তথা ফলসম্মাদিট্ঠিযং ঠিতস্স ফলসম্মাসঙ্কপ্পো পহোতি…পে… ফলসম্মাঞাণে ঠিতস্স ফলৰিমুত্তি পহোতীতি.

স্ৰাক্খাতোতিআদীনি ৰিসুদ্ধিমগ্গে ৰণ্ণিতানি. অপারুতাতি ৰিৰটা. অমতস্সাতি নিব্বানস্স. দ্ৰারাতি পৰেসনমগ্গা. অৰেচ্চপ্পসাদেনাতি অচলপ্পসাদেন. ধম্মৰিনীতাতি সম্মানিয্যানেন নিয্যাতা.

অত্থাযং ইতরা পজাতি অনাগামিনো সন্ধাযাহ, অনাগামিনো চ অত্থীতি ৰুত্তং হোতি. পুঞ্ঞভাগাতি পুঞ্ঞকোট্ঠাসেন নিব্বত্তা. ওত্তপ্পন্তি ওত্তপ্পমানো. তেন কদাচি নাম মুসা অস্সাতি মুসাৰাদভযেন সঙ্খাতুং ন সক্কোমি, ন পন মম সঙ্খাতুং বলং নত্থীতি দীপেতি.

২৯১. তং কিং মঞ্ঞতি ভৰন্তি ইমিনা কেৰলং ৰেস্সৰণং পুচ্ছতি, ন পনস্স এৰরূপো সত্থা নাহোসীতি ৰা ন ভৰিস্সতীতি ৰা লদ্ধি অত্থি. সব্ববুদ্ধানঞ্হি অভিসমযে ৰিসেসো নত্থি.

২৯২. সযংপরিসাযন্তি অত্তনো পরিসাযং. তযিদং ব্রহ্মচরিযন্তি তং ইদং সকলং সিক্খত্তযব্রহ্মচরিযং. সেসং উত্তানমেৰ. ইমানি পন পদানি ধম্মসঙ্গাহকত্থেরেহি ঠপিতানীতি.

ইতি সুমঙ্গলৰিলাসিনিযা দীঘনিকাযট্ঠকথাযং

জনৰসভসুত্তৰণ্ণনা নিট্ঠিতা.