ধাতুথূপপূজাৰণ্ণনা

২৩৯. রাজগহে ভগৰতো সরীরানং থূপঞ্চ মহঞ্চ অকাসীতি কথং অকাসি? কুসিনারতো যাৰ রাজগহং পঞ্চৰীসতি যোজনানি, এত্থন্তরে অট্ঠউসভৰিত্থতং সমতলং মগ্গং কারেত্ৰা যাদিসং মল্লরাজানো মকুটবন্ধনস্স চ সন্থাগারস্স চ অন্তরে পূজং কারেসুং. তাদিসং পঞ্চৰীসতিযোজনেপি মগ্গে পূজং কারেত্ৰা লোকস্স অনুক্কণ্ঠনত্থং সব্বত্থ অন্তরাপণে পসারেত্ৰা সুৰণ্ণদোণিযং পক্খিত্তধাতুযো সত্তিপঞ্জরেন পরিক্খিপাপেত্ৰা অত্তনো ৰিজিতে পঞ্চযোজনসতপরিমণ্ডলে মনুস্সে সন্নিপাতাপেসি. তে ধাতুযো গহেত্ৰা কুসিনারতো সাধুকীল়িতং কীল়ন্তা নিক্খমিত্ৰা যত্থ যত্থ সুৰণ্ণৰণ্ণানি পুপ্ফানি পস্সন্তি, তত্থ তত্থ ধাতুযো সত্তিঅন্তরে ঠপেত্ৰা পূজং অকংসু. তেসং পুপ্ফানং খীণকালে গচ্ছন্তি, রথস্স ধুরট্ঠানং পচ্ছিমট্ঠানে সম্পত্তে সত্ত দিৰসে সাধুকীল়িতং কীল়ন্তি. এৰং ধাতুযো গহেত্ৰা আগচ্ছন্তানং সত্ত ৰস্সানি সত্ত মাসানি সত্ত দিৰসানি ৰীতিৰত্তানি.

মিচ্ছাদিট্ঠিকা – ‘‘সমণস্স গোতমস্স পরিনিব্বুতকালতো পট্ঠায বলক্কারেন সাধুকীল়িতায উপদ্দুতম্হ সব্বে নো কম্মন্তা নট্ঠা’’তি উজ্ঝাযন্তা মনং পদোসেত্ৰা ছল়াসীতিসহস্সমত্তা অপাযে নিব্বত্তা. খীণাসৰা আৰজ্জিত্ৰা ‘‘মহাজনো মনং পদোসেত্ৰা অপাযে নিব্বত্তী’’তি দিস্ৰা – ‘‘সক্কং দেৰরাজানং ধাতুআহরণূপাযং কারেস্সামা’’তি তস্স সন্তিকং গন্ত্ৰা তমত্থং আরোচেত্ৰা – ‘‘ধাতুআহরণূপাযং করোহি মহারাজা’’তি আহংসু. সক্কো আহ – ‘‘ভন্তে, পুথুজ্জনো নাম অজাতসত্তুনা সমো সদ্ধো নত্থি, ন সো মম ৰচনং করিস্সতি, অপিচ খো মারৰিভিংসকসদিসং ৰিভিংসকং দস্সেস্সামি, মহাসদ্দং সাৰেস্সামি, যক্খগাহকখিপিতকঅরোচকে করিস্সামি, তুম্হে ‘অমনুস্সা মহারাজ কুপিতা ধাতুযো আহরাপেথা’তি ৰদেয্যাথ, এৰং সো আহরাপেস্সতী’’তি. অথ খো সক্কো তং সব্বং অকাসি.

থেরাপি রাজানং উপসঙ্কমিত্ৰা – ‘‘মহারাজ, অমনুস্সা কুপিতা, ধাতুযো আহরাপেহী’’তি ভণিংসু. রাজা – ‘‘ন তাৰ, ভন্তে, ময্হং চিত্তং তুস্সতি, এৰং সন্তেপি আহরন্তূ’’তি আহ. সত্তমদিৰসে ধাতুযো আহরিংসু. এৰং আহতা ধাতুযো গহেত্ৰা রাজগহে থূপঞ্চ মহঞ্চ অকাসি. ইতরেপি অত্তনো অত্তনো বলানুরূপেন আহরিত্ৰা সকসকট্ঠানেসু থূপঞ্চ মহঞ্চ অকংসু.

২৪০. এৰমেতং ভূতপুব্বন্তি এৰং এতং ধাতুভাজনঞ্চেৰ দসথূপকরণঞ্চ জম্বুদীপে ভূতপুব্বন্তি পচ্ছা সঙ্গীতিকারকা আহংসু. এৰং পতিট্ঠিতেসু পন থূপেসু মহাকস্সপত্থেরো ধাতূনং অন্তরাযং দিস্ৰা রাজানং অজাতসত্তুং উপসঙ্কমিত্ৰা ‘‘মহারাজ, একং ধাতুনিধানং কাতুং ৰট্টতী’’তি আহ. সাধু, ভন্তে, নিধানকম্মং তাৰ মম হোতু, সেসধাতুযো পন কথং আহরামীতি? ন, মহারাজ, ধাতুআহরণং তুয্হং ভারো, অম্হাকং ভারোতি. সাধু, ভন্তে, তুম্হে ধাতুযো আহরথ, অহং ধাতুনিধানং করিস্সামীতি. থেরো তেসং তেসং রাজকুলানং পরিচরণমত্তমেৰ ঠপেত্ৰা সেসধাতুযো আহরি. রামগামে পন ধাতুযো নাগা পরিগ্গণ্হিংসু, তাসং অন্তরাযো নত্থি. ‘‘অনাগতে লঙ্কাদীপে মহাৰিহারে মহাচেতিযম্হি নিদহিস্সন্তী’’তি তা ন আহরিত্ৰা সেসেহি সত্তহি নগরেহি আহরিত্ৰা রাজগহস্স পাচীনদক্খিণদিসাভাগে ঠত্ৰা – ‘‘ইমস্মিং ঠানে যো পাসাণো অত্থি, সো অন্তরধাযতু, পংসু সুৰিসুদ্ধা হোতু, উদকং মা উট্ঠহতূ’’তি অধিট্ঠাসি.

রাজা তং ঠানং খণাপেত্ৰা ততো উদ্ধতপংসুনা ইট্ঠকা কারেত্ৰা অসীতিমহাসাৰকানং চেতিযানি কারেতি. ‘‘ইধ রাজা কিং কারেতী’’তি পুচ্ছন্তানম্পি ‘‘মহাসাৰকানং চেতিযানী’’তি ৰদন্তি, ন কোচি ধাতুনিধানভাৰং জানাতি. অসীতিহত্থগম্ভীরে পন তস্মিং পদেসে জাতে হেট্ঠা লোহসন্থারং সন্থরাপেত্ৰা তত্থ থূপারামে চেতিযঘরপ্পমাণং তম্বলোহমযং গেহং কারাপেত্ৰা অট্ঠ অট্ঠ হরিচন্দনাদিমযে করণ্ডে চ থূপে চ কারাপেসি. অথ ভগৰতো ধাতুযো হরিচন্দনকরণ্ডে পক্খিপিত্ৰা তং হরিচন্দনকরণ্ডকম্পি অঞ্ঞস্মিং হরিচন্দনকরণ্ডকে, তম্পি অঞ্ঞস্মিন্তি এৰং অট্ঠ হরিচন্দনকরণ্ডে একতো কত্ৰা এতেনেৰ উপাযেন তে অট্ঠ করণ্ডে অট্ঠসু হরিচন্দনথূপেসু, অট্ঠ হরিচন্দনথূপে অট্ঠসু লোহিতচন্দনকরণ্ডেসু, অট্ঠ লোহিতচন্দনকরণ্ডে অট্ঠসু লোহিতচন্দনথূপেসু, অট্ঠ লোহিতচন্দনথূপে অট্ঠসু দন্তকরণ্ডেসু, অট্ঠ দন্তকরণ্ডে অট্ঠসু দন্তথূপেসু, অট্ঠ দন্তথূপে অট্ঠসু সব্বরতনকরণ্ডেসু, অট্ঠ সব্বরতনকরণ্ডে অট্ঠসু সব্বরতনথূপেসু, অট্ঠ সব্বরতনথূপে অট্ঠসু সুৰণ্ণকরণ্ডেসু, অট্ঠ সুৰণ্ণকরণ্ডে, অট্ঠসু সুৰণ্ণথূপেসু, অট্ঠ সুৰণ্ণথূপে অট্ঠসু রজতকরণ্ডেসু, অট্ঠ রজতকরণ্ডে অট্ঠসু রজতথূপেসু, অট্ঠ রজতথূপে, অট্ঠসু মণিকরণ্ডেসু, অট্ঠ মণিকরণ্ডে অট্ঠসু মণিথূপেসু, অট্ঠ মণিথূপে অট্ঠসু লোহিতঙ্ককরণ্ডেসু, অট্ঠ লোহিতঙ্ককরণ্ডে অট্ঠসু লোহিতঙ্কথূপেসু, অট্ঠ লোহিতঙ্কথূপে অট্ঠসু মসারগল্লকরণ্ডেসু, অট্ঠ মসারগল্লকরণ্ডে অট্ঠসু মসারগল্লথূপেসু, অট্ঠ মসারগল্লথূপে অট্ঠসু ফলিককরণ্ডেসু, অট্ঠ ফলিককরণ্ডে অট্ঠসু ফলিকমযথূপেসু পক্খিপি.

সব্বেসং উপরিমং ফলিকচেতিযং থূপারামচেতিযপ্পমাণং অহোসি, তস্স উপরি সব্বরতনমযং গেহং কারেসি, তস্স উপরি সুৰণ্ণমযং, তস্স উপরি রজতমযং, তস্স উপরি তম্বলোহমযং গেহং. তত্থ সব্বরতনমযং ৰালিকং ওকিরিত্ৰা জলজথলজপুপ্ফানং সহস্সানি ৰিপ্পকিরিত্ৰা অড্ঢছট্ঠানি জাতকসতানি অসীতিমহাথেরে সুদ্ধোদনমহারাজানং মহামাযাদেৰিং সত্ত সহজাতেতি সব্বানেতানি সুৰণ্ণমযানেৰ কারেসি. পঞ্চপঞ্চসতে সুৰণ্ণরজতমযে পুণ্ণঘটে ঠপাপেসি, পঞ্চ সুৰণ্ণদ্ধজসতে উস্সাপেসি. পঞ্চসতে সুৰণ্ণদীপে, পঞ্চসতে রজতদীপে কারাপেত্ৰা সুগন্ধতেলস্স পূরেত্ৰা তেসু দুকূলৰট্টিযো ঠপেসি.

অথাযস্মা মহাকস্সপো – ‘‘মালা মা মিলাযন্তু, গন্ধা মা ৰিনস্সন্তু, দীপা মা ৰিজ্ঝাযন্তূ’’তি অধিট্ঠহিত্ৰা সুৰণ্ণপট্টে অক্খরানি ছিন্দাপেসি –

‘‘অনাগতে পিযদাসো নাম কুমারো ছত্তং উস্সাপেত্ৰা অসোকো ধম্মরাজা ভৰিস্সতি. সো ইমা ধাতুযো ৰিত্থারিকা করিস্সতী’’তি.

রাজা সব্বপসাধনেহি পূজেত্ৰা আদিতো পট্ঠায দ্ৰারং পিদহন্তো নিক্খমি, সো তম্বলোহদ্ৰারং পিদহিত্ৰা আৰিঞ্ছনরজ্জুযং কুঞ্চিকমুদ্দিকং বন্ধিত্ৰা তত্থেৰ মহন্তং মণিক্খন্ধং ঠপেত্ৰা – ‘‘অনাগতে দলিদ্দরাজা ইমং মণিং গহেত্ৰা ধাতূনং সক্কারং করোতূ’’তি অক্খরং ছিন্দাপেসি.

সক্কো দেৰরাজা ৰিস্সকম্মং আমন্তেত্ৰা – ‘‘তাত, অজাতসত্তুনা ধাতুনিধানং কতং, এত্থ আরক্খং পট্ঠপেহী’’তি পহিণি. সো আগন্ত্ৰা ৰাল়সঙ্ঘাটযন্তং যোজেসি, কট্ঠরূপকানি তস্মিং ধাতুগব্ভে ফলিকৰণ্ণখগ্গে গাহেত্ৰা ৰাতসদিসেন ৰেগেন অনুপরিযাযন্তং যন্তং যোজেত্ৰা একায এৰ আণিযা বন্ধিত্ৰা সমন্ততো গিঞ্জকাৰসথাকারেন সিলাপরিক্খেপং কত্ৰা উপরি একায পিদহিত্ৰা পংসুং পক্খিপিত্ৰা ভূমিং সমং কত্ৰা তস্স উপরি পাসাণথূপং পতিট্ঠপেসি. এৰং নিট্ঠিতে ধাতুনিধানে যাৰতাযুকং ঠত্ৰা থেরোপি পরিনিব্বুতো, রাজাপি যথাকম্মং গতো, তেপি মনুস্সা কালঙ্কতা.

অপরভাগে পিযদাসো নাম কুমারো ছত্তং উস্সাপেত্ৰা অসোকো নাম ধম্মরাজা হুত্ৰা তা ধাতুযো গহেত্ৰা জম্বুদীপে ৰিত্থারিকা অকাসি. কথং? সো নিগ্রোধসামণেরং নিস্সায সাসনে লদ্ধপ্পসাদো চতুরাসীতি ৰিহারসহস্সানি কারেত্ৰা ভিক্খুসঙ্ঘং পুচ্ছি – ‘‘ভন্তে, মযা চতুরাসীতি ৰিহারসহস্সানি কারিতানি, ধাতুযো কুতো লভিস্সামী’’তি? মহারাজ, – ‘‘ধাতুনিধানং নাম অত্থী’’তি সুণোম, ন পন পঞ্ঞাযতি – ‘‘অসুকস্মিং ঠানে’’তি. রাজা রাজগহে চেতিযং ভিন্দাপেত্ৰা ধাতুং অপস্সন্তো পটিপাকতিকং কারেত্ৰা ভিক্খুভিক্খুনিযো উপাসকউপাসিকাযোতি চতস্সো পরিসা গহেত্ৰা ৰেসালিং গতো. তত্রাপি অলভিত্ৰা কপিলৰত্থুং. তত্রাপি অলভিত্ৰা রামগামং গতো. রামগামে নাগা চেতিযং ভিন্দিতুং ন অদংসু, চেতিযে নিপতিতকুদালো খণ্ডাখণ্ডং হোতি. এৰং তত্রাপি অলভিত্ৰা অল্লকপ্পং ৰেঠদীপং পাৰং কুসিনারন্তি সব্বত্থ চেতিযানি ভিন্দিত্ৰা ধাতুং অলভিত্ৰাৰ পটিপাকতিকানি কত্ৰা পুন রাজগহং গন্ত্ৰা চতস্সো পরিসা সন্নিপাতাপেত্ৰা – ‘‘অত্থি কেনচি সুতপুব্বং ‘অসুকট্ঠানে নাম ধাতুনিধান’ন্তি’’ পুচ্ছি.

তত্রেকো ৰীসৰস্সসতিকো থেরো – ‘‘অসুকট্ঠানে ধাতুনিধান’’ন্তি ন জানামি, ময্হং পন পিতা মহাথেরো মং সত্তৰস্সকালে মালাচঙ্কোটকং গাহাপেত্ৰা – ‘‘এহি সামণের, অসুকগচ্ছন্তরে পাসাণথূপো অত্থি, তত্থ গচ্ছামা’’তি গন্ত্ৰা পূজেত্ৰা – ‘‘ইমং ঠানং উপধারেতুং ৰট্টতি সামণেরা’’তি আহ. অহং এত্তকং জানামি মহারাজাতি আহ. রাজা ‘‘এতদেৰ ঠান’’ন্তি ৰত্ৰা গচ্ছে হারেত্ৰা পাসাণথূপঞ্চ পংসুঞ্চ অপনেত্ৰা হেট্ঠা সুধাভূমিং অদ্দস. ততো সুধঞ্চ ইট্ঠকাযো চ হারেত্ৰা অনুপুব্বেন পরিৰেণং ওরুয্হ সত্তরতনৰালুকং অসিহত্থানি চ কট্ঠরূপকানি সম্পরিৰত্তকানি অদ্দস. সো যক্খদাসকে পক্কোসাপেত্ৰা বলিকম্মং কারেত্ৰাপি নেৰ অন্তং ন কোটিং পস্সন্তো দেৰতানং নমস্সমানো – ‘‘অহং ইমা ধাতুযো গহেত্ৰা চতুরাসীতিযা ৰিহারসহস্সেসু নিদহিত্ৰা সক্কারং করোমি, মা মে দেৰতা অন্তরাযং করোন্তূ’’তি আহ.

সক্কো দেৰরাজা চারিকং চরন্তো তং দিস্ৰা ৰিস্সকম্মং আমন্তেসি – ‘‘তাত, অসোকো ধম্মরাজা ‘ধাতুযো নীহরিস্সামী’তি পরিৰেণং ওতিণ্ণো, গন্ত্ৰা কট্ঠরূপকানি হারেহী’’তি. সো পঞ্চচূল়গামদারকৰেসেন গন্ত্ৰা রঞ্ঞো পুরতো ধনুহত্থো ঠত্ৰা – ‘‘হরামি মহারাজা’’তি আহ. ‘‘হর, তাতা’’তি সরং গহেত্ৰা সন্ধিম্হিযেৰ ৰিজ্ঝি, সব্বং ৰিপ্পকিরিযিত্থ. অথ রাজা আৰিঞ্ছনে বন্ধং কুঞ্চিকমুদ্দিকং গণ্হি, মণিক্খন্ধং পস্সি. ‘‘অনাগতে দলিদ্দরাজা ইমং মণিং গহেত্ৰা ধাতূনং সক্কারং করোতূ’’তি পুন অক্খরানি দিস্ৰা কুজ্ঝিত্ৰা – ‘‘মাদিসং নাম রাজানং দলিদ্দরাজাতি ৰত্তুং অযুত্ত’’ন্তি পুনপ্পুনং ঘটেত্ৰা দ্ৰারং ৰিৰরাপেত্ৰা অন্তোগেহং পৰিট্ঠো.

অট্ঠারসৰস্সাধিকানং দ্ৰিন্নং ৰস্সসতানং উপরি আরোপিতদীপা তথেৰ পজ্জলন্তি. নীলুপ্পলপুপ্ফানি তঙ্খণং আহরিত্ৰা আরোপিতানি ৰিয, পুপ্ফসন্থারো তঙ্খণং সন্থতো ৰিয, গন্ধা তং মুহুত্তং পিসিত্ৰা ঠপিতা ৰিয রাজা সুৰণ্ণপট্টং গহেত্ৰা – ‘‘অনাগতে পিযদাসো নাম কুমারো ছত্তং উস্সাপেত্ৰা অসোকো নাম ধম্মরাজা ভৰিস্সতি সো ইমা ধাতুযো ৰিত্থারিকা করিস্সতী’’তি ৰাচেত্ৰা – ‘‘দিট্ঠো ভো, অহং অয্যেন মহাকস্সপত্থেরেনা’’তি ৰত্ৰা ৰামহত্থং আভুজিত্ৰা দক্খিণেন হত্থেন অপ্ফোটেসি. সো তস্মিং ঠানে পরিচরণধাতুমত্তমেৰ ঠপেত্ৰা সেসা ধাতুযো গহেত্ৰা ধাতুগেহং পুব্বে পিহিতনযেনেৰ পিদহিত্ৰা সব্বং যথাপকতিযাৰ কত্ৰা উপরি পাসাণচেতিযং পতিট্ঠাপেত্ৰা চতুরাসীতিযা ৰিহারসহস্সেসু ধাতুযো পতিট্ঠাপেত্ৰা মহাথেরে ৰন্দিত্ৰা পুচ্ছি – ‘‘দাযাদোম্হি, ভন্তে, বুদ্ধসাসনে’’তি. কিস্স দাযাদো ত্ৰং, মহারাজ, বাহিরকো ত্ৰং সাসনস্সাতি. ভন্তে, ছন্নৰুতিকোটিধনং ৰিস্সজ্জেত্ৰা চতুরাসীতি ৰিহারসহস্সানি কারেত্ৰা অহং ন দাযাদো, অঞ্ঞো কো দাযাদোতি? পচ্চযদাযকো নাম ত্ৰং মহারাজ, যো পন অত্তনো পুত্তঞ্চ ধীতরঞ্চ পব্বাজেতি, অযং সাসনে দাযাদো নামাতি. সো পুত্তঞ্চ ধীতরঞ্চ পব্বাজেসি. অথ নং থেরা আহংসু – ‘‘ইদানি, মহারাজ, সাসনে দাযাদোসী’’তি.

এৰমেতং ভূতপুব্বন্তি এৰং এতং অতীতে ধাতুনিধানম্পি জম্বুদীপতলে ভূতপুব্বন্তি. ততিযসঙ্গীতিকারাপি ইমং পদং ঠপযিংসু.

অট্ঠদোণং চক্খুমতো সরীরন্তিআদিগাথাযো পন তম্বপণ্ণিদীপে থেরেহি ৰুত্তাতি.

ইতি সুমঙ্গলৰিলাসিনিযা দীঘনিকাযট্ঠকথাযং

মহাপরিনিব্বানসুত্তৰণ্ণনা নিট্ঠিতা.