কম্মারপুত্তচুন্দৰত্থুৰণ্ণনা

১৮৯. কম্মারপুত্তস্সাতি সুৰণ্ণকারপুত্তস্স. সো কির অড্ঢো মহাকুটুম্বিকো ভগৰতো পঠমদস্সনেনেৰ সোতাপন্নো হুত্ৰা অত্তনো অম্বৰনে ৰিহারং কারাপেত্ৰা নিয্যাতেসি. তং সন্ধায ৰুত্তং – ‘‘অম্বৰনে’’তি.

সূকরমদ্দৰন্তি নাতিতরুণস্স নাতিজিণ্ণস্স একজেট্ঠকসূকরস্স পৰত্তমংসং. তং কির মুদু চেৰ সিনিদ্ধঞ্চ হোতি, তং পটিযাদাপেত্ৰা সাধুকং পচাপেত্ৰাতি অত্থো. একে ভণন্তি – ‘‘সূকরমদ্দৰন্তি পন মুদুওদনস্স পঞ্চগোরসযূসপাচনৰিধানস্স নামেতং, যথা গৰপানং নাম পাকনাম’’ন্তি. কেচি ভণন্তি – ‘‘সূকরমদ্দৰং নাম রসাযনৰিধি, তং পন রসাযনসত্থে আগচ্ছতি, তং চুন্দেন – ‘ভগৰতো পরিনিব্বানং ন ভৰেয্যা’তি রসাযনং পটিযত্ত’’ন্তি. তত্থ পন দ্ৰিসহস্সদীপপরিৰারেসু চতূসু মহাদীপেসু দেৰতা ওজং পক্খিপিংসু.

নাহং তন্তি ইমং সীহনাদং কিমত্থং নদতি? পরূপৰাদমোচনত্থং. অত্তনা পরিভুত্তাৰসেসং নেৰ ভিক্খূনং, ন মনুস্সানং দাতুং অদাসি, আৰাটে নিখণাপেত্ৰা ৰিনাসেসীতি হি ৰত্তুকামানং ইদং সুত্ৰা ৰচনোকাসো ন ভৰিস্সতীতি পরেসং উপৰাদমোচনত্থং সীহনাদং নদতীতি.

১৯০. ভুত্তস্স চ সূকরমদ্দৰেনাতি ভুত্তস্স উদপাদি, ন পন ভুত্তপচ্চযা. যদি হি অভুত্তস্স উপ্পজ্জিস্সথ, অতিখরো ভৰিস্সতি. সিনিদ্ধভোজনং ভুত্তত্তা পনস্স তনুৰেদনা অহোসি. তেনেৰ পদসা গন্তুং অসক্খি. ৰিরেচমানোতি অভিণ্হং পৰত্তলোহিতৰিরেচনোৰ সমানো. অৰোচাতি অত্তনা পত্থিতট্ঠানে পরিনিব্বানত্থায এৰমাহ. ইমা পন ধম্মসঙ্গাহকত্থেরেহি ঠপিতগাথাযোতি ৰেদিতব্বা.