দেৰতারোচনৰণ্ণনা

৯১. এত্তাৰতা চ ইমিনা ৰিপস্সিস্স ভগৰতো অপদানানুসারেন ৰিত্থারকথনেন – ‘‘তথাগতস্সেৰেসা, ভিক্খৰে, ধম্মধাতু সুপ্পটিৰিদ্ধা’’তি এৰং ৰুত্তায ধম্মধাতুযা সুপ্পটিৰিদ্ধভাৰং পকাসেত্ৰা ইদানি – ‘‘দেৰতাপি তথাগতস্স এতমত্থং আরোচেসু’’ন্তি ৰুত্তং দেৰতারোচনং পকাসেতুং একমিদাহন্তিআদিমাহ.

তত্থ সুভগৰনেতি এৰংনামকে ৰনে. সালরাজমূলেতি ৰনপ্পতিজেট্ঠকস্স মূলে. কামচ্ছন্দং ৰিরাজেত্ৰাতি অনাগামিমগ্গেন মূলসমুগ্ঘাতৰসেন ৰিরাজেত্ৰা. যথা চ ৰিপস্সিস্স, এৰং সেসবুদ্ধানম্পি সাসনে ৰুত্থব্রহ্মচরিযা দেৰতা আরোচযিংসু, পাল়ি পন ৰিপস্সিস্স চেৰ অম্হাকঞ্চ ভগৰতো ৰসেন আগতা.

তত্থ অত্তনো সম্পত্তিযা ন হাযন্তি, ন ৰিহাযন্তীতি অৰিহা. ন কঞ্চি সত্তং তপন্তীতি অতপ্পা. সুন্দরদস্সনা অভিরূপা পাসাদিকাতি সুদস্সা. সুট্ঠু পস্সন্তি, সুন্দরমেতেসং ৰা দস্সনন্তি সুদস্সী. সব্বেহেৰ চ সগুণেহি ভৰসম্পত্তিযা চ জেট্ঠা, নত্থেত্থ কনিট্ঠাতি অকনিট্ঠা.

ইধ ঠত্ৰা ভাণৰারা সমোধানেতব্বা. ইমস্মিঞ্হি সুত্তে ৰিপস্সিস্স ভগৰতো অপদানৰসেন তযো ভাণৰারা ৰুত্তা. যথা চ ৰিপস্সিস্স, এৰং সিখীআদীনম্পি অপদানৰসেন ৰুত্তাৰ. পাল়ি পন সঙ্খিত্তা. ইতি সত্তন্নং বুদ্ধানং ৰসেন অম্হাকং ভগৰতা একৰীসতি ভাণৰারা কথিতা. তথা অৰিহেহি. তথা অতপ্পেহি. তথা সুদস্সেহি. তথা সুদস্সীহি. তথা অকনিট্ঠেহীতি সব্বম্পি ছব্বীসতিভাণৰারসতং হোতি. তেপিটকে বুদ্ধৰচনে অঞ্ঞং সুত্তং ছব্বীসতিভাণৰারসতপরিমাণং নাম নত্থি, সুত্তন্তরাজা নাম অযং সুত্তন্তোতি ৰেদিতব্বো. ইতো পরং অনুসন্ধিদ্ৰযম্পি নিয্যাতেন্তো ইতি খো ভিক্খৰেতিআদিমাহ. তং সব্বং উত্তানমেৰাতি.

ইতি সুমঙ্গলৰিলাসিনিযা দীঘনিকাযট্ঠকথাযং

মহাপদানসুত্তৰণ্ণনা নিট্ঠিতা.