চারিকাঅনুজাননৰণ্ণনা

৮৫. পরিৰিতক্কো উদপাদীতি কদা উদপাদি? সম্বোধিতো সত্ত সংৰচ্ছরানি সত্ত মাসে সত্ত দিৰসে অতিক্কমিত্ৰা উদপাদি. ভগৰা কির পিতুসঙ্গহং করোন্তো ৰিহাসি. রাজাপি চিন্তেসি – ‘‘ময্হং জেট্ঠপুত্তো নিক্খমিত্ৰা বুদ্ধো জাতো, দুতিযপুত্তো মে নিক্খমিত্ৰা অগ্গসাৰকো জাতো, পুরোহিতপুত্তো দুতিযঅগ্গসাৰকো, ইমে চ অৰসেসা ভিক্খূ গিহিকালেপি ময্হং পুত্তমেৰ পরিৰারেত্ৰা ৰিচরিংসু. ইমে সব্বে ইদানিপি ময্হংযেৰ ভারো, অহমেৰ চ নে চতূহি পচ্চযেহি উপট্ঠহিস্সামি, অঞ্ঞেসং ওকাসং ন দস্সামী’’তি ৰিহারদ্ৰারকোট্ঠকতো পট্ঠায যাৰ রাজগেহদ্ৰারা উভযতো খদিরপাকারং কারাপেত্ৰা কিলঞ্জেহি ছাদাপেত্ৰা ৰত্থেহি পটিচ্ছাদাপেত্ৰা উপরি চ ছাদাপেত্ৰা সুৰণ্ণতারকৰিচিত্তং সমোলম্বিততালক্খন্ধমত্তং ৰিৰিধপুপ্ফদামৰিতানং কারাপেত্ৰা হেট্ঠা ভূমিযং চিত্তত্থরণেহি সন্থরাপেত্ৰা অন্তো উভোসু পস্সেসু মালাৰচ্ছকে পুণ্ণঘটে, সকলমগ্গৰাসত্থায চ গন্ধন্তরে পুপ্ফানি পুপ্ফন্তরে গন্ধে চ ঠপাপেত্ৰা ভগৰতো কালং আরোচাপেসি.

ভগৰা ভিক্খুসঙ্ঘপরিৰুতো অন্তোসাণিযাৰ রাজগেহংগন্ত্ৰা ভত্তকিচ্চং কত্ৰা ৰিহারং পচ্চাগচ্ছতি. অঞ্ঞো কোচি দট্ঠুম্পি ন লভতি, কুতো পন ভিক্খং ৰা দাতুং, পূজং ৰা কাতুং, ধম্মং ৰা সোতুং. নাগরা চিন্তেসুং – ‘‘অজ্জ সত্থু লোকে উপ্পন্নস্স সত্তমাসাধিকানি সত্তসংৰচ্ছরানি, মযঞ্চ দট্ঠুম্পি ন লভাম, পগেৰ ভিক্খং ৰা দাতুং, পূজং ৰা কাতুং, ধম্মং ৰা সোতুং. রাজা – ‘ময্হমেৰ বুদ্ধো, ময্হমেৰ ধম্মো, ময্হমেৰ সঙ্ঘো’তি মমাযিত্ৰা সযমেৰ উপট্ঠহি. সত্থা চ উপ্পজ্জমানো সদেৰকস্স লোকস্স অত্থায হিতায উপ্পন্নো. ন হি রঞ্ঞোযেৰ নিরযো উণ্হো অস্স, অঞ্ঞেসং নীলুপ্পলৰনসদিসো. তস্মা রাজানং ৰদাম. সচে নো সত্থারং দেতি, ইচ্চেতং কুসলং. নো চে দেতি, রঞ্ঞা সদ্ধিং যুজ্ঝিত্ৰাপি সঙ্ঘং গহেত্ৰা দানাদীনি পুঞ্ঞানি করোম. ন সক্কা খো পন সুদ্ধনাগরেহেৰ এৰং কাতুং, একং জেট্ঠপুরিসম্পি গণ্হামা’’তি.

তে সেনাপতিং উপসঙ্কমিত্ৰা তস্সেতমত্থং আরোচেত্ৰা – ‘‘সামি, কিং অম্হাকং পক্খো হোসি, উদাহু রঞ্ঞো’’তি আহংসু. সো – ‘‘অহং তুম্হাকং পক্খো হোমি, অপি চ খো পন পঠমদিৰসো ময্হং দাতব্বো’’তি. তে সম্পটিচ্ছিংসু. সো রাজানং উপসঙ্কমিত্ৰা – ‘‘নাগরা, দেৰ, তুম্হাকং কুপিতা’’তি আহ. কিমত্থং তাতাতি? সত্থারং কির তুম্হেযেৰ উপট্ঠহথ, অম্হে ন লভামাতি. সচে ইদানিপি লভন্তি, ন কুপ্পন্তি, অলভন্তা তুম্হেহি সদ্ধিং যুজ্ঝিতুকামা দেৰাতি. যুজ্ঝামি, তাত, নাহং ভিক্খুসঙ্ঘং দেমীতি. দেৰ তুম্হাকং দাসা তুম্হেহি সদ্ধিং যুজ্ঝামাতি ৰদন্তি, তুম্হে কং গণ্হিত্ৰা যুজ্ঝিস্সথাতি? ননু ত্ৰং সেনাপতীতি? নাগরেহি ৰিনা ন সমত্থো অহং দেৰাতি. ততো রাজা – ‘‘বলৰন্তো নাগরা, সেনাপতিপি তেসঞ্ঞেৰ পক্খো’’তি ঞত্ৰা ‘‘অঞ্ঞানিপি সত্তমাসাধিকানি সত্তসংৰচ্ছরানি ময্হং ভিক্খুসঙ্ঘং দদন্তূ’’তি আহ. নাগরা ন সম্পটিচ্ছিংসু. রাজা – ‘‘ছ ৰস্সানি, পঞ্চ, চত্তারি, তীণি, দ্ৰে, একৰস্স’’ন্তি হাপেসি. এৰং হাপেন্তেপি ন সম্পটিচ্ছিংসু. অঞ্ঞে সত্ত দিৰসে যাচি. নাগরা – ‘‘অতিকক্খল়ং দানি রঞ্ঞা সদ্ধিং কাতুং ন ৰট্টতী’’তি অনুজানিংসু.

রাজা সত্তমাসাধিকানং সত্তন্নং সংৰচ্ছরানং সজ্জিতং দানমুখং সত্তন্নমেৰ দিৰসানং ৰিস্সজ্জেত্ৰা ছ দিৰসে কেসঞ্চি অপস্সন্তানংযেৰ দানং দত্ৰা সত্তমে দিৰসে নাগরে পক্কোসাপেত্ৰা – ‘‘সক্খিস্সথ, তাত, এৰরূপং দানং দাতু’’ন্তি আহ. তেপি – ‘‘ননু অম্হেযেৰ নিস্সায তং দেৰস্স উপ্পন্ন’’ন্তি ৰত্ৰা – ‘‘সক্খিস্সামা’’তি আহংসু. রাজা পিট্ঠিহত্থেন অস্সূনি পুঞ্ছমানো ভগৰন্তং ৰন্দিত্ৰা – ‘‘ভন্তে, অহং অট্ঠসট্ঠিভিক্খুসতসহস্সং অঞ্ঞস্স ৰারং অকত্ৰা যাৰজীৰং চতূহি পচ্চযেহি উপট্ঠহিস্সামীতি চিন্তেসিং. নাগরা ন দানি মে অনুঞ্ঞাতা, নাগরা হি ‘মযং দানং দাতুং ন লভামা’তি কুপ্পন্তি. ভগৰা স্ৰে পট্ঠায তেসং অনুগ্গহং করোথা’’তি আহ.

অথ দুতিযদিৰসে সেনাপতি মহাদানং সজ্জেত্ৰা – ‘‘অজ্জ যথা অঞ্ঞো কোচি একভিক্খম্পি ন দেতি, এৰং রক্খথা’’তি সমন্তা পুরিসে ঠপেসি. তং দিৰসং সেট্ঠিভরিযা রোদমানা ধীতরং আহ – ‘‘সচে, অম্ম, তৰ পিতা জীৰেয্য, অজ্জাহং পঠমং দসবলং ভোজেয্য’’ন্তি. সা তং আহ – ‘‘অম্ম, মা চিন্তযি, অহং তথা করিস্সামি যথা বুদ্ধপ্পমুখো ভিক্খুসঙ্ঘো পঠমং অম্হাকং ভিক্খং পরিভুঞ্জিস্সতী’’তি. ততো সতসহস্সগ্ঘনিকায সুৰণ্ণপাতিযা নিরুদকপাযাসস্স পূরেত্ৰা সপ্পিমধুসক্করাদীহি অভিসঙ্খরিত্ৰা অঞ্ঞায পাতিযা পটিকুজ্জিত্ৰা তং সুমনমালাগুল়েহি পরিক্খিপিত্ৰা মালাগুল়সদিসং কত্ৰা ভগৰতো গামং পৰিসনৰেলায সযমেৰ উক্খিপিত্ৰা দাসিগণপরিৰুতা নগরা নিক্খমি. অন্তরামগ্গে সেনাপতিউপট্ঠাকা – ‘‘অম্ম, মা ইতো অগমা’’তি ৰদন্তি. মহাপুঞ্ঞা নাম মনাপকথা হোন্তি, ন চ তেসং পুনপ্পুনং ভণন্তানং কথা পটিক্খিপিতুং সক্কা হোতি. সা – ‘‘চূল়পিতা মহাপিতা মাতুলা কিস্স তুম্হে গন্তুং ন দেথা’’তি আহ. সেনাপতিনা – ‘‘অঞ্ঞস্স কস্সচি খাদনীযভোজনীযং দাতুং মা দেথা’’তি ঠপিতম্হ অম্মাতি. কিং পন মে হত্থে খাদনীযং ভোজনীযং পস্সথাতি? মালাগুল়ং পস্সামাতি. কিং তুম্হাকং সেনাপতি মালাগুল়পূজম্পি কাতুং ন দেতীতি? দেতি, অম্মাতি. তেন হি, অপেথ, অপেথাতি ভগৰন্তং উপসঙ্কমিত্ৰা মালাগুল়ং গণ্হাপেথ ভগৰাতি আহ. ভগৰা একং সেনাপতিস্সুপট্ঠাকং ওলোকেত্ৰা মালাগুল়ং গণ্হাপেসি. সা ভগৰন্তং ৰন্দিত্ৰা – ‘‘ভগৰা, ভৰাভৰে নিব্বত্তিযং মে সতি পরিতস্সনজীৰিতং নাম মা হোতু, অযং সুমনমালা ৰিয নিব্বত্তনিব্বত্তট্ঠানে পিযাৰ হোমি, নামেন চ সুমনা যেৰা’’তি পত্থনং কত্ৰা সত্থারা – ‘‘সুখিনী হোহী’’তি ৰুত্তা ৰন্দিত্ৰা পদক্খিণং কত্ৰা পক্কামি.

ভগৰা সেনাপতিস্স গেহং গন্ত্ৰা পঞ্ঞত্তাসনে নিসীদি. সেনাপতি যাগুং গহেত্ৰা উপগঞ্ছি, সত্থা পত্তং পিদহি. নিসিন্নো, ভন্তে, ভিক্খুসঙ্ঘোতি. অত্থি নো একো অন্তরা পিণ্ডপাতো লদ্ধোতি. সো মালং অপনেত্ৰা পিণ্ডপাতং অদ্দস. চূল়ুপট্ঠাকো আহ – ‘‘সামি, মালাতি মং ৰত্ৰা মাতুগামো ৰঞ্চেসী’’তি. পাযাসো ভগৰন্তং আদিং কত্ৰা সব্বেসং ভিক্খূনং পহোতি. সেনাপতিপি অত্তনো দেয্যধম্মং অদাসি. সত্থা ভত্তকিচ্চং কত্ৰা মঙ্গলং ৰত্ৰা পক্কামি. সেনাপতি – ‘‘কা নাম সা পিণ্ডপাতমদাসী’’তি পুচ্ছি. সেট্ঠিধীতা, সামীতি. সপ্পঞ্ঞা সা ইত্থী, এৰরূপায ঘরে ৰসন্তিযা পুরিসস্স সগ্গসম্পত্তি নাম ন দুল্লভাতি তং আনেত্ৰা জেট্ঠিকট্ঠানে ঠপেসি.

পুনদিৰসে নাগরা দানমদংসু, পুনদিৰসে রাজাতি একন্তরিকায দানং দাতুং আরভিংসু. রাজাপি চরপুরিসে ঠপেত্ৰা নাগরেহি দিন্নদানতো অতিরেকতরং দেতি, নাগরাপি তথেৰ কত্ৰা রঞ্ঞা দিন্নদানতো অতিরেকতরং. রাজগেহে নাটকিত্থিযো দহরসামণেরে ৰদন্তি – ‘‘গণ্হথ, তাতা, ন গহপতিকানং গত্তৰত্থাদীসু পুঞ্ছিত্ৰা বাল়দারকানং খেল়সিঙ্ঘাণিকাদিধোৰনহত্থেহি কতং, সুচিং পণীতং কত’’ন্তি. পুনদিৰসে নাগরাপি দদমানা ৰদন্তি – ‘‘গণ্হথ, তাতা, ন নগরগামনিগমাদীসু সঙ্কড্ঢিততণ্ডুলখীরদধিসপ্পিআদীহি, ন অঞ্ঞেসং জঙ্ঘসীসপিট্ঠিআদীনি ভঞ্জিত্ৰা আহরাপিতেহি কতং, জাতিসপ্পিখীরাদীহিযেৰ কত’’ন্তি. এৰং সত্তসু সংৰচ্ছরেসু সত্তসু মাসেসু সত্তসু দিৰসেসু চ অতিক্কন্তেসু অথ ভগৰতো অযং ৰিতক্কো উদপাদি. তেন ৰুত্তং – ‘‘সম্বোধিতো সত্ত সংৰচ্ছরানি সত্ত মাসানি সত্ত দিৰসানি অতিক্কমিত্ৰা উদপাদী’’তি.

৮৭. অঞ্ঞতরো মহাব্রহ্মাতি ধম্মদেসনং আযাচিতব্রহ্মাৰ.

৮৯. চতুরাসীতি আৰাসসহস্সানীতি চতুরাসীতি ৰিহারসহস্সানি. তে সব্বেপি দ্ৰাদসসহস্সভিক্খুগণ্হনকা মহাৰিহারা অভযগিরিচেতিযপব্বতচিত্তলপব্বতমহাৰিহারসদিসাৰ অহেসুং.

৯০. খন্তী পরমং তপোতি অধিৰাসনখন্তি নাম পরমং তপো. তিতিক্খাতি খন্তিযা এৰ ৰেৰচনং. তিতিক্খা সঙ্খাতা অধিৰাসনখন্তি উত্তমং তপোতি অত্থো. নিব্বানং পরমন্তি সব্বাকারেন পন নিব্বানং পরমন্তি ৰদন্তি বুদ্ধা. ন হি পব্বজিতো পরূপঘাতীতি যো অধিৰাসনখন্তিৰিরহিতত্তা পরং উপঘাতেতি বাধেতি হিংসতি, সো পব্বজিতো নাম ন হোতি. চতুত্থপাদো পন তস্সেৰ ৰেৰচনং. ‘‘ন হি পব্বজিতো’’তি এতস্স হি ন সমণো হোতীতি ৰেৰচনং. পরূপঘাতীতি এতস্স পরং ৰিহেঠযন্তোতি ৰেৰচনং. অথ ৰা পরূপঘাতীতি সীলূপঘাতী. সীলঞ্হি উত্তমট্ঠেন পরন্তি ৰুচ্চতি. যো চ সমণো পরং যং কঞ্চি সত্তং ৰিহেঠযন্তো পরূপঘাতী হোতি, অত্তনো সীলং ৰিনাসকো, সো পব্বজিতো নাম ন হোতীতি অত্থো. অথৰা যো অধিৰাসনখন্তিযা অভাৰতো পরূপঘাতী হোতি, পরং অন্তমসো ডংসমকসম্পি সঞ্চিচ্চ জীৰিতা ৰোরোপেতি, সো ন হি পব্বজিতো. কিং কারণা? মলস্স অপব্বাজিতত্তা. ‘‘পব্বাজযমত্তনো মলং, তস্মা পব্বজিতোতি ৰুচ্চতী’’তি (ধ. প. ৩৮৮) ইদঞ্হি পব্বজিতলক্খণং. যোপি ন হেৰ খো উপঘাতেতি, ন মারেতি, অপি চ দণ্ডাদীহি ৰিহেঠেতি, সো পরং ৰিহেঠযন্তো সমণো ন হোতি. কিং কারণা? ৰিহেসায অসমিতত্তা. ‘‘সমিতত্তা হি পাপানং, সমণোতি পৰুচ্চতী’’তি (ধ. প. ২৬৫) ইদঞ্হি সমণলক্খণং.

দুতিযগাথায সব্বপাপস্সাতি সব্বাকুসলস্স. অকরণন্তি অনুপ্পাদনং. কুসলস্সাতি চতুভূমিককুসলস্স. উপসম্পদাতি পটিলাভো. সচিত্তপরিযোদপনন্তি অত্তনো চিত্তজোতনং, তং পন অরহত্তেন হোতি. ইতি সীলসংৰরেন সব্বপাপং পহায সমথৰিপস্সনাহি কুসলং সম্পাদেত্ৰা অরহত্তফলেন চিত্তং পরিযোদাপেতব্বন্তি এতং বুদ্ধানং সাসনং ওৰাদো অনুসিট্ঠী তি.

ততিযগাথায অনূপৰাদোতি ৰাচায কস্সচি অনুপৰদনং. অনূপঘাতোতি কাযেন উপঘাতস্স অকরণং. পাতিমোক্খেতি যং তং পঅতিমোক্খং, অতিপমোক্খং, উত্তমসীলং, পাতি ৰা অগতিৰিসেসেহি মোক্খেতি দুগ্গতিভযেহি, যো ৰা নং পাতি, তং মোক্খেতীতি ‘‘পাতিমোক্খ’’ন্তি ৰুচ্চতি. তস্মিং পাতিমোক্খে চ সংৰরো. মত্তঞ্ঞুতাতি পটিগ্গহণপরিভোগৰসেন পমাণঞ্ঞুতা. পন্তঞ্চ সযনাসনন্তি সযনাসনঞ্চ সঙ্ঘট্টনৰিরহিতন্তি অত্থো. তত্থ দ্ৰীহিযেৰ পচ্চযেহি চতুপচ্চযসন্তোসো দীপিতো হোতীতি ৰেদিতব্বো. এতং বুদ্ধান সাসনন্তি এতং পরস্স অনুপৰদনং অনুপঘাতনং পাতিমোক্খসংৰরো পটিগ্গহণপরিভোগেসু মত্তঞ্ঞুতা অট্ঠসমাপত্তিৰসিভাৰায ৰিৰিত্তসেনাসনসেৰনঞ্চ বুদ্ধানং সাসনং ওৰাদো অনুসিট্ঠীতি. ইমা পন সব্ববুদ্ধানং পাতিমোক্খুদ্দেসগাথা হোন্তীতি ৰেদিতব্বা.