মহাজনকাযঅনুপব্বজ্জাৰণ্ণনা

৫৫. সুত্ৰান তেসন্তি তেসং চতুরাসীতিযা পাণসহস্সানং সুত্ৰা এতদহোসি. ওরকোতি ঊনকো লামকো. অনুপব্বজিংসূতি অনুপব্বজিতানি. কস্মা পনেত্থ যথা পরতো খণ্ডতিস্সানং অনুপব্বজ্জায – ‘‘বন্ধুমতিযা রাজধানিযা নিক্খমিত্ৰা’’তি ৰুত্তং, এৰং ন ৰুত্তন্তি? নিক্খমিত্ৰা সুতত্তা. এতে কির সব্বেপি ৰিপস্সিস্স কুমারস্স উপট্ঠাকপরিসাৰ, তে পাতোৰ উপট্ঠানং আগন্ত্ৰা কুমারং অদিস্ৰা পাতরাসত্থায গন্ত্ৰা ভুত্তপাতরাসা আগম্ম ‘‘কুহিং কুমারো’’তি পুচ্ছিত্ৰা ‘‘উয্যানভূমিং গতো’’তি সুত্ৰা ‘‘তত্থেৰ নং দক্খিস্সামা’’তি নিক্খমন্তা নিৰত্তমানং সারথিং দিস্ৰা – ‘‘কুমারো পব্বজিতো’’তি চস্স ৰচনং সুত্ৰা সুতট্ঠানেযেৰ সব্বাভরণানি ওমুঞ্চিত্ৰা অন্তরাপণতো কাসাৰপীতানি ৰত্থানি আহরাপেত্ৰা কেসমস্সুং ওহারেত্ৰা পব্বজিংসু. ইতি নগরতো নিক্খমিত্ৰা বহিনগরে সুতত্তা এত্থ – ‘‘বন্ধুমতিযা রাজধানিযা নিক্খমিত্ৰা’’তি ন ৰুত্তং.

চারিকং চরতীতি গতগতট্ঠানে মহামণ্ডপং কত্ৰা দানং সজ্জেত্ৰা আগম্ম স্ৰাতনায নিমন্তিতো জনস্স আযাচিতভিক্খমেৰ পটিগ্গণ্হন্তো চত্তারো মাসে চারিকং চরি.

আকিণ্ণোতি ইমিনা গণেন পরিৰুতো. অযং পন ৰিতক্কো বোধিসত্তস্স কদা উপ্পন্নোতি? স্ৰে ৰিসাখপুণ্ণমা ভৰিস্সতীতি চাতুদ্দসীদিৰসে. তদা কির সো – ‘‘যথেৰ মং ইমে পুব্বে গিহিভূতং পরিৰারেত্ৰা চরন্তি, ইদানিপি তথেৰ, কিং ইমিনা গণেনা’’তি গণসঙ্গণিকায উক্কণ্ঠিত্ৰা ‘‘অজ্জেৰ গচ্ছামী’’তি চিন্তেত্ৰা পুন ‘‘অজ্জ অৰেলা, সচে ইদানি গমিস্সামি, সব্বেৰ ইমে জানিস্সন্তি, স্ৰেৰ গমিস্সামী’’তি চিন্তেসি. তং দিৰসঞ্চ উরুৰেলগামসদিসে গামে গামৰাসিনো স্ৰাতনায নিমন্তযিংসু. তে চতুরাসীতিসহস্সানম্পি তেসং পব্বজিতানং মহাপুরিসস্স চ পাযাসমেৰ পটিযাদযিংসু. অথ মহাপুরিসো পুনদিৰসে তস্মিংযেৰ গামে তেহি পব্বজিতেহি সদ্ধিং ভত্তকিচ্চং কত্ৰা ৰসনট্ঠানমেৰ অগমাসি. তত্থ তে পব্বজিতা মহাপুরিসস্স ৰত্তং দস্সেত্ৰা অত্তনো অত্তনো রত্তিট্ঠানদিৰাট্ঠানানি পৰিট্ঠা. বোধিসত্তোপি পণ্ণসালং পৰিসিত্ৰা নিসিন্নো.

‘‘ঠিতে মজ্ঝন্হিকে কালে, সন্নিসীৰেসু পক্খিসু;

সণতেৰ ব্রহারঞ্ঞং, তং ভযং পটিভাতি ম’’ন্তি. (সং. নি. ১.১৫);

এৰরূপে অৰিৰেকারামানং ভযকালে সব্বসত্তানং সদরথকালেযেৰ – ‘‘অযং কালো’’তি নিক্খমিত্ৰা পণ্ণসালায দ্ৰারং পিদহিত্ৰা বোধিমণ্ডাভিমুখো পাযাসি. অঞ্ঞদাপি চ তস্মিং ঠানে ৰিচরন্তো বোধিমণ্ডং পস্সতি, নিসীদিতুং পনস্স চিত্তং ন নমিতপুব্বং. তং দিৰসং পনস্স ঞাণং পরিপাকগতং, তস্মা অলঙ্কতং বোধিমণ্ডং দিস্ৰা আরোহনত্থায চিত্তং উপ্পন্নং. সো দক্খিণদিসাভাগেন উপগম্ম পদক্খিণং কত্ৰা পুরত্থিমদিসাভাগে চুদ্দসহত্থং পল্লঙ্কং পঞ্ঞপেত্ৰা চতুরঙ্গৰীরিযং অধিট্ঠহিত্ৰা – ‘‘যাৰ বুদ্ধো ন হোমি, ন তাৰ ইতো ৰুট্ঠহামী’’তি পটিঞ্ঞং কত্ৰা নিসীদি. ইদমস্স ৰূপকাসং সন্ধায – ‘‘একোৰ গণম্হা ৰূপকট্ঠো ৰিহাসী’’তি ৰুত্তং.

অঞ্ঞেনেৰ তানীতি তে কির সাযং বোধিসত্তস্স উপট্ঠানং আগন্ত্ৰা পণ্ণসালং পরিৰারেত্ৰা নিসিন্না ‘‘অতিৰিকালো জাতো, উপধারেথা’’তি ৰত্ৰা পণ্ণসালং ৰিৰরিত্ৰা তং অপস্সন্তাপি ‘‘কুহিং গতো’’তি নানুবন্ধিংসু, ‘‘গণৰাসে নিব্বিন্নো একো ৰিহরিতুকামো মঞ্ঞে মহাপুরিসো, বুদ্ধভূতংযেৰ নং পস্সিস্সামা’’তি ৰত্ৰা অন্তোজম্বুদীপাভিমুখা চারিকং পক্কন্তা.