ৰিপস্সীসমঞ্ঞাৰণ্ণনা

৩৭. সব্বকামেহীতি ইদং লক্খণানি পরিগ্গণ্হাপেত্ৰা পচ্ছা কতং ৰিয ৰুত্তং, ন পনেৰং দট্ঠব্বং. পঠমঞ্হি তে নেমিত্তকে সন্তপ্পেত্ৰা পচ্ছা লক্খণপরিগ্গণ্হনং কতন্তি ৰেদিতব্বং. তস্স ৰিত্থারো গব্ভোক্কন্তিযং ৰুত্তোযেৰ. পাযেন্তীতি থঞ্ঞং পাযেন্তি. তস্স কির নিদ্দোসেন মধুরেন খীরেন সমন্নাগতা সট্ঠি ধাতিযো উপট্ঠাপেসি, তথা সেসাপি তেসু তেসু কম্মেসু কুসলা সট্ঠিসট্ঠিযেৰ. তাসং পেসনকারকে সট্ঠি পুরিসে, তস্স তস্স কতাকতভাৰং সল্লক্খণে সট্ঠি অমচ্চে উপট্ঠাপেসি. এৰং চত্তারি সট্ঠিযো ইত্থীনং, দ্ৰে সট্ঠিযো পুরিসানন্তি ছ সট্ঠিযো উপট্ঠকানংযেৰ অহেসুং. সেতচ্ছত্তন্তি দিব্বসেতচ্ছত্তং. কুলদত্তিযং পন সিরিগব্ভেযেৰ তিট্ঠতি. মা নং সীতং ৰাতিআদীসু মা অভিভৰীতি অত্থো ৰেদিতব্বো. স্ৰাস্সুদন্তি সো অস্সুদং. অঙ্কেনেৰ অঙ্কন্তি অঞ্ঞস্স বাহুনাৰ অঞ্ঞস্স বাহুং. অঞ্ঞস্স চ অংসকূটেনেৰ অঞ্ঞস্স অংসকূটং. পরিহরিযতীতি নীযতি, সম্পাপিযতীতি অত্থো.

৩৮. মঞ্জুস্সরোতি অখরস্সরো. ৰগ্গুস্সরোতি ছেকনিপুণস্সরো. মধুরস্সরোতি সাতস্সরো. পেমনিযস্সরোতি পেমজনকস্সরো. তত্রিদং করৰীকানং মধুরস্সরতায – করৰীকসকুণে কির মধুররসং অম্বপক্কং মুখতুণ্ডকেন পহরিত্ৰা পগ্ঘরিতরসং পিৰিত্ৰা পক্খেন তালং দত্ৰা ৰিকূজমানে চতুপ্পদা মত্তা ৰিয লল়িতুং আরভন্তি. গোচরপসুতাপি চতুপ্পদা মুখগতানি তিণানি ছড্ডেত্ৰা তং সদ্দং সুণন্তি. ৰাল়মিগা খুদ্দকমিগে অনুবন্ধমানা উক্খিত্তং পাদং অনিক্খিপিত্ৰাৰ তিট্ঠন্তি. অনুবদ্ধমিগা চ মরণভযং জহিত্ৰা তিট্ঠন্তি. আকাসে পক্খন্দা পক্খিনোপি পক্খে পসারেত্ৰা তং সদ্দং সুণমানাৰ তিট্ঠন্তি. উদকে মচ্ছাপি কণ্ণপটলং পপ্ফোটেত্ৰা তং সদ্দং সুণমানাৰ তিট্ঠন্তি. এৰং মধুরস্সরা করৰীকা.

অসন্ধিমিত্তাপি ধম্মাসোকস্স দেৰী – ‘‘অত্থি নু খো, ভন্তে, বুদ্ধস্সরেন সদিসো কস্সচি সরো’’তি সঙ্ঘং পুচ্ছি. অত্থি করৰীকসকুণস্সাতি. কুহিং, ভন্তে, তে সকুণাতি? হিমৰন্তেতি. সা রাজানং আহ – ‘‘দেৰ, অহং করৰীকসকুণং পস্সিতুকামাম্হী’’তি. রাজা – ‘‘ইমস্মিং পঞ্জরে নিসীদিত্ৰা করৰীকো আগচ্ছতূ’’তি সুৰণ্ণপঞ্জরং ৰিস্সজ্জেসি. পঞ্জরো গন্ত্ৰা একস্স করৰীকস্স পুরতো অট্ঠাসি. সো – ‘‘রাজাণায আগতো পঞ্জরো, ন সক্কা ন গন্তু’’ন্তি তত্থ নিসীদি. পঞ্জরো আগন্ত্ৰা রঞ্ঞো পুরতো অট্ঠাসি. ন করৰীকসদ্দং কারাপেতুং সক্কোন্তি. অথ রাজা – ‘‘কথং, ভণে, ইমে সদ্দং ন করোন্তী’’তি আহ. ঞাতকে অদিস্ৰা দেৰাতি. অথ নং রাজা আদাসেহি পরিক্খিপাপেসি. সো অত্তনো ছাযং দিস্ৰা – ‘‘ঞাতকা মে আগতা’’তি মঞ্ঞমানো পক্খেন তালং দত্ৰা মধুরস্সরেন মণিৰংসং ধমমানো ৰিয ৰিরৰি. সকলনগরে মনুস্সা মত্তা ৰিয লল়িংসু. অসন্ধিমিত্তা চিন্তেসি – ‘‘ইমস্স তাৰ তিরচ্ছানগতস্স এৰং মধুরো সদ্দো, কীদিসো নু খো সব্বঞ্ঞুতঞ্ঞাণসিরিপত্তস্স ভগৰতো সদ্দো অহোসী’’তি পীতিং উপ্পাদেত্ৰা তং পীতিং অৰিজহিত্ৰা সত্তহি জঙ্ঘসতেহি সদ্ধিং সোতাপত্তিফলে পতিট্ঠাসি. এৰং মধুরো কির করৰীকসদ্দোতি. ততো পন সতভাগেন সহস্সভাগেন চ মধুরতরো ৰিপস্সিস্স কুমারস্স সদ্দো অহোসীতি ৰেদিতব্বো.

৩৯. কম্মৰিপাকজন্তি ন ভাৰনামযং, কম্মৰিপাকৰসেন পন দেৰতানং চক্খুসদিসমেৰ মংসচক্খু অহোসি, যেন নিমিত্তং কত্ৰা তিলৰাহে পক্খিত্তং একতিলম্পি অযং সোতি উদ্ধরিত্ৰা দাতুং সক্কোতি.

৪০. ৰিপস্সীতি এত্থ অযং ৰচনত্থো, অন্তরন্তরা নিমীলজনিতন্ধকারৰিরহেন ৰিসুদ্ধং পস্সতি, ৰিৰটেহি চ অক্খীহি পস্সতীতি ৰিপস্সী; দুতিযৰারে ৰিচেয্য ৰিচেয্য পস্সতীতি ৰিপস্সী; ৰিচিনিত্ৰা ৰিচিনিত্ৰা পস্সতীতি অত্থো.

অত্থে পনাযতীতি অত্থে জানাতি পস্সতি, নযতি ৰা পৰত্তেতীতি অত্থো. একদিৰসং কির ৰিনিচ্ছযট্ঠানে নিসীদিত্ৰা অত্থে অনুসাসন্তস্স রঞ্ঞো অলঙ্কতপটিযত্তং মহাপুরিসং আনেত্ৰা হত্থে ঠপযিংসু. তস্স তং অঙ্কেকত্ৰা উপলাল়যমানস্সেৰ অমচ্চা সামিকং অস্সামিকং অকংসু. বোধিসত্তো অনত্তমনসদ্দং নিচ্ছারেসি. রাজা – ‘‘কিমেতং, উপধারেথা’’তি আহ. উপধারিযমানা অঞ্ঞং অদিস্ৰা – ‘‘অড্ডস্স দুব্বিনিচ্ছিতত্তা এৰং কতং ভৰিস্সতী’’তি পুন সামিকংযেৰ সামিকং কত্ৰা ‘‘ঞত্ৰা নু খো কুমারো এৰং করোতী’’তি ৰীমংসন্তা পুন সামিকং অস্সামিকং অকংসু. পুনপি বোধিসত্তো তথেৰ সদ্দং নিচ্ছারেসি. অথ রাজা – ‘‘জানাতি মহাপুরিসো’’তি ততো পট্ঠায অপ্পমত্তো অহোসি. ইদং সন্ধায ৰুত্তং – ‘‘ৰিচেয্য ৰিচেয্য কুমারো অত্থে পনাযতী’’তি.

৪২. ৰস্সিকন্তিআদীসু যত্থ সুখং হোতি ৰস্সকালে ৰসিতুং, অযং ৰস্সিকো. ইতরেসুপি এসেৰ নযো. অযং পনেত্থ ৰচনত্থো ৰস্সাৰাসো ৰস্সং, ৰস্সং অরহতীতি ৰস্সিকো. ইতরেসুপি এসেৰ নযো.

তত্থ ৰস্সিকো পাসাদো নাতিউচ্চো হোতি, নাতিনীচো, দ্ৰারৰাতপানানিপিস্স নাতিবহূনি নাতিতনূনি, ভূমত্থরণপচ্চত্থরণখজ্জভোজ্জানিপেত্থ মিস্সকানেৰ ৰট্টন্তি. হেমন্তিকে থম্ভাপি ভিত্তিযোপি নীচা হোন্তি, দ্ৰারৰাতপানানি তনুকানি সুখুমচ্ছিদ্দানি, উণ্হপ্পৰেসনত্থায ভিত্তিনিযূহানি নীহরিযন্তি. ভূমত্থরণপচ্চত্থরণনিৰাসনপারুপনানি পনেত্থ উণ্হৰিরিযানি কম্বলাদীনি ৰট্টন্তি. খজ্জভোজ্জং সিনিদ্ধং কটুকসন্নিস্সিতং নিরুদকসন্নিস্সিতঞ্চ. গিম্হিকে থম্ভাপি ভিত্তিযোপি উচ্চা হোন্তি, দ্ৰারৰাতপানানি পনেত্থ বহূনি ৰিপুলজাতানি হোন্তি, ভূমত্থরণাদীনি দুকূলমযানি ৰট্টন্তি. খজ্জভোজ্জানি মধুরসসন্নিস্সিতভরিতানি. ৰাতপানসমীপেসু চেত্থ নৰ চাটিযো ঠপেত্ৰা উদকস্স পূরেত্ৰা নীলুপ্পলাদীহি সঞ্ছাদেন্তি. তেসু তেসু পদেসেসু উদকযন্তানি করোন্তি, যেহি দেৰে ৰস্সন্তে ৰিয উদকধারা নিক্খমন্তি.

নিপ্পুরিসেহীতি পুরিসৰিরহিতেহি. ন কেৰলঞ্চেত্থ তূরিযানেৰ নিপ্পুরিসানি, সব্বট্ঠানানিপি নিপ্পুরিসানেৰ, দোৰারিকাপি ইত্থিযোৰ, নহাপনাদিপরিকম্মকরাপি ইত্থিযোৰ. রাজা কির – ‘‘তথারূপং ইস্সরিযসুখসম্পত্তিং অনুভৰমানস্স পুরিসং দিস্ৰা পুরিসাসঙ্কা উপ্পজ্জতি, সা মে পুত্তস্স মা অহোসী’’তি সব্বকিচ্চেসু ইত্থিযোৰ ঠপেসীতি.

পঠমভাণৰারৰণ্ণনা নিট্ঠিতা.