জিণ্ণপুরিসৰণ্ণনা

৪৩. দুতিযভাণৰারে গোপানসিৰঙ্কন্তি গোপানসী ৰিয ৰঙ্কং. ভোগ্গন্তি খন্ধে, কটিযং, জাণূসূতি তীসু ঠানেসু ভোগ্গৰঙ্কং. দণ্ডপরাযনন্তি দণ্ডগতিকং দণ্ডপটিসরণং. আতুরন্তি জরাতুরং. গতযোব্বনন্তি অতিক্কন্তযোব্বনং পচ্ছিমৰযে ঠিতং. দিস্ৰাতি অড্ঢযোজনপ্পমাণেন বলকাযেন পরিৰুতো সুসংৰিহিতারক্খোপি গচ্ছন্তো যদা রথো পুরতো হোতি, পচ্ছা বলকাযো, তাদিসে ওকাসে সুদ্ধাৰাসখীণাসৰব্রহ্মেহি অত্তনো আনুভাৰেন রথস্স পুরতোৰ দস্সিতং, তং পুরিসং পস্সিত্ৰা. সুদ্ধাৰাসা কির – ‘‘মহাপুরিসো পঙ্কে গজো ৰিয পঞ্চসু কামগুণেসু লগ্গো, সতিমস্স উপ্পাদেস্সামা’’তি তং দস্সেসুং. এৰং দস্সিতঞ্চ তং বোধিসত্তো চেৰ পস্সতি সারথি চ. ব্রহ্মানো হি বোধিসত্তস্স অপ্পমাদত্থং সারথিস্স চ কথাসল্লাপত্থং তং দস্সেসুং. কিং পনেসোতি ‘‘এসো জিণ্ণোতি কিং ৰুত্তং হোতি, নাহং, ভো ইতো পুব্বে এৰরূপং অদ্দস’’ন্তি পুচ্ছি.

তেন হীতি যদি ময্হম্পি এৰরূপেহি কেসেহি এৰরূপেন চ কাযেন ভৰিতব্বং, তেন হি সম্ম সারথি. অলং দানজ্জ উয্যানভূমিযাতি – ‘‘অজ্জ উয্যানভূমিং পস্সিস্সামা’’তি গচ্ছাম, অলং তায উয্যানভূমিযাতি সংৰিগ্গহদযো সংৰেগানুরূপমাহ. অন্তেপুরং গতোতি ইত্থিজনং ৰিস্সজ্জেত্ৰা সিরিগব্ভে এককোৰ নিসিন্নো. যত্র হি নামাতি যায জাতিযা সতি জরা পঞ্ঞাযতি, সা জাতি ধিরত্থু ধিক্কতা অত্থু, জিগুচ্ছামেতং জাতিন্তি, জাতিযা মূলং খণন্তো নিসীদি, পঠমেন সল্লেন হদযে ৰিদ্ধো ৰিয.

৪৫. সারথিং আমন্তাপেত্ৰাতি রাজা কির নেমিত্তকেহি কথিতকালতো পট্ঠায ওহিতসোতো ৰিচরতি, সো ‘‘কুমারো উয্যানং গচ্ছন্তো অন্তরামগ্গে নিৰত্তো’’তি সুত্ৰা সারথিং আমন্তাপেসি. মা হেৰ খোতিআদীসু রজ্জং কারেতু, মা পব্বজতু, ব্রাহ্মণানং ৰচনং মা সচ্চং হোতূতি এৰং চিন্তেসীতি অত্থো.