দ্ৰত্তিংসমহাপুরিসলক্খণৰণ্ণনা

৩৩. অদ্দস খোতি দুকূলচুম্বটকে নিপজ্জাপেত্ৰা আনীতং অদ্দস. মহাপুরিসস্সাতি জাতিগোত্তকুলপদেসাদিৰসেন মহন্তস্স পুরিসস্স. দ্ৰে গতিযোতি দ্ৰে নিট্ঠা, দ্ৰে নিপ্ফত্তিযো. অযঞ্হি গতিসদ্দো – ‘‘পঞ্চ খো ইমা, সারিপুত্ত, গতিযো’’তি (ম. নি. ১.১৫৩) এত্থ নিরযাদিভেদায সত্তেহি গন্তব্বগতিযা ৰত্ততি. ‘‘ইমেসং খো অহং ভিক্খূনং সীলৰন্তানং কল্যাণধম্মানং নেৰ জানামি আগতিং ৰা গতিং ৰা’’তি (ম. নি. ১.৫০৮) এত্থ অজ্ঝাসযে. ‘‘নিব্বানং অরহতো গতী’’তি (পরি. ৩৩৯) এত্থ পটিস্সরণে. ‘‘অপি চ ত্যাহং ব্রহ্মে গতিঞ্চ পজানামি, জুতিঞ্চ পজানামি এৰংমহিদ্ধিকো বকো ব্রহ্মা’’তি (ম. নি. ১.৫০৩) এত্থ নিপ্ফত্তিযং ৰত্ততি. স্ৰাযমিধাপি নিপ্ফত্তিযং ৰত্ততীতি ৰেদিতব্বো. অনঞ্ঞাতি অঞ্ঞা গতি নিপ্ফত্তি নাম নত্থি.

ধম্মিকোতি দসকুসলধম্মসমন্নাগতো অগতিগমনৰিরহিতো. ধম্মরাজাতি ইদং পুরিমপদস্সেৰ ৰেৰচনং. ধম্মেন ৰা লদ্ধরজ্জত্তা ধম্মরাজা. চাতুরন্তোতি পুরত্থিমসমুদ্দাদীনং চতুন্নং সমুদ্দানং ৰসেন চতুরন্তায পথৰিযা ইস্সরো. ৰিজিতাৰীতি ৰিজিতসঙ্গামো. জনপদো অস্মিং থাৰরিযং থিরভাৰং পত্তোতি জনপদত্থাৰরিযপ্পত্তো. চণ্ডস্স হি রঞ্ঞো বলিদণ্ডাদীহি লোকং পীল়যতো মনুস্সা মজ্ঝিমজনপদং ছড্ডেত্ৰা পব্বতসমুদ্দতীরাদীনি নিস্সায পচ্চন্তে ৰাসং কপ্পেন্তি. অতিমুদুকস্স রঞ্ঞো চোরেহি সাহসিকধনৰিলোপপীল়িতা মনুস্সা পচ্চন্তং পহায জনপদমজ্ঝে ৰাসং কপ্পেন্তি, ইতি এৰরূপে রাজিনি জনপদো থিরভাৰং ন পাপুণাতি. ইমস্মিং পন কুমারে রজ্জং কারযমানে এতস্স জনপদো পাসাণপিট্ঠিযং ঠপেত্ৰা অযোপট্টেন পরিক্খিত্তো ৰিয থিরো ভৰিস্সতীতি দস্সেন্তো – ‘‘জনপদত্থাৰরিযপ্পত্তো’’তি আহংসু.

সত্তরতনসমন্নাগতোতি এত্থ রতিজননট্ঠেন রতনং. অপিচ –

‘‘চিত্তীকতং মহগ্ঘঞ্চ, অতুলং দুল্লভদস্সনং;

অনোমসত্তপরিভোগং, রতনং তেন ৰুচ্চতি’’.

চক্করতনস্স চ নিব্বত্তকালতো পট্ঠায অঞ্ঞং দেৰট্ঠানং নাম ন হোতি, সব্বে গন্ধপুপ্ফাদীহি তস্সেৰ পূজঞ্চ অভিৰাদনাদীনি চ করোন্তীতি চিত্তীকতট্ঠেন রতনং. চক্করতনস্স চ এত্তকং নাম ধনং অগ্ঘতীতি অগ্ঘো নত্থি, ইতি মহগ্ঘট্ঠেনাপি রতনং. চক্করতনঞ্চ অঞ্ঞেহি লোকে ৰিজ্জমানরতনেহি অসদিসন্তি অতুলট্ঠেনাপি রতনং. যস্মা চ পন যস্মিং কপ্পে বুদ্ধা উপ্পজ্জন্তি, তস্মিংযেৰ চক্কৰত্তিনো উপ্পজ্জন্তি, বুদ্ধা চ কদাচি করহচি উপ্পজ্জন্তি, তস্মা দুল্লভদস্সনট্ঠেনাপি রতনং. তদেতং জাতিরূপকুলইস্সরিযাদীহি অনোমস্স উল়ারসত্তস্সেৰ উপ্পজ্জতি, ন অঞ্ঞস্সাতি অনোমসত্তপরিভোগট্ঠেনাপি রতনং. যথা চক্করতনং, এৰং সেসানিপীতি. ইমেহি সত্তহি রতনেহি পরিৰারভাৰেন চেৰ সব্বভোগূপকরণভাৰেন চ সমন্নাগতোতি সত্তরতনসমন্নাগতো.

ইদানি তেসং সরূপতো দস্সনত্থং তস্সিমানীতিআদি ৰুত্তং. তত্থ চক্করতনন্তিআদীসু অযং সঙ্খেপাধিপ্পাযো – দ্ৰেসহস্সদীপপরিৰারানং চতুন্নং মহাদীপানং সিরিৰিভৰং গহেত্ৰা দাতুং সমত্থং চক্করতনং পাতুভৰতি. তথা পুরেভত্তমেৰ সাগরপরিযন্তং পথৰিং অনুসংযাযনসমত্থং ৰেহাসঙ্গমং হত্থিরতনং, তাদিসমেৰ অস্সরতনং, চতুরঙ্গসমন্নাগতে অন্ধকারে যোজনপ্পমাণং অন্ধকারং ৰিধমিত্ৰা আলোকদস্সনসমত্থং মণিরতনং, ছব্বিধদোসৰিৰজ্জিতং মনাপচারি ইত্থিরতনং, যোজনপ্পমাণে অন্তোপথৰিগতং নিধিং দস্সনসমত্থং গহপতিরতনং, অগ্গমহেসিযা কুচ্ছিম্হি নিব্বত্তিত্ৰা সকলরজ্জমনুসাসনসমত্থং জেট্ঠপুত্তসঙ্খাতং পরিণাযকরতনং পাতুভৰতি.

পরোসহস্সন্তি অতিরেকসহস্সং. সূরাতি অভীরুকা. ৰীরঙ্গরূপাতি ৰীরানং অঙ্গং ৰীরঙ্গং, ৰীরিযস্সেতং নামং, ৰীরঙ্গং রূপমেতেসন্তি ৰীরঙ্গরূপা, ৰীরিযজাতিকা ৰীরিযসভাৰা ৰীরিযমযা অকিলাসুনো অহেসুং. দিৰসম্পি যুজ্ঝন্তা ন কিলমন্তীতি ৰুত্তং হোতি. সাগরপরিযন্তন্তি চক্কৰাল়পব্বতং সীমং কত্ৰা ঠিতসমুদ্দপরিযন্তং. অদণ্ডেনাতি যে কতাপরাধে সত্তে সতম্পি সহস্সম্পি গণ্হন্তি, তে ধনদণ্ডেন রজ্জং কারেন্তি. যে ছেজ্জভেজ্জং অনুসাসন্তি, তে সত্থদণ্ডেন. অযং পন দুৰিধম্পি দণ্ডং পহায অদণ্ডেন অজ্ঝাৰসতি. অসত্থেনাতি যে একতোধারাদিনা সত্থেন পরং ৰিহেসন্তি, তে সত্থেন রজ্জং কারেন্তি নাম. অযং পন সত্থেন খুদ্দমক্খিকাযপি পিৰনমত্তং লোহিতং কস্সচি অনুপ্পাদেত্ৰা ধম্মেনেৰ – ‘‘এহি খো মহারাজা’’তি এৰং পটিরাজূহি সম্পটিচ্ছিতাগমনো ৰুত্তপ্পকারং পথৰিং অভিৰিজিনিত্ৰা অজ্ঝাৰসতি, অভিভৰিত্ৰা সামী হুত্ৰা ৰসতীতি অত্থো.

এৰং একং নিপ্ফত্তিং কথেত্ৰা দুতিযং কথেতুং সচে খো পনাতিআদি ৰুত্তং. তত্থ রাগদোসমোহমানদিট্ঠিকিলেসতণ্হাসঙ্খাতং ছদনং আৰরণং ৰিৰটং ৰিদ্ধংসিতং ৰিৰটকং এতেনাতি ৰিৰটচ্ছদো. ‘‘ৰিৰট্টচ্ছদা’’তিপি পাঠো, অযমেৰ অত্থো.

৩৫. এৰং দুতিযং নিপ্ফত্তিং কথেত্ৰা তাসং নিমিত্তভূতানি লক্খণানি দস্সেতুং অযঞ্হি, দেৰ, কুমারোতিআদি ৰুত্তং. তত্থ সুপ্পতিট্ঠিতপাদোতি যথা অঞ্ঞেসং ভূমিযং পাদং ঠপেন্তানং অগ্গপাদতলং ৰা পণ্হি ৰা পস্সং ৰা পঠমং ফুসতি, ৰেমজ্ঝে ৰা পন ছিদ্দং হোতি, উক্খিপন্তানং অগ্গতলাদীসু এককোট্ঠাসোৰ পঠমং উট্ঠহতি, ন এৰমস্স. অস্স পন সুৰণ্ণপাদুকতলমিৰ একপ্পহারেনেৰ সকলং পাদতলং ভূমিং ফুসতি, একপ্পহারেনেৰ ভূমিতো উট্ঠহতি. তস্মা অযং সুপ্পতিট্ঠিতপাদো.

চক্কানীতি দ্ৰীসু পাদতলেসু দ্ৰে চক্কানি, তেসং অরা চ নেমি চ নাভি চ পাল়িযং ৰুত্তাৰ. সব্বাকারপরিপূরানীতি ইমিনা পন অযং ৰিসেসো ৰেদিতব্বো, তেসং কির চক্কানং পাদতলস্স মজ্ঝে নাভি দিস্সতি, নাভিপরিচ্ছিন্না ৰট্টলেখা দিস্সতি, নাভিমুখপরিক্খেপপট্টো দিস্সতি, পনাল়িমুখং দিস্সতি, অরা দিস্সন্তি, অরেসু ৰট্টিলেখা দিস্সন্তি, নেমিমণিকা দিস্সন্তি. ইদং তাৰ পাল়িযং আগতমেৰ. সম্বহুলৰারো পন অনাগতো, সো এৰং দট্ঠব্বো – সত্তি, সিরিৰচ্ছো, নন্দি, সোৰত্তিকো, ৰটংসকো, ৰড্ঢমানকং, মচ্ছযুগল়ং, ভদ্দপীঠং, অঙ্কুসকো, পাসাদো, তোরণং, সেতচ্ছত্তং, খগ্গো, তালৰণ্টং, মোরহত্থকো, ৰাল়বীজনী, উণ্হীসং, মণি, পত্তো, সুমনদামং, নীলুপ্পলং, রত্তুপ্পলং, সেতুপ্পলং, পদুমং, পুণ্ডরীকং, পুণ্ণঘটো, পুণ্ণপাতি, সমুদ্দো, চক্কৰাল়ো, হিমৰা, সিনেরু, চন্দিমসূরিযা, নক্খত্তানি, চত্তারো মহাদীপা, দ্ৰিপরিত্তদীপসহস্সানি, অন্তমসো চক্কৰত্তিরঞ্ঞো পরিসং উপাদায সব্বো চক্কলক্খণস্সেৰ পরিৰারো.

আযতপণ্হীতি দীঘপণ্হি, পরিপুণ্ণপণ্হীতি অত্থো. যথা হি অঞ্ঞেসং অগ্গপাদো দীঘো হোতি, পণ্হিমত্থকে জঙ্ঘা পতিট্ঠাতি, পণ্হিং তচ্ছেত্ৰা ঠপিতা ৰিয হোতি, ন এৰং মহাপুরিসস্স. মহাপুরিসস্স পন চতূসু কোট্ঠাসেসু দ্ৰে কোট্ঠাসা অগ্গপাদো হোতি, ততিযে কোট্ঠাসে জঙ্ঘা পতিট্ঠাতি, চতুত্থকোট্ঠাসে আরগ্গেন ৰট্টেত্ৰা ঠপিতা ৰিয রত্তকম্বলগেণ্ডুকসদিসা পণ্হি হোতি.

দীঘঙ্গুলীতি যথা অঞ্ঞেসং কাচি অঙ্গুলিযো দীঘা হোন্তি, কাচি রস্সা, ন এৰং মহাপুরিসস্স. মহাপুরিসস্স পন মক্কটস্সেৰ দীঘা হত্থপাদঙ্গুলিযো মূলে থূলা, অনুপুব্বেন গন্ত্ৰা অগ্গে তনুকা, নিয্যাসতেলেন মদ্দিত্ৰা ৰট্টিতহরিতালৰট্টিসদিসা হোন্তি. তেন ৰুত্তং – ‘‘দীঘঙ্গুলী’’তি.

মুদুতলুনহত্থপাদোতি সপ্পিমণ্ডে ওসারেত্ৰা ঠপিতং সতৰারৰিহতকপ্পাসপটলং ৰিয মুদু. যথা চ ইদানি জাতমত্তস্স, এৰং ৰুড্ঢকালেপি মুদুতলুনাযেৰ ভৰিস্সন্তি, মুদুতলুনা হত্থপাদা এতস্সাতি মুদুতলুনহত্থপাদো.

জালহত্থপাদোতি ন চম্মেন পটিবদ্ধঅঙ্গুলন্তরো. এদিসো হি ফণহত্থকো পুরিসদোসেন উপহতো পব্বজ্জং ন পটিলভতি. মহাপুরিসস্স পন চতস্সো হত্থঙ্গুলিযো পঞ্চপি পাদঙ্গুলিযো একপ্পমাণা হোন্তি, তাসং একপ্পমাণতায যৰলক্খণং অঞ্ঞমঞ্ঞং পটিৰিজ্ঝিত্ৰা তিট্ঠতি. অথস্স হত্থপাদা কুসলেন ৰড্ঢকিনা যোজিতজালৰাতপানসদিসা হোন্তি. তেন ৰুত্তং – ‘‘জালহত্থপাদো’’তি.

উদ্ধং পতিট্ঠিতগোপ্ফকত্তা উস্সঙ্খা পাদা অস্সাতি উস্সঙ্খপাদো. অঞ্ঞেসঞ্হি পিট্ঠিপাদে গোপ্ফকা হোন্তি, তেন তেসং পাদা আণিবদ্ধা ৰিয বদ্ধা হোন্তি, ন যথাসুখং পরিৰট্টন্তি, গচ্ছন্তানং পাদতলানিপি ন দিস্সন্তি. মহাপুরিসস্স পন আরুহিত্ৰা উপরি গোপ্ফকা পতিট্ঠহন্তি, তেনস্স নাভিতো পট্ঠায উপরিমকাযো নাৰায ঠপিতসুৰণ্ণপটিমা ৰিয নিচ্চলো হোতি, অধোকাযোৰ ইঞ্জতি, সুখেন পাদা পরিৰট্টন্তি, পুরতোপি পচ্ছতোপি উভযপস্সেসুপি ঠত্ৰা পস্সন্তানং পাদতলানি পঞ্ঞাযন্তি, ন হত্থীনং ৰিয পচ্ছতোযেৰ.

এণিজঙ্ঘোতি এণিমিগসদিসজঙ্ঘো মংসুস্সদেন পরিপুণ্ণজঙ্ঘো, ন একতো বদ্ধপিণ্ডিকমংসো, সমন্ততো সমসণ্ঠিতেন মংসেন পরিক্খিত্তাহি সুৰট্টিতাহি সালিগব্ভযৰগব্ভসদিসাহি জঙ্ঘাহি সমন্নাগতোতি অত্থো.

অনোনমন্তোতি অনমন্তো, এতেনস্স অখুজ্জঅৰামনভাৰো দীপিতো. অৰসেসজনা হি খুজ্জা ৰা হোন্তি ৰামনা ৰা. খুজ্জানং উপরিমকাযো অপরিপুণ্ণো হোতি, ৰামনানং হেট্ঠিমকাযো. তে অপরিপুণ্ণকাযত্তা ন সক্কোন্তি অনোনমন্তা জণ্ণুকানি পরিমজ্জিতুং. মহাপুরিসো পন পরিপুণ্ণউভযকাযত্তা সক্কোতি.

কোসোহিতৰত্থগুয্হোতি উসভৰারণাদীনং ৰিয সুৰণ্ণপদুমকণ্ণিকসদিসেহি কোসেহি ওহিতং পটিচ্ছন্নং ৰত্থগুয্হং অস্সাতি কোসোহিতৰত্থগুয্হো. ৰত্থগুয্হন্তি ৰত্থেন গুহিতব্বং অঙ্গজাতং ৰুচ্চতি.

সুৰণ্ণৰণ্ণোতি জাতিহিঙ্গুলকেন মজ্জিত্ৰা দীপিদাঠায ঘংসিত্ৰা গেরুকপরিকম্মং কত্ৰা ঠপিতঘনসুৰণ্ণরূপসদিসোতি অত্থো. এতেনস্স ঘনসিনিদ্ধসণ্হসরীরতং দস্সেত্ৰা ছৰিৰণ্ণদস্সনত্থং কঞ্চনসন্নিভত্তচোতি ৰুত্তং. পুরিমস্স ৰা ৰেৰচনমেতং.

রজোজল্লন্তি রজো ৰা মলং ৰা. ন উপলিম্পতীতি ন লগ্গতি পদুমপলাসতো উদকবিন্দু ৰিয ৰিৰট্টতি. হত্থধোৰনাদীনি পন উতুগ্গহণত্থায চেৰ দাযকানং পুঞ্ঞফলত্থায চ বুদ্ধা করোন্তি, ৰত্তসীসেনাপি চ করোন্তিযেৰ. সেনাসনং পৰিসন্তেন হি ভিক্খুনা পাদে ধোৰিত্ৰা পৰিসিতব্বন্তি ৰুত্তমেতং.

উদ্ধগ্গলোমোতি আৰট্টপরিযোসানে উদ্ধগ্গানি হুত্ৰা মুখসোভং উল্লোকযমানানি ৰিয ঠিতানি লোমানি অস্সাতি উদ্ধগ্গলোমো.

ব্রহ্মুজুগত্তোতি ব্রহ্মা ৰিয উজুগত্তো, উজুমেৰ উগ্গতদীঘসরীরো ভৰিস্সতি. যেভুয্যেন হি সত্তা খন্ধে কটিযং জাণূসূতি তীসু ঠানেসু নমন্তি, তে কটিযং নমন্তা পচ্ছতো নমন্তি, ইতরেসু দ্ৰীসু ঠানেসু পুরতো. দীঘসরীরা পন একে পস্সৰঙ্কা হোন্তি, একে মুখং উন্নমেত্ৰা নক্খত্তানি গণযন্তা ৰিয চরন্তি, একে অপ্পমংসলোহিতা সূলসদিসা হোন্তি, একে পুরতো পব্ভারা হোন্তি, পৰেধমানা গচ্ছন্তি. অযং পন উজুমেৰ উগ্গন্ত্ৰা দীঘপ্পমাণো দেৰনগরে উস্সিতসুৰণ্ণতোরণং ৰিয ভৰিস্সতীতি দীপেন্তি. যথা চেতং, এৰং যং যং জাতমত্তস্স সব্বসো অপরিপুণ্ণং মহাপুরিসলক্খণং হোতি, তং তং আযতিং তথাভাৰিতং সন্ধায ৰুত্তন্তি ৰেদিতব্বং.

সত্তুস্সদোতি দ্ৰে হত্থপিট্ঠিযো দ্ৰে পাদপিট্ঠিযো দ্ৰে অংসকূটানি খন্ধোতি ইমেসু সত্তসু ঠানেসু পরিপুণ্ণো মংসুস্সদো অস্সাতি সত্তুস্সদো. অঞ্ঞেসং পন হত্থপাদপিট্ঠাদীসু সিরাজালং পঞ্ঞাযতি, অংসকূটক্খন্ধেসু অট্ঠিকোটিযো. তে মনুস্সা পেতা ৰিয খাযন্তি, ন তথা মহাপুরিসো, মহাপুরিসো পন সত্তসু ঠানেসু পরিপুণ্ণমংসুস্সদত্তা নিগূল়্হসিরাজালেহি হত্থপিট্ঠাদীহি ৰট্টেত্ৰা সুট্ঠপিতসুৰণ্ণাল়িঙ্গসদিসেন খন্ধেন সিলারূপকং ৰিয খাযতি, চিত্তকম্মরূপকং ৰিয চ খাযতি.

সীহস্স পুব্বদ্ধং ৰিয কাযো অস্সাতি সীহপুব্বদ্ধকাযো. সীহস্স হি পুরত্থিমকাযোৰ পরিপুণ্ণো হোতি, পচ্ছিমকাযো অপরিপুণ্ণো. মহাপুরিসস্স পন সীহস্স পুব্বদ্ধকাযো ৰিয সব্বো কাযো পরিপুণ্ণো. সোপি সীহস্সেৰ তত্থ তত্থ ৰিনতুন্নতাদিৰসেন দুস্সণ্ঠিতৰিসণ্ঠিতো ন হোতি, দীঘযুত্তট্ঠানে পন দীঘো, রস্সথূলকিসপুথুলঅনুৰট্টিতযুত্তট্ঠানেসু তথাৰিধোৰ হোতি. ৰুত্তঞ্হেতং ভগৰতা –

‘‘মনাপিযেৰ খো, ভিক্খৰে, কম্মৰিপাকে পচ্চুপট্ঠিতে যেহি অঙ্গেহি দীঘেহি সোভতি, তানি অঙ্গানি দীঘানি সণ্ঠন্তি. যেহি অঙ্গেহি রস্সেহি সোভতি, তানি অঙ্গানি রস্সানি সণ্ঠন্তি. যেহি অঙ্গেহি থূলেহি সোভতি, তানি অঙ্গানি থূলানি সণ্ঠন্তি. যেহি অঙ্গেহি কিসেহি সোভতি, তানি অঙ্গানি কিসানি সণ্ঠন্তি. যেহি অঙ্গেহি পুথুলেহি সোভতি, তানি অঙ্গানি পুথুলানি সণ্ঠন্তি. যেহি অঙ্গেহি ৰট্টেহি সোভতি, তানি অঙ্গানি ৰট্টানি সণ্ঠন্তী’’তি.

ইতি নানাচিত্তেন পুঞ্ঞচিত্তেন চিত্তিতো দসহি পারমীহি সজ্জিতো মহাপুরিসস্স অত্তভাৰো, লোকে সব্বসিপ্পিনো ৰা সব্বইদ্ধিমন্তো ৰা পতিরূপকম্পি কাতুং ন সক্কোন্তি.

চিতন্তরংসোতি অন্তরংসং ৰুচ্চতি দ্ৰিন্নং কোট্টানং অন্তরং, তং চিতং পরিপুণ্ণং অন্তরংসং অস্সাতি চিতন্তরংসো. অঞ্ঞেসঞ্হি তং ঠানং নিন্নং হোতি, দ্ৰে পিট্ঠিকোট্টা পাটিযেক্কা পঞ্ঞাযন্তি. মহাপুরিসস্স পন কটিতো পট্ঠায মংসপটলং যাৰ খন্ধা উগ্গম্ম সমুস্সিতসুৰণ্ণফলকং ৰিয পিট্ঠিং ছাদেত্ৰা পতিট্ঠিতং.

নিগ্রোধপরিমণ্ডলোতি নিগ্রোধো ৰিয পরিমণ্ডলো. যথা পঞ্ঞাসহত্থতায ৰা সতহত্থতায ৰা সমক্খন্ধসাখো নিগ্রোধো দীঘতোপি ৰিত্থারতোপি একপ্পমাণোৰ হোতি, এৰং কাযতোপি ব্যামতোপি একপ্পমাণো. যথা অঞ্ঞেসং কাযো দীঘো ৰা হোতি ব্যামো ৰা, ন এৰং ৰিসমপ্পমাণোতি অত্থো. তেনেৰ যাৰতক্ৰস্স কাযোতিআদি ৰুত্তং. তত্থ যাৰতকো অস্সাতি যাৰতক্ৰস্স.

সমৰট্টক্খন্ধোতি সমৰট্টিতক্খন্ধো. যথা একে কোঞ্চা ৰিয চ বকা ৰিয চ ৰরাহা ৰিয চ দীঘগলা ৰঙ্কগলা পুথুলগলা চ হোন্তি, কথনকালে সিরাজালং পঞ্ঞাযতি, মন্দো সরো নিক্খমতি, ন এৰং মহাপুরিসস্স. মহাপুরিসস্স পন সুৰট্টিতসুৰণ্ণাল়িঙ্গসদিসো খন্ধো হোতি, কথনকালে সিরাজালং ন পঞ্ঞাযতি, মেঘস্স ৰিয গজ্জিতো সরো মহা হোতি.

রসগ্গসগ্গীতি এত্থ রসং গসন্তি হরন্তীতি রসগ্গসা. রসহরণীনমেতং অধিৰচনং, তা অগ্গা অস্সাতি রসগ্গসগ্গী. মহাপুরিসস্স কির সত্তরসহরণীসহস্সানি উদ্ধগ্গানি হুত্ৰা গীৰাযমেৰ পটিমুক্কানি. তিলফলমত্তোপি আহারো জিৰ্হগ্গে ঠপিতো সব্বকাযং অনুফরতি. তেনেৰ মহাপধানং পদহন্তস্স একতণ্ডুলাদীহিপি কল়াযযূসপসতমত্তেনাপি কাযস্স যাপনং অহোসি. অঞ্ঞেসং পন তথা অভাৰা ন সকলং কাযং ওজা ফরতি. তেন তে বহ্ৰাবাধা হোন্তি.

সীহস্সেৰ হনু অস্সাতি সীহহনু. তত্থ সীহস্স হেট্ঠিমহনুমেৰ পরিপুণ্ণং হোতি, ন উপরিমং. মহাপুরিসস্স পন সীহস্স হেট্ঠিমং ৰিয দ্ৰেপি পরিপুণ্ণানি দ্ৰাদসিযা পক্খস্স চন্দসদিসানি হোন্তি. অথ নেমিত্তকা হনুকপরিযন্তং ওলোকেন্তাৰ ইমেসু হনুকেসু হেট্ঠিমে ৰীসতি উপরিমে ৰীসতীতি চত্তালীসদন্তা সমা অৰিরল়া পতিট্ঠহিস্সন্তীতি সল্লক্খেত্ৰা অযঞ্হি দেৰ, কুমারো চত্তালীসদন্তো হোতীতিআদিমাহংসু. তত্রাযমত্থো, অঞ্ঞেসঞ্হি পরিপুণ্ণদন্তানম্পি দ্ৰত্তিংস দন্তা হোন্তি. ইমস্স পন চত্তালীসং ভৰিস্সন্তি. অঞ্ঞেসঞ্চ কেচি দন্তা উচ্চা, কেচি নীচাতি ৰিসমা হোন্তি, ইমস্স পন অযপট্টকেন ছিন্নসঙ্খপটলং ৰিয সমা ভৰিস্সন্তি. অঞ্ঞেসং কুম্ভিলানং ৰিয দন্তা ৰিরল়া হোন্তি, মচ্ছমংসানি খাদন্তানং দন্তন্তরং পূরেন্তি. ইমস্স পন কনকফলকাযং সমুস্সিতৰজিরপন্তি ৰিয অৰিরল়া তূলিকায দস্সিতপরিচ্ছেদা ৰিয দন্তা ভৰিস্সন্তি. অঞ্ঞেসঞ্চ পূতিদন্তা উট্ঠহন্তি. তেন কাচি দাঠা কাল়াপি ৰিৰণ্ণাপি হোন্তি. অযং পন সুট্ঠু সুক্কদাঠো ওসধিতারকম্পি অতিক্কম্ম ৰিরোচমানায পভায সমন্নাগতদাঠো ভৰিস্সতি.

পহূতজিৰ্হোতি পুথুলজিৰ্হো. অঞ্ঞেসং জিৰ্হা থূলাপি হোন্তি কিসাপি রস্সাপি থদ্ধাপি ৰিসমাপি, মহাপুরিসস্স পন জিৰ্হা মুদু দীঘা পুথুলা ৰণ্ণসম্পন্না হোতি. সো হি এতং লক্খণং পরিযেসিতুং আগতানং কঙ্খাৰিনোদনত্থং মুদুকত্তা তং জিৰ্হং কথিনসূচিং ৰিয ৰট্টেত্ৰা উভো নাসিকসোতানি পরামসতি, দীঘত্তা উভো কণ্ণসোতানি পরামসতি, পুথুলত্তা কেসন্তপরিযোসানং কেৰলম্পি নলাটং পটিচ্ছাদেতি. এৰমস্স মুদুদীঘপুথুলভাৰং পকাসেন্তো তেসং কঙ্খং ৰিনোদেতি. এৰং তিলক্খণসম্পন্নং জিৰ্হং সন্ধায ‘‘পহূতজিৰ্হো’’তি ৰুত্তং.

ব্রহ্মস্সরোতি অঞ্ঞে ছিন্নস্সরাপি ভিন্নস্সরাপি কাকস্সরাপি হোন্তি, অযং পন মহাব্রহ্মুনো সরসদিসেন সরেন সমন্নাগতো ভৰিস্সতি, মহাব্রহ্মুনো হি পিত্তসেম্হেহি অপলিবুদ্ধত্তা সরো ৰিসদো হোতি. মহাপুরিসেনাপি কতকম্মং তস্স ৰত্থুং সোধেতি. ৰত্থুনো সুদ্ধত্তা নাভিতো পট্ঠায সমুট্ঠহন্তো সরো ৰিসদো অট্ঠঙ্গসমন্নাগতোৰ সমুট্ঠাতি. করৰীকো ৰিয ভণতীতি করৰীকভাণী, মত্তকরৰীকরুতমঞ্জুঘোসোতি অত্থো.

অভিনীলনেত্তোতি ন সকলনীলনেত্তো, নীলযুত্তট্ঠানে পনস্স উমাপুপ্ফসদিসেন অতিৰিসুদ্ধেন নীলৰণ্ণেন সমন্নাগতানি নেত্তানি হোন্তি, পীতযুত্তট্ঠানে কণিকারপুপ্ফসদিসেন পীতৰণ্ণেন, লোহিতযুত্তট্ঠানে বন্ধুজীৰকপুপ্ফসদিসেন লোহিতৰণ্ণেন, সেতযুত্তট্ঠানে ওসধিতারকসদিসেন সেতৰণ্ণেন, কাল়যুত্তট্ঠানে অদ্দারিট্ঠকসদিসেন কাল়ৰণ্ণেন সমন্নাগতানি. সুৰণ্ণৰিমানে উগ্ঘাটিতমণিসীহপঞ্জরসদিসানি খাযন্তি.

গোপখুমোতি এত্থ পখুমন্তি সকলচক্খুভণ্ডং অধিপ্পেতং, তং কাল়ৰচ্ছকস্স বহলধাতুকং হোতি, রত্তৰচ্ছকস্স ৰিপ্পসন্নং, তংমুহুত্তজাততরুণরত্তৰচ্ছকসদিসচক্খুভণ্ডোতি অত্থো. অঞ্ঞেসঞ্হি চক্খুভণ্ডা অপরিপুণ্ণা হোন্তি, হত্থিমূসিকাদীনং অক্খিসদিসেহি ৰিনিগ্গতেহিপি গম্ভীরেহিপি অক্খীহি সমন্নাগতা হোন্তি. মহাপুরিসস্স পন ধোৰিত্ৰা মজ্জিত্ৰা ঠপিতমণিগুল়িকা ৰিয মুদুসিনিদ্ধনীলসুখুমপখুমাচিতানি অক্খীনি.

উণ্ণাতি উণ্ণলোমং. ভমুকন্তরেতি দ্ৰিন্নং ভমুকানং ৰেমজ্ঝে নাসিকমত্থকেযেৰ জাতা, উগ্গন্ত্ৰা পন নলাটৰেমজ্ঝে জাতা. ওদাতাতি পরিসুদ্ধা, ওসধিতারকসমানৰণ্ণা. মুদূতি সপ্পিমণ্ডে ওসারেত্ৰা ঠপিতসতৰারৰিহতকপ্পাসপটলসদিসা. তূলসন্নিভাতি সিম্বলিতূললতাতূলসমানা, অযমস্স ওদাততায উপমা. সা পনেসা কোটিযং গহেত্ৰা আকড্ঢিযমানা উপড্ঢবাহুপ্পমাণা হোতি, ৰিস্সট্ঠা দক্খিণাৰট্টৰসেন আৰট্টিত্ৰা উদ্ধগ্গা হুত্ৰা সন্তিট্ঠতি. সুৰণ্ণফলকমজ্ঝে ঠপিতরজতপুব্বুল়কং ৰিয, সুৰণ্ণঘটতো নিক্খমমানা খীরধারা ৰিয, অরুণপ্পভারঞ্জিতে গগনপ্পদেসে ওসধিতারকা ৰিয চ অতিমনোহরায সিরিযা ৰিরোচতি.

উণ্হীসসীসোতি ইদং পরিপুণ্ণনলাটতঞ্চ পরিপুণ্ণসীসতং চাতি দ্ৰে অত্থৰসে পটিচ্চ ৰুত্তং. মহাপুরিসস্স হি দক্খিণকণ্ণচূল়িকতো পট্ঠায মংসপটলং উট্ঠহিত্ৰা সকলনলাটং ছাদযমানং পূরযমানং গন্ত্ৰা ৰামকণ্ণচূল়িকাযং পতিট্ঠিতং, তং রঞ্ঞো বন্ধউণ্হীসপট্টো ৰিয ৰিরোচতি. মহাপুরিসস্স কির ইমং লক্খণং দিস্ৰা রাজূনং উণ্হীসপট্টং অকংসু. অযং তাৰ একো অত্থো. অঞ্ঞে পন জনা অপরিপুণ্ণসীসা হোন্তি, কেচি কপিসীসা, কেচি ফলসীসা, কেচি অট্ঠিসীসা, কেচি হত্থিসীসা, কেচি তুম্বসীসা, কেচি পব্ভারসীসা. মহাপুরিসস্স পন আরগ্গেন ৰট্টেত্ৰা ঠপিতং ৰিয সুপরিপুণ্ণং উদকপুব্বুল়সদিসং সীসং হোতি. তত্থ পুরিমনযে উণ্হীসৰেঠিতসীসো ৰিযাতি উণ্হীসসীসো. দুতিযনযে উণ্হীসং ৰিয সব্বত্থ পরিমণ্ডলসীসোতি উণ্হীসসীসো.