অধিচ্চসমুপ্পন্নৰাদৰণ্ণনা

৬৭. ‘‘অধিচ্চসমুপ্পন্নো অত্তা চ লোকো চা’’তি দস্সনং অধিচ্চসমুপ্পন্নং. তং এতেসং অত্থীতি অধিচ্চসমুপ্পন্নিকা. অধিচ্চসমুপ্পন্নন্তি অকারণসমুপ্পন্নং.

৬৮-৭৩. অসঞ্ঞসত্তাতি দেসনাসীসমেতং, অচিত্তুপ্পাদা রূপমত্তকঅত্তভাৰাতি অত্থো. তেসং এৰং উপ্পত্তি ৰেদিতব্বা – একচ্চো হি তিত্থাযতনে পব্বজিত্ৰা ৰাযোকসিণে পরিকম্মং কত্ৰা চতুত্থজ্ঝানং নিব্বত্তেত্ৰা ঝানা ৰুট্ঠায – ‘‘চিত্তে দোসং পস্সতি, চিত্তে সতি হত্থচ্ছেদাদিদুক্খঞ্চেৰ সব্বভযানি চ হোন্তি, অলং ইমিনা চিত্তেন, অচিত্তকভাৰোৰ সন্তো’’তি, এৰং চিত্তে দোসং পস্সিত্ৰা অপরিহীনজ্ঝানো কালং কত্ৰা অসঞ্ঞসত্তেসু নিব্বত্ততি, চিত্তমস্স চুতিচিত্তনিরোধেন ইধেৰ নিৰত্ততি, রূপক্খন্ধমত্তমেৰ তত্থ পাতুভৰতি. তে তত্থ যথা নাম জিযাৰেগক্খিত্তো সরো যত্তকো জিযাৰেগো, তত্তকমেৰ আকাসে গচ্ছতি. এৰমেৰ ঝানৰেগক্খিত্তা উপপজ্জিত্ৰা যত্তকো ঝানৰেগো, তত্তকমেৰ কালং তিট্ঠন্তি, ঝানৰেগে পন পরিহীনে তত্থ রূপক্খন্ধো অন্তরধাযতি, ইধ পন পটিসন্ধিসঞ্ঞা উপ্পজ্জতি. যস্মা পন তায ইধ উপ্পন্নসঞ্ঞায তেসং তত্থ চুতি পঞ্ঞাযতি, তস্মা ‘‘সঞ্ঞুপ্পাদা চ পন তে দেৰা তম্হা কাযা চৰন্তী’’তি ৰুত্তং. সন্ততাযাতি সন্তভাৰায. সেসমেত্থ উত্তানমেৰ. তক্কীৰাদোপি ৰুত্তনযেনেৰ ৰেদিতব্বোতি.