৩. পঞ্হাপুচ্ছকৰণ্ণনা

২১৫. পঞ্হাপুচ্ছকে চতুন্নম্পি সচ্চানং খন্ধৰিভঙ্গে ৰুত্তনযানুসারেনেৰ কুসলাদিভাৰো ৰেদিতব্বো. আরম্মণত্তিকেসু পন সমুদযসচ্চং কামাৰচরধম্মে অস্সাদেন্তস্স পরিত্তারম্মণং হোতি, মহগ্গতধম্মে অস্সাদেন্তস্স মহগ্গতারম্মণং, পঞ্ঞত্তিং অস্সাদেন্তস্স নৰত্তব্বারম্মণং. দুক্খসচ্চং কামাৰচরধম্মে আরব্ভ উপ্পন্নং পরিত্তারম্মণং, রূপারূপাৰচরধম্মে আরব্ভ উপ্পত্তিকালে মহগ্গতারম্মণং, নৰ লোকুত্তরধম্মে পচ্চৰেক্খণকালে অপ্পমাণারম্মণং, পণ্ণত্তিং পচ্চৰেক্খণকালে নৰত্তব্বারম্মণং. মগ্গসচ্চং সহজাতহেতুৰসেন সব্বদাপি মগ্গহেতুকং ৰীরিযং ৰা ৰীমংসং ৰা জেট্ঠকং কত্ৰা মগ্গভাৰনাকালে মগ্গাধিপতি, ছন্দচিত্তেসু অঞ্ঞতরাধিপতিকালে নৰত্তব্বং নাম হোতি. দুক্খসচ্চং অরিযানং মগ্গপচ্চৰেক্খণকালে মগ্গারম্মণং, তেসংযেৰ মগ্গং গরুং কত্ৰা পচ্চৰেক্খণকালে মগ্গাধিপতি, সেসধম্মপচ্চৰেক্খণকালে নৰত্তব্বং হোতি.

দ্ৰে সচ্চানীতি দুক্খসমুদযসচ্চানি. এতানি হি অতীতাদিভেদে ধম্মে আরব্ভ উপ্পত্তিকালে অতীতাদিআরম্মণানি হোন্তি. সমুদযসচ্চং অজ্ঝত্তাদিভেদে ধম্মে অস্সাদেন্তস্স অজ্ঝত্তাদিআরম্মণং হোতি, দুক্খসচ্চং আকিঞ্চঞ্ঞাযতনকালে নৰত্তব্বারম্মণম্পীতি ৰেদিতব্বং. ইতি ইমস্মিং পঞ্হাপুচ্ছকে দ্ৰে সচ্চানি লোকিযানি হোন্তি, দ্ৰে লোকুত্তরানি. যথা চ ইমস্মিং, এৰং পুরিমেসুপি দ্ৰীসু. সম্মাসম্বুদ্ধেন হি তীসুপি সুত্তন্তভাজনীযাদীসু লোকিযলোকুত্তরানেৰ সচ্চানি কথিতানি. এৰমযং সচ্চৰিভঙ্গোপি তেপরিৰট্টং নীহরিত্ৰাৰ ভাজেত্ৰা দস্সিতোতি.

সম্মোহৰিনোদনীযা ৰিভঙ্গট্ঠকথায

সচ্চৰিভঙ্গৰণ্ণনা নিট্ঠিতা.