২. সমুদযসচ্চনিদ্দেসৰণ্ণনা

২০৩. সমুদযসচ্চনিদ্দেসে যাযং তণ্হাতি যা অযং তণ্হা. পোনোব্ভৰিকাতি পুনব্ভৰকরণং পুনোব্ভৰো, পুনোব্ভৰো সীলমস্সাতি পোনোব্ভৰিকা. অপিচ পুনব্ভৰং দেতি, পুনব্ভৰায সংৰত্ততি, পুনপ্পুনং ভৰে নিব্বত্তেতীতি পোনোব্ভৰিকা. সা পনেসা পুনব্ভৰস্স দাযিকাপি অত্থি অদাযিকাপি, পুনব্ভৰায সংৰত্তনিকাপি অত্থি অসংৰত্তনিকাপি, দিন্নায পটিসন্ধিযা উপধিৰেপক্কমত্তাপি. সা পুনব্ভৰং দদমানাপি অদদমানাপি, পুনব্ভৰায সংৰত্তমানাপি অসংৰত্তমানাপি, দিন্নায পটিসন্ধিযা উপধিৰেপক্কমত্তাপি পোনোব্ভৰিকা এৰাতি নামং লভতি. অভিনন্দনসঙ্খাতেন নন্দিরাগেন সহগতাতি নন্দিরাগসহগতা, নন্দিরাগেন সদ্ধিং অত্থতো একত্তমেৰ গতাতি ৰুত্তং হোতি. তত্রতত্রাভিনন্দিনীতি যত্র যত্র অত্তভাৰো তত্রতত্রাভিনন্দিনী, রূপাদীসু ৰা আরম্মণেসু তত্রতত্রাভিনন্দিনী; রূপাভিনন্দিনী সদ্দগন্ধরসফোট্ঠব্বধম্মাভিনন্দিনীতি অত্থো. সেয্যথিদন্তি নিপাতো; তস্স সা কতমাতি চেতি অত্থো. কামতণ্হাতি কামে তণ্হা কামতণ্হা; পঞ্চকামগুণিকরাগস্সেতং অধিৰচনং. ভৰে তণ্হা ভৰতণ্হা; ভৰপত্থনাৰসেন উপ্পন্নস্স সস্সতদিট্ঠিসহগতস্স রূপারূপভৰরাগস্স চ ঝাননিকন্তিযা চেতং অধিৰচনং. ৰিভৰে তণ্হা ৰিভৰতণ্হা; উচ্ছেদদিট্ঠিসহগতস্স রাগস্সেতং অধিৰচনং.

ইদানি তস্সা তণ্হায ৰত্থুং ৰিত্থারতো দস্সেতুং সা খো পনেসাতিআদিমাহ. তত্থ উপ্পজ্জতীতি জাযতি. নিৰিসতীতি পুনপ্পুনং পৰত্তিৰসেন পতিট্ঠহতি. যং লোকে পিযরূপং সাতরূপন্তি যং লোকস্মিং পিযসভাৰঞ্চেৰ মধুরসভাৰঞ্চ. চক্খুং লোকেতিআদীসু লোকস্মিঞ্হি চক্খাদীসু মমত্তেন অভিনিৰিট্ঠা সত্তা সম্পত্তিযং পতিট্ঠিতা অত্তনো চক্খুং আদাসাদীসু নিমিত্তগ্গহণানুসারেন ৰিপ্পসন্নপঞ্চপসাদং সুৰণ্ণৰিমানে উগ্ঘাটিতমণিসীহপঞ্জরং ৰিয মঞ্ঞন্তি, সোতং রজতপনাল়িকং ৰিয পামঙ্গসুত্তকং ৰিয চ মঞ্ঞন্তি, তুঙ্গনাসাতি লদ্ধৰোহারং ঘানং ৰট্টেত্ৰা ঠপিতহরিতালৰট্টিং ৰিয মঞ্ঞন্তি, জিৰ্হং রত্তকম্বলপটলং ৰিয মুদুসিনিদ্ধমধুররসদং মঞ্ঞন্তি, কাযং সাললট্ঠিং ৰিয সুৰণ্ণতোরণং ৰিয চ মঞ্ঞন্তি, মনং অঞ্ঞেসং মনেন অসদিসং উল়ারং মঞ্ঞন্তি, রূপং সুৰণ্ণকণিকারপুপ্ফাদিৰণ্ণং ৰিয, সদ্দং মত্তকরৰীককোকিলমন্দধমিতমণিৰংসনিগ্ঘোসং ৰিয, অত্তনা পটিলদ্ধানি চতুসমুট্ঠানিকগন্ধারম্মণাদীনি ‘কস্স অঞ্ঞস্স এৰরূপানি অত্থী’তি মঞ্ঞন্তি. তেসং এৰং মঞ্ঞমানানং তানি চক্খাদীনি পিযরূপানি চেৰ হোন্তি সাতরূপানি চ. অথ নেসং তত্থ অনুপ্পন্না চেৰ তণ্হা উপ্পজ্জতি, উপ্পন্না চ পুনপ্পুনং পৰত্তিৰসেন নিৰিসতি. তস্মা ভগৰা – ‘‘চক্খুং লোকে পিযরূপং সাতরূপং. এত্থেসা তণ্হা উপ্পজ্জমানা উপ্পজ্জতী’’তিআদিমাহ. তত্থ উপ্পজ্জমানাতি যদা উপ্পজ্জতি তদা এত্থ উপ্পজ্জতীতি অত্থো. এস নযো সব্বত্থাপীতি.

সমুদযসচ্চনিদ্দেসৰণ্ণনা নিট্ঠিতা.