৩. ধাতুৰিভঙ্গো

১. সুত্তন্তভাজনীযৰণ্ণনা

১৭২. ইদানি তদনন্তরে ধাতুৰিভঙ্গে সব্বা ধাতুযো ছহি ছহি ধাতূহি সঙ্খিপিত্ৰা তীহি ছক্কেহি সুত্তন্তভাজনীযং দস্সেন্তো ছ ধাতুযোতিআদিমাহ. তত্থ ছাতি গণনপরিচ্ছেদো. ধাতুযোতি পরিচ্ছিন্নধম্মনিদস্সনং. পথৰীধাতূতিআদীসু ধাত্ৰট্ঠো নাম সভাৰট্ঠো, সভাৰট্ঠো নাম সুঞ্ঞতট্ঠো, সুঞ্ঞতট্ঠো নাম নিস্সত্তট্ঠোতি এৰং সভাৰসুঞ্ঞতনিস্সত্তট্ঠেন পথৰীযেৰ ধাতু পথৰীধাতু. আপোধাতুআদীসুপি এসেৰ নযো. এৰমেত্থ পদসমাসং ৰিদিত্ৰা এৰমত্থো ৰেদিতব্বো – পথৰীধাতূতি পতিট্ঠানধাতু. আপোধাতূতি আবন্ধনধাতু. তেজোধাতূতি পরিপাচনধাতু. ৰাযোধাতূতি ৰিত্থম্ভনধাতু. আকাসধাতূতি অসম্ফুট্ঠধাতু. ৰিঞ্ঞাণধাতূতি ৰিজাননধাতু.

১৭৩. পথৰীধাতুদ্ৰযন্তি পথৰীধাতু দ্ৰে অযং. অযং পথৰীধাতু নাম ন একা এৰ অজ্ঝত্তিকবাহিরভেদেন পন দ্ৰে ধাতুযো এৰাতি অত্থো. তেনেৰাহ – ‘‘অত্থি অজ্ঝত্তিকা অত্থি বাহিরা’’তি. তত্থ অজ্ঝত্তিকাতি সত্তসন্তানপরিযাপন্না নিযকজ্ঝত্তা. বাহিরাতি সঙ্খারসন্তানপরিযাপন্না অনিন্দ্রিযবদ্ধা. অজ্ঝত্তং পচ্চত্তন্তি উভযম্পেতং নিযকজ্ঝত্তাধিৰচনমেৰ. ইদানি তং সভাৰাকারতো দস্সেতুং কক্খল়ন্তিআদি ৰুত্তং. তত্থ কক্খল়ন্তি থদ্ধং. খরিগতন্তি ফরুসং. কক্খল়ত্তন্তি কক্খল়ভাৰো. কক্খল়ভাৰোতি কক্খল়সভাৰো. অজ্ঝত্তং উপাদিন্নন্তি নিযকজ্ঝত্তসঙ্খাতং উপাদিন্নং. উপাদিন্নং নাম সরীরট্ঠকং. সরীরট্ঠকঞ্হি কম্মসমুট্ঠানং ৰা হোতু মা ৰা, তং সন্ধায উপাদিন্নম্পি অত্থি অনুপাদিন্নম্পি; আদিন্নগ্গহিতপরামট্ঠৰসেন পন সব্বম্পেতং উপাদিন্নমেৰাতি দস্সেতুং ‘‘অজ্ঝত্তং উপাদিন্ন’’ন্তি আহ.

ইদানি তমেৰ পথৰীধাতুং ৰত্থুৰসেন দস্সেতুং সেয্যথিদং কেসা লোমাতিআদি ৰুত্তং. তত্থ সেয্যথিদন্তি নিপাতো. তস্সত্থো – যা সা অজ্ঝত্তিকা পথৰীধাতু সা কতমা? যং ৰা অজ্ঝত্তং পচ্চত্তং কক্খল়ং নাম তং কতমন্তি? কেসা লোমাতিআদি তস্সা অজ্ঝত্তিকায পথৰীধাতুযা ৰত্থুৰসেন পভেদদস্সনং. ইদং ৰুত্তং হোতি – কেসা নাম অজ্ঝত্তা উপাদিন্না সরীরট্ঠকা কক্খল়ত্তলক্খণা ইমস্মিং সরীরে পাটিযেক্কো কোট্ঠাসো. লোমা নাম…পে… করীসং নাম. ইধ পন অৰুত্তম্পি পটিসম্ভিদামগ্গে (পটি. ম. ১.৪) পাল়িআরুল়্হং মত্থলুঙ্গং আহরিত্ৰা মত্থলুঙ্গং নাম অজ্ঝত্তং উপাদিন্নং সরীরট্ঠকং কক্খল়ত্তলক্খণং ইমস্মিং সরীরে পাটিযেক্কো কোট্ঠাসো. পরতো আপোধাতুআদীনং নিদ্দেসে পিত্তাদীসুপি এসেৰ নযো.

ইমিনা কিং দস্সিতং হোতি? ধাতুমনসিকারো. ইমস্মিং পন ধাতুমনসিকারে কম্মং কত্ৰা ৰিপস্সনং পট্ঠপেত্ৰা উত্তমত্থং অরহত্তং পাপুণিতুকামেন কিং কত্তব্বং? চতুপারিসুদ্ধিসীলং সোধেতব্বং. সীলৰতো হি কম্মট্ঠানভাৰনা ইজ্ঝতি. তস্স সোধনৰিধানং ৰিসুদ্ধিমগ্গে ৰুত্তনযেনেৰ ৰেদিতব্বং. ৰিসুদ্ধসীলেন পন সীলে পতিট্ঠায দস পুব্বপলিবোধা ছিন্দিতব্বা. তেসম্পি ছিন্দনৰিধানং ৰিসুদ্ধিমগ্গে ৰুত্তনযেনেৰ ৰেদিতব্বং. ছিন্নপলিবোধেন ধাতুমনসিকারকম্মট্ঠানং উগ্গণ্হিতব্বং. আচরিযেনাপি ধাতুমনসিকারকম্মট্ঠানং উগ্গণ্হাপেন্তেন সত্তৰিধং উগ্গহকোসল্লং দসৰিধঞ্চ মনসিকারকোসল্লং আচিক্খিতব্বং. অন্তেৰাসিকেনাপি আচরিযস্স সন্তিকে বহুৰারে সজ্ঝাযং কত্ৰা নিজ্জটং পগুণং কম্মট্ঠানং কাতব্বং. ৰুত্তঞ্হেতং অট্ঠকথাযং – ‘‘আদিকম্মিকেন ভিক্খুনা জরামরণা মুচ্চিতুকামেন সত্তহাকারেহি উগ্গহকোসল্লং ইচ্ছিতব্বং, দসহাকারেহি মনসিকারকোসল্লং ইচ্ছিতব্ব’’ন্তি.

তত্থ ৰচসা, মনসা, ৰণ্ণতো, সণ্ঠানতো, দিসতো, ওকাসতো, পরিচ্ছেদতোতি ইমেহি সত্তহাকারেহি ইমস্মিং ধাতুমনসিকারকম্মট্ঠানে ‘উগ্গহকোসল্লং’ ইচ্ছিতব্বং. অনুপুব্বতো, নাতিসীঘতো, নাতিসণিকতো, ৰিক্খেপপটিবাহনতো, পণ্ণত্তিসমতিক্কমতো, অনুপুব্বমুঞ্চনতো, লক্খণতো, তযো চ সুত্তন্তাতি ইমেহি দসহাকারেহি ‘মনসিকারকোসল্লং’ ইচ্ছিতব্বং. তদুভযম্পি পরতো সতিপট্ঠানৰিভঙ্গে আৰি ভৰিস্সতি.

এৰং উগ্গহিতকম্মট্ঠানেন পন ৰিসুদ্ধিমগ্গে ৰুত্তে অট্ঠারস সেনাসনদোসে ৰজ্জেত্ৰা পঞ্চঙ্গসমন্নাগতে সেনাসনে ৰসন্তেন অত্তনাপি পঞ্চহি পধানিযঙ্গেহি সমন্নাগতেন পচ্ছাভত্তং পিণ্ডপাতপটিক্কন্তেন ৰিৰিত্তোকাসগতেন কম্মট্ঠানং মনসিকাতব্বং. মনসিকরোন্তেন চ ৰণ্ণসণ্ঠানদিসোকাসপরিচ্ছেদৰসেন কেসাদীসু একেককোট্ঠাসং মনসিকরিত্ৰা অৰসানে এৰং মনসিকারো পৰত্তেতব্বো – ইমে কেসা নাম সীসকটাহপলিৰেঠনচম্মে জাতা. তত্থ যথা ৰম্মিকমত্থকে জাতেসু কুণ্ঠতিণেসু ন ৰম্মিকমত্থকো জানাতি ‘মযি কুণ্ঠতিণানি জাতানী’তি, নাপি কুণ্ঠতিণানি জানন্তি ‘মযং ৰম্মিকমত্থকে জাতানী’তি, এৰমেৰ ন সীসকটাহপলিৰেঠনচম্মং জানাতি ‘মযি কেসা জাতা’তি, নাপি কেসা জানন্তি ‘মযং সীসকটাহপলিৰেঠনচম্মে জাতা’তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি কেসা নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

লোমা সরীরৰেঠনচম্মে জাতা. তত্থ যথা সুঞ্ঞগামট্ঠানে জাতেসু দব্বতিণেসু ন সুঞ্ঞগামট্ঠানং জানাতি ‘মযি দব্বতিণানি জাতানী’তি, নাপি দব্বতিণানি জানন্তি ‘মযং সুঞ্ঞগামট্ঠানে জাতানী’তি, এৰমেৰ ন সরীরৰেঠনচম্মং জানাতি ‘মযি লোমা জাতা’তি, নাপি লোমা জানন্তি ‘মযং সরীরৰেঠনচম্মে জাতা’তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি লোমা নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

নখা অঙ্গুলীনং অগ্গেসু জাতা. তত্থ যথা কুমারকেসু দণ্ডকেহি মধুকট্ঠিকে ৰিজ্ঝিত্ৰা কীল়ন্তেসু ন দণ্ডকা জানন্তি ‘অম্হেসু মধুকট্ঠিকা ঠপিতা’তি, নাপি মধুকট্ঠিকা জানন্তি ‘মযং দণ্ডকেসু ঠপিতা’তি, এৰমেৰ ন অঙ্গুলিযো জানন্তি ‘অম্হাকং অগ্গেসু নখা জাতা’তি, নাপি নখা জানন্তি ‘মযং অঙ্গুলীনং অগ্গেসু জাতা’তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি নখা নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

দন্তা হনুকট্ঠিকেসু জাতা. তত্থ যথা ৰড্ঢকীহি পাসাণউদুক্খলেসু কেনচিদেৰ সিলেসজাতেন বন্ধিত্ৰা ঠপিতথম্ভেসু ন উদুক্খলানি জানন্তি ‘অম্হেসু থম্ভা ঠিতা’তি, নাপি থম্ভা জানন্তি ‘মযং উদুক্খলেসু ঠিতা’তি, এৰমেৰ ন হনুকট্ঠিকা জানন্তি ‘অম্হেসু দন্তা জাতা’তি, নাপি দন্তা জানন্তি ‘মযং হনুকট্ঠিকেসু জাতা’তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি দন্তা নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

তচো সকলসরীরং পরিযোনন্ধিত্ৰা ঠিতো. তত্থ যথা অল্লগোচম্মপরিযোনদ্ধায মহাৰীণায ন মহাৰীণা জানাতি ‘অহং অল্লগোচম্মেন পরিযোনদ্ধা’তি, নাপি অল্লগোচম্মং জানাতি ‘মযা মহাৰীণা পরিযোদ্ধা’তি, এৰমেৰ ন সরীরং জানাতি ‘অহং তচেন পরিযোনদ্ধ’ন্তি, নাপি তচো জানাতি ‘মযা সরীরং পরিযোনদ্ধন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি তচো নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

মংসং অট্ঠিসঙ্ঘাটং অনুলিম্পিত্ৰা ঠিতং. তত্থ যথা মহামত্তিকায লিত্তায ভিত্তিযা ন ভিত্তি জানাতি ‘অহং মহামত্তিকায লিত্তা’তি, নাপি মহামত্তিকা জানাতি ‘মযা মহাভিত্তি লিত্তা’তি, এৰমেৰ ন অট্ঠিসঙ্ঘাটো জানাতি ‘অহং নৰমংসপেসিসতপ্পভেদেন মংসেন লিত্তো’তি, নাপি মংসং জানাতি ‘মযা অট্ঠিসঙ্ঘাটো লিত্তো’তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি মংসং নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

ন্হারু সরীরব্ভন্তরে অট্ঠীনি আবন্ধমানা ঠিতা. তত্থ যথা ৰল্লীহি ৰিনদ্ধেসু কুট্টদারূসু ন কুট্টদারূনি জানন্তি ‘মযং ৰল্লীহি ৰিনদ্ধানী’তি, নাপি ৰল্লিযো জানন্তি ‘অম্হেহি কুট্টদারূনি ৰিনদ্ধানী’তি, এৰমেৰ ন অট্ঠীনি জানন্তি ‘মযং ন্হারূহি আবদ্ধানী’তি, নাপি ন্হারূ জানন্তি ‘অম্হেহি অট্ঠীনি আবদ্ধানী’তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি ন্হারু নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

অট্ঠীসু পণ্হিকট্ঠি গোপ্ফকট্ঠিং উক্খিপিত্ৰা ঠিতং. গোপ্ফকট্ঠি জঙ্ঘট্ঠিং উক্খিপিত্ৰা ঠিতং. জঙ্ঘট্ঠি ঊরুট্ঠিং উক্খিপিত্ৰা ঠিতং. ঊরুট্ঠি কটিট্ঠিং উক্খিপিত্ৰা ঠিতং. কটিট্ঠি পিট্ঠিকণ্টকং উক্খিপিত্ৰা ঠিতং. পিট্ঠিকণ্টকো গীৰট্ঠিং উক্খিপিত্ৰা ঠিতো. গীৰট্ঠি সীসট্ঠিং উক্খিপিত্ৰা ঠিতং. সীসট্ঠি গীৰট্ঠিকে পতিট্ঠিতং. গীৰট্ঠি পিট্ঠিকণ্টকে পতিট্ঠিতং. পিট্ঠিকণ্টকো কটিট্ঠিম্হি পতিট্ঠিতো. কটিট্ঠি ঊরুট্ঠিকে পতিট্ঠিতং. ঊরুট্ঠি জঙ্ঘট্ঠিকে পতিট্ঠিতং. জঙ্ঘট্ঠি গোপ্ফকট্ঠিকে পতিট্ঠিতং. গোপ্ফকট্ঠি পণ্হিকট্ঠিকে পতিট্ঠিতং.

তত্থ যথা ইট্ঠকদারুগোমযাদিসঞ্চযেসু ন হেট্ঠিমা হেট্ঠিমা জানন্তি ‘মযং উপরিমে উপরিমে উক্খিপিত্ৰা ঠিতা’তি, নাপি উপরিমা উপরিমা জানন্তি ‘মযং হেট্ঠিমেসু হেট্ঠিমেসু পতিট্ঠিতা’তি, এৰমেৰ ন পণ্হিকট্ঠি জানাতি ‘অহং গোপ্ফকট্ঠিং উক্খিপিত্ৰা ঠিত’ন্তি, ন গোপ্ফকট্ঠি জানাতি ‘অহং জঙ্ঘট্ঠিং উক্খিপিত্ৰা ঠিত’ন্তি, ন জঙ্ঘট্ঠি জানাতি ‘অহং ঊরুট্ঠিং উক্খিপিত্ৰা ঠিত’ন্তি, ন ঊরুট্ঠি জানাতি ‘অহং কটিট্ঠিং উক্খিপিত্ৰা ঠিত’ন্তি, ন কটিট্ঠি জানাতি ‘অহং পিট্ঠিকণ্টকং উক্খিপিত্ৰা ঠিত’ন্তি, ন পিট্ঠিকণ্টকো জানাতি ‘অহং গীৰট্ঠিং উক্খিপিত্ৰা ঠিতো’তি, ন গীৰট্ঠি জানাতি ‘অহং সীসট্ঠিং উক্খিপিত্ৰা ঠিত’ন্তি, ন সীসট্ঠি জানাতি ‘অহং গীৰট্ঠিম্হি পতিট্ঠিত’ন্তি, ন গীৰট্ঠি জানাতি ‘অহং পিট্ঠিকণ্টকে পতিট্ঠিত’ন্তি, ন পিট্ঠিকণ্টকো জানাতি ‘অহং কটিট্ঠিম্হি পতিট্ঠিতো’তি, ন কটিট্ঠি জানাতি ‘অহং ঊরুট্ঠিম্হি পতিট্ঠিত’ন্তি, ন ঊরুট্ঠি জানাতি ‘অহং জঙ্ঘট্ঠিম্হি পতিট্ঠিত’ন্তি, ন জঙ্ঘট্ঠি জানাতি ‘অহং গোপ্ফকট্ঠিম্হি পতিট্ঠিত’ন্তি, ন গোপ্ফকট্ঠি জানাতি ‘অহং পণ্হিকট্ঠিম্হি পতিট্ঠিত’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি অট্ঠি নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

অট্ঠিমিঞ্জং তেসং তেসং অট্ঠীনং অব্ভন্তরে ঠিতং. তত্থ যথা ৰেল়ুপব্বাদীনং অন্তো পক্খিত্তেসু সিন্নৰেত্তগ্গাদীসু ন ৰেল়ুপব্বাদীনি জানন্তি ‘অম্হেসু ৰেত্তগ্গাদীনি পক্খিত্তানী’তি, নাপি ৰেত্তগ্গাদীনি জানন্তি ‘মযং ৰেল়ুপব্বাদীসু ঠিতানীতি, এৰমেৰ ন অট্ঠীনি জানন্তি ‘অম্হাকং অন্তো অট্ঠিমিঞ্জং ঠিত’ন্তি, নাপি অট্ঠিমিঞ্জং জানাতি ‘অহং অট্ঠীনং অন্তো ঠিত’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি অট্ঠিমিঞ্জং নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

ৰক্কং গলৰাটকতো নিক্খন্তেন একমূলেন থোকং গন্ত্ৰা দ্ৰিধা ভিন্নেন থূলন্হারুনা ৰিনিবদ্ধং হুত্ৰা হদযমংসং পরিক্খিপিত্ৰা ঠিতং. তত্থ যথা ৰণ্টুপনিবদ্ধে অম্বফলদ্ৰযে ন ৰণ্টং জানাতি ‘মযা অম্বফলদ্ৰযং উপনিবদ্ধ’ন্তি, নাপি অম্বফলদ্ৰযং জানাতি ‘অহং ৰণ্টেন উপনিবদ্ধ’ন্তি, এৰমেৰ ন থূলন্হারু জানাতি ‘মযা ৰক্কং উপনিবদ্ধ’ন্তি, নাপি ৰক্কং জানাতি ‘অহং থূলন্হারুনা উপনিবদ্ধ’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি ৰক্কং নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

হদযং সরীরব্ভন্তরে উরট্ঠিপঞ্জরমজ্ঝং নিস্সায ঠিতং. তত্থ যথা জিণ্ণসন্দমানিকপঞ্জরব্ভন্তরং নিস্সায ঠপিতায মংসপেসিযা ন জিণ্ণসন্দমানিকপঞ্জরব্ভন্তরং জানাতি ‘মং নিস্সায মংসপেসি ঠপিতা’তি, নাপি মংসপেসি জানাতি ‘অহং জিণ্ণসন্দমানিকপঞ্জরব্ভন্তরং নিস্সায ঠিতা’তি, এৰমেৰ ন উরট্ঠিপঞ্জরব্ভন্তরং জানাতি ‘মং নিস্সায হদযং ঠিত’ন্তি, নাপি হদযং জানাতি ‘অহং উরট্ঠিপঞ্জরব্ভন্তরং নিস্সায ঠিত’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি হদযং নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

যকনং অন্তোসরীরে দ্ৰিন্নং থনানং অব্ভন্তরে দক্খিণপস্সং নিস্সায ঠিতং. তত্থ যথা উক্খলিকপালপস্সম্হি লগ্গে যমকমংসপিণ্ডে ন উক্খলিকপালপস্সং জানাতি ‘মযি যমকমংসপিণ্ডো লগ্গো’তি, নাপি যমকমংসপিণ্ডো জানাতি ‘অহং উক্খলিকপালপস্সে লগ্গো’তি, এৰমেৰ ন থনানং অব্ভন্তরে দক্খিণপস্সং জানাতি ‘মং নিস্সায যকনং ঠিত’ন্তি, নাপি যকনং জানাতি ‘অহং থনানং অব্ভন্তরে দক্খিণপস্সং নিস্সায ঠিত’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি যকনং নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

কিলোমকেসু পটিচ্ছন্নকিলোমকং হদযঞ্চ ৰক্কঞ্চ পরিৰারেত্ৰা ঠিতং, অপটিচ্ছন্নকিলোমকং সকলসরীরে চম্মস্স হেট্ঠতো মংসং পরিযোনন্ধিত্ৰা ঠিতং. তত্থ যথা পিলোতিকপলিৰেঠিতে মংসে ন মংসং জানাতি ‘অহং পিলোতিকায পলিৰেঠিত’ন্তি, নাপি পিলোতিকা জানাতি ‘মযা মংসং পলিৰেঠিত’ন্তি, এৰমেৰ ন ৰক্কহদযানি সকলসরীরে মংসঞ্চ জানাতি ‘অহং কিলোমকেন পটিচ্ছন্ন’ন্তি, নাপি কিলোমকং জানাতি ‘মযা ৰক্কহদযানি সকলসরীরে মংসঞ্চ পটিচ্ছন্ন’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি কিলোমকং নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

পিহকং হদযস্স ৰামপস্সে উদরপটলস্স মত্থকপস্সং নিস্সায ঠিতং. তত্থ যথা কোট্ঠকমত্থকপস্সং নিস্সায ঠিতায গোমযপিণ্ডিযা ন কোট্ঠকমত্থকপস্সং জানাতি ‘গোমযপিণ্ডি মং নিস্সায ঠিতা’তি, নাপি গোমযপিণ্ডি জানাতি ‘অহং কোট্ঠকমত্থকপস্সং নিস্সায ঠিতা’তি, এৰমেৰ ন উদরপটলস্স মত্থকপস্সং জানাতি ‘পিহকং মং নিস্সায ঠিত’ন্তি, নাপি পিহকং জানাতি ‘অহং উদরপটলস্স মত্থকপস্সং নিস্সায ঠিত’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি পিহকং নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

পপ্ফাসং সরীরব্ভন্তরে দ্ৰিন্নং থনানং অব্ভন্তরে হদযঞ্চ যকনঞ্চ উপরিছাদেত্ৰা ওলম্বন্তং ঠিতং. তত্থ যথা জিণ্ণকোট্ঠব্ভন্তরে ওলম্বমানে সকুণকুলাৰকে ন জিণ্ণকোট্ঠব্ভন্তরং জানাতি ‘মযি সকুণকুলাৰকো ওলম্বমানো ঠিতো’তি, নাপি সকুণকুলাৰকো জানাতি ‘অহং জিণ্ণকোট্ঠব্ভন্তরে ওলম্বমানো ঠিতো’তি, এৰমেৰ ন সরীরব্ভন্তরং জানাতি ‘মযি পপ্ফাসং ওলম্বমানং ঠিত’ন্তি, নাপি পপ্ফাসং জানাতি ‘অহং এৰরূপে সরীরব্ভন্তরে ওলম্বমানং ঠিত’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি পপ্ফাসং নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

অন্তং গলৰাটকতো করীসমগ্গপরিযন্তে সরীরব্ভন্তরে ঠিতং. তত্থ যথা লোহিতদোণিকায ওভুজিত্ৰা ঠপিতে ছিন্নসীসধমনিকল়েৰরে ন লোহিতদোণি জানাতি ‘মযি ধমনিকল়েৰরং ঠিত’ন্তি, নাপি ধমনিকল়েৰরং জানাতি ‘অহং লোহিতদোণিকাযং ঠিত’ন্তি, এৰমেৰ ন সরীরব্ভন্তরং জানাতি ‘মযি অন্তং ঠিত’ন্তি, নাপি অন্তং জানাতি ‘অহং সরীরব্ভন্তরে ঠিত’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি অন্তং নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

অন্তগুণং অন্তন্তরে একৰীসতি অন্তভোগে বন্ধিত্ৰা ঠিতং. তত্থ যথা পাদপুঞ্ছনরজ্জুমণ্ডলকং সিব্বেত্ৰা ঠিতেসু রজ্জুকেসু ন পাদপুঞ্ছনরজ্জুমণ্ডলকং জানাতি ‘রজ্জুকা মং সিব্বেত্ৰা ঠিতা’তি, নাপি রজ্জুকা জানন্তি ‘মযং পাদপুঞ্ছনরজ্জুমণ্ডলকং সিব্বেত্ৰা ঠিতা’তি, এৰমেৰ ন অন্তং জানাতি ‘অন্তগুণং মং আবন্ধিত্ৰা ঠিত’ন্তি, নাপি অন্তগুণং জানাতি ‘অহং অন্তং বন্ধিত্ৰা ঠিত’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি অন্তগুণং নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

উদরিযং উদরে ঠিতং অসিতপীতখাযিতসাযিতং. তত্থ যথা সুৰানদোণিযং ঠিতে সুৰানৰমথুম্হি ন সুৰানদোণি জানাতি ‘মযি সুৰানৰমথু ঠিতো’তি, নাপি সুৰানৰমথু জানাতি ‘অহং সুৰানদোণিযং ঠিতো’তি, এৰমেৰ ন উদরং জানাতি ‘মযি উদরিযং ঠিত’ন্তি, নাপি উদরিযং জানাতি ‘অহং উদরে ঠিত’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি উদরিযং নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

করীসং পক্কাসযসঙ্খাতে অট্ঠঙ্গুলৰেল়ুপব্বসদিসে অন্তপরিযোসানে ঠিতং. তত্থ যথা ৰেল়ুপব্বে ওমদ্দিত্ৰা পক্খিত্তায সণ্হপণ্ডুমত্তিকায ন ৰেল়ুপব্বং জানাতি ‘মযি পণ্ডুমত্তিকা ঠিতা’তি, নাপি পণ্ডুমত্তিকা জানাতি ‘অহং ৰেল়ুপব্বে ঠিতা’তি, এৰমেৰ ন পক্কাসযো জানাতি ‘মযি করীসং ঠিত’ন্তি, নাপি করীসং জানাতি ‘অহং পক্কাসযে ঠিত’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি করীসং নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

মত্থলুঙ্গং সীসকটাহব্ভন্তরে ঠিতং. তত্থ যথা পুরাণলাবুকটাহে পক্খিত্তায পিট্ঠপিণ্ডিযা ন লাবুকটাহং জানাতি ‘মযি পিট্ঠপিণ্ডি ঠিতা’তি, নাপি পিট্ঠপিণ্ডি জানাতি ‘অহং লাবুকটাহে ঠিতা’তি, এৰমেৰ ন সীসকটাহব্ভন্তরং জানাতি ‘মযি মত্থলুঙ্গং ঠিত’ন্তি, নাপি মত্থলুঙ্গং জানাতি ‘অহং সীসকটাহব্ভন্তরে ঠিত’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি মত্থলুঙ্গং নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো থদ্ধো পথৰীধাতূতি.

যং ৰা পনঞ্ঞম্পীতি ইমিনা আপোকোট্ঠাসাদীসু তীসু অনুগতং পথৰীধাতুং লক্খণৰসেন যেৰাপনকং পথৰিং কত্ৰা দস্সেতি.

বাহিরপথৰীধাতুনিদ্দেসে অযোতি কাল়লোহং. লোহন্তি জাতিলোহং, ৰিজাতিলোহং, কিত্তিমলোহং, পিসাচলোহন্তি চতুব্বিধং. তত্থ অযো, সজ্ঝু, সুৰণ্ণং, তিপু, সীসং, তম্বলোহং, ৰেকন্তকন্তি ইমানি সত্ত জাতিলোহানি নাম. নাগনাসিকলোহং ৰিজাতিলোহং নাম. কংসলোহং, ৰট্টলোহং, আরকূটন্তি তীণি কিত্তিমলোহানি নাম. মোরক্খকং, পুথুকং, মলিনকং, চপলকং, সেলকং, আটকং, ভল্লকং, দূসিলোহন্তি অট্ঠ পিসাচলোহানি নাম. তেসু পঞ্চ জাতিলোহানি পাল়িযং ৰিসুং ৰুত্তানেৰ. তম্বলোহং, ৰেকন্তকলোহন্তি ইমেহি পন দ্ৰীহি জাতিলোহেহি সদ্ধিং সেসং সব্বম্পি ইধ লোহন্তি ৰেদিতব্বং.

তিপূতি সেততিপু. সীসন্তি কাল়তিপু. সজ্ঝূতি রজতং. মুত্তাতি সামুদ্দিকমুত্তা. মণীতি ঠপেত্ৰা পাল়িআগতে ৰেল়ুরিযাদযো সেসো জোতিরসাদিভেদো সব্বোপি মণি. ৰেল়ুরিযোতি ৰংসৰণ্ণমণি. সঙ্খোতি সামুদ্দিকসঙ্খো. সিলাতি কাল়সিলা, পণ্ডুসিলা, সেতসিলাতিআদিভেদা সব্বাপি সিলা. পৰাল়ন্তি পৰাল়মেৰ. রজতন্তি কহাপণো. জাতরূপন্তি সুৰণ্ণং. লোহিতঙ্কোতি রত্তমণি. মসারগল্লন্তি কবরমণি. তিণাদীসু বহিসারা অন্তমসো নাল়িকেরাদযোপি তিণং নাম. অন্তোসারং অন্তমসো দারুখণ্ডম্পি কট্ঠং নাম. সক্খরাতি মুগ্গমত্ততো যাৰ মুট্ঠিপ্পমাণা মরুম্বা সক্খরা নাম. মুগ্গমত্ততো পন হেট্ঠা ৰালিকাতি ৰুচ্চতি. কঠলন্তি যং কিঞ্চি কপালং. ভূমীতি পথৰী. পাসাণোতি অন্তোমুট্ঠিযং অসণ্ঠহনতো পট্ঠায হত্থিপ্পমাণং অসম্পত্তো পাসাণো নাম. হত্থিপ্পমাণতো পট্ঠায পন উপরি পব্বতো নাম. যং ৰা পনাতি ইমিনা তালট্ঠি-নাল়িকের-ফলাদিভেদং সেসপথৰিং গণ্হাতি. যা চ অজ্ঝত্তিকা পথৰীধাতু যা চ বাহিরাতি ইমিনা দ্ৰেপি পথৰীধাতুযো কক্খল়ট্ঠেন লক্খণতো একা পথৰীধাতু এৰাতি দস্সেতি.

১৭৪. আপোধাতুনিদ্দেসাদীসু হেট্ঠা ৰুত্তনযেনেৰ ৰেদিতব্বং. আপো আপোগতন্তিআদীসু আবন্ধনৰসেন আপো. তদেৰ আপোসভাৰং গতত্তা আপোগতং নাম. স্নেহৰসেন স্নেহো. সোযেৰ স্নেহসভাৰং গতত্তা স্নেহগতং নাম. বন্ধনত্তং রূপস্সাতি অৰিনিব্ভোগরূপস্স বন্ধনভাৰো. পিত্তং সেম্হন্তিআদীনিপি ৰণ্ণসণ্ঠানদিসোকাসপরিচ্ছেদৰসেন পরিগ্গহেত্ৰা ধাতুৰসেনেৰ মনসিকাতব্বানি.

তত্রাযং নযো – পিত্তেসু হি অবদ্ধপিত্তং জীৰিতিন্দ্রিযপটিবদ্ধং সকলসরীরং ব্যাপেত্ৰা ঠিতং, বদ্ধপিত্তং পিত্তকোসকে ঠিতং. তত্থ যথা পূৰং ব্যাপেত্ৰা ঠিতে তেলে ন পূৰং জানাতি ‘তেলং মং ব্যাপেত্ৰা ঠিত’ন্তি, নাপি তেলং জানাতি ‘অহং পূৰং ব্যাপেত্ৰা ঠিত’ন্তি, এৰমেৰ ন সরীরং জানাতি ‘অবদ্ধপিত্তং মং ব্যাপেত্ৰা ঠিত’ন্তি, নাপি অবদ্ধপিত্তং জানাতি ‘অহং সরীরং ব্যাপেত্ৰা ঠিত’ন্তি. যথা চ ৰস্সোদকেন পুণ্ণে কোসাতকীকোসকে ন কোসাতকীকোসকো জানাতি ‘মযি ৰস্সোদকং ঠিত’ন্তি, নাপি ৰস্সোদকং জানাতি ‘অহং কোসাতকীকোসকে ঠিত’ন্তি, এৰমেৰ ন পিত্তকোসকো জানাতি মযি বদ্ধপিত্তং ঠিতন্তি, নাপি বদ্ধপিত্তং জানাতি ‘অহং পিত্তকোসকে ঠিত’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি পিত্তং নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো যূসভূতো আবন্ধনাকারো আপোধাতূতি.

সেম্হং একপত্থপূরপ্পমাণং উদরপটলে ঠিতং. তত্থ যথা উপরি সঞ্জাতফেণপটলায চন্দনিকায ন চন্দনিকা জানাতি ‘মযি ফেণপটলং ঠিত’ন্তি, নাপি ফেণপটলং জানাতি ‘অহং চন্দনিকায ঠিত’ন্তি, এৰমেৰ ন উদরপটলং জানাতি ‘মযি সেম্হং ঠিত’ন্তি, নাপি সেম্হং জানাতি ‘অহং উদরপটলে ঠিত’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি সেম্হং নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো যূসভূতো আবন্ধনাকারো আপোধাতূতি.

পুব্বো অনিবদ্ধোকাসো, যত্থ যত্থেৰ খাণুকণ্টকপ্পহরণঅগ্গিজালাদীহি অভিহটে সরীরপ্পদেসে লোহিতং সণ্ঠহিত্ৰা পচ্চতি, গণ্ডপীল়কাদযো ৰা উপ্পজ্জন্তি, তত্থ তত্থেৰ তিট্ঠতি. তত্থ যথা ফরসুপ্পহারাদিৰসেন পগ্ঘরিতনিযাসে রুক্খে ন রুক্খস্স ফরসুপ্পহারাদিপ্পদেসা জানন্তি ‘অম্হেসু নিয্যাসো ঠিতো’তি, নাপি নিয্যাসো জানাতি ‘অহং রুক্খস্স ফরসুপ্পহারাদিপ্পদেসেসু ঠিতো’তি, এৰমেৰ ন সরীরস্স খাণুকণ্টকাদীহি অভিহটপ্পদেসা জানন্তি ‘অম্হেসু পুব্বো ঠিতো’তি, নাপি পুব্বো জানাতি ‘অহং তেসু পদেসেসু ঠিতো’তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি পুব্বো নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো যূসভূতো আবন্ধনাকারো আপোধাতূতি.

লোহিতেসু সংসরণলোহিতং অবদ্ধপিত্তং ৰিয সকলসরীরং ব্যাপেত্ৰা ঠিতং. সন্নিচিতলোহিতং যকনট্ঠানস্স হেট্ঠাভাগং পূরেত্ৰা একপত্তপূরণপ্পমাণং ৰক্কহদযযকনপপ্ফাসানি তেমেন্তং ঠিতং. তত্থ সংসরণলোহিতে অবদ্ধপিত্তসদিসোৰ ৰিনিচ্ছযো. ইতরং পন যথা জজ্জরকপালট্ঠে উদকে হেট্ঠা লেড্ডুখণ্ডানি তেমযমানে ন লেড্ডুখণ্ডানি জানন্তি ‘মযং উদকেন তেমিযমানা ঠিতা’তি, নাপি উদকং জানাতি ‘অহং লেড্ডুখণ্ডানি তেমেমী’তি, এৰমেৰ ন যকনস্স হেট্ঠাভাগট্ঠানং ৰক্কাদীনি ৰা জানন্তি ‘মযি লোহিতং ঠিতং, অম্হে ৰা তেমযমানং ঠিত’ন্তি, নাপি লোহিতং জানাতি ‘অহং যকনস্স হেট্ঠাভাগং পূরেত্ৰা ৰক্কাদীনি তেমযমানং ঠিত’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি লোহিতং নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো যূসভূতো আবন্ধনাকারো আপোধাতূতি.

সেদো অগ্গিসন্তাপাদিকালেসু কেসলোমকূপৰিৰরানি পূরেত্ৰা তিট্ঠতি চেৰ পগ্ঘরতি চ. তত্থ যথা উদকা অব্বূল়্হমত্তেসু ভিসমুল়ালকুমুদনাল়কলাপেসু ন ভিসাদিকলাপৰিৰরানি জানন্তি ‘অম্হেহি উদকং পগ্ঘরতী’তি, নাপি ভিসাদিকলাপৰিৰরেহি পগ্ঘরন্তং উদকং জানাতি ‘অহং ভিসাদিকলাপৰিৰরেহি পগ্ঘরামী’তি, এৰমেৰ ন কেসলোমকূপৰিৰরানি জানন্তি ‘অম্হেহি সেদো পগ্ঘরতী’তি, নাপি সেদো জানাতি ‘অহং কেসলোমকূপৰিৰরেহি পগ্ঘরামী’তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি সেদো নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো যূসভূতো আবন্ধনাকারো আপোধাতূতি.

মেদো থূলস্স সকলসরীরং ফরিত্ৰা কিসস্স জঙ্ঘমংসাদীনি নিস্সায ঠিতো পত্থিন্নস্নেহো. তত্থ যথা হলিদ্দিপিলোতিকপটিচ্ছন্নে মংসপুঞ্জে ন মংসপুঞ্জো জানাতি ‘মং নিস্সায হলিদ্দিপিলোতিকা ঠিতা’তি, নাপি হলিদ্দিপিলোতিকা জানাতি ‘অহং মংসপুঞ্জং নিস্সায ঠিতা’তি, এৰমেৰ ন সকলসরীরে জঙ্ঘাদীসু ৰা মংসং জানাতি ‘মং নিস্সায মেদো ঠিতো’তি, নাপি মেদো জানাতি ‘অহং সকলসরীরে জঙ্ঘাদীসু ৰা মংসং নিস্সায ঠিতো’তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি মেদো নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো পত্থিন্নস্নেহো পত্থিন্নযূসভূতো আবন্ধনাকারো আপোধাতূতি.

অস্সু যদা সঞ্জাযতি তদা অক্খিকূপকে পূরেত্ৰা তিট্ঠতি ৰা পগ্ঘরতি ৰা. তত্থ যথা উদকপুণ্ণেসু তরুণতালট্ঠিকূপকেসু ন তরুণতালট্ঠিকূপকা জানন্তি ‘অম্হেসু উদকং ঠিত’ন্তি, নাপি উদকং জানাতি ‘অহং তরুণতালট্ঠিকূপকেসু ঠিত’ন্তি, এৰমেৰ ন অক্খিকূপকা জানন্তি ‘অম্হেসু অস্সু ঠিত’ন্তি, নাপি অস্সু জানাতি ‘অহং অক্খিকূপকেসু ঠিত’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি অস্সু নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো যূসভূতো আবন্ধনাকারো আপোধাতূতি.

ৰসা অগ্গিসন্তাপাদিকালে হত্থতলহত্থপিট্ঠিপাদতলপাদপিট্ঠিনাসপুটনলাটঅংসকূটেসু ঠিতৰিলীনস্নেহো. তত্থ যথা পক্খিত্ততেলে আচামে ন আচামো জানাতি ‘মং তেলং অজ্ঝোত্থরিত্ৰা ঠিত’ন্তি, নাপি তেলং জানাতি ‘অহং আচামং অজ্ঝোত্থরিত্ৰা ঠিত’ন্তি, এৰমেৰ ন হত্থতলাদিপ্পদেসো জানাতি ‘মং ৰসা অজ্ঝোত্থরিত্ৰা ঠিতা’তি, নাপি ৰসা জানাতি ‘অহং হত্থতলাদিপ্পদেসে অজ্ঝোত্থরিত্ৰা ঠিতা’তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি ৰসা নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো যূসভূতো আবন্ধনাকারো আপোধাতূতি.

খেল়ো তথারূপে খেল়ুপ্পত্তিপচ্চযে সতি উভোহি কপোলপস্সেহি ওরোহিত্ৰা জিৰ্হায তিট্ঠতি. তত্থ যথা অব্বোচ্ছিন্নউদকনিস্সন্দে নদীতীরকূপকে ন কূপতলং জানাতি ‘মযি উদকং সন্তিট্ঠতী’তি, নাপি উদকং জানাতি ‘অহং কূপতলে সন্তিট্ঠামী’তি, এৰমেৰ ন জিৰ্হাতলং জানাতি ‘মযি উভোহি কপোলপস্সেহি ওরোহিত্ৰা খেল়ো ঠিতো’তি, নাপি খেল়ো জানাতি ‘অহং উভোহি কপোলপস্সেহি ওরোহিত্ৰা জিৰ্হাতলে ঠিতো’তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি খেল়ো নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো যূসভূতো আবন্ধনাকারো আপোধাতূতি.

সিঙ্ঘাণিকা যদা সঞ্জাযতি তদা নাসাপুটে পূরেত্ৰা তিট্ঠতি ৰা পগ্ঘরতি ৰা. তত্থ যথা পূতিদধিভরিতায সিপ্পিকায ন সিপ্পিকা জানাতি ‘মযি পূতিদধি ঠিত’ন্তি, নাপি পূতিদধি জানাতি ‘অহং সিপ্পিকায ঠিত’ন্তি, এৰমেৰ ন নাসাপুটা জানন্তি ‘অম্হেসু সিঙ্ঘাণিকা ঠিতা’তি, নাপি সিঙ্ঘাণিকা জানাতি ‘অহং নাসাপুটেসু ঠিতা’তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি সিঙ্ঘাণিকা নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো যূসভূতো আবন্ধনাকারো আপোধাতূতি.

লসিকা অট্ঠিকসন্ধীনং অব্ভঞ্জনকিচ্চং সাধযমানা অসীতিসতসন্ধীসু ঠিতা. তত্থ যথা তেলব্ভঞ্জিতে অক্খে ন অক্খো জানাতি ‘মং তেলং অব্ভঞ্জিত্ৰা ঠিত’ন্তি, নাপি তেলং জানাতি ‘অহং অক্খং অব্ভঞ্জিত্ৰা ঠিত’ন্তি, এৰমেৰ ন অসীতিসতসন্ধযো জানন্তি ‘লসিকা অম্হে অব্ভঞ্জিত্ৰা ঠিতা’তি, নাপি লসিকা জানাতি ‘অহং অসীতিসতসন্ধযো অব্ভঞ্জিত্ৰা ঠিতা’তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি লসিকা নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো যূসভূতো আবন্ধনাকারো আপোধাতূতি.

মুত্তং ৰত্থিস্স অব্ভন্তরে ঠিতং. তত্থ যথা চন্দনিকায পক্খিত্তে অধোমুখে রৰণঘটে ন রৰণঘটো জানাতি ‘মযি চন্দনিকারসো ঠিতো’তি, নাপি চন্দনিকারসো জানাতি ‘অহং রৰণঘটে ঠিতো’তি, এৰমেৰ ন ৰত্থি জানাতি ‘মযি মুত্তং ঠিত’ন্তি, নাপি মুত্তং জানাতি ‘অহং ৰত্থিম্হি ঠিত’ন্তি. অঞ্ঞমঞ্ঞং আভোগপচ্চৰেক্খণরহিতা এতে ধম্মা. ইতি মুত্তং নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো যূসভূতো আবন্ধনাকারো আপোধাতূতি. যং ৰা পনাতি অৰসেসেসু তীসু কোট্ঠাসেসু আপোধাতুং সন্ধায ৰুত্তং.

বাহিরআপোধাতুনিদ্দেসে মূলং পটিচ্চ নিব্বত্তো রসো মূলরসো নাম. খন্ধরসাদীসুপি এসেৰ নযো. খীরাদীনি পাকটানেৰ. যথা পন ভেসজ্জসিক্খাপদে এৰমিধ নিযমো নত্থি. যং কিঞ্চি খীরং খীরমেৰ. সেসেসুপি এসেৰ নযো. ভুম্মানীতি আৰাটাদীসু ঠিতউদকানি. অন্তলিক্খানীতি পথৰিং অপ্পত্তানি ৰস্সোদকানি. যং ৰা পনাতি হিমোদককপ্পৰিনাসকউদকপথৰীসন্ধারকউদকাদীনি ইধ যেৰাপনকট্ঠানং পৰিট্ঠানি.

১৭৫. তেজোধাতুনিদ্দেসে তেজনৰসেন তেজো. তেজোৰ তেজোভাৰং গতত্তা তেজোগতং. উস্মাতি উণ্হাকারো. উস্মাৰ উস্মাভাৰং গতত্তা উস্মাগতং. উসুমন্তি চণ্ডউসুমং. তদেৰ উসুমভাৰং গতত্তা উসুমগতং. যেন চাতি যেন তেজোগতেন কুপ্পিতেন. সন্তপ্পতীতি অযং কাযো সন্তপ্পতি, একাহিকজরাদিভাৰেন উসুমজাতো হোতি. যেন চ জীরীযতীতি যেন অযং কাযো জীরীযতি, ইন্দ্রিযৰেকল্লতং বলপরিক্খযং ৰলিপলিতাদিভাৰঞ্চ পাপুণাতি. যেন চ পরিডয্হতীতি যেন কুপ্পিতেন অযং কাযো ডয্হতি, সো চ পুগ্গলো ‘ডয্হামি ডয্হামী’তি কন্দন্তো সতধোতসপ্পিগোসীতচন্দনাদিলেপনঞ্চেৰ তালৰণ্টৰাতঞ্চ পচ্চাসীসতি. যেন চ অসিতপীতখাযিতসাযিতং সম্মা পরিণামং গচ্ছতীতি যেনেতং অসিতং ৰা ওদনাদি, পীতং ৰা পানকাদি, খাযিতং ৰা পিট্ঠখজ্জকাদি, সাযিতং ৰা অম্বপক্কমধুফাণিতাদি সম্মা পরিপাকং গচ্ছতি, রসাদিভাৰেন ৰিৰেকং গচ্ছতীতি অত্থো. এত্থ চ পুরিমা তযো তেজোধাতূ চতুসমুট্ঠানা, পচ্ছিমো কম্মসমুট্ঠানোৰ. অযং তাৰেত্থ পদসংৰণ্ণনা.

ইদং পন মনসিকারৰিধানং – ইধ ভিক্খু ‘যেন সন্তপ্পতি, অযং ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো পরিপাচনাকারো তেজোধাতূ’তি মনসি করোতি; ‘যেন জীরীযতি, যেন পরিডয্হতি, যেন অসিতপীতখাযিতসাযিতং সম্মা পরিণামং গচ্ছতি, অযং ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো পরিপাচনাকারো তেজোধাতূ’তি মনসি করোতি. যং ৰা পনাতি ইমস্মিং সরীরে পাকতিকো একো উতু অত্থি, সো যেৰাপনকট্ঠানং পৰিট্ঠো.

বাহিরতেজোধাতুনিদ্দেসে কট্ঠং পটিচ্চ পজ্জলিতো কট্ঠুপাদানো অগ্গি কট্ঠগ্গি নাম. সকলিকগ্গিআদীসুপি এসেৰ নযো. সঙ্কারগ্গীতি কচৰরং সংকড্ঢিত্ৰা জালাপিতো কচৰরগ্গি. ইন্দগ্গীতি অসনিঅগ্গি. অগ্গিসন্তাপোতি জালায ৰা ৰীতচ্চিকঙ্গারানং ৰা সন্তাপো. সূরিযসন্তাপোতি আতপো. কট্ঠসন্নিচযসন্তাপোতি কট্ঠরাসিট্ঠানে সন্তাপো. সেসেসুপি এসেৰ নযো. যং ৰা পনাতি পেতগ্গি কপ্পৰিনাসগ্গি নিরযগ্গিআদযো ইধ যেৰাপনকট্ঠানং পৰিট্ঠা.

১৭৬. ৰাযোধাতুনিদ্দেসে ৰাযনৰসেন ৰাযো. ৰাযোৰ ৰাযোভাৰং গতত্তা ৰাযোগতং. থম্ভিতত্তং রূপস্সাতি অৰিনিব্ভোগরূপস্স থম্ভিতভাৰো. উদ্ধঙ্গমা ৰাতাতি উগ্গারহিক্কাদি পৰত্তকা উদ্ধং আরোহনৰাতা. অধোগমা ৰাতাতি উচ্চারপস্সাৰাদিনীহরণকা অধো ওরোহনৰাতা. কুচ্ছিসযা ৰাতাতি অন্তানং বহিৰাতা. কোট্ঠাসযা ৰাতাতি অন্তানং অন্তোৰাতা. অঙ্গমঙ্গানুসারিনো ৰাতাতি ধমনিজালানুসারেন সকলসরীরে অঙ্গমঙ্গানি অনুসটা সমিঞ্জনপসারণাদিনিব্বত্তকা ৰাতা. সত্থকৰাতাতি সন্ধিবন্ধনানি কত্তরিযা ছিন্দন্তা ৰিয পৰত্তৰাতা. খুরকৰাতাতি খুরেন ৰিয হদযং ফালনৰাতা. উপ্পলকৰাতাতি হদযমংসমেৰ উপ্পাটনকৰাতা. অস্সাসোতি অন্তোপৰিসননাসিকাৰতো. পস্সাসোতি বহিনিক্খমননাসিকাৰতো. এত্থ চ পুরিমা সব্বে চতুসমুট্ঠানা, অস্সাসপস্সাসা চিত্তসমুট্ঠানাৰ. অযমেত্থ পদৰণ্ণনা.

ইদং পন মনসিকারৰিধানং – ইধ ভিক্খু উদ্ধঙ্গমাদিভেদে ৰাতে উদ্ধঙ্গমাদিৰসেন পরিগ্গহেত্ৰা ‘উদ্ধঙ্গমা ৰাতা নাম ইমস্মিং সরীরে পাটিযেক্কো কোট্ঠাসো অচেতনো অব্যাকতো সুঞ্ঞো নিস্সত্তো ৰিত্থম্ভনাকারো ৰাযোধাতূ’তি মনসি করোতি. সেসেসুপি এসেৰ নযো. যং ৰা পনাতি সেসে ৰাযোকোট্ঠাসে অনুগতা ৰাতা ইধ যেৰাপনকট্ঠানং পৰিট্ঠা.

বাহিরৰাযোধাতুনিদ্দেসে পুরত্থিমা ৰাতাতি পুরত্থিমদিসতো আগতা ৰাতা. পচ্ছিমুত্তরদক্খিণেসুপি এসেৰ নযো. সরজা ৰাতাতি সহ রজেন সরজা. অরজা ৰাতাতি রজৰিরহিতা সুদ্ধা অরজা নাম. সীতাতি সীতউতুসমুট্ঠানা সীতৰলাহকন্তরে সমুট্ঠিতা. উণ্হাতি উণ্হউতুসমুট্ঠানা উণ্হৰলাহকন্তরে সমুট্ঠিতা. পরিত্তাতি মন্দা তনুকৰাতা. অধিমত্তাতি বলৰৰাতা. কাল়াতি কাল়ৰলাহকন্তরে সমুট্ঠিতা, যেহি অব্ভাহতো ছৰিৰণ্ণো কাল়কো হোতি. তেসং এতং অধিৰচনন্তিপি একে. ৰেরম্ভৰাতাতি যোজনতো উপরি ৰাযনৰাতা. পক্খৰাতাতি অন্তমসো মক্খিকাযপি পক্খাযূহনসমুট্ঠিতা ৰাতা. সুপণ্ণৰাতাতি গরুল়ৰাতা. কামঞ্চ ইমেপি পক্খৰাতাৰ উস্সদৰসেন পন ৰিসুং গহিতা. তালৰণ্টৰাতাতি তালপণ্ণেহি ৰা অঞ্ঞেন ৰা কেনচি মণ্ডলসণ্ঠানেন সমুট্ঠাপিতা ৰাতা. ৰিধূপনৰাতাতি বীজনপত্তকেন সমুট্ঠাপিতা ৰাতা. ইমানি চ তালৰণ্টৰিধূপনানি অনুপ্পন্নম্পি ৰাতং উপ্পাদেন্তি, উপ্পন্নম্পি পরিৰত্তেন্তি. যং ৰা পনাতি ইধ পাল়িআগতে ঠপেত্ৰা সেসৰাতা যেৰাপনকট্ঠানং পৰিট্ঠা.

১৭৭. আকাসধাতুনিদ্দেসে অপ্পটিঘট্টনট্ঠেন ন কস্সতীতি আকাসো. আকাসোৰ আকাসভাৰং গতত্তা আকাসগতং. অঘট্টনীযতায অঘং. অঘমেৰ অঘভাৰং গতত্তা অঘগতং. ৰিৰরোতি অন্তরং. তদেৰ ৰিৰরভাৰং গতত্তা ৰিৰরগতং. অসম্ফুট্ঠং মংসলোহিতেহীতি মংসলোহিতেহি নিস্সটং. কণ্ণচ্ছিদ্দন্তিআদি পন তস্সেৰ পভেদদস্সনং. তত্থ কণ্ণচ্ছিদ্দন্তি কণ্ণস্মিং ছিদ্দং ৰিৰরং মংসলোহিতেহি অসম্ফুট্ঠোকাসো. সেসেসুপি এসেৰ নযো. যেনাতি যেন ৰিৰরেন এতং অসিতাদিভেদং অজ্ঝোহরণীযং অজ্ঝোহরতি, অন্তো পৰেসেতি. যত্থাতি যস্মিং অন্তোউদরপটলসঙ্খাতে ওকাসে এতদেৰ চতুব্বিধং অজ্ঝোহরণীযং তিট্ঠতি. যেনাতি যেন ৰিৰরেন সব্বম্পেতং ৰিপক্কং কসটভাৰং আপন্নং নিক্খমতি, তং উদরপটলতো যাৰ করীসমগ্গা ৰিদত্থিচতুরঙ্গুলমত্তং ছিদ্দং মংসলোহিতেহি অসম্ফুট্ঠং নিস্সটং আকাসধাতূতি ৰেদিতব্বং. যং ৰা পনাতি এত্থ চম্মন্তরং মংসন্তরং ন্হারুন্তরং অট্ঠিন্তরং লোমন্তরন্তি ইদং সব্বং যেৰাপনকট্ঠানং পৰিট্ঠং.

বাহিরকআকাসধাতুনিদ্দেসে অসম্ফুট্ঠং চতূহি মহাভূতেহীতি চতূহি মহাভূতেহি নিস্সটং ভিত্তিছিদ্দকৰাটছিদ্দাদিকং ৰেদিতব্বং. ইমিনা যস্মিং আকাসে পরিকম্মং করোন্তস্স চতুক্কপঞ্চকজ্ঝানানি উপ্পজ্জন্তি তং কথিতং.

১৭৮. ৰিঞ্ঞাণধাতুনিদ্দেসে চক্খুৰিঞ্ঞাণসঙ্খাতা ধাতু চক্খুৰিঞ্ঞাণধাতু. সেসাসুপি এসেৰ নযো. ইতি ইমাসু ছসু ধাতূসু পরিগ্গহিতাসু অট্ঠারস ধাতুযো পরিগ্গহিতাৰ হোন্তি. কথং? পথৰীতেজোৰাযোধাতুগ্গহণেন তাৰ ফোট্ঠব্বধাতু গহিতাৰ হোতি, আপোধাতুআকাসধাতুগ্গহণেন ধম্মধাতু, ৰিঞ্ঞাণধাতুগ্গহণেন তস্সা পুরেচারিকপচ্ছাচারিকত্তা মনোধাতু গহিতাৰ হোতি. চক্খুৰিঞ্ঞাণধাতুআদযো সুত্তে আগতা এৰ. সেসা নৰ আহরিত্ৰা দস্সেতব্বা. চক্খুৰিঞ্ঞাণধাতুগ্গহণেন হি তস্সা নিস্সযভূতা চক্খুধাতু, আরম্মণভূতা রূপধাতু চ গহিতাৰ হোন্তি. এৰং সোতৰিঞ্ঞাণধাতুআদিগ্গহণেন সোতধাতুআদযোতি অট্ঠারসাপি গহিতাৰ হোন্তি. তাসু দসহি ধাতূহি রূপপরিগ্গহো কথিতো হোতি. সত্তহি অরূপপরিগ্গহো. ধম্মধাতুযা সিযা রূপপরিগ্গহো, সিযা অরূপপরিগ্গহো. ইতি অড্ঢেকাদসহি ধাতূহি রূপপরিগ্গহো, অড্ঢট্ঠধাতূহি অরূপপরিগ্গহোতি রূপারূপপরিগ্গহো কথিতো হোতি. রূপারূপং পঞ্চক্খন্ধা. তং হোতি দুক্খসচ্চং. তংসমুট্ঠাপিকা পুরিমতণ্হা সমুদযসচ্চং. উভিন্নং অপ্পৰত্তি নিরোধসচ্চং. তংপজাননো মগ্গো মগ্গসচ্চন্তি ইদং চতুসচ্চকম্মট্ঠানং অট্ঠারসধাতুৰসেন অভিনিৰিট্ঠস্স ভিক্খুনো যাৰ অরহত্তা মত্থকং পাপেত্ৰা নিগমনং কথিতন্তি ৰেদিতব্বং.

১৭৯. ইদানি দুতিযছক্কং দস্সেন্তো অপরাপি ছ ধাতুযোতিআদিমাহ. তত্থ সুখধাতু দুক্খধাতূতি কাযপ্পসাদৰত্থুকানি সুখদুক্খানি সপ্পটিপক্খৰসেন যুগল়কতো দস্সিতানি. সুখঞ্হি দুক্খস্স পটিপক্খো, দুক্খং সুখস্স. যত্তকং সুখেন ফরিতট্ঠানং তত্তকং দুক্খং ফরতি. যত্তকং দুক্খেন ফরিতট্ঠানং তত্তকং সুখং ফরতি. সোমনস্সধাতু দোমনস্সধাতূতি ইদম্পি তথেৰ যুগল়কং কতং. সোমনস্সঞ্হি দোমনস্সস্স পটিপক্খো, দোমনস্সং সোমনস্সস্স. যত্তকং সোমনস্সেন ফরিতট্ঠানং তত্তকং দোমনস্সং ফরতি. যত্তকং দোমনস্সেন ফরিতট্ঠানং তত্তকং সোমনস্সং ফরতি.

উপেক্খাধাতু অৰিজ্জাধাতূতি ইদং পন দ্ৰযং সরিক্খকৰসেন যুগল়কং কতং. উভযম্পি হেতং অৰিভূতত্তা সরিক্খকং হোতি. তত্থ সুখদুক্খধাতুগ্গহণেন তং সম্পযুত্তা কাযৰিঞ্ঞাণধাতু, ৰত্থুভূতা কাযধাতু, আরম্মণভূতা ফোট্ঠব্বধাতু চ গহিতাৰ হোন্তি. সোমনস্সদোমনস্সধাতুগ্গহণেন তং সম্পযুত্তা মনোৰিঞ্ঞাণধাতু গহিতা হোতি. অৰিজ্জাধাতুগ্গহণেন ধম্মধাতু গহিতা. উপেক্খাধাতুগ্গহণেন চক্খুসোতঘানজিৰ্হাৰিঞ্ঞাণধাতুমনোধাতুযো, তাসংযেৰ ৰত্থারম্মণভূতা চক্খুধাতুরূপধাতুআদযো চ গহিতাতি এৰং অট্ঠারসপি ধাতুযো গহিতাৰ হোন্তি. ইদানি তাসু দসহি ধাতূহি রূপপরিগ্গহোতিআদি সব্বং হেট্ঠা ৰুত্তনযেনেৰ ৰেদিতব্বং. এৰম্পি একস্স ভিক্খুনো যাৰ অরহত্তা মত্থকং পাপেত্ৰা নিগমনং কথিতং হোতীতি ৰেদিতব্বং. তত্থ কতমা সুখধাতু যং কাযিকং সাতন্তি আদীনি হেট্ঠা ৰুত্তনযানেৰ.

১৮১. ততিযছক্কে কামোতি দ্ৰে কামা – ৰত্থুকামো চ কিলেসকামো চ. তত্থ কিলেসকামং সন্ধায কামপটিসংযুত্তা ধাতু কামধাতু, কামৰিতক্কস্সেতং নামং. ৰত্থুকামং সন্ধায কামোযেৰ ধাতু কামধাতু, কামাৰচরধম্মানমেতং নামং. ব্যাপাদপটিসংযুত্তা ধাতু ব্যাপাদধাতু, ব্যাপাদৰিতক্কস্সেতং নামং. ব্যাপাদোৰ ধাতু ব্যাপাদধাতু, দসআঘাতৰত্থুকস্স পটিঘস্সেতং নামং. ৰিহিংসা পটিসংযুত্তা ধাতু ৰিহিংসাধাতু, ৰিহিংসাৰিতক্কস্সেতং নামং. ৰিহিংসাযেৰ ধাতু ৰিহিংসাধাতু, পরসত্তৰিহেসনস্সেতং নামং. অযং পন হেট্ঠা অনাগতত্তা এৰং অত্থাদিৰিভাগতো ৰেদিতব্বা – ৰিহিংসন্তি এতায সত্তে, ৰিহিংসনং ৰা এতং সত্তানন্তি ৰিহিংসা. সা ৰিহেঠনলক্খণা, করুণাপটিপক্খলক্খণা ৰা; পরসন্তানে উব্বেগজননরসা, সকসন্তানে করুণাৰিদ্ধংসনরসা ৰা; দুক্খাযতনপচ্চুপট্ঠানা; পটিঘপদট্ঠানাতি ৰেদিতব্বা. নেক্খম্মং ৰুচ্চতি লোভা নিক্খন্তত্তা অলোভো, নীৰরণেহি নিক্খন্তত্তা পঠমজ্ঝানং, সব্বাকুসলেহি নিক্খন্তত্তা সব্বকুসলং. নেক্খম্মপটিসংযুত্তা ধাতু নেক্খম্মধাতু, নেক্খম্মৰিতক্কস্সেতং নামং. নেক্খম্মমেৰ ধাতু নেক্খম্মধাতু, সব্বস্সাপি কুসলস্সেতং নামং. অব্যাপাদপটিসংযুত্তা ধাতু অব্যাপাদধাতু, অব্যাপাদৰিতক্কস্সেতং নামং. অব্যাপাদোৰ ধাতু অব্যাপাদধাতু, মেত্তাযেতং নামং. অৰিহিংসাপটিসংযুত্তা ধাতু অৰিহিংসাধাতু, অৰিহিংসা ৰিতক্কস্সেতং নামং. অৰিহিংসাৰ ধাতু অৰিহিংসাধাতু, করুণাযেতং নামং.

১৮২. ইদানি তমেৰত্থং দস্সেতুং তত্থ কতমা কামধাতূতি পদভাজনং আরদ্ধং. তত্থ পটিসংযুত্তোতি সংপযোগৰসেন পটিসংযুত্তো. তক্কো ৰিতক্কোতিআদীনি ৰুত্তত্থানেৰ. ৰিহেঠেতীতি বাধেতি, দুক্খাপেতি. হেঠনাতি পাণিপ্পহারাদীহি বাধনা, দুক্খুপ্পাদনা. বলৰহেঠনা ৰিহেঠনা. হিংসন্তি এতাযাতি হিংসনা. বলৰহিংসনা ৰিহিংসনা. রোসনাতি ঘট্টনা. ৰিরোসনাতি বলৰঘট্টনা. সব্বত্থ ৰা ‘ৰি’ উপসগ্গেন পদং ৰড্ঢিতং. উপহনন্তি এতেনাতি উপঘাতো, পরেসং উপঘাতো পরূপঘাতো.

মেত্তাযন্তি এতাযাতি মেত্তি. মেত্তাযনাকারো মেত্তাযনা. মেত্তায অযিতস্স মেত্তাসমঙ্গিনো ভাৰো মেত্তাযিতত্তং. ব্যাপাদেন ৰিমুত্তস্স চেতসো ৰিমুত্তি চেতোৰিমুত্তি. এত্থ চ পুরিমেহি তীহি উপচারপ্পত্তাপি অপ্পনাপতাপি মেত্তা কথিতা, পচ্ছিমেন অপ্পনাপত্তাৰ.

করুণাযন্তি এতাযাতি করুণা. করুণাযনাকারো করুণাযনা. করুণায অযিতস্স করুণাসমঙ্গিনো ভাৰো করুণাযিতত্তং. ৰিহিংসায ৰিমুত্তস্স চেতসো ৰিমুত্তি চেতোৰিমুত্তি. ইধাপি পুরিমনযেনেৰ উপচারপ্পনাভেদো ৰেদিতব্বো. উভযত্থাপি চ পরিযোসানপদে মেত্তাকরুণাতি চেতোৰিমুত্তিৰিসেসনত্থং ৰুত্তং.

এত্থ চ কামৰিতক্কো সত্তেসুপি উপ্পজ্জতি সঙ্খারেসুপি. উভযত্থ উপ্পন্নোপি কম্মপথভেদোৰ. ব্যাপাদো পন সত্তেসু উপ্পন্নোযেৰ কম্মপথং ভিন্দতি, ন ইতরো. ৰিহিংসাযপি এসেৰ নযো. এত্থ চ দুৰিধা কথা – সব্বসঙ্গাহিকা চেৰ অসম্ভিন্না চ. কামধাতুগ্গহণেন হি ব্যাপাদৰিহিংসাধাতুযোপি গহিতা. কামধাতুযাযেৰ পন নীহরিত্ৰা নীহরিত্ৰা দ্ৰেপি এতা দস্সিতাতি. অযং তাৰেত্থ সব্বসঙ্গাহিককথা. ঠপেত্ৰা পন ব্যাপাদৰিহিংসাধাতুযো সেসা সব্বাপি কামধাতু এৰাতি. অযং অসম্ভিন্নকথা নাম. নেক্খম্মধাতুগ্গহণেনাপি অব্যাপাদঅৰিহিংসাধাতুযো গহিতাযেৰ. নেক্খম্মধাতুতো পন নীহরিত্ৰা নীহরিত্ৰা তদুভযম্পি দস্সিতন্তি অযমেত্থাপি সব্বসঙ্গাহিককথা. ঠপেত্ৰা অব্যাপাদঅৰিহিংসাধাতুযো অৰসেসা নেক্খম্মধাতূতি অযং অসম্ভিন্নকথা নাম.

ইমাহি চ ছহি ধাতূহি পরিগ্গহিতা হি অট্ঠারস ধাতুযো পরিগ্গহিতাৰ হোন্তি. সব্বাপি হি তা কামধাতুতোৰ নীহরিত্ৰা নীহরিত্ৰা লভাপেতব্বা অট্ঠারস ধাতুযোৰ হোন্তীতি তিণ্ণং ছক্কানং ৰসেন অট্ঠারস হোন্তি. এৰং পন অগ্গহেত্ৰা একেকস্মিং ছক্কে ৰুত্তনযেন অট্ঠারস অট্ঠারস কত্ৰা সব্বানিপি তানি অট্ঠারসকানি একজ্ঝং অভিসঙ্খিপিত্ৰা অট্ঠারসেৰ হোন্তীতি ৰেদিতব্বা. ইতি ইমস্মিং সুত্তন্তভাজনীযে সোল়স ধাতুযো কামাৰচরা, দ্ৰে তেভূমিকাতি এৰমেত্থ সম্মসনচারোৰ কথিতোতি ৰেদিতব্বো.

সুত্তন্তভাজনীযৰণ্ণনা.

২. অভিধম্মভাজনীযৰণ্ণনা

১৮৩. অভিধম্মভাজনীযে সরূপেনেৰ সব্বাপি ধাতুযো দস্সেন্তো অট্ঠারস ধাতুযো – চক্খুধাতু রূপধাতূতিআদিমাহ. তত্থ উদ্দেসৰারে তাৰ –

অত্থতো লক্খণাদিতো, কমতাৰত্ৰসঙ্খতো;

পচ্চযা অথ দট্ঠব্বা, ৰেদিতব্বো ৰিনিচ্ছযো.

তত্থ ‘অত্থতো’তি চক্খতীতি চক্খু. রূপযতীতি রূপং. চক্খুস্স ৰিঞ্ঞাণং চক্খুৰিঞ্ঞাণন্তি এৰমাদিনা তাৰ নযেন চক্খাদীনং ৰিসেসত্থতো ৰেদিতব্বো ৰিনিচ্ছযো. অৰিসেসেন পন ৰিদহতি, ধীযতে, ৰিধানং, ৰিধীযতে এতায, এত্থ ৰা ধীযতীতি ধাতু. লোকিযা হি ধাতুযো কারণভাৰেন ৰৰত্থিতা হুত্ৰা সুৰণ্ণরজতাদিধাতুযো ৰিয সুৰণ্ণরজতাদিং অনেকপ্পকারং সংসারদুক্খং ৰিদহন্তি; ভারহারেহি চ ভারো ৰিয সত্তেহি ধীযন্তে ধারীযন্তেতি অত্থো. দুক্খৰিধানমত্তমেৰ চেতা অৰসৰত্তনতো. এতাহি চ করণভূতাহি সংসারদুক্খং সত্তেহি অনুৰিধীযতি; তথাৰিহিতঞ্চেতং এতাস্ৰেৰ ধীযতি ঠপীযতীতি অত্থো. ইতি চক্খাদীসু একেকো ধম্মো যথাসম্ভৰং ৰিদহতি ধীযতেতিআদিঅত্থৰসেন ধাতূতি ৰুচ্চতি.

অপিচ যথা তিত্থিযানং অত্তা নাম সভাৰতো নত্থি, ন এৰমেতা. এতা পন অত্তনো সভাৰং ধারেন্তীতি ধাতুযো. যথা চ লোকে ৰিচিত্তা হরিতালমনোসিলাদযো সিলাৰযৰা ধাতুযোতি ৰুচ্চন্তি, এৰমেতাপি ধাতুযো ৰিয ধাতুযো. ৰিচিত্তা হেতা ঞাণঞেয্যাৰযৰাতি. যথা ৰা সরীরসঙ্খাতস্স সমুদাযস্স অৰযৰভূতেসু রসসোণিতাদীসু অঞ্ঞমঞ্ঞং ৰিসভাগলক্খণপরিচ্ছিন্নেসু ধাতুসমঞ্ঞা, এৰমেতেসুপি পঞ্চক্খন্ধসঙ্খাতস্স অত্তভাৰস্স অৰযৰেসু ধাতুসমঞ্ঞা ৰেদিতব্বা. অঞ্ঞমঞ্ঞৰিসভাগলক্খণপরিচ্ছিন্না হেতে চক্খাদযোতি. অপিচ ধাতূতি নিজ্জীৰমত্তস্সেতং অধিৰচনং. তথা হি ভগৰা – ‘‘ছ ধাতুরো অযং, ভিক্খু, পুরিসো’’তিআদীসু (ম. নি. ৩.৩৪৩-৩৪৪) জীৰসঞ্ঞাসমূহনত্থং ধাতুদেসনং অকাসীতি. তস্মা যথাৰুত্তেনত্থেন চক্খু চ তং ধাতু চাতি চক্খুধাতু …পে… মনোৰিঞ্ঞাণঞ্চ তং ধাতু চাতি মনোৰিঞ্ঞাণধাতূতি এৰং তাৰেত্থ অত্থতো ৰিঞ্ঞাতব্বো ৰিনিচ্ছযো.

‘লক্খণাদিতো’তি চক্খাদীনং লক্খণাদিতো পেত্থ ৰেদিতব্বো ৰিনিচ্ছযো. তানি চ পন তেসং লক্খণাদীনি হেট্ঠা ৰুত্তনযেনেৰ ৰেদিতব্বানি.

‘কমতো’তি ইধাপি পুব্বে ৰুত্তেসু উপ্পত্তিক্কমাদীসু দেসনাক্কমোৰ যুজ্জতি. সো চ পনাযং হেতুফলানুপুব্বৰৰত্থানৰসেন ৰুত্তো. চক্খুধাতু রূপধাতূতি ইদঞ্হি দ্ৰযং হেতু. চক্খুৰিঞ্ঞাণধাতূতি ফলং. এৰং সব্বত্থ কমতো ৰেদিতব্বো ৰিনিচ্ছযো.

‘তাৰত্ৰতো’তি তাৰভাৰতো. ইদং ৰুত্তং হোতি – তেসু তেসু হি সুত্তাভিধম্মপদেসেসু আভাধাতু, সুভধাতু, আকাসানঞ্চাযতনধাতু, ৰিঞ্ঞাণঞ্চাযতনধাতু, আকিঞ্চঞ্ঞাযতনধাতু, নেৰসঞ্ঞানাসঞ্ঞাযতনধাতু, সঞ্ঞাৰেদযিতনিরোধধাতু, কামধাতু, ব্যাপাদধাতু, ৰিহিংসাধাতু, নেক্খম্মধাতু, অব্যাপাদধাতু, অৰিহিংসাধাতু, সুখধাতু, দুক্খধাতু, সোমনস্সধাতু, দোমনস্সধাতু, উপেক্খাধাতু, অৰিজ্জাধাতু, আরম্ভধাতু, নিক্কমধাতু, পরক্কমধাতু, হীনধাতু, মজ্ঝিমধাতু, পণীতধাতু, পথৰীধাতু, আপোধাতু, তেজোধাতু, ৰাযোধাতু, আকাসধাতু, ৰিঞ্ঞাণধাতু, সঙ্খতধাতু, অসঙ্খতধাতু, অনেকধাতুনানাধাতুলোকোতি এৰমাদযো অঞ্ঞাপি ধাতুযো দিস্সন্তি.

এৰং সতি সব্বাসং ৰসেন পরিচ্ছেদং অকত্ৰা কস্মা অট্ঠারসাতি অযমেৰ পরিচ্ছেদো কতোতি চে? সভাৰতো ৰিজ্জমানানং সব্বধাতূনং তদন্তোগধত্তা. রূপধাতুযেৰ হি আভাধাতু. সুভধাতু পন রূপাদিপ্পটিবদ্ধা. কস্মা? সুভনিমিত্তত্তা. সুভনিমিত্তঞ্হি সুভধাতু. তঞ্চ রূপাদিৰিনিমুত্তং ন ৰিজ্জতি, কুসলৰিপাকারম্মণা ৰা রূপাদযো এৰ সুভধাতূতি রূপাদিমত্তমেৰেসা. আকাসানঞ্চাযতনধাতুআদীসু চিত্তং মনোৰিঞ্ঞাণধাতু. সেসা ধম্মা ধম্মধাতু. সঞ্ঞাৰেদযিতনিরোধধাতু পন সভাৰতো নত্থি; ধাতুদ্ৰযনিরোধমত্তমেৰ হি সা. কামধাতু ধম্মধাতুমত্তং ৰা হোতি, যথাহ ‘‘তত্থ কতমা কামধাতু? কামপটিসংযুত্তো তক্কো …পে… মিচ্ছাসঙ্কপ্পো’’তি; অট্ঠারসপি ধাতুযো ৰা, যথাহ ‘‘হেট্ঠতো অৰীচিনিরযং পরিযন্তং কত্ৰা উপরিতো পরনিম্মিতৰসৰত্তিদেৰে অন্তোকরিত্ৰা যং এতস্মিং অন্তরে এত্থাৰচরা এত্থ পরিযাপন্না খন্ধধাতুআযতনা, রূপা, ৰেদনা, সঞ্ঞা, সঙ্খারা, ৰিঞ্ঞাণং – অযং ৰুচ্চতি কামধাতূ’’তি. নেক্খম্মধাতু ধম্মধাতু এৰ; ‘‘সব্বেপি কুসলা ধম্মা নেক্খম্মধাতূ’’তি ৰা ৰচনতো মনোৰিঞ্ঞাণধাতুপি হোতিযেৰ. ব্যাপাদৰিহিংসাঅব্যাপাদঅৰিহিংসাসুখদুক্খসোমনস্সদোমনস্সুপেক্খাঅৰিজ্জাআরম্ভনিক্কমপরক্কমধাতুযো ধম্মধাতুযেৰ.

হীনমজ্ঝিমপণীতধাতুযো অট্ঠারসধাতুমত্তমেৰ. হীনা হি চক্খাদযো হীনধাতু. মজ্ঝিমপণীতা চক্খাদযো মজ্ঝিমা চেৰ পণীতা চ ধাতূ. নিপ্পরিযাযেন পন অকুসলা ধম্মধাতুমনোৰিঞ্ঞাণধাতুযো হীনধাতু. লোকিযা কুসলাব্যাকতা উভোপি চক্খুধাতুআদযো চ মজ্ঝিমধাতু. লোকুত্তরা পন ধম্মধাতুমনোৰিঞ্ঞাণধাতুযো পণীতধাতু. পথৰীতেজোৰাযোধাতুযো ফোট্ঠব্বধাতুযেৰ. আপোধাতু আকাসধাতু চ ধম্মধাতুযেৰ. ৰিঞ্ঞাণধাতু চক্খুৰিঞ্ঞাণাদিসত্তৰিঞ্ঞাণধাতুসঙ্খেপোযেৰ. সত্তরস ধাতুযো ধম্মধাতুএকদেসো চ সঙ্খতধাতু. অসঙ্খতধাতু পন ধম্মধাতুএকদেসোৰ. অনেকধাতুনানাধাতুলোকো পন অট্ঠারসধাতুপ্পভেদমত্তমেৰাতি. ইতি সভাৰতো ৰিজ্জমানানং সব্বধাতূনং তদন্তোগধত্তা অট্ঠারসেৰ ৰুত্তাতি.

অপিচ ৰিজাননসভাৰে ৰিঞ্ঞাণে জীৰসঞ্ঞীনং জীৰসঞ্ঞাসমূহনত্থম্পি অট্ঠারসেৰ ৰুত্তা. সন্তি হি সত্তা ৰিজাননসভাৰে ৰিঞ্ঞাণে জীৰসঞ্ঞিনো. তেসং চক্খুসোতঘানজিৰ্হাকাযৰিঞ্ঞাণমনোৰিঞ্ঞাণধাতুভেদেন তস্সা অনেকত্তং, চক্খুরূপাদিপচ্চযাযত্তৰুত্তিতায অনিচ্চতঞ্চ পকাসেত্ৰা দীঘরত্তানুসযিতং জীৰসঞ্ঞং সমূহনিতুকামেন ভগৰতা অট্ঠারস ধাতুযো পকাসিতা. কিঞ্চ ভিয্যো? তথা ৰেনেয্যজ্ঝাসযৰসেন; যে চ ইমায নাতিসঙ্খেপৰিত্থারায দেসনায ৰেনেয্যা সত্তা, তদজ্ঝাসযৰসেন চ অট্ঠারসেৰ পকাসিতা.

সঙ্খেপৰিত্থারনযেন তথা তথা হি,

ধম্মং পকাসযতি এস যথা যথাস্স;

সদ্ধম্মতেজৰিহতং ৰিলযং খণেন,

ৰেনেয্যসত্তহদযেসু তমো পযাতীতি.

এৰমেত্থ ‘তাৰত্ৰতো’ ৰেদিতব্বো ৰিনিচ্ছযো.

‘সঙ্খতো’তি চক্খুধাতু তাৰ জাতিতো একো ধম্মোত্ৰেৰ সঙ্খং গচ্ছতি চক্খুপসাদৰসেন. তথা সোতঘানজিৰ্হাকাযরূপসদ্দগন্ধরসধাতুযো সোতপসাদাদিৰসেন. ফোট্ঠব্বধাতু পন পথৰীতেজোৰাযোৰসেন তযো ধম্মাতি সঙ্খং গচ্ছতি. চক্খুৰিঞ্ঞাণধাতু কুসলাকুসলৰিপাকৰসেন দ্ৰে ধম্মাতি সঙ্খং গচ্ছতি. তথা সোতঘানজিৰ্হাকাযৰিঞ্ঞাণধাতুযো. মনোধাতু পন পঞ্চদ্ৰারাৰজ্জনকুসলাকুসলৰিপাকসম্পটিচ্ছনৰসেন তযো ধম্মাতি সঙ্খং গচ্ছতি. ধম্মধাতু তিণ্ণং অরূপক্খন্ধানং, সোল়সন্নং সুখুমরূপানং, অসঙ্খতায চ ধাতুযা ৰসেন ৰীসতিধম্মাতি সঙ্খং গচ্ছতি. মনোৰিঞ্ঞাণধাতু সেসকুসলাকুসলাব্যাকতৰিঞ্ঞাণৰসেন ছসত্ততিধম্মাতি সঙ্খং গচ্ছতীতি এৰমেত্থ ‘সঙ্খতো’ ৰেদিতব্বো ৰিনিচ্ছযো.

‘পচ্চযা’তি চক্খুধাতুআদীনং চক্খুৰিঞ্ঞাণধাতুআদীসু পচ্চযতো ৰেদিতব্বো ৰিনিচ্ছযো. সো পনেতেসং পচ্চযভাৰো নিদ্দেসৰারে আৰি ভৰিস্সতি.

‘দট্ঠব্বা’তি দট্ঠব্বতোপেত্থ ৰিনিচ্ছযো ৰেদিতব্বোতি অত্থো. সব্বা এৰ হি সঙ্খতা ধাতুযো পুব্বন্তাপরন্তৰিৰিত্ততো, ধুৰসুভসুখত্তভাৰসুঞ্ঞতো, পচ্চযাযত্তৰুত্তিতো চ দট্ঠব্বা. ৰিসেসতো পনেত্থ ভেরিতলং ৰিয চক্খুধাতু দট্ঠব্বা, দণ্ডো ৰিয রূপধাতু, সদ্দো ৰিয চক্খুৰিঞ্ঞাণধাতু. তথা আদাসতলং ৰিয চক্খুধাতু, মুখং ৰিয রূপধাতু, মুখনিমিত্তং ৰিয চক্খুৰিঞ্ঞাণধাতু. অথ ৰা উচ্ছুতিলানি ৰিয চক্খুধাতু, যন্তচক্কযট্ঠি ৰিয রূপধাতু, উচ্ছুরসতেলানি ৰিয চক্খুৰিঞ্ঞাণধাতু. তথা অধরারণী ৰিয চক্খুধাতু, উত্তরারণী ৰিয রূপধাতু, অগ্গি ৰিয চক্খুৰিঞ্ঞাণধাতু. এস নযো সোতধাতুআদীসুপি.

মনোধাতু পন যথাসম্ভৰতো চক্খুৰিঞ্ঞাণধাতুআদীনং পুরেচরানুচরা ৰিয দট্ঠব্বা. ধম্মধাতুযা ৰেদনাক্খন্ধো সল্লমিৰ সূলমিৰ চ দট্ঠব্বো; সঞ্ঞাসঙ্খারক্খন্ধা ৰেদনাসল্লসূলযোগা আতুরা ৰিয; পুথুজ্জনানং ৰা সঞ্ঞা আসাদুক্খজননতো রিত্তমুট্ঠি ৰিয, অযথাভুচ্চনিমিত্তগ্গাহকতো ৰনমিগো ৰিয; সঙ্খারা পটিসন্ধিযং পক্খিপনতো অঙ্গারকাসুযং খিপনকপুরিসো ৰিয, জাতিদুক্খানুবন্ধনতো রাজপুরিসানুবন্ধচোরা ৰিয, সব্বানত্থাৰহস্স খন্ধসন্তানস্স হেতুতো ৰিসরুক্খবীজানি ৰিয; রূপং নানাৰিধূপদ্দৰনিমিত্ততো খুরচক্কং ৰিয দট্ঠব্বং.

অসঙ্খতা পন ধাতু অমততো সন্ততো খেমতো চ দট্ঠব্বা. কস্মা? সব্বানত্থপটিপক্খভূতত্তা. মনোৰিঞ্ঞাণধাতু গহিতারম্মণং মুঞ্চিত্ৰাপি অঞ্ঞং গহেত্ৰাৰ পৰতনতো ৰনমক্কটো ৰিয, দুদ্দমনতো অস্সখল়ুঙ্কো ৰিয, যত্থকামনিপাতিতো ৰেহাসং খিত্তদণ্ডো ৰিয, লোভদোসাদিনানপ্পকারকিলেসযোগতো রঙ্গনটো ৰিয দট্ঠব্বোতি.

১৮৪. নিদ্দেসৰারে চক্খুঞ্চ পটিচ্চ রূপে চাতি ইদঞ্চ দ্ৰযং পটিচ্চ অঞ্ঞঞ্চ কিরিযামনোধাতুঞ্চেৰ সম্পযুত্তখন্ধত্তযঞ্চাতি অত্থো. চক্খুৰিঞ্ঞাণধাতুযা হি চক্খু নিস্সযপচ্চযো হোতি, রূপং আরম্মণপচ্চযো, কিরিযমনোধাতু ৰিগতপচ্চযো, তযো অরূপক্খন্ধা সহজাতপচ্চযো. তস্মা এসা চক্খুৰিঞ্ঞাণধাতু ইমে চত্তারো পটিচ্চ উপ্পজ্জতি নাম. সোতঞ্চ পটিচ্চাতিআদীসুপি এসেৰ নযো.

নিরুদ্ধসমনন্তরাতি নিরুদ্ধায সমনন্তরা. তজ্জা মনোধাতূতি তস্মিং আরম্মণে জাতা কুসলাকুসলৰিপাকতো দুৰিধা মনোধাতু সম্পটিচ্ছনকিচ্চা. সব্বধম্মেসু ৰা পন পঠমসমন্নাহারোতি এতেসু চক্খুৰিঞ্ঞাণাদীসু সব্বধম্মেসু উপ্পজ্জমানেসু পঠমসমন্নাহারো; চক্খুৰিঞ্ঞাণধাতুআদীনং ৰা আরম্মণসঙ্খাতেসু সব্বধম্মেসু পঠমসমন্নাহারোতি অযমেত্থ অত্থো ৰেদিতব্বো. এতেন পঞ্চদ্ৰারাৰজ্জনকিচ্চা কিরিযমনোধাতু গহিতাতি ৰেদিতব্বা.

মনোধাতুযাপি উপ্পজ্জিত্ৰা নিরুদ্ধসমনন্তরাতি এত্থ পি-কারো সম্পিণ্ডনত্থো. তস্মা মনোধাতুযাপি মনোৰিঞ্ঞাণধাতুযাপীতি অযমেত্থ অত্থো ৰেদিতব্বো. তেন যা চ ৰিপাকমনোধাতুযা উপ্পজ্জিত্ৰা নিরুদ্ধায সমনন্তরা উপ্পজ্জতি সন্তীরণকিচ্চা ৰিপাকমনোৰিঞ্ঞাণধাতু, যা চ তস্সা উপ্পজ্জিত্ৰা নিরুদ্ধায সমনন্তরা উপ্পজ্জতি ৰোট্ঠব্বনকিচ্চা কিরিযমনোৰিঞ্ঞাণধাতু, যা চ তস্সা উপ্পজ্জিত্ৰা নিরুদ্ধায সমনন্তরা উপ্পজ্জতি জৰনকিচ্চা মনোৰিঞ্ঞাণধাতু – তা সব্বাপি কথিতা হোতীতি ৰেদিতব্বা. মনঞ্চ পটিচ্চাতি ভৰঙ্গমনং. ধম্মে চাতি চতুভূমিকধম্মারম্মণং. উপ্পজ্জতি মনোৰিঞ্ঞাণন্তি সহাৰজ্জনকং জৰনং নিব্বত্ততি.

ইমস্মিং পন ঠানে হত্থে গহিতপঞ্হং নাম গণ্হিংসু. মহাধম্মরক্খিতত্থেরো কির নাম দীঘভাণকাভযত্থেরং হত্থে গহেত্ৰা আহ – ‘পটিচ্চাতি নাম আগতট্ঠানে আৰজ্জনং ৰিসুং ন কাতব্বং, ভৰঙ্গনিস্সিতকমেৰ কাতব্ব’ন্তি. তস্মা ইধ মনোতি সহাৰজ্জনকং ভৰঙ্গং. মনোৰিঞ্ঞাণন্তি জৰনমনোৰিঞ্ঞাণং. ইমস্মিং পন অভিধম্মভাজনীযে সোল়স ধাতুযো কামাৰচরা, দ্ৰে চতুভূমিকা লোকিযলোকুত্তরমিস্সকা কথিতাতি.

অভিধম্মভাজনীযৰণ্ণনা.

৩. পঞ্হাপুচ্ছকৰণ্ণনা

১৮৫. পঞ্হাপুচ্ছকে অট্ঠারসন্নং ধাতূনং হেট্ঠা ৰুত্তনযানুসারেনেৰ কুসলাদিভাৰো ৰেদিতব্বো. আরম্মণত্তিকেসু পন ছ ধাতুযো পরিত্তারম্মণাতি ইদং পন পঞ্চন্নং চক্খুৰিঞ্ঞাণাদীনং মনোধাতুযা চ একন্তেন পঞ্চসু রূপারম্মণাদীসু পৰত্তিং সন্ধায ৰুত্তং. দ্ৰে ধাতুযোতি ৰুত্তানং পন ধম্মধাতুমনোৰিঞ্ঞাণধাতূনং মনাযতনধম্মাযতনেসু ৰুত্তনযেনেৰ পরিত্তারম্মণাদিতা ৰেদিতব্বা. ইতি ইমস্মিম্পি পঞ্হাপুচ্ছকে সোল়স ধাতুযো কামাৰচরা, দ্ৰে চতুভূমিকা লোকিযলোকুত্তরমিস্সকা কথিতা. এৰমযং ধাতুৰিভঙ্গোপি তেপরিৰট্টং নীহরিত্ৰাৰ ভাজেত্ৰা দেসিতোতি.

সম্মোহৰিনোদনিযা ৰিভঙ্গট্ঠকথায

ধাতুৰিভঙ্গৰণ্ণনা নিট্ঠিতা.