২. অভিধম্মভাজনীযৰণ্ণনা

৪৭২. অভিধম্মভাজনীযে সত্তপি বোজ্ঝঙ্গে একতো পুচ্ছিত্ৰা ৰিস্সজ্জনস্স চ পাটিযেক্কং পুচ্ছিত্ৰা ৰিস্সজ্জনস্স চ ৰসেন দ্ৰে নযা. তেসং অত্থৰণ্ণনা হেট্ঠা ৰুত্তনযেনেৰ ৰেদিতব্বা.

উপেক্খাসম্বোজ্ঝঙ্গনিদ্দেসে পন উপেক্খনৰসেন উপেক্খা. উপেক্খনাকারো উপেক্খনা. উপেক্খিতব্বযুত্তে সমপ্পৰত্তে ধম্মে ইক্খতি, ন চোদেতীতি উপেক্খা. পুগ্গলং উপেক্খাপেতীতি উপেক্খনা. বোজ্ঝঙ্গভাৰপ্পত্তিযা লোকিযউপেক্খনায অধিকা উপেক্খনা অজ্ঝুপেক্খনা. অব্যাপারাপজ্জনেন মজ্ঝত্তভাৰো মজ্ঝত্ততা. সা পন চিত্তস্স, ন সত্তস্সাতি দীপেতুং মজ্ঝত্ততা চিত্তস্সাতি ৰুত্তন্তি. অযমেত্থ অনুপুব্বপদৰণ্ণনা.

নযা পনেত্থ গণেতব্বা – সত্তন্নম্পি হি বোজ্ঝঙ্গানং একতো পুচ্ছিত্ৰা ৰিস্সজ্জনে একেকমগ্গে নযসহস্সং নযসহস্সন্তি চত্তারি নযসহস্সানি ৰিভত্তানি. পাটিযেক্কং পুচ্ছিত্ৰা ৰিস্সজ্জনে একেকবোজ্ঝঙ্গৰসেন চত্তারি চত্তারীতি সত্ত চতুক্কা অট্ঠৰীসতি. তানি পুরিমেহি চতূহি সদ্ধিং দ্ৰত্তিংসাতি সব্বানিপি অভিধম্মভাজনীযে দ্ৰত্তিংস নযসহস্সানি ৰিভত্তানি কুসলানেৰ. যস্মা পন ফলক্খণেপি বোজ্ঝঙ্গা লব্ভন্তি, কুসলহেতুকানি চ সামঞ্ঞফলানি, তস্মা তেসুপি বোজ্ঝঙ্গদস্সনত্থং কুসলনিদ্দেসপুব্বঙ্গমায এৰ তন্তিযা ৰিপাকনযো আরদ্ধো. সোপি একতো পুচ্ছিত্ৰা ৰিস্সজ্জনস্স চ, পাটিযেক্কং পুচ্ছিত্ৰা ৰিস্সজ্জনস্স চ ৰসেন দুৰিধো হোতি. সেসমেত্থ হেট্ঠা ৰুত্তনযেনেৰ ৰেদিতব্বং. ৰিপাকে পন কুসলতো তিগুণা নযা কাতব্বাতি.

অভিধম্মভাজনীযৰণ্ণনা.