৪. সঙ্খারক্খন্ধনিদ্দেসো

২০. সঙ্খারক্খন্ধনিদ্দেসে যে কেচি সঙ্খারাতি চতুভূমিকসঙ্খারে পরিযাদিযতি. চক্খুসম্ফস্সজা চেতনাতিআদীনি অতীতাদিৰসেন নিদ্দিট্ঠসঙ্খারে সভাৰতো দস্সেতুং ৰুত্তানি. চক্খুসম্ফস্সজাতিআদীনি ৰুত্তত্থানেৰ. চেতনাতি হেট্ঠিমকোটিযা পধানসঙ্খারৰসেন ৰুত্তং. হেট্ঠিমকোটিযা হি অন্তমসো চক্খুৰিঞ্ঞাণেন সদ্ধিং পাল়িযং আগতা চত্তারো সঙ্খারা উপ্পজ্জন্তি. তেসু চেতনা পধানা আযূহনট্ঠেন পাকটত্তা. তস্মা অযমেৰ গহিতা. তংসম্পযুত্তসঙ্খারা পন তায গহিতায গহিতাৰ হোন্তি. ইধাপি পুরিমা পঞ্চ চক্খুপসাদাদিৰত্থুকাৰ. মনোসম্ফস্সজা হদযৰত্থুকাপি অৰত্থুকাপি. সব্বা চতুভূমিকচেতনা. সেসং ৰেদনাক্খন্ধসদিসমেৰাতি.

অযং সঙ্খারক্খন্ধনিদ্দেসো.