১৩-১৮. অনুলোমপচ্চনীযপট্ঠানৰণ্ণনা

১. ইদানি কুসলাদীসু ধম্মেসু পচ্চযধম্মং অপ্পটিক্খিপিত্ৰা পচ্চযুপ্পন্নস্স কুসলাদিভাৰপটিক্খেপৰসেন ধম্মানং অনুলোমপচ্চনীযতায লদ্ধনামং অনুলোমপচ্চনীযপট্ঠানং দস্সেতুং কুসলং ধম্মং পটিচ্চ ন কুসলো ধম্মো উপ্পজ্জতি হেতুপচ্চযাতিআদি আরদ্ধং. তত্থ কুসলং ধম্মং পটিচ্চাতি কুসলস্স পচ্চযভাৰং অনুজানাতি. ন কুসলো ধম্মো উপ্পজ্জতীতি কুসলস্সেৰ উপ্পত্তিং ৰারেতি. তস্মা ‘‘কুসলে খন্ধে পটিচ্চ চিত্তসমুট্ঠানং রূপ’’ন্তিআদিনা নযেন ৰিস্সজ্জনং দস্সিতং, তং সব্বং পাল়িং ওলোকেত্ৰা সাধুকং সল্লক্খেতব্বং. যম্পি যেন সদিসং, যঞ্চ যত্থ লব্ভতি, যো চ যেসং ৰিস্সজ্জনানং যেসু পচ্চযেসু গণনপরিচ্ছেদো, সো সব্বো পাল়িযং দস্সিতো, তস্মা পাল়িযেৰ এত্থ অত্থো. যথা চেত্থ, এৰং দুকপট্ঠানাদীসুপীতি.

এত্তাৰতা –

তিকঞ্চ পট্ঠানৰরং দুকুত্তমং,

দুকং তিকঞ্চেৰ তিকং দুকঞ্চ;

তিকং তিকঞ্চেৰ দুকং দুকঞ্চ,

ছ অনুলোমপচ্চনীযম্হি নযা সুগম্ভীরাতি. –

অট্ঠকথাযং ৰুত্তগাথায দীপিতা ধম্মানুলোমপচ্চনীযপট্ঠানে ছ নযা নিদ্দিট্ঠা হোন্তি. পচ্চযৰসেন পনেত্থ একেকস্মিং পট্ঠানে অনুলোমাদযো চত্তারো চত্তারো নযাতি একেন পরিযাযেন চতুৰীসতিনযপটিমণ্ডিতং অনুলোমপচ্চনীযপট্ঠানঞ্ঞেৰ ৰেদিতব্বং.

অনুলোমপচ্চনীযপট্ঠানৰণ্ণনা.