৪. নিস্সযৰারৰণ্ণনা

৩২৯-৩৩৭. নিস্সযৰারে কুসলং ধম্মং নিস্সাযাতি কুসলং ধম্মং পতিট্ঠট্ঠেন নিস্সযং কত্ৰাতি অত্থো. সেসমেত্থ পচ্চযৰারে ৰুত্তনযেনেৰ ৰেদিতব্বং. অৰসানে পনস্স ‘‘পচ্চযত্তং নাম নিস্সযত্তং, নিস্সযত্তং নাম পচ্চযত্ত’’ন্তি ইদং উভিন্নম্পি এতেসং ৰারানং অত্থতো নিন্নানাকরণভাৰদস্সনত্থং ৰুত্তং. অত্থতো হি এতেপি পটিচ্চসহজাতা ৰিয নিন্নানাকরণা. এৰং সন্তেপি অঞ্ঞমঞ্ঞস্স অত্থনিযমনত্থং ৰুত্তা. অৰিজ্জাপচ্চযা সঙ্খারাতিআদীসু হি অনিস্সায ৰত্তমানং নানাক্খণিকম্পি ‘‘পচ্চযা উপ্পজ্জতী’’তি ৰুত্তং. অঞ্ঞমঞ্ঞং অল্লীযিত্ৰা ঠিতকট্ঠাদীসু চ একং একস্স নিস্সযপচ্চযো ন হোতি, তথা উপাদারূপং মহাভূতস্স নিস্সযপচ্চযো ন হোতিযেৰ. ইতি পচ্চযৰারেন নিস্সযপচ্চযভাৰং নিস্সযৰারেন চ পচ্চযাতি ৰুত্তস্স সহজাতপুরেজাতভাৰং নিযমেতুং উভোপেতে ৰুত্তা. অপিচ তথা বুজ্ঝনকানং অজ্ঝাসযৰসেন দেসনাৰিলাসেন নিরুত্তিপটিসম্ভিদাপভেদজাননৰসেন চাপি এতে উভোপি ৰুত্তাতি.

নিস্সযৰারৰণ্ণনা.