২৩. তেৰীসতিমৰগ্গো

১. একাধিপ্পাযকথাৰণ্ণনা

৯০৮. ইদানি একাধিপ্পাযকথা নাম হোতি. তত্থ কারুঞ্ঞেন ৰা একেন অধিপ্পাযেন একাধিপ্পাযো, সংসারে ৰা একতো ভৰিস্সামাতি ইত্থিযা সদ্ধিং বুদ্ধপূজাদীনি কত্ৰা পণিধিৰসেন একো অধিপ্পাযো অস্সাতি একাধিপ্পাযো. এৰরূপো দ্ৰিন্নম্পি জনানং একাধিপ্পাযো মেথুনো ধম্মো পটিসেৰিতব্বোতি যেসং লদ্ধি, সেয্যথাপি অন্ধকানঞ্চেৰ ৰেতুল্লকানঞ্চ; তে সন্ধায পুচ্ছা সকৰাদিস্স, পটিঞ্ঞা ইতরস্স. সেসমেত্থ যথাপাল়িমেৰ নিয্যাতীতি.

একাধিপ্পাযকথাৰণ্ণনা.

২. অরহন্তৰণ্ণকথাৰণ্ণনা

৯০৯. ইদানি অরহন্তৰণ্ণকথা নাম হোতি. তত্থ ইরিযাপথসম্পন্নে আকপ্পসম্পন্নে পাপভিক্খূ দিস্ৰা ‘‘অরহন্তানং ৰণ্ণেন অমনুস্সা মেথুনং ধম্মং পটিসেৰন্তী’’তি যেসং লদ্ধি, সেয্যথাপি একচ্চানং উত্তরাপথকানং; তে সন্ধায পুচ্ছা সকৰাদিস্স, পটিঞ্ঞা ইতরস্স. সেসমেত্থ উত্তানত্থমেৰাতি.

অরহন্তৰণ্ণকথাৰণ্ণনা.

৩-৭. ইস্সরিযকামকারিকাকথাৰণ্ণনা

৯১০-৯১৪. ইদানি ইস্সরিযকামকারিকাকথা নাম হোতি. ছদ্দন্তজাতকাদীনি সন্ধায ‘‘বোধিসত্তো ইস্সরিযকামকারিকাহেতু ৰিনিপাতং গচ্ছতি, গব্ভসেয্যং ওক্কমতি, দুক্করকারিকং অকাসি, অপরন্তপং অকাসি, অঞ্ঞং সত্থারং উদ্দিসী’’তি যেসং লদ্ধি, সেয্যথাপি অন্ধকানং, তে সন্ধায পুচ্ছা সকৰাদিস্স, পটিঞ্ঞা ইতরস্স. সেসং পঠমকথাযং উত্তানত্থমেৰ. দুতিযকথাযং ইদ্ধিমাতি যদি ইস্সরিযকামকারিকাহেতু গচ্ছেয্য, ইদ্ধিযা গচ্ছেয্য, ন কম্মৰসেনাতি চোদনত্থং ৰুত্তং. ইতরো পন পঠমপঞ্হে ভাৰনামযং সন্ধায পটিক্খিপতি. দুতিযপঞ্হে পুঞ্ঞিদ্ধিং সন্ধায পটিজানাতি. ততিযকথাযং ইস্সরিযকামকারিকাহেতু নাম দুক্করকারিকা মিচ্ছাদিট্ঠিযা করিযতি. যদি চ সো তং করেয্য, সস্সতাদীনিপি গণ্হেয্যাতি চোদনত্থং সস্সতো লোকোতিআদি ৰুত্তং. চতুত্থকথাযম্পি এসেৰ নযোতি.

ইস্সরিযকামকারিকাকথাৰণ্ণনা.

৮. পতিরূপকথাৰণ্ণনা

৯১৫-৯১৬. ইদানি রাগপতিরূপকথা নাম হোতি. তত্থ মেত্তাকরুণামুদিতাযো সন্ধায ‘‘ন রাগো রাগপতিরূপকো’’তি চ ইস্সামচ্ছরিযকুক্কুচ্চানি সন্ধায ‘‘ন দোসো দোসপতিরূপকো’’তি চ হসিতুপ্পাদং সন্ধায ‘‘ন মোহো মোহপতিরূপকো’’তি চ দুম্মঙ্কূনং পুগ্গলানং নিগ্গহং পেসলানং ভিক্খূনং অনুগ্গহং পাপগরহিতং কল্যাণপসংসং আযস্মতো পিলিন্দৰচ্ছস্স ৰসলৰাদং ভগৰতো খেল়াসকৰাদং মোঘপুরিসৰাদঞ্চ সন্ধায ‘‘ন কিলেসো কিলেসপতিরূপকো’’তি চ যেসং লদ্ধি, সেয্যথাপি অন্ধকানং; তে সন্ধায সব্বকথাসু পুচ্ছা সকৰাদিস্স, পটিঞ্ঞা ইতরস্স. অথ নং যস্মা ফস্সাদিপতিরূপকা নফস্সাদযো নাম নত্থি, তস্মা রাগাদিপতিরূপকা নরাগাদযোপি নত্থীতি চোদেতুং অত্থি ন ফস্সোতিআদিমাহ. ইতরো তেসং অভাৰা পটিক্খিপতি. সেসং সব্বত্থ উত্তানত্থমেৰাতি.

পতিরূপকথাৰণ্ণনা.

৯. অপরিনিপ্ফন্নকথাৰণ্ণনা

৯১৭-৯১৮. ইদানি অপরিনিপ্ফন্নকথা নাম হোতি. তত্থ –

‘‘দুক্খমেৰ হি সম্ভোতি, দুক্খং তিট্ঠতি ৰেতি চ;

নাঞ্ঞত্র দুক্খা সম্ভোতি, নাঞ্ঞং দুক্খা নিরুজ্ঝতী’’তি. (সং. নি. ১.১৭১) –

ৰচনং নিস্সায দুক্খঞ্ঞেৰ পরিনিপ্ফন্নং, সেসা খন্ধাযতনধাতুইন্দ্রিযধম্মা অপরিনিপ্ফন্নাতি যেসং লদ্ধি, সেয্যথাপি একচ্চানং উত্তরপথকানঞ্চেৰ হেতুৰাদানঞ্চ; তে সন্ধায রূপং অপরিনিপ্ফন্নন্তি পুচ্ছা সকৰাদিস্স, পটিঞ্ঞা ইতরস্স. অথ নং ‘‘সচে রূপং অপরিনিপ্ফন্নং, ন অনিচ্চাদিসভাৰং সিযা’’তি চোদেতুং রূপং ন অনিচ্চন্তিআদিমাহ. ইতরো তথারূপং রূপং অপস্সন্তো পটিক্খিপতি. সকৰাদী ননু রূপং অনিচ্চন্তিআদি ৰচনেন তস্স একং লদ্ধিং পটিসেধেত্ৰা দুতিযং পুচ্ছন্তো দুক্খঞ্ঞেৰ পরিনিপ্ফন্নন্তিআদিমাহ. অথস্স তম্পি লদ্ধিং পটিসেধেতুং ন যদনিচ্চন্তিআদিমাহ. তত্রাযং অধিপ্পাযো – ন কেৰলঞ্হি পঠমসচ্চমেৰ দুক্খং. যং পন কিঞ্চি অনিচ্চং, তং দুক্খমেৰ. রূপঞ্চ অনিচ্চং, তস্মা তম্পি পরিনিপ্ফন্নং. ইতি যং ত্ৰং ৰদেসি ‘‘রূপং অপরিনিপ্ফন্নং, দুক্খঞ্ঞেৰ পরিনিপ্ফন্ন’’ন্তি, তং নো ৰত রে ৰত্তব্বে ‘‘দুক্খঞ্ঞেৰ পরিনিপ্ফন্ন’’ন্তি. ৰেদনাদিমূলিকাদীসুপি যোজনাসু এসেৰ নযো. ধম্মাযতনধম্মধাতূসু পন ঠপেত্ৰা নিব্বানং সেসধম্মানং ৰসেন অনিচ্চতা ৰেদিতব্বা. ইন্দ্রিযানি অনিচ্চানেৰাতি.

অপরিনিপ্ফন্নকথাৰণ্ণনা.

তেৰীসতিমো ৰগ্গো.

নিগমনকথা

এত্তাৰতা চ –

পণ্ণাসকেহি চতূহি, তীহি ৰগ্গেহি চেৰ চ;

সঙ্গহেত্ৰা কথা সব্বা, ঊনতিসতভেদনা.

কথাৰত্থুপ্পকরণং, কথামগ্গেসু কোৰিদো;

যং জিনো দেসযি তস্স, নিট্ঠিতা অত্থৰণ্ণনা.

ইমং তেরসমত্তেহি, ভাণৰারেহি তন্তিযা;

চিরট্ঠিতত্থং ধম্মস্স, সঙ্খরোন্তেন যং মযা.

যং পত্তং কুসলং তেন, লোকোযং সনরামরো;

ধম্মরাজস্স সদ্ধম্ম-রসমেৰাধিগচ্ছতূতি.

কথাৰত্থু-অট্ঠকথা নিট্ঠিতা.

নমো তস্স ভগৰতো অরহতো সম্মাসম্বুদ্ধস্স

অভিধম্মপিটকে

যমকপ্পকরণ-অট্ঠকথা

সঙ্খেপেনেৰ দেৰানং, দেৰদেৰো সুরালযে;

কথাৰত্থুপ্পকরণং, দেসযিত্ৰা রণঞ্জহো.

যমস্স ৰিসযাতীতো, নানাযমকমণ্ডিতং;

অভিধম্মপ্পকরণং, ছট্ঠং ছট্ঠান দেসকো.

যমকং অযমাৰত্ত-নীলামলতনূরুহো;

যং দেসযি অনুপ্পত্তো, তস্স সংৰণ্ণনাক্কমো;

ইদানি যস্মা তস্মাস্স, হোতি সংৰণ্ণনা অযন্তি.