৩. করুণাকথাৰণ্ণনা

৮০৭-৮০৮. ইদানি করুণাকথা নাম হোতি. তত্থ পিযাযিতানং ৰত্থূনং ৰিপত্তিযা সরাগানং রাগৰসেন করুণাপতিরূপিকং পৰত্তিং দিস্ৰা ‘‘রাগোৰ করুণা নাম, সো চ ভগৰতো নত্থি, তস্মা নত্থি বুদ্ধস্স ভগৰতো করুণা’’তি যেসং লদ্ধি, সেয্যথাপি উত্তরাপথকানং; তে সন্ধায পুচ্ছা সকৰাদিস্স, পটিঞ্ঞা ইতরস্স. অথ নং ‘‘করুণা নামেসা নিক্কিলেসতায চেৰ সত্তারম্মণতায চ চেতোৰিমুত্তিতায চ একাদসানিসংসতায চ মেত্তাদীহি সমানজাতিকা, তস্মা যদি ভগৰতো করুণা নত্থি, মেত্তাদযোপিস্স ন সিযু’’ন্তি চোদনত্থং নত্থি বুদ্ধস্স ভগৰতো মেত্তাতিআদিমাহ. আকারুণিকোতি পঞ্হে তথারূপং ৰোহারং অপস্সন্তো পটিক্খিপতি. সেসমেত্থ উত্তানত্থমেৰাতি.

করুণাকথাৰণ্ণনা.