২. অঞ্ঞমঞ্ঞপচ্চযকথাৰণ্ণনা

৭১৮-৭১৯. ইদানি অঞ্ঞমঞ্ঞপচ্চযকথা নাম হোতি. তত্থ যেসং সমযে ‘‘অৰিজ্জাপচ্চযা সঙ্খারা’’তি অযমেৰ তন্তি, ‘‘সঙ্খারপচ্চযাপি অৰিজ্জা’’তি অযং নত্থি, তস্মা অৰিজ্জাৰ সঙ্খারানং পচ্চযো, ন পন সঙ্খারা অৰিজ্জাযাতি লদ্ধি, সেয্যথাপি মহাসঙ্ঘিকানং; তে সন্ধায অৰিজ্জাসঙ্খারাদীনং অঞ্ঞমঞ্ঞপচ্চযতাপি অত্থীতি দস্সেতুং পুচ্ছা সকৰাদিস্স, পটিঞ্ঞা ইতরস্স. অৰিজ্জা সঙ্খারেনাতি এত্থ অপুঞ্ঞাভিসঙ্খারোৰ গহিতো. তস্মা সঙ্খারপচ্চযাপি অৰিজ্জাতি এত্থ সহজাতঅঞ্ঞমঞ্ঞঅত্থিঅৰিগতসম্পযুত্তৰসেন পচ্চযতা ৰেদিতব্বা. উপাদানপচ্চযাপি তণ্হাতি এত্থ ঠপেত্ৰা কামুপাদানং সেসানি তীণি উপাদানানি অৰিজ্জায সঙ্খারা ৰিয তণ্হায পচ্চযা হোন্তীতি ৰেদিতব্বানি. সেসং যথাপাল়িমেৰ নিয্যাতি. জরামরণপচ্চযাতি পুচ্ছা পরৰাদিস্স, নামরূপং ৰিঞ্ঞাণপচ্চযাতি সকৰাদিস্সাতি.

অঞ্ঞমঞ্ঞপচ্চযকথাৰণ্ণনা.