১৪. চুদ্দসমৰগ্গো

১. কুসলাকুসলপটিসন্দহনকথাৰণ্ণনা

৬৮৬-৬৯০. ইদানি কুসলাকুসলপটিসন্দহনকথা নাম হোতি. তত্থ কুসলং ৰা অকুসলস্স, অকুসলং ৰা কুসলস্স অনন্তরা উপ্পজ্জনকং নাম নত্থীতি তেসং অঞ্ঞমঞ্ঞং পটিসন্ধানং ন যুজ্জতি. যে পন যস্মা একৰত্থুস্মিঞ্ঞেৰ রজ্জতি ৰিরজ্জতি চ, তস্মা তং অঞ্ঞমঞ্ঞং পটিসন্দহতীতি লদ্ধিং গহেত্ৰা ঠিতা, সেয্যথাপি মহাসঙ্ঘিকা; তে সন্ধায পুচ্ছা সকৰাদিস্স; পটিঞ্ঞা ইতরস্স. আৰট্টনা পণিধীতি উভযং আৰজ্জনস্সেৰ নামং. তঞ্হি ভৰঙ্গং আৰট্টেতীতি আৰট্টনা. ভৰঙ্গারম্মণতো অঞ্ঞস্মিং আরম্মণে চিত্তং পণিদহতি ঠপেতীতি পণিধি. কুসলং অনাৰট্টেন্তস্সাতি যং তং অকুসলানন্তরং পটিসন্দহন্তং কুসলং উপ্পজ্জতি, তং অনাৰট্টেন্তস্স উপ্পজ্জতীতি পুচ্ছতি. ইতরো পন ৰিনা আৰজ্জনেন কুসলস্স উপ্পত্তিং অপস্সন্তো পটিক্খিপতি. কুসলং অযোনিসো মনসিকরোতোতি ইদং যদি অকুসলানন্তরং কুসলং উপ্পজ্জেয্য, অকুসলস্সেৰ আৰজ্জনেন অযোনিসো মনসিকরোতো উপ্পজ্জেয্যাতি চোদনত্থং ৰুত্তং. সেসং যথাপাল়িমেৰ নিয্যাতি. ননু যস্মিংযেৰ ৰত্থুস্মিন্তি ৰচনং একারম্মণে সরাগৰিরাগুপ্পত্তিং দীপেতি, ন কুসলাকুসলানং অনন্তরতং, তস্মা অসাধকন্তি.

কুসলাকুসলপটিসন্দহনকথাৰণ্ণনা.

২. সল়াযতনুপ্পত্তিকথাৰণ্ণনা

৬৯১-৬৯২. ইদানি সল়াযতনুপ্পত্তিকথা নাম হোতি. তত্থ উপপত্তেসিযেন পটিসন্ধিচিত্তেন সহেৰ ওপপাতিকানং সল়াযতনং উপ্পজ্জতি. গব্ভসেয্যকানং অজ্ঝত্তিকাযতনেসু মনাযতনকাযাযতনানেৰ পটিসন্ধিক্খণে উপ্পজ্জন্তি. সেসানি চত্তারি সত্তসত্ততিরত্তিম্হি. তানি চ খো যেন কম্মুনা পটিসন্ধি গহিতা, তস্সেৰ অঞ্ঞস্স ৰা কতত্তাতি অযং সকসমযে ৰাদো. যেসং পন এককম্মসম্ভৰত্তা সম্পন্নসাখাৰিটপানং রুক্খাদীনং অংকুরো ৰিয বীজমত্তং সল়াযতনং মাতুকুচ্ছিস্মিং পটিসন্ধিক্খণেযেৰ উপ্পজ্জতীতি লদ্ধি, সেয্যথাপি পুব্বসেলিযানং; তে সন্ধায সল়াযতনন্তি পুচ্ছা সকৰাদিস্স, পটিঞ্ঞা ইতরস্স. সব্বঙ্গপচ্চঙ্গীতিআদি সল়াযতনে সতি এৰরূপো হুত্ৰা ওক্কমেয্যাতি চোদনত্থং ৰুত্তং. মাতুকুচ্ছিগতস্সাতি পুচ্ছা পরৰাদিস্স. পরতো মাতুকুচ্ছিগতস্স পচ্ছা কেসাতি পুচ্ছা সকৰাদিস্স. সেসমেত্থ উত্তানত্থমেৰাতি.

সল়াযতনুপ্পত্তিকথাৰণ্ণনা.

৩. অনন্তরপচ্চযকথাৰণ্ণনা

৬৯৩-৬৯৭. ইদানি অনন্তরপচ্চযকথা নাম হোতি. তত্থ নচ্চগীতাদীসু রূপদস্সনসদ্দসৰনাদীনং লহুপরিৰত্তিতং দিস্ৰা ‘‘ইমানি ৰিঞ্ঞাণানি অঞ্ঞমঞ্ঞস্স অনন্তরা উপ্পজ্জন্তী’’তি যেসং লদ্ধি, সেয্যথাপি উত্তরাপথকানং; তে সন্ধায চক্খুৰিঞ্ঞাণস্সাতি পুচ্ছা সকৰাদিস্স, পটিঞ্ঞা ইতরস্স. সোতৰিঞ্ঞাণং রূপারম্মণংযেৰাতি যদি চক্খুৰিঞ্ঞাণস্স অনন্তরা উপ্পজ্জেয্য, ৰিপাকমনোধাতু ৰিয রূপারম্মণং সিযাতি চোদেতুং ৰুত্তং. চক্খুঞ্চ পটিচ্চ রূপে চ উপ্পজ্জতি সোতৰিঞ্ঞাণন্তি পঞ্হেসু সুত্তাভাৰেন পটিক্খিপিত্ৰা অনন্তরুপ্পত্তিং সল্লক্খেন্তো লদ্ধিৰসেন পটিজানাতি. তঞ্ঞেৰ চক্খুৰিঞ্ঞাণং তং সোতৰিঞ্ঞাণন্তি যথা পঠমজৰনানন্তরং দুতিযজৰনং মনোৰিঞ্ঞাণভাৰেন তঞ্ঞেৰ হোতি, কিং তে তথা এতম্পি দ্ৰযং একমেৰাতি পুচ্ছতি. ইমিনা নযেন সব্বৰারেসু অত্থো ৰেদিতব্বো. নচ্চতি গাযতীতিআদিৰচনং আরম্মণসমোধানে লহুপরিৰত্তিতায ৰোকিণ্ণভাৰং দীপেতি, ন অনন্তরপচ্চযতং, তস্মা অসাধকন্তি.

অনন্তরপচ্চযকথাৰণ্ণনা.

৪. অরিযরূপকথাৰণ্ণনা

৬৯৮-৬৯৯. ইদানি অরিযরূপকথা নাম হোতি. তত্থ সম্মাৰাচাকম্মন্তা রূপং, তঞ্চ খো ‘‘সব্বং রূপং চত্তারি চ মহাভূতানি চতুন্নঞ্চ মহাভূতানং উপাদাযরূপ’’ন্তি (ম. নি. ৩.৬৭) ৰচনতো উপাদাযরূপন্তি যেসং লদ্ধি, সেয্যথাপি উত্তরাপথকানং; তে সন্ধায অরিযরূপং মহাভূতানং উপাদাযাতি পুচ্ছা সকৰাদিস্স. তত্থ অরিযানং রূপং, অরিযং ৰা রূপন্তি অরিযরূপং. আমন্তাতি লদ্ধিযং ঠত্ৰা পটিঞ্ঞা ইতরস্স. কুসলন্তি পুট্ঠো লদ্ধিৰসেনেৰ পটিজানাতি. অনাসৰপুচ্ছাদীসুপি এসেৰ নযো. যং কিঞ্চি রূপন্তি সুত্তং ঠপেত্ৰা ভূতানি সেসরূপস্স উপাদাভাৰং দীপেতি, ন সম্মাৰাচাকম্মন্তানং. তেসঞ্হি রূপমত্তঞ্ঞেৰ অসিদ্ধং, কুতো উপাদারূপতা; তস্মা অসাধকন্তি.

অরিযরূপকথাৰণ্ণনা.

৫. অঞ্ঞো অনুসযোতিকথাৰণ্ণনা

৭০০-৭০১. ইদানি অঞ্ঞো অনুসযোতিকথা নাম হোতি. তত্থ যস্মা পুথুজ্জনো কুসলাব্যাকতে চিত্তে ৰত্তমানে সানুসযোতি ৰত্তব্বো, ন পরিযুট্ঠিতোতি তস্মা অঞ্ঞো অনুসযো, অঞ্ঞং পরিযুট্ঠানন্তি যেসং লদ্ধি, সেয্যথাপি অন্ধকানং; তে সন্ধায অঞ্ঞো কামরাগানুসযোতি পুচ্ছা সকৰাদিস্স পটিঞ্ঞা ইতরস্স. সেসং হেট্ঠা অনুসযকথাযং ৰুত্তনযেনেৰ ৰেদিতব্বং. সানুসযোতিআদি পন তস্মিং সমযে অনুসযস্স অপ্পহীনত্তা সানুসযোতি ৰত্তব্বতং, অনুপ্পন্নত্তা চ পরিযুট্ঠিতোতি অৰত্তব্বতং দীপেতি, ন অনুসযপরিযুট্ঠানানং অঞ্ঞত্তং, তস্মা অসাধকন্তি.

অঞ্ঞো অনুসযোতিকথাৰণ্ণনা.

৬. পরিযুট্ঠানং চিত্তৰিপ্পযুত্তন্তিকথাৰণ্ণনা

৭০২. ইদানি পরিযুট্ঠানং চিত্তৰিপ্পযুত্তন্তিকথা নাম হোতি. তত্থ যস্মা অনিচ্চাদিতো মনসিকরোতোপি রাগাদযো উপ্পজ্জন্তি. ৰুত্তম্পি চেতং – ‘‘অপ্পেকদা, ভো ভারদ্ৰাজ, অসুভতো মনসিকরিস্সামীতি সুভতোৰ মনসিকরোতী’’তি (সং. নি. ৪.১২৭). তস্মা পরিযুট্ঠানং চিত্তৰিপ্পযুত্তন্তি যেসং লদ্ধি, সেয্যথাপি অন্ধকানংযেৰ; তে সন্ধায পুচ্ছা সকৰাদিস্স, পটিঞ্ঞা ইতরস্স. সেসমেত্থ উত্তানত্থমেৰাতি.

পরিযুট্ঠানং চিত্তৰিপ্পযুত্তন্তিকথাৰণ্ণনা.

৭. পরিযাপন্নকথাৰণ্ণনা

৭০৩-৭০৫. ইদানি পরিযাপন্নকথা নাম হোতি. তত্থ যস্মা কামরাগো কামধাতুং অনুসেতি, কামধাতুপরিযাপন্নোতি চ ৰুচ্চতি, তস্মা রূপরাগারূপরাগাপি রূপধাতুঅরূপধাতুযো অনুসেন্তি. রূপধাতুঅরূপধাতুপরিযাপন্নাযেৰ চ নাম হোন্তীতি যেসং লদ্ধি, সেয্যথাপি অন্ধকানঞ্চেৰ সম্মিতিযানঞ্চ; তে সন্ধায রূপরাগোতি পুচ্ছা সকৰাদিস্স, পটিঞ্ঞা ইতরস্স. তত্থ অনুসেতীতি যথা কামরাগো কামৰিতক্কসঙ্খাতং কামধাতুং সহজাতৰসেন অনুসেতি, কিং তে এৰং রূপরাগো রূপধাতুন্তি পুচ্ছতি. পরিযাপন্নোতি যথা চ সো তিৰিধায কামধাতুযা কিলেসকামৰসেন পরিযাপন্নত্তা কামধাতুপরিযাপন্নো, কিং তে এৰং রূপরাগোপি রূপধাতুপরিযাপন্নোতি পুচ্ছতি. ইতরো পনস্স অধিপ্পাযং অসল্লক্খেন্তো কেৰলং লদ্ধিৰসেন আমন্তাতি পটিজানাতি. অথ নং তমত্থং সল্লক্খাপেতুং কুসলৰিপাককিরিযসঙ্খাতেহি সমাপত্তেসিযাদীহি সংসন্দিত্ৰা পুচ্ছিতুং সমাপত্তেসিযোতিআদিমাহ. সেসমেত্থ যথাপাল়িমেৰ নিয্যাতি. ননু কামরাগোতিআদিৰচনম্পি কামরাগস্সেৰ কামধাতুযং অনুসযভাৰং পরিযাপন্নতঞ্চ দীপেতি, ন ইতরেসং ইতরধাতূসূতি.

পরিযাপন্নকথাৰণ্ণনা.

৮. অব্যাকতকথাৰণ্ণনা

৭০৬-৭০৮. ইদানি অব্যাকতকথা নাম হোতি. তত্থ ৰিপাককিরিযরূপনিব্বানসঙ্খাতং চতুব্বিধং অব্যাকতং অৰিপাকত্তা অব্যাকতন্তি ৰুত্তং. দিট্ঠিগতং ‘‘সস্সতো লোকোতি খো, ৰচ্ছ, অব্যাকতমেত’’ন্তি (সং. নি. ৪.৪১৬ থোকং ৰিসদিসং) সস্সতাদিভাৰেন অকথিতত্তা. যেসং পন ইমং ৰিভাগং অগ্গহেত্ৰা পুরিমাব্যাকতং ৰিয দিট্ঠিগতম্পি অব্যাকতন্তি লদ্ধি, সেয্যথাপি অন্ধকানঞ্চেৰ উত্তরাপথকানঞ্চ; তেসং তং ৰিভাগং দস্সেতুং দিট্ঠিগতং অব্যাকতন্তি পুচ্ছা সকৰাদিস্স, পটিঞ্ঞা ইতরস্স. সেসমেত্থ যথাপাল়িমেৰ নিয্যাতীতি.

অব্যাকতকথাৰণ্ণনা.

৯. অপরিযাপন্নকথাৰণ্ণনা

৭০৯-৭১০. ইদানি অপরিযাপন্নকথা নাম হোতি. তত্থ যস্মা পুথুজ্জনো ঝানলাভী কামেসু ৰীতরাগোতি ৰত্তব্বো হোতি, ন পন ৰিগতদিট্ঠিকোতি, তস্মা দিট্ঠিগতং অপরিযাপন্নন্তি যেসং লদ্ধি, সেয্যথাপি পুব্বসেলিযানং; তে সন্ধায পুচ্ছা সকৰাদিস্স, পটিঞ্ঞা ইতরস্স. সেসমেত্থ যথাপাল়িমেৰ নিয্যাতীতি.

অপরিযাপন্নকথাৰণ্ণনা.

চুদ্দসমো ৰগ্গো.