১২. দ্ৰাদসমৰগ্গো

১. সংৰরো কম্মন্তিকথাৰণ্ণনা

৬৩০-৬৩২. ইদানি সংৰরো কম্মন্তিকথা নাম হোতি. তত্থ ‘‘চক্খুনা রূপং দিস্ৰা নিমিত্তগ্গাহী হোতি, ন নিমিত্তগ্গাহী হোতী’’তি সুত্তং নিস্সায ‘‘সংৰরোপি অসংৰরোপি কম্ম’’ন্তি যেসং লদ্ধি, সেয্যথাপি মহাসংঘিকানং; তে সন্ধায পুচ্ছা সকৰাদিস্স, পটিঞ্ঞা ইতরস্স.

অথ নং যা সকসমযে চেতনা ‘‘কম্ম’’ন্তি ৰুত্তা যথা সা কাযৰচীমনোদ্ৰারেসু পৰত্তমানা কাযকম্মাদিনামং লভতি, তথা ‘‘যদি তে সংৰরো কম্মং, সোপি চক্খুন্দ্রিযাদীসু পৰত্তমানো চক্খুকম্মাদিনামং লভেয্যা’’তি চোদেতুং চক্খুন্দ্রিযসংৰরো চক্খুকম্মন্তিআদিমাহ. ইতরো তাদিসং সুত্তপদং অপস্সন্তো চতূসু দ্ৰারেসু পটিক্খিপিত্ৰা পঞ্চমে কাযদ্ৰারে পসাদকাযং সন্ধায পটিক্খিপতি, ৰিঞ্ঞত্তিকাযং সন্ধায পটিজানাতি. সো হি পসাদকাযম্পি ৰিঞ্ঞত্তিকাযম্পি কাযিন্দ্রিযন্ত্ৰেৰ ইচ্ছতি. মনোদ্ৰারেপি ৰিপাকদ্ৰারং সন্ধায পটিক্খিপতি, কম্মদ্ৰারং সন্ধায পটিজানাতি. অসংৰরেপি এসেৰ নযো. ‘‘চক্খুনা রূপং দিস্ৰা’’তি সুত্তং তেসু দ্ৰারেসু সংৰরাসংৰরমেৰ দীপেতি, ন তস্স কম্মভাৰং, তস্মা অসাধকন্তি.

সংৰরো কম্মন্তিকথাৰণ্ণনা.

২. কম্মকথাৰণ্ণনা

৬৩৩-৬৩৫. ইদানি কম্মকথা নাম হোতি. তত্থ ‘‘নাহং, ভিক্খৰে, সঞ্চেতনিকানং কম্মান’’ন্তি (অ. নি. ১০.২১৭) সুত্তপদং নিস্সায ‘‘সব্বং কম্মং সৰিপাক’’ন্তি যেসং লদ্ধি, সেয্যথাপি মহাসংঘিকানং; তেসং ‘‘চেতনাহং, ভিক্খৰে, কম্মং ৰদামী’’তি (অ. নি. ৬.৬৩) সত্থারা অৰিসেসেন চেতনা ‘‘কম্ম’’ন্তি ৰুত্তা; সা চ কুসলাকুসলাৰ সৰিপাকা, অব্যাকতা অৰিপাকাতি ইমং ৰিভাগং দস্সেতুং সব্বং কম্মন্তি পুচ্ছা সকৰাদিস্স, পটিঞ্ঞা ইতরস্স. পুন সব্বা চেতনাতি পঞ্হেসু অব্যাকতং সন্ধায পটিক্খেপো, কুসলাকুসলে সন্ধায পটিঞ্ঞা ৰেদিতব্বা. ৰিপাকাব্যাকতাতিআদি সৰিপাকাৰিপাকচেতনং সরূপেন দস্সেতুং ৰুত্তং. সেসমেত্থ উত্তানত্থমেৰ. ‘‘নাহং, ভিক্খৰে’’তি সুত্তং সতি পচ্চযে দিট্ঠধম্মাদীসু ৰিপাকপটিসংৰেদনং সন্ধায ৰুত্তং, তস্মা অসাধকন্তি.

কম্মকথাৰণ্ণনা.

৩. সদ্দো ৰিপাকোতিকথাৰণ্ণনা

৬৩৬-৬৩৭. ইদানি সদ্দো ৰিপাকোতিকথা নাম হোতি. তত্থ ‘‘সো তস্স কম্মস্স কতত্তা উপচিতত্তা উস্সন্নত্তা ৰিপুলত্তা ব্রহ্মস্সরো হোতী’’তিআদীনি (দী. নি. ৩.২৩৬) অযোনিসো গহেত্ৰা ‘‘সদ্দো ৰিপাকো’’তি যেসং লদ্ধি, সেয্যথাপি মহাসংঘিকানং; তেসং ‘‘কম্মসমুট্ঠানা অরূপধম্মাৰ ৰিপাকাতি নামং লভন্তি. রূপধম্মেসু পনাযং ৰোহারো নত্থী’’তি দস্সেতুং পুচ্ছা সকৰাদিস্স, পটিঞ্ঞা ইতরস্স. সুখৰেদনীযোতিআদি ‘‘ৰিপাকো নাম এৰরূপো হোতী’’তি দস্সনত্থং ৰুত্তং. ‘‘সো তস্স কম্মস্সা’’তি সুত্তং লক্খণপটিলাভদস্সনত্থং ৰুত্তং. মহাপুরিসো হি কম্মস্স কতত্তা সুচিপরিৰারোপি হোতি, ন চ পরিৰারো ৰিপাকো, তস্মা অসাধকমেতন্তি.

সদ্দো ৰিপাকোতিকথাৰণ্ণনা.

৪. সল়াযতনকথাৰণ্ণনা

৬৩৮-৬৪০. ইদানি সল়াযতনকথা নাম হোতি. তত্থ যস্মা সল়াযতনং কম্মস্স কতত্তা উপ্পন্নং, তস্মা ‘‘ৰিপাকো’’তি যেসং লদ্ধি, সেয্যথাপি মহাসংঘিকানং; তে সন্ধায চক্খাযতনং ৰিপাকোতি পুচ্ছা সকৰাদিস্স, পটিঞ্ঞা ইতরস্স. সেসং হেট্ঠা ৰুত্তনযমেৰ. সল়াযতনং ৰিপাকোতি এত্থ মনাযতনং সিযা ৰিপাকো. সেসানি কেৰলং কম্মসমুট্ঠানানি, ন ৰিপাকো. তস্মা অসাধকমেতন্তি.

সল়াযতনকথাৰণ্ণনা.

৫. সত্তক্খত্তুপরমকথাৰণ্ণনা

৫৪১-৫৪৫. ইদানি সত্তক্খত্তুপরমকথা নাম হোতি, তত্থ যস্মা ‘‘সত্তক্খত্তুপরমো’’তি ৰুত্তং, তস্মা ‘‘সত্তক্খত্তুপরমো পুগ্গলো সত্তক্খত্তুপরমতায নিযতো’’তি যেসং লদ্ধি, সেয্যথাপি উত্তরাপথকানং; তেসং ঠপেত্ৰা ‘‘অরিযমগ্গং অঞ্ঞো তস্স নিযমো নত্থি, যেন সো সত্তক্খত্তুপরমতায নিযতো ভৰেয্যা’’তি ইমং ৰিভাগং দস্সেতুং পুচ্ছা সকৰাদিস্স, পটিঞ্ঞা ইতরস্স.

মাতা জীৰিতাতিআদীসু অযমধিপ্পাযো – দ্ৰে নিযামা সম্মত্তনিযামো চ মিচ্ছত্তনিযামো চ. সম্মত্তনিযামো অরিযমগ্গো. সো অৰিনিপাতধম্মতঞ্চেৰ ফলুপ্পত্তিঞ্চ নিযমেতি. মিচ্ছত্তনিযামো আনন্তরিযকম্মং. তং অনন্তরা নিরযূপপত্তিং নিযমেতি. তত্থ সত্তক্খত্তুপরমো সোতাপত্তিমগ্গেন অৰিনিপাতধম্মতায চ ফলুপ্পত্তিযা চ নিযমিতো. সেসমগ্গনিযামো পনস্স নত্থি অনধিগতত্তা, আনন্তরিযম্পি কাতুং সো অভব্বো. ত্ৰং পনস্স নিযামং ইচ্ছসি, তেন তং ৰদাম – ‘‘কিং তে সো ইমিনা মিচ্ছত্তনিযামেন নিযমিতো’’তি.

অভব্বো অন্তরাতি পঞ্হেসু আনন্তরিযাভাৰং সন্ধায পটিক্খিপতি, সত্তক্খত্তুপরমং সন্ধায পটিজানাতি. অত্থি সো নিযামোতি পঞ্হে সত্তক্খত্তুপরমতায নিযামং অপস্সন্তো পটিক্খিপতি. অত্থি তে সতিপট্ঠানাতিআদি নিযামসঙ্খাতে মগ্গধম্মে দস্সেতুং ৰুত্তং. তস্স পন পুন পঠমমগ্গানুপ্পত্তিতো তেপি নত্থি, তস্মা পটিক্খিপতি. সেসমেত্থ উত্তানত্থমেৰ. ননু সো সত্তক্খত্তুপরমোতি এত্থ ভগৰা ‘‘অযং পুগ্গলো এত্তকে ভৰে সন্ধাৰিত্ৰা পরিনিব্বাযিস্সতি, অযং এত্তকে’’তি অত্তনো ঞাণবলেন ব্যাকরোতি, ন ভৰনিযামং নাম কিঞ্চি তেন সত্তক্খত্তুপরমো, কোলংকোলো, একবীজী ৰাতি ৰুত্তং, তস্মা অসাধকমেতন্তি.

সত্তক্খত্তুপরমকথাৰণ্ণনা.

৬৪৬-৬৪৭. কোলংকোলএকবীজিকথাযোপি ইমিনাৰুপাযেন ৰেদিতব্বা.

কোলংকোলএকবীজিকথাৰণ্ণনা.

৮. জীৰিতাৰোরোপনকথাৰণ্ণনা

৬৪৮-৬৪৯. ইদানি জীৰিতাৰোরোপনকথা নাম হোতি. তত্থ যস্মা দোসসম্পযুত্তেন চিত্তেন পাণাতিপাতো হোতি, দোসো চ দিট্ঠিসম্পন্নস্স অপ্পহীনো, তস্মা ‘‘দিট্ঠিসম্পন্নো সঞ্চিচ্চ পাণং জীৰিতা ৰোরোপেয্যা’’তি যেসং লদ্ধি, সেয্যথাপি পুব্বসেলিযাপরসেলিযানং; তে সন্ধায দিট্ঠিসম্পন্নোতি পুচ্ছা সকৰাদিস্স, পটিঞ্ঞা ইতরস্স. সঞ্চিচ্চ মাতরন্তিআদিপঞ্হেসু পন ‘‘অট্ঠানমেতং অনৰকাসো’’তি সুত্তভযেন পটিক্খিপতি. সত্থরি অগারৰোতিআদি সত্থারাদীসু সগারৰস্স সিক্খাপদস্স ৰীতিক্কমাভাৰদস্সনত্থং ৰুত্তং. ইতরো পন অকুসলৰসেন তস্স অগারৰো নাম নত্থীতি পটিক্খিপিত্ৰা সগারৰভাৰঞ্চ সম্পটিচ্ছিত্ৰা পুন অগারৰোতি পুট্ঠো তেসু তেসু কিচ্চেসু পসুততায ৰিক্খিত্তানং অসতিযা অমনসিকারেন চেতিযে অভিৰাদনপদক্খিণকরণাভাৰং সন্ধায পটিজানাতি. পুন ওহদেয্যাতিআদিনা নযেন পুট্ঠো তাদিসায কিরিযায সঞ্চিচ্চ অকরণতো পটিক্খিপতি. সেসমেত্থ উত্তানত্থমেৰাতি.

জীৰিতাৰোরোপনকথাৰণ্ণনা.

৯. দুগ্গতিকথাৰণ্ণনা

৬৫০-৬৫২. ইদানি দুগ্গতিকথা নাম হোতি. তত্থ যে দুগ্গতিঞ্চ দুগ্গতিসত্তানং রূপাদিআরম্মণং তণ্হঞ্চাতি উভযম্পি দুগ্গতীতি গহেত্ৰা পুন তথা অৰিভজিত্ৰা অৰিসেসেনেৰ ‘‘দিট্ঠিসম্পন্নস্স পহীনা দুগ্গতী’’তি ৰদন্তি, সেয্যথাপি উত্তরাপথকা; তে সন্ধায পুচ্ছা সকৰাদিস্স, পটিঞ্ঞা ইতরস্স. আপাযিকে রূপে রজ্জেয্যাতিআদি পরৰাদিনো লদ্ধিযা দিট্ঠিসম্পন্নস্স দুগ্গতি অপ্পহীনা, তস্স ৰসেন চোদেতুং ৰুত্তং. সেসমেত্থ উত্তানত্থমেৰ. নিরযং উপপজ্জেয্যাতিআদি দুগ্গতিপহানমেৰ দুগ্গতিগামিনিতণ্হাপহানং ৰা দীপেতি, ন দুগ্গতিসত্তানং রূপাদিআরম্মণায তণ্হায পহানং, তস্মা অসাধকন্তি.

দুগ্গতিকথাৰণ্ণনা.

৬৫৩. সত্তমভৰিককথাযপি এসেৰ নযোতি.

দ্ৰাদসমো ৰগ্গো.