১. নিরোধকথাৰণ্ণনা

৫৭১-৫৭২. ইদানি নিরোধকথা নাম হোতি. তত্থ যেসং ‘‘উপপত্তেসিযন্তি সঙ্খং গতস্স ভৰঙ্গচিত্তস্স ভঙ্গক্খণেন সহেৰ কিরিযাতি সঙ্খং গতা কুসলা ৰা অকুসলা ৰা চত্তারো খন্ধা চিত্তসমুট্ঠানরূপঞ্চাতি পঞ্চক্খন্ধা উপ্পজ্জন্তি. তেসু হি অনুপ্পন্নেসু ভৰঙ্গে নিরুদ্ধে সন্ততিৰিচ্ছেদো ভৰেয্যা’’তি লদ্ধি, সেয্যথাপি অন্ধকানং; তে সন্ধায উপপত্তেসিযেতি পুচ্ছা সকৰাদিস্স, পটিঞ্ঞা ইতরস্স. তত্থ উপপত্তেসিযেতি চতূসুপি পদেসু বহুৰচনভুম্মত্থে একৰচনভুম্মং. উপপত্তেসিযেসু পঞ্চসু খন্ধেসু অনিরুদ্ধেসূতি অযঞ্হেত্থ অত্থো. দসন্নন্তি উপপত্তেসিযখন্ধানঞ্চ কিরিযখন্ধানঞ্চ ৰসেন ৰুত্তং. তত্থ পঠমপঞ্হে খন্ধলক্খণৰসেন কিরিযৰসেন চ পঞ্চেৰ নাম তে খন্ধাতি পটিক্খিপতি. দুতিযপঞ্হে পুরিমপচ্ছিমৰসেন উপপত্তেসিযকিরিযৰসেন চ নানত্তং সন্ধায পটিজানাতি. দ্ৰিন্নং পন ফস্সানং চিত্তানঞ্চ সমোধানং পুট্ঠো সুত্তলেসাভাৰেন পটিক্খিপতি.

কিরিযা চত্তারোতি রূপেন ৰিনা কুসলা অকুসলা ৰা চত্তারো গহিতা. কিরিযাঞাণন্তি পরৰাদিনা চক্খুৰিঞ্ঞাণসমঙ্গিক্খণে অরহতো অনুঞ্ঞাতং অনারম্মণঞাণং. নিরুদ্ধে মগ্গো উপ্পজ্জতীতি পুচ্ছা পরৰাদিস্স, অনিরুদ্ধে অনুপ্পজ্জনতো পটিঞ্ঞা সকৰাদিস্স. মতো মগ্গং ভাৰেতীতি ছলেন পুচ্ছা পরৰাদিস্স. যস্মা পন পটিসন্ধিতো যাৰ চুতিচিত্তা সত্তো জীৰতিযেৰ নাম, তস্মা সকৰাদী ন হেৰন্তি পটিক্খিপতি.

নিরোধকথাৰণ্ণনা.