৯. নযথাচিত্তস্স ৰাচাতিকথাৰণ্ণনা

৫৬৪. ইদানি নযথাচিত্তস্স ৰাচাতিকথা নাম হোতি. তত্থ যস্মা কোচি অঞ্ঞং ভণিস্সামীতি অঞ্ঞং ভণতি, তস্মা নযথাচিত্তস্স ৰাচা চিত্তানুরূপা চিত্তানুগতিকা ন হোতি, ৰিনাপি চিত্তেন পৰত্ততীতি যেসং লদ্ধি; সেয্যথাপি পুব্বসেলিযানং; তে সন্ধায পুচ্ছা সকৰাদিস্স, পটিঞ্ঞা ইতরস্স. অথ নং ‘‘যদি তংসমুট্ঠাপকং চিত্তং ন সিযা, ফস্সাদযোপি তস্মিং খণে ন সিযু’’ন্তি চোদেতুং অফস্সকস্সাতিআদিমাহ. ন ভণিতুকামোতিআদীসু যস্মা অঞ্ঞং ভণিস্সামীতি অঞ্ঞং ভণন্তোপি ভণিতুকামোযেৰ নাম হোতি, তস্মা ন হেৰাতি পটিক্খিপতি.

৫৬৫. ননু অত্থি কোচি অঞ্ঞং ভণিস্সামীতিআদীসু চীৰরন্তি ভণিতুকামো চীরন্তি ভণেয্য. তত্থ অঞ্ঞং ভণিতুকামতাচিত্তং, অঞ্ঞং ভণনচিত্তং, ইতি পুব্বভাগেন চিত্তেন অসদিসত্তা অযথাচিত্তো নাম হোতি, তেনস্স কেৰলং অনাপত্তি নাম হোতি, ন পন চীরন্তি ৰচনসমুট্ঠাপকচিত্তং নত্থি, ইতি অচিত্তকা সা ৰাচাতি অত্থং সন্ধায ইমিনা উদাহরণেন ‘‘নযথাচিত্তস্স ৰাচা’’তি পতিট্ঠাপিতাপি অপ্পতিট্ঠাপিতাৰ হোতীতি.

নযথাচিত্তস্স ৰাচাতিকথাৰণ্ণনা.