৭. আকাসো সনিদস্সনোতিকথাৰণ্ণনা

৪৬৩-৪৬৪. ইদানি আকাসো সনিদস্সনোতিকথা নাম হোতি. তত্থ যেসং তাল়চ্ছিদ্দাদীসু ঞাণপ্পৰত্তিং নিস্সায ‘‘সব্বোপি অজটাকাসো সনিদস্সনো’’তি লদ্ধি, সেয্যথাপি অন্ধকানং; তে সন্ধায আকাসো সনিদস্সনোতি পুচ্ছা সকৰাদিস্স, পটিঞ্ঞা ইতরস্স. অথ নং ‘‘যদি সনিদস্সনো, এৰংৰিধো ভৰেয্যা’’তি চোদনত্থং রূপন্তিআদি ৰুত্তং. চক্খুঞ্চ পটিচ্চাতিপঞ্হেসু এৰরূপস্স সুত্তস্স অভাৰেন পটিক্খিপিত্ৰা তুলন্তরিকাদীনং উপলদ্ধিং নিস্সায পটিজানাতি. দ্ৰিন্নং রুক্খানং অন্তরন্তি এত্থ রুক্খরূপং চক্খুনা দিস্ৰা অন্তরে রূপাভাৰতো আকাসন্তি মনোদ্ৰারৰিঞ্ঞাণং উপ্পজ্জতি, ন চক্খুৰিঞ্ঞাণং. সেসেসুপি এসেৰ নযো. তস্মা অসাধকমেতন্তি.

আকাসো সনিদস্সনোতিকথাৰণ্ণনা.