৪. নিযামকথাৰণ্ণনা

৪২৮-৪৩১. ইদানি নিযামকথা নাম হোতি. তত্থ যো পুগ্গলো সম্মত্তনিযামং ওক্কমিস্সতি, তং ‘‘ভব্বো এস ধম্মং অভিসমেতু’’ন্তি যস্মা ভগৰা জানাতি, তস্মা ‘‘অনিযতস্স পুথুজ্জনস্সেৰ সতো পুগ্গলস্স নিযামগমনায ঞাণং অত্থী’’তি যেসং লদ্ধি, সেয্যথাপি এতরহি উত্তরাপথকানং; তে সন্ধায অনিযতস্সাতি পুচ্ছা সকৰাদিস্স. তত্থ নিযামগমনাযাতি নিযামো ৰুচ্চতি মগ্গো, মগ্গগমনায মগ্গোক্কমনাযাতি অত্থো. যং পনস্স ঞাণং দিস্ৰা ভগৰা ‘‘ভব্বো অয’’ন্তি জানাতি, তং সন্ধায পটিঞ্ঞা পরৰাদিস্স.

অথস্স সকৰাদী অযুত্তৰাদিতং দীপেতুং নিযতস্সাতি ৰিপরীতানুযোগমাহ. তত্থ পঠমপঞ্হে মগ্গেন নিযতস্স অনিযামগমনায ঞাণং নাম নত্থীতি পটিক্খিপতি. দুতিযে নত্থিভাৰেন পটিজানাতি. ততিযে অনিযতস্স নত্থীতি পুট্ঠত্তা লদ্ধিৰিরোধেন পটিক্খিপতি. পুন পঠমপঞ্হমেৰ চতুত্থং কত্ৰা নিযতস্স নিযামগমনাদিৰসেন তযো পঞ্হা কতা. তেসু পঠমে যস্মা আদিমগ্গেন নিযতস্স পুন তদত্থায ঞাণং নত্থি, তস্মা পটিক্খিপতি. দুতিযে নত্থিভাৰেনেৰ পটিজানাতি. ততিযে লদ্ধিৰিরোধেনেৰ পটিক্খিপতি. পুন পঠমপঞ্হং অট্ঠমং কত্ৰা অনিযতস্স অনিযামগমনাদিৰসেন তযো পঞ্হা কতা. তেসং অত্থো ৰুত্তনযেনেৰ ৰেদিতব্বো. পুন পঠমপঞ্হমেৰ দ্ৰাদসমং কত্ৰা তংমূলকা অত্থি নিযামোতিআদযো পঞ্হা কতা. তত্থ যস্মা নিযামগমনায ঞাণং নাম মগ্গঞাণমেৰ হোতি, তস্মা তং সন্ধায অত্থি নিযামোতি ৰুত্তং. ইতরো পন নিযামোতি ৰুত্তে পটিক্খিপতি, ঞাণন্তি ৰুত্তে পটিজানাতি. সতিপট্ঠানাদীসুপি এসেৰ নযো. পচ্চনীকং উত্তানত্থমেৰ. গোত্রভুনোতিআদি যেন যং অপ্পত্তং, তস্স তং নত্থীতি দস্সনত্থং ৰুত্তং. ভগৰা জানাতীতি অত্তনো ঞাণবলেন জানাতি, ন তস্স নিযামগমনঞাণসব্ভাৰতো. তস্মা ইমিনা কারণেন পতিট্ঠিতাপিস্স লদ্ধি অপ্পতিট্ঠিতাযেৰাতি.

নিযামকথাৰণ্ণনা.