১০. সংৰরকথাৰণ্ণনা

৩৭৯. ইদানি সংৰরকথা নাম হোতি. তত্থ যেসং তাৰতিংসে দেৰে উপাদায ততুত্তরি দেৰেসু যস্মা তে পঞ্চ ৰেরানি ন সমাচরন্তি, তস্মা সংৰরো অত্থীতি লদ্ধি, তে সন্ধায পুচ্ছা সকৰাদিস্স, ৰেরসমুদাচারং অপস্সতো পটিঞ্ঞা ইতরস্স. ততো যস্মা সংৰরো নাম সংৰরিতব্বে অসংৰরে সতি হোতি, তস্মা অসংৰরপুচ্ছা সকৰাদিস্স, দেৰেসু পাণাতিপাতাদীনং অভাৰেন পটিক্খেপো ইতরস্স.

অত্থি মনুস্সেসূতিআদি সংৰরে সতি অসংৰরস্স অসংৰরে চ সতি সংৰরস্স পৰত্তিদস্সনত্থং ৰুত্তং.

৩৮০. পাণাতিপাতা ৰেরমণীতি আদিপঞ্হেসু পাণাতিপাতাদীনং অসমাচরণৰসেন পটিঞ্ঞা, পাণাতিপাতাদীনং নত্থিতায পটিক্খেপো ৰেদিতব্বো. পটিলোমপঞ্হা উত্তানত্থাযেৰ.

অৰসানে নত্থি দেৰেসু সংৰরোতিপঞ্হে পাণাতিপাতাদীনি কত্ৰা পুন ততো সংৰরাভাৰং সন্ধায পটিঞ্ঞা সকৰাদিস্স. ততো ছলৰসেন যদি সংৰরো নত্থি, সব্বে দেৰা পাণাতিপাতিনোতিআদিপুচ্ছা পরৰাদিস্স. দেৰানং ৰেরসমুদাচারস্স অভাৰেন পটিক্খেপো সকৰাদিস্স. নহেৰন্তি ৰচনমত্তং গহেত্ৰা লদ্ধিপতিট্ঠাপনং পরৰাদিস্স. এৰং পতিট্ঠিতা পন লদ্ধি অপ্পতিট্ঠিতাৰ হোতীতি.

সংৰরকথাৰণ্ণনা.