অট্ঠমহাৰিপাকচিত্তৰণ্ণনা

৪৯৮. ইদানি অট্ঠমহাৰিপাকচিত্তানি দস্সেতুং পুন কতমে ধম্মা অব্যাকতাতিআদি আরদ্ধং. তত্থ পাল়িযং নযমত্তং দস্সেত্ৰা সব্বৰারা সংখিত্তা. তেসং অত্থো হেট্ঠা ৰুত্তনযেনেৰ ৰেদিতব্বো. যো পনেত্থ ৰিসেসো তং দস্সেতুং অলোভো অব্যাকতমূলন্তিআদি ৰুত্তং. যম্পি ন ৰুত্তং তং এৰং ৰেদিতব্বং – যো হি কামাৰচরকুসলেসু কম্মদ্ৰারকম্মপথপুঞ্ঞকিরিযৰত্থুভেদো ৰুত্তো সো ইধ নত্থি. কস্মা? অৰিঞ্ঞত্তিজনকতো অৰিপাকধম্মতো তথা অপ্পৰত্তিতো চ. যাপি তা যেৰাপনকেসু করুণামুদিতা ৰুত্তা, তা সত্তারম্মণত্তা ৰিপাকেসু ন সন্তি. একন্তপরিত্তারম্মণানি হি কামাৰচরৰিপাকানি. ন কেৰলঞ্চ করুণামুদিতা, ৰিরতিযোপেত্থ ন সন্তি. ‘পঞ্চ সিক্খাপদানি কুসলানেৰা’তি (ৰিভ. ৭১৫) হি ৰুত্তং.

অসঙ্খারসসঙ্খারৰিধানঞ্চেত্থ কুসলতো চেৰ পচ্চযভেদতো চ ৰেদিতব্বং. অসঙ্খারিকস্স হি কুসলস্স অসঙ্খারিকমেৰ ৰিপাকং, সসঙ্খারিকস্স সসঙ্খারিকং. বলৰপচ্চযেহি চ উপ্পন্নং অসঙ্খারিকং, ইতরেহি ইতরং. হীনাদিভেদেপি ইমানি হীনমজ্ঝিমপণীতেহি ছন্দাদীহি অনিপ্ফাদিতত্তা হীনমজ্ঝিমপণীতানি নাম ন হোন্তি. হীনস্স পন কুসলস্স ৰিপাকং হীনং, মজ্ঝিমস্স মজ্ঝিমং, পণীতস্স পণীতং. অধিপতিনো পেত্থ ন সন্তি. কস্মা? ছন্দাদীনি ধুরং কত্ৰা অনুপ্পাদেতব্বতো. সেসং সব্বং অট্ঠসু কুসলেসু ৰুত্তসদিসমেৰ.

ইদানি ইমেসং অট্ঠন্নং মহাৰিপাকচিত্তানং ৰিপচ্চনট্ঠানং ৰেদিতব্বং. এতানি হি চতূসু ঠানেসু ৰিপচ্চন্তি – পটিসন্ধিযং, ভৰঙ্গে, চুতিযং, তদারম্মণেতি. কথং? মনুস্সেসু তাৰ কামাৰচরদেৰেসু চ পুঞ্ঞৰন্তানং দুহেতুকতিহেতুকানং পটিসন্ধিগ্গহণকালে পটিসন্ধি হুত্ৰা ৰিপচ্চন্তি. পটিসন্ধিযা ৰীতিৰত্তায পৰত্তে সট্ঠিপি অসীতিপি ৰস্সানি অসঙ্খ্যেয্যম্পি আযুকালং ভৰঙ্গং হুত্ৰা, বলৰারম্মণে ছসু দ্ৰারেসু তদারম্মণং হুত্ৰা, মরণকালে চুতি হুত্ৰাতি. এৰং চতূসু ঠানেসু ৰিপচ্চন্তি.

তত্থ সব্বেপি সব্বঞ্ঞুবোধিসত্তা পচ্ছিমপটিসন্ধিগ্গহণে পঠমেন সোমনস্সসহগততিহেতুকঅসঙ্খারিকমহাৰিপাকচিত্তেন পটিসন্ধিং গণ্হন্তি. তং পন মেত্তাপুব্বভাগচিত্তস্স ৰিপাকং হোতি. তেন দিন্নায পটিসন্ধিযা অসঙ্খ্যেয্যং আযু. কালৰসেন পন পরিণমতি. মহাসীৰত্থেরো পনাহ – ‘সোমনস্সসহগততো উপেক্খাসহগতং বলৰতরং. তেন পটিসন্ধিং গণ্হন্তি. তেন গহিতপটিসন্ধিকা হি মহজ্ঝাসযা হোন্তি. দিব্বেসুপি আরম্মণেসু উপ্পিলাৰিনো ন হোন্তি, তিপিটকচূল়নাগত্থেরাদযো ৰিযা’তি. অট্ঠকথাযং পন – ‘অযং থেরস্স মনোরথো,’‘নত্থি এত’ন্তি পটিক্খিপিত্ৰা ‘সব্বঞ্ঞুবোধিসত্তানং হিতূপচারো বলৰা হোতি, তস্মা মেত্তাপুব্বভাগকামাৰচরকুসলৰিপাকসোমনস্সসহগততিহেতুকঅসঙ্খারিকচিত্তেন পটিসন্ধিং গণ্হন্তী’তি ৰুত্তং.

ৰিপাকুদ্ধারকথা

ইদানি ৰিপাকুদ্ধারকথায মাতিকা ঠপেতব্বা – তিপিটকচূল়নাগত্থেরো তাৰ আহ – একায কুসলচেতনায সোল়স ৰিপাকচিত্তানি উপ্পজ্জন্তি. এত্থেৰ দ্ৰাদসকমগ্গোপি অহেতুকট্ঠকম্পীতি. মোরৰাপিৰাসী মহাদত্তত্থেরো পনাহ – একায কুসলচেতনায দ্ৰাদস ৰিপাকচিত্তানি উপ্পজ্জন্তি. এত্থেৰ দসকমগ্গোপি অহেতুকট্ঠকম্পীতি. তিপিটকমহাধম্মরক্খিতত্থেরো আহ – একায কুসলচেতনায দস ৰিপাকচিত্তানি উপ্পজ্জন্তি, এত্থেৰ অহেতুকট্ঠকন্তি.

ইমস্মিং ঠানে সাকেতপঞ্হং নাম গণ্হিংসু. সাকেতে কির উপাসকা সালাযং নিসীদিত্ৰা ‘কিং নু খো একায চেতনায কম্মে আযূহিতে একা পটিসন্ধি হোতি উদাহু নানা’তি? পঞ্হং নাম সমুট্ঠাপেত্ৰা নিচ্ছেতুং অসক্কোন্তা আভিধম্মিকত্থেরে উপসঙ্কমিত্ৰা পুচ্ছিংসু. থেরা ‘যথা একস্মা অম্ববীজা একোৰ অঙ্কুরো নিক্খমতি, এৰং একাৰ পটিসন্ধি হোতী’তি সঞ্ঞাপেসুং. অথেকদিৰসং ‘কিং নু খো নানাচেতনাহি কম্মে আযূহিতে পটিসন্ধিযো নানা হোন্তি উদাহু একা’তি? পঞ্হং সমুট্ঠাপেত্ৰা নিচ্ছেতুং অসক্কোন্তা থেরে পুচ্ছিংসু. থেরা ‘যথা বহূসু অম্ববীজেসু রোপিতেসু বহূ অঙ্কুরা নিক্খমন্তি, এৰং বহুকাৰ পটিসন্ধিযো হোন্তী’তি সঞ্ঞাপেসুং.

অপরম্পি ইমস্মিং ঠানে উস্সদকিত্তনং নাম গহিতং. ইমেসঞ্হি সত্তানং লোভোপি উস্সন্নো হোতি, দোসোপি মোহোপি; অলোভোপি অদোসোপি অমোহোপি. তং নেসং উস্সন্নভাৰং কো নিযামেতীতি? পুব্বহেতু নিযামেতি. কম্মাযূহনক্খণেযেৰ নানত্তং হোতি. কথং? ‘‘যস্স হি কম্মাযূহনক্খণে লোভো বলৰা হোতি অলোভো মন্দো, অদোসামোহা বলৰন্তো দোসমোহা মন্দা, তস্স মন্দো অলোভো লোভং পরিযাদাতুং ন সক্কোতি, অদোসামোহা পন বলৰন্তো দোসমোহে পরিযাদাতুং সক্কোন্তি. তস্মা সো তেন কম্মেন দিন্নপটিসন্ধিৰসেন নিব্বত্তো লুদ্ধো হোতি, সুখসীলো অক্কোধনো, পঞ্ঞৰা পন হোতি ৰজিরূপমঞাণো’’তি.

‘যস্স পন কম্মাযূহনক্খণে লোভদোসা বলৰন্তো হোন্তি অলোভাদোসা মন্দা, অমোহো বলৰা মোহো মন্দো, সো পুরিমনযেনেৰ লুদ্ধো চেৰ হোতি দুট্ঠো চ, পঞ্ঞৰা পন হোতি ৰজিরূপমঞাণো দত্তাভযত্থেরো ৰিয.

‘যস্স পন কম্মাযূহনক্খণে লোভাদোসমোহা বলৰন্তো হোন্তি ইতরে মন্দা, সো পুরিমনযেনেৰ লুদ্ধো চেৰ হোতি দন্ধো চ, সুখসীলকো পন হোতি অক্কোধনো.

‘তথা যস্স কম্মাযূহনক্খণে তযোপি লোভদোসমোহা বলৰন্তো হোন্তি অলোভাদযো মন্দা, সো পুরিমনযেনেৰ লুদ্ধো চেৰ হোতি দুট্ঠো চ মূল়্হো চ.

‘যস্স পন কম্মাযূহনক্খণে অলোভদোসমোহা বলৰন্তো হোন্তি ইতরে মন্দা, সো পুরিমনযেনেৰ অপ্পকিলেসো হোতি, দিব্বারম্মণম্পি দিস্ৰা নিচ্চলো, দুট্ঠো পন হোতি দন্ধপঞ্ঞো চাতি.

‘যস্স পন কম্মাযূহনক্খণে অলোভাদোসমোহা বলৰন্তো হোন্তি ইতরে মন্দা, সো পুরিমনযেনেৰ অলুদ্ধো চেৰ হোতি, সুখসীলকো চ, দন্ধো পন হোতি.

‘তথা যস্স কম্মাযূহনক্খণে অলোভদোসামোহা বলৰন্তো হোন্তি ইতরে মন্দা, সো পুরিমনযেনেৰ অলুদ্ধো চেৰ হোতি পঞ্ঞৰা চ, দুট্ঠো চ পন হোতি কোধনো.

‘যস্স পন কম্মাযূহনক্খণে তযোপি অলোভাদযো বলৰন্তো হোন্তি লোভাদযো মন্দা, সো মহাসঙ্ঘরক্খিতত্থেরো ৰিয অলুদ্ধো অদুট্ঠো পঞ্ঞৰা চ হোতী’তি.

অপরম্পি ইমস্মিং ঠানে হেতুকিত্তনং নাম গহিতং. তিহেতুককম্মঞ্হি তিহেতুকম্পি দুহেতুকম্পি অহেতুকম্পি ৰিপাকং দেতি. দুহেতুককম্মং তিহেতুকৰিপাকং ন দেতি, ইতরং দেতি. তিহেতুককম্মেন পটিসন্ধি তিহেতুকাপি হোতি, দুহেতুকাপি; অহেতুকা ন হোতি. দুহেতুকেন দুহেতুকাপি হোতি অহেতুকাপি; তিহেতুকা ন হোতি. অসঙ্খারিকং কুসলং অসঙ্খারিকম্পি সসঙ্খারিকম্পি ৰিপাকং দেতি. সসঙ্খারিকং সসঙ্খারিকম্পি অসঙ্খারিকম্পি ৰিপাকং দেতি. আরম্মণেন ৰেদনা পরিৰত্তেতব্বা. জৰনেন তদারম্মণং নিযামেতব্বং.

ইদানি তস্স তস্স থেরস্স ৰাদে সোল়সমগ্গাদযো ৰেদিতব্বা. পঠমকামাৰচরকুসলসদিসেন হি পঠমমহাৰিপাকচিত্তেন গহিতপটিসন্ধিকস্স গব্ভাৰাসতো নিক্খমিত্ৰা সংৰরাসংৰরে পট্ঠপেতুং সমত্থভাৰং উপগতস্স চক্খুদ্ৰারস্মিং ‘ইট্ঠারম্মণে’ আপাথমাগতে কিরিযমনোধাতুযা ভৰঙ্গে অনাৰট্টিতেযেৰ অতিক্কমনআরম্মণানং পমাণং নত্থি. কস্মা এৰং হোতি? আরম্মণদুব্বলতায. অযং তাৰ একো মোঘৰারো.

সচে পন ভৰঙ্গং আৰট্টেতি, কিরিযমনোধাতুযা ভৰঙ্গে আৰট্টিতে, ৰোট্ঠব্বনং অপাপেত্ৰাৰ অন্তরা, চক্খুৰিঞ্ঞাণে ৰা সম্পটিচ্ছনে ৰা সন্তীরণে ৰা ঠত্ৰা নিৰত্তিস্সতীতি নেতং ঠানং ৰিজ্জতি. ৰোট্ঠব্বনৰসেন পন ঠত্ৰা একং ৰা দ্ৰে ৰা চিত্তানি পৰত্তন্তি. ততো আসেৰনং লভিত্ৰা জৰনট্ঠানে ঠত্ৰা পুন ভৰঙ্গং ওতরতি ইদম্পি আরম্মণদুব্বলতায এৰ হোতি. অযং পন ৰারো ‘দিট্ঠং ৰিয মে, সুতং ৰিয মে’তিআদীনি ৰদনকালে লব্ভতি. অযম্পি দুতিযো মোঘৰারো.

অপরস্স কিরিযমনোধাতুযা ভৰঙ্গে আৰট্টিতে ৰীথিচিত্তানি উপ্পজ্জন্তি, জৰনং জৰতি. জৰনপরিযোসানে পন তদারম্মণস্স ৰারো. তস্মিং অনুপ্পন্নেযেৰ ভৰঙ্গং ওতরতি. তত্রাযং উপমা – যথা হি নদিযা আৰরণং বন্ধিত্ৰা মহামাতিকাভিমুখে উদকে কতে উদকং গন্ত্ৰা উভোসু তীরেসু কেদারে পূরেত্ৰা অতিরেকং কক্কটকমগ্গাদীহি পলাযিত্ৰা পুন নদিংযেৰ ওতরতি, এৰমেতং দট্ঠব্বং. এত্থ হি নদিযং উদকপ্পৰত্তনকালো ৰিয ভৰঙ্গৰীথিপ্পৰত্তনকালো. আৰরণবন্ধনকালো ৰিয কিরিযমনোধাতুযা ভৰঙ্গস্স আৰট্টনকালো. মহামাতিকায উদকপ্পৰত্তনকালো ৰিয ৰীথিচিত্তপ্পৰত্তি. উভোসু তীরেসু কেদারপূরণং ৰিয জৰনং. কক্কটকমগ্গাদীহি পলাযিত্ৰা পুন উদকস্স নদীওতরণং ৰিয জৰনং জৰিত্ৰা তদারম্মণে অনুপ্পন্নেযেৰ পুন ভৰঙ্গোতরণং. এৰং ভৰঙ্গং ওতরণচিত্তানম্পি গণনপথো নত্থি. ইদঞ্চাপি আরম্মণদুব্বলতায এৰ হোতি. অযং ততিযো মোঘৰারো.

সচে পন বলৰারম্মণং আপাথগতং হোতি কিরিযমনোধাতুযা ভৰঙ্গে আৰট্টিতে চক্খুৰিঞ্ঞাণাদীনি উপ্পজ্জন্তি. জৰনট্ঠানে পন পঠমকামাৰচরকুসলচিত্তং জৰনং হুত্ৰা ছসত্তৰারে জৰিত্ৰা তদারম্মণস্স ৰারং দেতি. তদারম্মণং পতিট্ঠহমানং তংসদিসমেৰ মহাৰিপাকচিত্তং পতিট্ঠাতি. ইদং দ্ৰে নামানি লভতি – পটিসন্ধিচিত্তসদিসত্তা ‘মূলভৰঙ্গ’ন্তি চ, যং জৰনেন গহিতং আরম্মণং তস্স গহিতত্তা ‘তদারম্মণ’ন্তি চ. ইমস্মিং ঠানে চক্খুৰিঞ্ঞাণং সম্পটিচ্ছনং সন্তীরণং তদারম্মণন্তি চত্তারি ৰিপাকচিত্তানি গণনূপগানি হোন্তি.

যদা পন দুতিযকুসলচিত্তং জৰনং হোতি, তদা তংসদিসং দুতিযৰিপাকচিত্তমেৰ তদারম্মণং হুত্ৰা পতিট্ঠাতি. ইদঞ্চ দ্ৰে নামানি লভতি. পটিসন্ধিচিত্তেন অসদিসত্তা ‘আগন্তুকভৰঙ্গ’ন্তি চ পুরিমনযেনেৰ ‘তদারম্মণ’ন্তি চ. ইমিনা সদ্ধিং পুরিমানি চত্তারি পঞ্চ হোন্তি.

যদা পন ততিযকুসলচিত্তং জৰনং হোতি, তদা তংসদিসং ততিযৰিপাকচিত্তং তদারম্মণং হুত্ৰা পতিট্ঠাতি. ইদম্পি ৰুত্তনযেনেৰ ‘আগন্তুকভৰঙ্গং’‘তদারম্মণ’ন্তি চ দ্ৰে নামানি লভতি. ইমিনা সদ্ধিং পুরিমানি পঞ্চ ছ হোন্তি.

যদা পন চতুত্থকুসলচিত্তং জৰনং হোতি, তদা তংসদিসং চতুত্থৰিপাকচিত্তং তদারম্মণং হুত্ৰা পতিট্ঠাতি. ইদম্পি ৰুত্তনযেনেৰ ‘আগন্তুকভৰঙ্গং’‘তদারম্মণ’ন্তি চ দ্ৰে নামানি লভতি. ইমিনা সদ্ধিং পুরিমানি ছ সত্ত হোন্তি.

যদা পন তস্মিং দ্ৰারে ‘ইট্ঠমজ্ঝত্তারম্মণং’ আপাথমাগচ্ছতি, তত্রাপি ৰুত্তনযেনেৰ তযো মোঘৰারা লব্ভন্তি. যস্মা পন আরম্মণেন ৰেদনা পরিৰত্ততি তস্মা তত্থ উপেক্খাসহগতসন্তীরণং. চতুন্নঞ্চ উপেক্খাসহগতমহাকুসলজৰনানং পরিযোসানে চত্তারি উপেক্খাসহগতমহাৰিপাকচিত্তানেৰ তদারম্মণভাৰেন পতিট্ঠহন্তি. তানিপি ৰুত্তনযেনেৰ ‘আগন্তুকভৰঙ্গং’‘তদারম্মণ’ন্তি চ দ্ৰে নামানি লভন্তি. ‘পিট্ঠিভৰঙ্গানী’তিপি ৰুচ্চন্তি এৰ. ইতি ইমানি পঞ্চ পুরিমেহি সত্তহি সদ্ধিং দ্ৰাদস হোন্তি. এৰং চক্খুদ্ৰারে দ্ৰাদস, সোতদ্ৰারাদীসু দ্ৰাদস দ্ৰাদসাতি, সমসট্ঠি হোন্তি. এৰং একায চেতনায কম্মে আযূহিতে সমসট্ঠি ৰিপাকচিত্তানি উপ্পজ্জন্তি. অগ্গহিতগ্গহণেন পন চক্খুদ্ৰারে দ্ৰাদস, সোতঘানজিৰ্হাকাযৰিঞ্ঞাণানি চত্তারীতি সোল়স হোন্তি.

ইমস্মিং ঠানে অম্বোপমং নাম গণ্হিংসু – একো কির পুরিসো ফলিতম্বরুক্খমূলে সসীসং পারুপিত্ৰা নিপন্নো নিদ্দাযতি. অথেকং অম্বপক্কং ৰণ্টতো মুচ্চিত্ৰা তস্স কণ্ণসক্খলিং পুঞ্ছমানং ৰিয ‘থ’ন্তি ভূমিযং পতি. সো তস্স সদ্দেন পবুজ্ঝিত্ৰা উম্মীলেত্ৰা ওলোকেসি. ততো হত্থং পসারেত্ৰা ফলং গহেত্ৰা মদ্দিত্ৰা উপসিঙ্ঘিত্ৰা পরিভুঞ্জি.

তত্থ, তস্স পুরিসস্স অম্বরুক্খমূলে নিদ্দাযনকালো ৰিয ভৰঙ্গসমঙ্গিকালো. অম্বপক্কস্স ৰণ্টতো মুচ্চিত্ৰা কণ্ণসক্খলিং পুঞ্ছমানস্স পতনকালো ৰিয আরম্মণস্স পসাদঘট্টনকালো. তেন সদ্দেন পবুদ্ধকালো ৰিয কিরিযমনোধাতুযা ভৰঙ্গস্স আৰট্টিতকালো. উম্মীলেত্ৰা ওলোকিতকালো ৰিয চক্খুৰিঞ্ঞাণস্স দস্সনকিচ্চসাধনকালো. হত্থং পসারেত্ৰা গহিতকালো ৰিয ৰিপাকমনোধাতুযা আরম্মণস্স সম্পটিচ্ছিতকালো. গহেত্ৰা মদ্দিতকালো ৰিয ৰিপাকমনোৰিঞ্ঞাণধাতুযা আরম্মণস্স সন্তীরণকালো. উপসিঙ্ঘিতকালো ৰিয কিরিযমনোৰিঞ্ঞাণধাতুযা আরম্মণস্স ৰৰত্থাপিতকালো. পরিভুত্তকালো ৰিয জৰনস্স আরম্মণরসং অনুভৰিতকালো. অযং উপমা কিং দীপেতি? আরম্মণস্স পসাদঘট্টনমেৰ কিচ্চং. তেন পসাদে ঘট্টিতে কিরিযমনোধাতুযা ভৰঙ্গাৰট্টনমেৰ, চক্খুৰিঞ্ঞাণস্স দস্সনমত্তকমেৰ, ৰিপাকমনোধাতুযা আরম্মণসম্পটিচ্ছনমত্তকমেৰ, ৰিপাকমনোৰিঞ্ঞাণধাতুযা আরম্মণসন্তীরণমত্তকমেৰ, কিরিযমনোৰিঞ্ঞাণধাতুযা আরম্মণৰৰত্থাপনমত্তকমেৰ কিচ্চং. একন্তেন পন আরম্মণরসং জৰনমেৰ অনুভৰতীতি দীপেতি.

এত্থ চ ‘ত্ৰং ভৰঙ্গং নাম হোহি, ত্ৰং আৰজ্জনং নাম, ত্ৰং দস্সনং নাম, ত্ৰং সম্পটিচ্ছনং নাম, ত্ৰং সন্তীরণং নাম, ত্ৰং ৰোট্ঠব্বনং নাম, ত্ৰং জৰনং নাম, হোহী’তি কোচি কত্তা ৰা কারেতা ৰা নত্থি.

ইমস্মিং পন ঠানে পঞ্চৰিধং নিযামং নাম গণ্হিংসু – বীজনিযামং উতুনিযামং কম্মনিযামং ধম্মনিযামং চিত্তনিযামন্তি. তত্থ কুলত্থগচ্ছস্স উত্তরগ্গভাৰো, দক্খিণৰল্লিযা দক্খিণতো রুক্খপরিহরণং, সূরিযাৰট্টপুপ্ফানং সূরিযাভিমুখভাৰো, মালুৰলতায রুক্খাভিমুখগমনমেৰ, নাল়িকেরস্স মত্থকে ছিদ্দসব্ভাৰোতি তেসং তেসং বীজানং তংতংসদিসফলদানং বীজনিযামো নাম. তস্মিং তস্মিং সমযে তেসং তেসং রুক্খানং একপ্পহারেনেৰ পুপ্ফফলপল্লৰগ্গহণং উতুনিযামো নাম. তিহেতুককম্মং তিহেতুকদুহেতুকাহেতুকৰিপাকং দেতি. দুহেতুককম্মং দুহেতুকাহেতুকৰিপাকং দেতি, তিহেতুকং ন দেতীতি, এৰং তস্স তস্স কম্মস্স তংতংসদিসৰিপাকদানমেৰ কম্মনিযামো নাম.

অপরোপি কম্মসরিক্খকৰিপাকৰসেনেৰ কম্মনিযামো হোতি. তস্স দীপনত্থমিদং ৰত্থুং কথেন্তি – সম্মাসম্বুদ্ধকালে সাৰত্থিযা দ্ৰারগামো ঝাযি. ততো পজ্জলিতং তিণকরল়ং উট্ঠহিত্ৰা আকাসেন গচ্ছতো কাকস্স গীৰায পটিমুঞ্চি. সো ৰিরৰন্তো ভূমিযং পতিত্ৰা কালমকাসি. মহাসমুদ্দেপি একা নাৰা নিচ্চলা অট্ঠাসি. হেট্ঠা কেনচি নিরুদ্ধভাৰং অপস্সন্তা কাল়কণ্ণিসলাকং ৰিচারেসুং. সা নাৰিকস্সেৰ উপাসিকায হত্থে পতি. ততো একিস্সা কারণা মা সব্বে নস্সন্তু, উদকে নং খিপামাতি আহংসু. নাৰিকো ‘ন সক্খিস্সামি এতং উদকে উপ্পিলৰমানং পস্সিতু’ন্তি ৰালিকাঘটং গীৰাযং বন্ধাপেত্ৰা খিপাপেসি. তঙ্খণঞ্ঞেৰ নাৰা খিত্তসরো ৰিয পক্খন্দি. একো ভিক্খু লেণে ৰসতি. মহন্তং পব্বতকূটং পতিত্ৰা দ্ৰারং পিদহি. তং সত্তমে দিৰসে সযমেৰ অপগতং. সম্মাসম্বুদ্ধস্স জেতৰনে নিসীদিত্ৰা ধম্মং কথেন্তস্স ইমানি তীণি ৰত্থূনি একপ্পহারেনেৰ আরোচেসুং. সত্থা ‘ন এতং অঞ্ঞেহি কতং, তেহি কতকম্মমেৰ ত’ন্তি অতীতং আহরিত্ৰা দস্সেন্তো আহ –

কাকো পুরিমত্তভাৰে মনুস্সো হুত্ৰা একং দুট্ঠগোণং দমেতুং অসক্কোন্তো গীৰায পলালৰেণিং বন্ধিত্ৰা অগ্গিং অদাসি. গোণো তেনেৰ মতো. ইদানি তং কম্মং এতস্স আকাসেন গচ্ছতোপি ন মুচ্চিতুং অদাসি. সাপি ইত্থী পুরিমত্তভাৰে একা ইত্থীযেৰ. একো কুক্কুরো তায পরিচিতো হুত্ৰা অরঞ্ঞং গচ্ছন্তিযা সদ্ধিং গচ্ছতি, সদ্ধিমেৰাগচ্ছতি. মনুস্সা ‘নিক্খন্তো ইদানি অম্হাকং সুনখলুদ্দকো’তি উপ্পণ্ডেন্তি. সা তেন অট্টীযমানা কুক্কুরং নিৰারেতুং অসক্কোন্তী ৰালিকাঘটং গীৰায বন্ধিত্ৰা উদকে খিপি. তং কম্মং তস্সা সমুদ্দমজ্ঝে মুচ্চিতুং নাদাসি. সোপি ভিক্খু পুরিমত্তভাৰে গোপালকো হুত্ৰা বিলং পৰিট্ঠায গোধায সাখাভঙ্গমুট্ঠিযা দ্ৰারং থকেসি. ততো সত্তমে দিৰসে সযং আগন্ত্ৰা ৰিৰরি. গোধা কম্পমানা নিক্খমি. করুণায তং ন মারেসি. তং কম্মং তস্স পব্বতন্তরং পৰিসিত্ৰা নিসিন্নস্স মুচ্চিতুং নাদাসীতি. ইমানি তীণি ৰত্থূনি সমোধানেত্ৰা ইমং গাথমাহ –

‘‘ন অন্তলিক্খে ন সমুদ্দমজ্ঝে,

ন পব্বতানং ৰিৰরং পৰিস্স;

ন ৰিজ্জতে সো জগতিপ্পদেসো,

যত্থট্ঠিতো মুচ্চেয্য পাপকম্মা’’তি. (ধ. প. ১২৭);

অযম্পি কম্মনিযামোযেৰ নাম. অঞ্ঞানিপি এৰরূপানি ৰত্থূনি কথেতব্বানি.

বোধিসত্তানং পন পটিসন্ধিগ্গহণে, মাতুকুচ্ছিতো নিক্খমনে, অভিসম্বোধিযং তথাগতস্স ধম্মচক্কপ্পৰত্তনে, আযুসঙ্খারস্স ওস্সজ্জনে, পরিনিব্বানে চ দসসহস্সচক্কৰাল়কম্পনং ধম্মনিযামো নাম.

আরম্মণেন পন পসাদে ঘট্টিতে ‘ত্ৰং আৰজ্জনং নাম হোহি…পে… ত্ৰং জৰনং নাম হোহী’তি কোচি কত্তা ৰা কারেতা ৰা নত্থি, অত্তনো অত্তনো পন ধম্মতায এৰ আরম্মণেন পসাদস্স ঘট্টিতকালতো পট্ঠায কিরিযমনোধাতুচিত্তং ভৰঙ্গং আৰট্টেতি, চক্খুৰিঞ্ঞাণং দস্সনকিচ্চং সাধেতি, ৰিপাকমনোধাতু সম্পটিচ্ছনকিচ্চং সাধেতি, ৰিপাকমনোৰিঞ্ঞাণধাতু সন্তীরণকিচ্চং সাধেতি, কিরিযমনোৰিঞ্ঞাণধাতু ৰোট্ঠব্বনকিচ্চং সাধেতি, জৰনং আরম্মণরসং অনুভৰতীতি অযং চিত্তনিযামো নাম. অযং ইধ অধিপ্পেতো.

সসঙ্খারিকতিহেতুককুসলেনাপি উপেক্খাসহগতেহি অসঙ্খারিকসসঙ্খারিককুসলচিত্তেহিপি কম্মে আযূহিতে তংসদিসৰিপাকচিত্তেহি আদিন্নায পটিসন্ধিযা এসেৰ নযো. উপেক্খাসহগতদ্ৰযে পন পঠমং ‘ইট্ঠমজ্ঝত্তারম্মণৰসেন’ পৰত্তিং দস্সেত্ৰা পচ্ছা ‘ইট্ঠারম্মণৰসেন’ দস্সেতব্বা.

এৰম্পি একেকস্মিং দ্ৰারে দ্ৰাদস দ্ৰাদস হুত্ৰা সমসট্ঠি হোন্তি. অগ্গহিতগ্গহণেন সোল়স ৰিপাকচিত্তানি উপ্পজ্জন্তি.

ইমস্মিং ঠানে পঞ্চউচ্ছুনাল়িযন্তোপমং নাম গণ্হিংসু. উচ্ছুপীল়নসমযে কির একস্মা গামা একাদস যন্তৰাহা নিক্খমিত্ৰা একং উচ্ছুৰাটং দিস্ৰা তস্স পরিপক্কভাৰং ঞত্ৰা উচ্ছুসামিকং উপসঙ্কমিত্ৰা ‘যন্তৰাহা ময’ন্তি আরোচেসুং. সো ‘অহং তুম্হেযেৰ পরিযেসামী’তি উচ্ছুসালং তে গহেত্ৰা অগমাসি. তে তত্থ নাল়িযন্তং সজ্জেত্ৰা ‘মযং একাদস জনা, অপরম্পি একং লদ্ধুং ৰট্টতি, ৰেতনেন গণ্হথা’তি আহংসু. উচ্ছুসামিকো ‘অহমেৰ সহাযো ভৰিস্সামী’তি উচ্ছূনং সালং পূরাপেত্ৰা তেসং সহাযো অহোসি. তে অত্তনো অত্তনো কিচ্চানি কত্ৰা, ফাণিতপাচকেন উচ্ছুরসে পক্কে, গুল়বন্ধকেন বদ্ধে, উচ্ছুসামিকেন তুলযিত্ৰা ভাগেসু দিন্নেসু, অত্তনো অত্তনো ভাগং আদায উচ্ছুসালং সামিকস্স পটিচ্ছাপেত্ৰা, এতেনেৰ উপাযেন অপরাসুপি চতূসু সালাসু কম্মং কত্ৰা পক্কমিংসু.

তত্থ পঞ্চ যন্তসালা ৰিয পঞ্চ পসাদা দট্ঠব্বা. পঞ্চ উচ্ছুৰাটা ৰিয পঞ্চ আরম্মণানি. একাদস ৰিচরণকযন্তৰাহা ৰিয একাদস ৰিপাকচিত্তানি. পঞ্চ উচ্ছুসালাসামিনো ৰিয পঞ্চৰিঞ্ঞাণানি. পঠমকসালাযং সামিকেন সদ্ধিং দ্ৰাদসন্নং জনানং একতোৰ হুত্ৰা কতকম্মানং ভাগগ্গহণকালো ৰিয একাদসন্নং ৰিপাকচিত্তানং চক্খুৰিঞ্ঞাণেন সদ্ধিং একতো হুত্ৰা চক্খুদ্ৰারে রূপারম্মণে সকসককিচ্চকরণকালো. সালাসামিকস্স সালায সম্পটিচ্ছনকালো ৰিয চক্খুৰিঞ্ঞাণস্স দ্ৰারসঙ্কন্তিঅকরণং. দুতিয ততিয চতুত্থ পঞ্চমসালায দ্ৰাদসন্নং একতো হুত্ৰা কতকম্মানং ভাগগ্গহণকালো ৰিয একাদসন্নং ৰিপাকচিত্তানং কাযৰিঞ্ঞাণেন সদ্ধিং একতো হুত্ৰা কাযদ্ৰারে ফোট্ঠব্বারম্মণে সকসককিচ্চকরণকালো. সালাসামিকস্স সালায সম্পটিচ্ছনকালো ৰিয কাযৰিঞ্ঞাণস্স দ্ৰারসঙ্কন্তিঅকরণং ৰেদিতব্বং. এত্তাৰতা তিহেতুককম্মেন পটিসন্ধি তিহেতুকা হোতীতি ৰারো কথিতো. যা পন তেন দুহেতুকপটিসন্ধি হোতি, সা পটিচ্ছন্নাৰ হুত্ৰা গতা.

ইদানি দুহেতুককম্মেন দুহেতুকা পটিসন্ধি হোতীতি ৰারো কথেতব্বো. দুহেতুকেন হি সোমনস্সসহগতঅসঙ্খারিকচিত্তেন কম্মে আযূহিতে তংসদিসেনেৰ দুহেতুকৰিপাকচিত্তেন গহিতপটিসন্ধিকস্স ৰুত্তনযেনেৰ চক্খুদ্ৰারে ‘ইট্ঠারম্মণে’ আপাথমাগতে তযো মোঘৰারা. দুহেতুকসোমনস্সসহগতঅসঙ্খারিকজৰনাৰসানে তংসদিসমেৰ মূলভৰঙ্গসঙ্খাতং তদারম্মণং. সসঙ্খারিকজৰনাৰসানে তংসদিসমেৰ আগন্তুকভৰঙ্গসঙ্খাতং তদারম্মণং. ‘ইট্ঠমজ্ঝত্তারম্মণে’ দ্ৰিন্নং উপেক্খাসহগতজৰনানং অৰসানে তাদিসানেৰ দ্ৰে তদারম্মণানি উপ্পজ্জন্তি. ইধ একেকস্মিং দ্ৰারে অট্ঠ অট্ঠ কত্ৰা সমচত্তালীস চিত্তানি. অগ্গহিতগ্গহণেন পন চক্খুদ্ৰারে অট্ঠ, সোতঘানজিৰ্হাকাযৰিঞ্ঞাণানি চত্তারীতি দ্ৰাদস হোন্তি. এৰং একায চেতনায কম্মে আযূহিতে দ্ৰাদস ৰিপাকচিত্তানি উপ্পজ্জন্তি. অম্বোপমপঞ্চনিযামকথা পাকতিকা এৰ. দুহেতুকসেসচিত্তত্তযসদিসৰিপাকেন গহিতপটিসন্ধিকেপি এসেৰ নযো. যন্তৰাহোপমায পনেত্থ সত্ত যন্তৰাহা. তেহি তত্থ যন্তে নাম সজ্জিতে সালাসামিকং অট্ঠমং কত্ৰা ৰুত্তনযানুসারেন যোজনা ৰেদিতব্বা. এত্তাৰতা দুহেতুককম্মেন দুহেতুকপটিসন্ধি হোতীতি ৰারো কথিতো.

ইদানি অহেতুকপটিসন্ধিকথা হোতি – চতুন্নঞ্হি দুহেতুককুসলচিত্তানং অঞ্ঞতরেন কম্মে আযূহিতে কুসলৰিপাকউপেক্খাসহগতাহেতুকমনোৰিঞ্ঞাণধাতুচিত্তেন গহিতপটিসন্ধিকস্স পটিসন্ধি কম্মসদিসাতি ন ৰত্তব্বা. কম্মঞ্হি দুহেতুকং পটিসন্ধি অহেতুকা. তস্স ৰুড্ঢিপ্পত্তস্স চক্খুদ্ৰারে ‘ইট্ঠমজ্ঝত্তারম্মণে’ আপাথমাগতে পুরিমনযেনেৰ তযো মোঘৰারা ৰেদিতব্বা. চতুন্নং পন দুহেতুককুসলচিত্তানং অঞ্ঞতরজৰনস্স পরিযোসানে অহেতুকচিত্তং তদারম্মণভাৰেন পতিট্ঠাতি. তং ‘মূলভৰঙ্গং’‘তদারম্মণ’ন্তি দ্ৰে নামানি লভতি. এৰমেত্থ চক্খুৰিঞ্ঞাণং সম্পটিচ্ছনং উপেক্খাসহগতসন্তীরণং তদারম্মণম্পি উপেক্খাসহগতমেৰাতি তেসু একং গহেত্ৰা গণনূপগানি তীণেৰ হোন্তি.

‘ইট্ঠারম্মণে’ পন সন্তীরণম্পি তদারম্মণম্পি সোমনস্সসহগতমেৰ. তেসু একং গহেত্ৰা পুরিমানি তীণি চত্তারি হোন্তি. এৰং পঞ্চসু দ্ৰারেসু চত্তারি চত্তারি কত্ৰা একায চেতনায কম্মে আযূহিতে ৰীসতি ৰিপাকচিত্তানি উপ্পজ্জন্তীতি ৰেদিতব্বানি. অগ্গহিতগ্গহণেন পন চক্খুদ্ৰারে চত্তারি সোতঘানজিৰ্হাকাযৰিঞ্ঞাণানি চত্তারীতি অট্ঠ হোন্তি. ইদং ‘অহেতুকট্ঠকং’ নাম. ইদং মনুস্সলোকেন গহিতং.

চতূসু পন অপাযেসু পৰত্তে লব্ভতি. যদা হি মহামোগ্গল্লানত্থেরো নিরযে পদুমং মাপেত্ৰা পদুমকণ্ণিকায নিসিন্নো নেরযিকানং ধম্মকথং কথেসি, তদা তেসং থেরং পস্সন্তানং কুসলৰিপাকং চক্খুৰিঞ্ঞাণং উপ্পজ্জতি. সদ্দং সুণন্তানং সোতৰিঞ্ঞাণং, চন্দনৰনে দিৰাৰিহারং নিসীদিত্ৰা গতস্স চীৰরগন্ধঘাযনকালে ঘানৰিঞ্ঞাণং, নিরযগ্গিং নিব্বাপেতুং দেৰং ৰস্সাপেত্ৰা পানীযদানকালে জিৰ্হাৰিঞ্ঞাণং, মন্দমন্দৰাতসমুট্ঠাপনকালে কাযৰিঞ্ঞাণন্তি এৰং চক্খুৰিঞ্ঞাণাদীনি পঞ্চ, একং সম্পটিচ্ছনং, দ্ৰে সন্তীরণানীতি অহেতুকট্ঠকং লব্ভতি. নাগসুপণ্ণৰেমানিকপেতানম্পি অকুসলেন পটিসন্ধি হোতি. পৰত্তে কুসলং ৰিপচ্চতি. তথা চক্কৰত্তিনো মঙ্গলহত্থিঅস্সাদীনং. অযং তাৰ ‘ইট্ঠইট্ঠমজ্ঝত্তারম্মণেসু’ কুসলজৰনৰসেন কথামগ্গো.

‘ইট্ঠারম্মণে’ পন চতূসু সোমনস্সসহগতাকুসলচিত্তেসু জৰিতেসু কুসলৰিপাকং সোমনস্সসহগতাহেতুকচিত্তং তদারম্মণং হোতি. ‘ইট্ঠমজ্ঝত্তারম্মণে’ চতূসু উপেক্খাসহগতলোভসম্পযুত্তেসু জৰিতেসু কুসলৰিপাকং উপেক্খাসহগতাহেতুকচিত্তং তদারম্মণং হোতি. যং পন ‘জৰনেন তদারম্মণং নিযমেতব্ব’ন্তি ৰুত্তং তং কুসলং সন্ধায ৰুত্তন্তি ৰেদিতব্বং. দোমনস্সসহগতজৰনানন্তরং তদারম্মণং উপ্পজ্জমানং কিং উপ্পজ্জতীতি? অকুসলৰিপাকাহেতুকমনোৰিঞ্ঞাণধাতুচিত্তং উপ্পজ্জতি.

ইদং পন জৰনং কুসলত্থায ৰা অকুসলত্থায ৰা কো নিযামেতীতি? আৰজ্জনঞ্চেৰ ৰোট্ঠব্বনঞ্চ. আৰজ্জনেন হি যোনিসো আৰট্টিতে ৰোট্ঠব্বনেন যোনিসো ৰৰত্থাপিতে জৰনং অকুসলং ভৰিস্সতীতি অট্ঠানমেতং. আৰজ্জনেন অযোনিসো আৰট্টিতে ৰোট্ঠব্বনেন অযোনিসো ৰৰত্থাপিতে জৰনং কুসলং ভৰিস্সতীতিপি অট্ঠানমেতং. উভযেন পন যোনিসো আৰট্টিতে ৰৰত্থাপিতে চ জৰনং কুসলং হোতি, অযোনিসো অকুসলন্তি ৰেদিতব্বং.

‘ইট্ঠারম্মণে’ পন কঙ্খতো উদ্ধতস্স চ তদারম্মণং কিং হোতীতি? ইট্ঠারম্মণস্মিং কঙ্খতু ৰা মা ৰা, উদ্ধতো ৰা হোতু মা ৰা, কুসলৰিপাকাহেতুকসোমনস্সচিত্তমেৰ তদারম্মণং হোতি, ‘ইট্ঠমজ্ঝত্তারম্মণে’ ‘কুসলৰিপাকাহেতুকউপেক্খাসহগত’ন্তি, অযং পনেত্থ সঙ্খেপতো অত্থদীপনো মহাধম্মরক্খিতত্থেরৰাদো নাম. সোমনস্সসহগতস্মিঞ্হি জৰনে জৰিতে পঞ্চ তদারম্মণানি গৰেসিতব্বানীতি. উপেক্খাসহগতস্মিং জৰনে জৰিতে ছ গৰেসিতব্বানীতি.

অথ যদা সোমনস্সসহগতপটিসন্ধিকস্স পৰত্তে ঝানং নিব্বত্তেত্ৰা পমাদেন পরিহীনজ্ঝানস্স ‘পণীতধম্মো মে নট্ঠো’তি পচ্চৰেক্খতো ৰিপ্পটিসারৰসেন দোমনস্সং উপ্পজ্জতি, তদা কিং উপ্পজ্জতি? ‘সোমনস্সানন্তরঞ্হি দোমনস্সং দোমনস্সানন্তরঞ্চ সোমনস্সং’ পট্ঠানে পটিসিদ্ধং. মহগ্গতধম্মং আরব্ভ জৰনে জৰিতে তদারম্মণম্পি তত্থেৰ পটিসিদ্ধন্তি? কুসলৰিপাকা ৰা অকুসলৰিপাকা ৰা উপেক্খাসহগতাহেতুকমনোৰিঞ্ঞাণধাতু উপ্পজ্জতি, কিমস্সা আৰজ্জনন্তি? ‘ভৰঙ্গাৰজ্জনানং ৰিয নত্থস্সা আৰজ্জনকিচ্চ’ন্তি. ‘এতানি তাৰ অত্তনো নিন্নত্তা চ চিণ্ণত্তা চ সমুদাচারত্তা চ উপ্পজ্জন্তু, অযং কথং উপ্পজ্জতী’তি? ‘যথা নিরোধস্স অনন্তরপচ্চযং নেৰসঞ্ঞানাসঞ্ঞাযতনং, নিরোধা ৰুট্ঠহন্তস্স ফলসমাপত্তিচিত্তং, অরিযমগ্গচিত্তং, মগ্গানন্তরানি ফলচিত্তানি, এৰং অসন্তেপি আৰজ্জনে, নিন্নচিণ্ণসমুদাচারভাৰেন উপ্পজ্জতি. ৰিনা হি আৰজ্জনেন চিত্তং উপ্পজ্জতি, আরম্মণেন পন ৰিনা নুপ্পজ্জতী’তি. ‘অথ কিমস্সারম্মণ’ন্তি? ‘রূপাদীসু পরিত্তধম্মেসু অঞ্ঞতরং. এতেসু হি যদেৰ তস্মিং সমযে আপাথমাগতং হোতি, তং আরব্ভ এতং চিত্তং উপ্পজ্জতী’তি ৰেদিতব্বং.

ইদানি সব্বেসম্পি এতেসং চিত্তানং পাকটভাৰত্থং অযং পকিণ্ণকনযো ৰুত্তো –

সুত্তং দোৰারিকো চ, গামিল্লো অম্বো কোলিযকেন চ;

জচ্চন্ধো পীঠসপ্পী চ, ৰিসযগ্গাহো চ উপনিস্সযমত্থসোতি.

তত্থ ‘সুত্ত’ন্তি, একো পন্থমক্কটকো পঞ্চসু দিসাসু সুত্তং পসারেত্ৰা জালং কত্ৰা মজ্ঝে নিপজ্জতি. পঠমদিসায পসারিতসুত্তে পাণকেন ৰা পটঙ্গেন ৰা মক্খিকায ৰা পহটে নিপন্নট্ঠানতো চলিত্ৰা নিক্খমিত্ৰা সুত্তানুসারেন গন্ত্ৰা তস্স যূসং পিৰিত্ৰা পুনআগন্ত্ৰা তত্থেৰ নিপজ্জতি. দুতিযদিসাদীসু পহটকালেপি এৰমেৰ করোতি.

তত্থ পঞ্চসু দিসাসু পসারিতসুত্তং ৰিয পঞ্চপসাদা. মজ্ঝে নিপন্নমক্কটকো ৰিয চিত্তং. পাণকাদীহি সুত্তঘট্টনকালো ৰিয আরম্মণেন পসাদস্স ঘট্টিতকালো. মজ্ঝে নিপন্নমক্কটকস্স চলনং ৰিয পসাদঘট্টনকং আরম্মণং গহেত্ৰা কিরিযমনোধাতুযা ভৰঙ্গস্স আৰট্টিতকালো. সুত্তানুসারেন গমনকালো ৰিয ৰীথিচিত্তপ্পৰত্তি. সীসে ৰিজ্ঝিত্ৰা যূসপিৰনং ৰিয জৰনস্স আরম্মণে জৰিতকালো. পুনআগন্ত্ৰা মজ্ঝে নিপজ্জনং ৰিয চিত্তস্স হদযৰত্থুমেৰ নিস্সায পৰত্তনং.

ইদং ওপম্মং কিং দীপেতি? আরম্মণেন পসাদে ঘট্টিতে পসাদৰত্থুকচিত্ততো হদযরূপৰত্থুকচিত্তং পঠমতরং উপ্পজ্জতীতি দীপেতি. একেকং আরম্মণং দ্ৰীসু দ্ৰীসু দ্ৰারেসু আপাথমাগচ্ছতীতিপি.

‘দোৰারিকো’তি, একো রাজা সযনগতো নিদ্দাযতি. তস্স পরিচারকো পাদে পরিমজ্জন্তো নিসীদি. বধিরদোৰারিকো দ্ৰারে ঠিতো. তযো পটিহারা পটিপাটিযা ঠিতা. অথেকো পচ্চন্তৰাসী মনুস্সো পণ্ণাকারং আদায আগন্ত্ৰা দ্ৰারং আকোটেসি. বধিরদোৰারিকো সদ্দং ন সুণাতি. পাদপরিমজ্জকো সঞ্ঞং অদাসি. তায সঞ্ঞায দ্ৰারং ৰিৰরিত্ৰা পস্সি. পঠমপটিহারো পণ্ণাকারং গহেত্ৰা দুতিযস্স অদাসি, দুতিযো ততিযস্স, ততিযো রঞ্ঞো. রাজা পরিভুঞ্জি.

তত্থ সো রাজা ৰিয জৰনং দট্ঠব্বং. পাদপরিমজ্জকো ৰিয আৰজ্জনং. বধিরদোৰারিকো ৰিয চক্খুৰিঞ্ঞাণং. তযো পটিহারা ৰিয সম্পটিচ্ছনাদীনি তীণি ৰীথিচিত্তানি. পচ্চন্তৰাসিনো পণ্ণাকারং আদায আগন্ত্ৰা দ্ৰারাকোটনং ৰিয আরম্মণস্স পসাদঘট্টনং. পাদপরিমজ্জকেন সঞ্ঞায দিন্নকালো ৰিয কিরিযমনোধাতুযা ভৰঙ্গস্স আৰট্টিতকালো. তেন দিন্নসঞ্ঞায বধিরদোৰারিকস্স দ্ৰারৰিৰরণকালো ৰিয চক্খুৰিঞ্ঞাণস্স আরম্মণে দস্সনকিচ্চসাধনকালো. পঠমপটিহারেন পণ্ণাকারস্স গহিতকালো ৰিয ৰিপাকমনোধাতুযা আরম্মণস্স সম্পটিচ্ছিতকালো. পঠমেন দুতিযস্স দিন্নকালো ৰিয ৰিপাকমনোৰিঞ্ঞাণধাতুযা আরম্মণস্স সন্তীরণকালো. দুতিযেন ততিযস্স দিন্নকালো ৰিয কিরিযমনোৰিঞ্ঞাণধাতুযা আরম্মণস্স ৰৰত্থাপিতকালো. ততিযেন রঞ্ঞো দিন্নকালো ৰিয ৰোট্ঠব্বনেন জৰনস্স নিয্যাদিতকালো. রঞ্ঞো পরিভোগকালো ৰিয জৰনস্স আরম্মণরসানুভৰনকালো.

ইদং ওপম্মং কিং দীপেতি? আরম্মণস্স পসাদঘট্টমত্তনমেৰ কিচ্চং, কিরিযমনোধাতুযা ভৰঙ্গাৰট্টনমত্তমেৰ, চক্খুৰিঞ্ঞাণাদীনং দস্সনসম্পটিচ্ছনসন্তীরণৰৰত্থাপনমত্তানেৰ কিচ্চানি. একন্তেন পন জৰনমেৰ আরম্মণরসং অনুভোতীতি দীপেতি.

‘গামিল্লো’তি, সম্বহুলা গামদারকা অন্তরৰীথিযং পংসুকীল়ং কীল়ন্তি. তত্থেকস্স হত্থে কহাপণো পটিহঞ্ঞি. সো ‘ময্হং হত্থে পটিহতং, কিং নু খো এত’ন্তি আহ. অথেকো ‘পণ্ডরং এত’ন্তি আহ. অপরো সহ পংসুনা গাল়্হং গণ্হি. অঞ্ঞো ‘পুথুলং চতুরস্সং এত’ন্তি আহ. অপরো ‘কহাপণো এসো’তি আহ. অথ নং আহরিত্ৰা মাতু অদাসি. সা কম্মে উপনেসি.

তত্থ সম্বহুলানং দারকানং অন্তরৰীথিযং কীল়ন্তানং নিসিন্নকালো ৰিয ভৰঙ্গচিত্তপ্পৰত্তি দট্ঠব্বা. কহাপণস্স হত্থে পটিহতকালো ৰিয আরম্মণেন পসাদস্স ঘট্টিতকালো. ‘কিং নু খো এত’ন্তি ৰুত্তকালো ৰিয তং আরম্মণং গহেত্ৰা কিরিযমনোধাতুযা ভৰঙ্গস্স আৰট্টিতকালো. ‘পণ্ডরং এত’ন্তি ৰুত্তকালো ৰিয চক্খুৰিঞ্ঞাণেন দস্সনকিচ্চস্স সাধিতকালো. সহ পংসুনা গাল়্হং গহিতকালো ৰিয ৰিপাকমনোধাতুযা আরম্মণস্স সম্পটিচ্ছিতকালো. ‘পুথুলং চতুরস্সং এত’ন্তি ৰুত্তকালো ৰিয ৰিপাকমনোৰিঞ্ঞাণধাতুযা আরম্মণস্স সন্তীরণকালো. ‘এসো কহাপণো’তি ৰুত্তকালো ৰিয কিরিযমনোৰিঞ্ঞাণধাতুযা আরম্মণস্স ৰৰত্থাপিতকালো. মাতরা কম্মে উপনীতকালো ৰিয জৰনস্স আরম্মণরসানুভৰনং ৰেদিতব্বং.

ইদং ওপম্মং কিং দীপেতি? কিরিযমনোধাতু অদিস্ৰাৰ ভৰঙ্গং আৰট্টেতি, ৰিপাকমনোধাতু অদিস্ৰাৰ সম্পটিচ্ছতি, ৰিপাকমনোৰিঞ্ঞাণধাতু অদিস্ৰাৰ সন্তীরেতি, কিরিযমনোৰিঞ্ঞাণধাতু অদিস্ৰাৰ ৰৰত্থাপেতি, জৰনং অদিস্ৰাৰ আরম্মণরসং অনুভোতি. একন্তেন পন চক্খুৰিঞ্ঞাণমেৰ দস্সনকিচ্চং সাধেতীতি দীপেতি.

‘অম্বো কোলিযকেন চা’তি, ইদং হেট্ঠা ৰুত্তং অম্বোপমঞ্চ উচ্ছুসালাসামিকোপমঞ্চ সন্ধায ৰুত্তং.

‘জচ্চন্ধো পীঠসপ্পী চা’তি, উভোপি কির তে নগরদ্ৰারে সালাযং নিসীদিংসু. তত্থ পীঠসপ্পী আহ – ‘ভো অন্ধক, কস্মা ত্ৰং ইধ সুস্সমানো ৰিচরসি, অসুকো পদেসো সুভিক্খো বহ্ৰন্নপানো, কিং তত্থ গন্ত্ৰা সুখেন জীৰিতুং ন ৰট্টতী’তি? ‘ময্হং তাৰ তযা আচিক্খিতং, তুয্হং পন তত্থ গন্ত্ৰা সুখেন জীৰিতুং কিং ন ৰট্টতী’তি? ‘ময্হং গন্তুং পাদা নত্থী’তি. ‘ময্হম্পি পস্সিতুং চক্খূনি নত্থী’তি. ‘যদি এৰং, তৰ পাদা হোন্তু, মম চক্খূনী’তি উভোপি ‘সাধূ’তি সম্পটিচ্ছিত্ৰা জচ্চন্ধো পীঠসপ্পিং খন্ধং আরোপেসি. সো তস্স খন্ধে নিসীদিত্ৰা ৰামহত্থেনস্স সীসং পরিক্খিপিত্ৰা দক্খিণহত্থেন ‘ইমস্মিং ঠানে মূলং আৰরিত্ৰা ঠিতং, ইমস্মিং পাসাণো, ৰামং মুঞ্চ দক্খিণং গণ্হ, দক্খিণং মুঞ্চ ৰামং গণ্হা’তি মগ্গং নিযমেত্ৰা আচিক্খতি. এৰং জচ্চন্ধস্স পাদা পীঠসপ্পিস্স চক্খূনীতি উভোপি সম্পযোগেন ইচ্ছিতট্ঠানং গন্ত্ৰা সুখেন জীৰিংসু.

তত্থ জচ্চন্ধো ৰিয রূপকাযো, পীঠসপ্পী ৰিয অরূপকাযো. পীঠসপ্পিনা ৰিনা জচ্চন্ধস্স দিসং গন্তুং গমনাভিসঙ্খারস্স অনিব্বত্তিতকালো ৰিয রূপস্স অরূপেন ৰিনা আদানগহণচোপনং পাপেতুং অসমত্থতা. জচ্চন্ধেন ৰিনা পীঠসপ্পিস্স দিসং গন্তুং গমনাভিসঙ্খারস্স অপ্পৰত্তনং ৰিয পঞ্চৰোকারে রূপং, ৰিনা অরূপস্স অপ্পৰত্তি. দ্ৰিন্নম্পি সম্পযোগেন ইচ্ছিতট্ঠানং গন্ত্ৰা সুখেন জীৰিতকালো ৰিয রূপারূপধম্মানং অঞ্ঞমঞ্ঞযোগেন সব্বকিচ্চেসু পৰত্তিসম্ভাৰোতি. অযং পঞ্হো পঞ্চৰোকারভৰৰসেন কথিতো.

‘ৰিসযগ্গাহো’ চাতি, চক্খু রূপৰিসযং গণ্হাতি. সোতাদীনি সদ্দাদিৰিসযে.

‘উপনিস্সযমত্থসো’তি, ‘উপনিস্সযতো’ চ ‘অত্থতো’ চ. তত্থ অসম্ভিন্নত্তা চক্খুস্স, আপাথগতত্তা রূপানং, আলোকসন্নিস্সিতং, মনসিকারহেতুকং চতূহি পচ্চযেহি উপ্পজ্জতি চক্খুৰিঞ্ঞাণং, সদ্ধিং সম্পযুত্তধম্মেহি. তত্থ মতস্সাপি চক্খু সম্ভিন্নং হোতি. জীৰতো নিরুদ্ধম্পি, পিত্তেন ৰা সেম্হেন ৰা রুহিরেন ৰা পলিবুদ্ধম্পি, চক্খুৰিঞ্ঞাণস্স পচ্চযো ভৰিতুং অসক্কোন্তং ‘সম্ভিন্নং’ নাম হোতি. সক্কোন্তং অসম্ভিন্নং নাম. সোতাদীসুপি এসেৰ নযো. চক্খুস্মিং পন অসম্ভিন্নেপি বহিদ্ধা রূপারম্মণে আপাথং অনাগচ্ছন্তে চক্খুৰিঞ্ঞাণং নুপ্পজ্জতি. তস্মিং পন আপাথং আগচ্ছন্তেপি আলোকসন্নিস্সযে অসতি নুপ্পজ্জতি. তস্মিং সন্তেপি কিরিযমনোধাতুযা ভৰঙ্গে অনাৰট্টিতে নুপ্পজ্জতি. আৰট্টিতেযেৰ উপ্পজ্জতি. এৰং উপ্পজ্জমানং সম্পযুত্তধম্মেহি সদ্ধিংযেৰ উপ্পজ্জতি. ইতি ইমে চত্তারো পচ্চযে লভিত্ৰা উপ্পজ্জতি চক্খুৰিঞ্ঞাণং (ম. নি. ১.৩০৬ থোকং ৰিসদিসং).

অসম্ভিন্নত্তা সোতস্স, আপাথগতত্তা সদ্দানং, আকাসসন্নিস্সিতং, মনসিকারহেতুকং চতূহি পচ্চযেহি উপ্পজ্জতি সোতৰিঞ্ঞাণং, সদ্ধিং সম্পযুত্তধম্মেহি. তত্থ ‘আকাসসন্নিস্সিত’ন্তি আকাসসন্নিস্সযং লদ্ধাৰ উপ্পজ্জতি, ন ৰিনা তেন. ন হি পিহিতকণ্ণচ্ছিদ্দস্স সোতৰিঞ্ঞাণং পৰত্ততি. সেসং পুরিমনযেনেৰ ৰেদিতব্বং. যথা চেত্থ এৰং ইতো পরেসুপি. ৰিসেসমত্তং পন ৰক্খাম.

অসম্ভিন্নত্তা ঘানস্স, আপাথগতত্তা গন্ধানং, ৰাযোসন্নিস্সিতং, মনসিকারহেতুকং চতূহি পচ্চযেহি উপ্পজ্জতি ঘানৰিঞ্ঞাণং, সদ্ধিং সম্পযুত্তধম্মেহি. তত্থ ‘ৰাযোসন্নিস্সিত’ন্তি ঘানবিলং ৰাযুম্হি পৰিসন্তেযেৰ উপ্পজ্জতি, তস্মিং অসতি নুপ্পজ্জতীতি অত্থো.

অসম্ভিন্নত্তা জিৰ্হায, আপাথগতত্তা রসানং, আপোসন্নিস্সিতং, মনসিকারহেতুকং চতূহি পচ্চযেহি উপ্পজ্জতি জিৰ্হাৰিঞ্ঞাণং, সদ্ধিং সম্পযুত্তধম্মেহি. তত্থ ‘আপোসন্নিস্সিত’ন্তি জিৰ্হাতেমনং আপং লদ্ধাৰ উপ্পজ্জতি, ন ৰিনা তেন. সুক্খজিৰ্হানঞ্হি সুক্খখাদনীযে জিৰ্হায ঠপিতেপি জিৰ্হাৰিঞ্ঞাণং নুপ্পজ্জতেৰ.

অসম্ভিন্নত্তা কাযস্স, আপাথগতত্তা ফোট্ঠব্বানং, পথৰিসন্নিস্সিতং, মনসিকারহেতুকং চতূহি পচ্চযেহি উপ্পজ্জতি কাযৰিঞ্ঞাণং, সদ্ধিং সম্পযুত্তধম্মেহি. তত্থ ‘পথৰিসন্নিস্সিত’ন্তি কাযপসাদপচ্চযং পথৰিসন্নিস্সযং লদ্ধাৰ উপ্পজ্জতি, ন তেন ৰিনা. কাযদ্ৰারস্মিঞ্হি বহিদ্ধামহাভূতারম্মণং অজ্ঝত্তিকং কাযপসাদং ঘট্টেত্ৰা পসাদপচ্চযেসু মহাভূতেসু পটিহঞ্ঞতি.

অসম্ভিন্নত্তা মনস্স, আপাথগতত্তা ধম্মানং, ৰত্থুসন্নিস্সিতং, মনসিকারহেতুকং চতূহি পচ্চযেহি উপ্পজ্জতি মনোৰিঞ্ঞাণং, সদ্ধিং সম্পযুত্তধম্মেহি. তত্থ ‘মনো’তি ভৰঙ্গচিত্তং. তং নিরুদ্ধম্পি, আৰজ্জনচিত্তস্স পচ্চযো ভৰিতুং অসমত্থং মন্দথামগতমেৰ পৰত্তমানম্পি, সম্ভিন্নং নাম হোতি. আৰজ্জনস্স পন পচ্চযো ভৰিতুং সমত্থং অসম্ভিন্নং নাম. ‘আপাথগতত্তা ধম্মান’ন্তি ধম্মারম্মণে আপাথগতে. ‘ৰত্থুসন্নিস্সিত’ন্তি হদযৰত্থুসন্নিস্সযং লদ্ধাৰ উপ্পজ্জতি, ন তেন ৰিনা. অযম্পি পঞ্হো পঞ্চৰোকারভৰং সন্ধায কথিতো. ‘মনসিকারহেতুক’ন্তি কিরিযমনোৰিঞ্ঞাণধাতুযা ভৰঙ্গে আৰট্টিতেযেৰ উপ্পজ্জতীতি অত্থো. অযং তাৰ ‘উপনিস্সযমত্থসো’তি এত্থ উপনিস্সযৰণ্ণনা.

‘অত্থতো’ পন চক্খু দস্সনত্থং, সোতং সৰনত্থং, ঘানং ঘাযনত্থং, জিৰ্হা সাযনত্থা, কাযো ফুসনত্থো, মনো ৰিজাননত্থো. তত্থ দস্সনং অত্থো অস্স. তঞ্হি তেন নিপ্ফাদেতব্বন্তি দস্সনত্থং. সেসেসুপি এসেৰ নযো. এত্তাৰতা তিপিটকচূল়নাগত্থেরৰাদে সোল়সকমগ্গো নিট্ঠিতো, সদ্ধিং দ্ৰাদসকমগ্গেন চেৰ অহেতুকট্ঠকেন চাতি.

ইদানি মোরৰাপীৰাসীমহাদত্তত্থেরৰাদে দ্ৰাদসকমগ্গকথা হোতি. তত্থ সাকেতপঞ্হউস্সদকিত্তনহেতুকিত্তনানি পাকতিকানেৰ. অযং পন থেরো অসঙ্খারিকসসঙ্খারিকেসু দোসং দিস্ৰা ‘অসঙ্খারিকং অসঙ্খারিকমেৰ ৰিপাকং দেতি, নো সসঙ্খারিকং; সসঙ্খারিকম্পি সসঙ্খারিকমেৰ নো অসঙ্খারিক’ন্তি আহ. জৰনেন চেস চিত্তনিযামং ন কথেতি. আরম্মণেন পন ৰেদনানিযামং কথেতি. তেনস্স ৰিপাকুদ্ধারে দ্ৰাদসকমগ্গো নাম জাতো. দসকমগ্গোপি, অহেতুকট্ঠকম্পি এত্থেৰ পৰিট্ঠং.

তত্রাযং নযো – সোমনস্সসহগততিহেতুকঅসঙ্খারিকচিত্তেন হি কম্মে আযূহিতে তাদিসেনেৰ ৰিপাকচিত্তেন গহিতপটিসন্ধিকস্স ৰুড্ঢিপ্পত্তস্স চক্খুদ্ৰারে ‘ইট্ঠারম্মণে’ আপাথগতে হেট্ঠা ৰুত্তনযেনেৰ তযো মোঘৰারা হোন্তি. তস্স কুসলতো চত্তারি সোমনস্সসহগতানি, অকুসলতো চত্তারি, কিরিযতো পঞ্চাতি ইমেসং তেরসন্নং চিত্তানং অঞ্ঞতরেন জৰিতপরিযোসানে তদারম্মণং পতিট্ঠহমানং সোমনস্সসহগতঅসঙ্খারিকতিহেতুকচিত্তম্পি দুহেতুকচিত্তম্পি পতিট্ঠাতি. এৰমস্স চক্খুদ্ৰারে চক্খুৰিঞ্ঞাণাদীনি তীণি, তদারম্মণানি দ্ৰেতি, পঞ্চ গণনূপগচিত্তানি হোন্তি.

আরম্মণেন পন ৰেদনং পরিৰত্তেত্ৰা কুসলতো চতুন্নং, অকুসলতো চতুন্নং, কিরিযতো চতুন্নন্তি, দ্ৰাদসন্নং উপেক্খাসহগতচিত্তানং অঞ্ঞতরেন জৰিতাৰসানে উপেক্খাসহগততিহেতুকঅসঙ্খারিকৰিপাকম্পি দুহেতুকঅসঙ্খারিকৰিপাকম্পি তদারম্মণং হুত্ৰা উপ্পজ্জতি. এৰমস্স চক্খুদ্ৰারে উপেক্খাসহগতসন্তীরণং, ইমানি দ্ৰে তদারম্মণানীতি, তীণি গণনূপগচিত্তানি হোন্তি. তানি পুরিমেহি পঞ্চহি সদ্ধিং অট্ঠ. সোতদ্ৰারাদীসুপি অট্ঠ অট্ঠাতি একায চেতনায কম্মে আযূহিতে সমচত্তালীস চিত্তানি উপ্পজ্জন্তি. অগ্গহিতগ্গহণেন পন চক্খুদ্ৰারে অট্ঠ, সোতৰিঞ্ঞাণাদীনি চত্তারীতি, দ্ৰাদস হোন্তি. তত্থ ‘মূলভৰঙ্গতা’‘আগন্তুকভৰঙ্গতা’‘অম্বোপমনিযামকথা’ চ ৰুত্তনযেনেৰ ৰেদিতব্বা.

সোমনস্সসহগততিহেতুকসসঙ্খারিককুসলচিত্তেন কম্মে আযূহিতেপি উপেক্খাসহগততিহেতুকঅসঙ্খারিকসসঙ্খারিকেহি কম্মে আযূহিতেপি এসেৰ নযো. তত্থ যন্তোপমাপি এত্থ পাকতিকা এৰ. এত্তাৰতা তিহেতুককম্মেন তিহেতুকপটিসন্ধি হোতীতি ৰারো কথিতো. তিহেতুককম্মেন দুহেতুকপটিসন্ধি হোতীতি ৰারো পন পটিচ্ছন্নো হুত্ৰা গতো.

ইদানি দুহেতুককম্মেন দুহেতুকপটিসন্ধিকথা হোতি. সোমনস্সসহগতদুহেতুকঅসঙ্খারিকচিত্তেন হি কম্মে আযূহিতে তাদিসেনেৰ ৰিপাকচিত্তেন গহিতপটিসন্ধিকস্স ৰুড্ঢিপ্পত্তস্স চক্খুদ্ৰারে ইট্ঠারম্মণে আপাথগতে হেট্ঠা ৰুত্তনযেনেৰ তযো মোঘৰারা হোন্তি. দুহেতুকস্স পন জৰনকিরিযা নত্থি. তস্মা কুসলতো চত্তারি সোমনস্সসহগতানি, অকুসলতো চত্তারীতি ইমেসং অট্ঠন্নং অঞ্ঞতরেন জৰিতপরিযোসানে দুহেতুকমেৰ সোমনস্সসহগতঅসঙ্খারিকং তদারম্মণং হোতি. এৰমস্স চক্খুৰিঞ্ঞাণাদীনি তীণি, ইদঞ্চ তদারম্মণন্তি, চত্তারি গণনূপগচিত্তানি হোন্তি. ‘ইট্ঠমজ্ঝত্তারম্মণে’ পন কুসলতো উপেক্খাসহগতানং চতুন্নং, অকুসলতো চতুন্নন্তি, অট্ঠন্নং অঞ্ঞতরেন জৰিতপরিযোসানে দুহেতুকমেৰ উপেক্খাসহগতং অসঙ্খারিকং তদারম্মণং হোতি. এৰমস্স উপেক্খাসহগতসন্তীরণং, ইদঞ্চ তদারম্মণন্তি, দ্ৰে গণনূপগচিত্তানি হোন্তি. তানি পুরিমেহি চতূহি সদ্ধিং ছ. সোতদ্ৰারাদীসুপি ছ ছাতি একায চেতনায কম্মে আযূহিতে সমতিংস চিত্তানি উপ্পজ্জন্তি. অগ্গহিতগ্গহণেন পন চক্খুদ্ৰারে ছ, সোতৰিঞ্ঞাণাদীনি চত্তারীতি দস হোন্তি. অম্বোপমনিযামকথা পাকতিকা এৰ. যন্তোপমা ইধ ন লব্ভতীতি ৰুত্তং.

সোমনস্সসহগতদুহেতুকসসঙ্খারিককুসলচিত্তেন কম্মে আযূহিতেপি উপেক্খাসহগতদুহেতুকঅসঙ্খারিকসসঙ্খারিকেহি কম্মে আযূহিতেপি এসেৰ নযো. এত্তাৰতা দুহেতুককম্মেন দুহেতুকপটিসন্ধি হোতীতি ৰারো কথিতো.

অহেতুকপটিসন্ধি হোতীতি ৰারো পন এৰং ৰেদিতব্বো – কুসলতো চতূহি ঞাণৰিপ্পযুত্তেহি কম্মে আযূহিতে, কুসলৰিপাকাহেতুকমনোৰিঞ্ঞাণধাতুযা উপেক্খাসহগতায পটিসন্ধিযা গহিতায, কম্মসদিসা পটিসন্ধীতি ন ৰত্তব্বা. ইতো পট্ঠায হেট্ঠা ৰুত্তনযেনেৰ কথেত্ৰা ইট্ঠেপি ইট্ঠমজ্ঝত্তেপি চিত্তপ্পৰত্তি ৰেদিতব্বা. ইমস্স হি থেরস্স ৰাদে পিণ্ডজৰনং জৰতি. সেসা ইদং পন জৰনং কুসলত্থায ৰা অকুসলত্থায ৰা কো নিযামেতীতিআদিকথা সব্বা হেট্ঠা ৰুত্তনযেনেৰ ৰেদিতব্বাতি. এত্তাৰতা মোরৰাপীৰাসীমহাদত্তত্থেরৰাদে দ্ৰাদসকমগ্গো নিট্ঠিতো সদ্ধিং দসকমগ্গেন চেৰ অহেতুকট্ঠকেন চ.

ইদানি মহাধম্মরক্খিতত্থেরৰাদে দসকমগ্গকথা হোতি. তত্থ সাকেতপঞ্হউস্সদকিত্তনানি পাকতিকানেৰ. হেতুকিত্তনে পন অযং ৰিসেসো. তিহেতুককম্মং তিহেতুকৰিপাকম্পি দুহেতুকৰিপাকম্পি অহেতুকৰিপাকম্পি দেতি. দুহেতুককম্মং তিহেতুকমেৰ ন দেতি, ইতরং দেতি. তিহেতুককম্মেন পটিসন্ধি তিহেতুকাৰ হোতি; দুহেতুকাহেতুকা ন হোতি. দুহেতুককম্মেন দুহেতুকাহেতুকা হোতি, তিহেতুকা ন হোতি. অসঙ্খারিককম্মং ৰিপাকং অসঙ্খারিকমেৰ দেতি, নো সসঙ্খারিকং. সসঙ্খারিকম্পি সসঙ্খারিকমেৰ দেতি, নো অসঙ্খারিকং. আরম্মণেন ৰেদনা পরিৰত্তেতব্বা. জৰনং পিণ্ডজৰনমেৰ জৰতি. আদিতো পট্ঠায চিত্তানি কথেতব্বানি.

তত্রাযং কথা – একো পঠমকুসলচিত্তেন কম্মং আযূহতি, পঠমৰিপাকচিত্তেনেৰ পটিসন্ধিং গণ্হাতি. অযং কম্মসদিসা পটিসন্ধি. তস্স ৰুড্ঢিপ্পত্তস্স চক্খুদ্ৰারে ‘ইট্ঠারম্মণে’ আপাথগতে ৰুত্তনযেনেৰ তযো মোঘৰারা হোন্তি. অথস্স হেট্ঠা ৰুত্তানং তেরসন্নং সোমনস্সসহগতজৰনানং অঞ্ঞতরেন জৰিতপরিযোসানে পঠমৰিপাকচিত্তমেৰ তদারম্মণং হোতি. তং ‘মূলভৰঙ্গং’ ‘তদারম্মণ’ন্তি দ্ৰে নামানি লভতি. এৰমস্স চক্খুৰিঞ্ঞাণাদীনি তীণি, ইদঞ্চ তদারম্মণন্তি, চত্তারি গণনূপগচিত্তানি হোন্তি. ‘ইট্ঠমজ্ঝত্তারম্মণে’ হেট্ঠা ৰুত্তানংযেৰ দ্ৰাদসন্নং উপেক্খাসহগতজৰনানং অঞ্ঞতরেন জৰিতপরিযোসানে উপেক্খাসহগতং তিহেতুকং অসঙ্খারিকচিত্তং তদারম্মণতায পৰত্ততি. তং ‘আগন্তুকভৰঙ্গং’‘তদারম্মণ’ন্তি দ্ৰে নামানি লভতি. এৰমস্স উপেক্খাসহগতসন্তীরণং ইদঞ্চ তদারম্মণন্তি দ্ৰে গণনূপগচিত্তানি. তানি পুরিমেহি চতূহি সদ্ধিং ছ হোন্তি. এৰং একায চেতনায কম্মে আযূহিতে পঞ্চসু দ্ৰারেসু সমতিংস চিত্তানি উপ্পজ্জন্তি. অগ্গহিতগ্গহণেন পন চক্খুদ্ৰারে ছ, সোতৰিঞ্ঞাণাদীনি চত্তারীতি দস হোন্তি. অম্বোপমনিযামকথা পাকতিকাযেৰ.

দুতিযততিযচতুত্থকুসলচিত্তেহি কম্মে আযূহিতেপি এত্তকানেৰ ৰিপাকচিত্তানি হোন্তি. চতূহি উপেক্খাসহগতচিত্তেহি আযূহিতেপি এসেৰ নযো. ইধ পন পঠমং ইট্ঠমজ্ঝত্তারম্মণং দস্সেতব্বং. পচ্ছা ইট্ঠারম্মণেন ৰেদনা পরিৰত্তেতব্বা. অম্বোপমনিযামকথা পাকতিকা এৰ. যন্তোপমা ন লব্ভতি. ‘কুসলতো পন চতুন্নং ঞাণৰিপ্পযুত্তানং অঞ্ঞতরেন কম্মে আযূহিতে’তি ইতো পট্ঠায সব্বং ৰিত্থারেত্ৰা অহেতুকট্ঠকং কথেতব্বং. এত্তাৰতা মহাধম্মরক্খিতত্থেরৰাদে দসকমগ্গো নিট্ঠিতো হোতি, সদ্ধিং অহেতুকট্ঠকেনাতি.

ইমেসং পন তিণ্ণং থেরানং কতরস্স ৰাদো গহেতব্বোতি? ন কস্সচি একংসেন. সব্বেসং পন ৰাদেসু যুত্তং গহেতব্বং. পঠমৰাদস্মিঞ্হি সসঙ্খারাসঙ্খারৰিধানং পচ্চযভেদতো অধিপ্পেতং. তেনেত্থ, অসঙ্খারিককুসলস্স দুব্বলপচ্চযেহি উপ্পন্নং সসঙ্খারিকৰিপাকং, সসঙ্খারিককুসলস্স বলৰপচ্চযেহি উপ্পন্নং অসঙ্খারিকৰিপাকঞ্চ গহেত্ৰা, লব্ভমানানিপি কিরিযজৰনানি পহায, কুসলজৰনেন তদারম্মণং আরম্মণেন চ ৰেদনং নিযামেত্ৰা, সেক্খপুথুজ্জনৰসেন সোল়সকমগ্গো কথিতো. যং পনেত্থ অকুসলজৰনাৰসানে অহেতুকৰিপাকমেৰ তদারম্মণং দস্সিতং, তং ইতরেসু ন দস্সিতমেৰ. তস্মা তং তত্থ তেসু ৰুত্তং সহেতুকৰিপাকঞ্চ, এত্থাপি সব্বমিদং লব্ভতেৰ. তত্রাযং নযো – যদা হি কুসলজৰনানং অন্তরন্তরা অকুসলং জৰতি, তদা কুসলাৰসানে আচিণ্ণসদিসমেৰ, অকুসলাৰসানে সহেতুকং তদারম্মণং যুত্তং. যদা নিরন্তরং অকুসলমেৰ তদা অহেতুকং. এৰং তাৰ পঠমৰাদে যুত্তং গহেতব্বং.

দুতিযৰাদে পন কুসলতো সসঙ্খারাসঙ্খারৰিধানং অধিপ্পেতং. তেনেত্থ অসঙ্খারিককুসলস্স অসঙ্খারিকমেৰ ৰিপাকং, সসঙ্খারিককুসলস্স চ সসঙ্খারিকমেৰ গহেত্ৰা, জৰনেন তদারম্মণনিযামং অকত্ৰা, সব্বেসম্পি সেক্খাসেক্খপুথুজ্জনানং উপ্পত্তিরহো পিণ্ডজৰনৰসেনেৰ দ্ৰাদসকমগ্গো কথিতো. তিহেতুকজৰনাৰসানে পনেত্থ তিহেতুকং তদারম্মণং যুত্তং. দুহেতুকজৰনাৰসানে দুহেতুকং, অহেতুকজৰনাৰসানে অহেতুকং ভাজেত্ৰা পন ন ৰুত্তং. এৰং দুতিযৰাদে যুত্তং গহেতব্বং.

ততিযৰাদেপি কুসলতোৰ অসঙ্খারসসঙ্খারৰিধানং অধিপ্পেতং. ‘তিহেতুককম্মং তিহেতুকৰিপাকম্পি দুহেতুকৰিপাকম্পি অহেতুকৰিপাকম্পি দেতী’তি পন ৰচনতো অসঙ্খারিকতিহেতুকপটিসন্ধিকস্স অসঙ্খারিকদুহেতুকেনপি তদারম্মণেন ভৰিতব্বং. তং অদস্সেত্ৰা হেতুসদিসমেৰ তদারম্মণং দস্সিতং. তং পুরিমায হেতুকিত্তনলদ্ধিযা ন যুজ্জতি. কেৰলং দসকমগ্গৰিভাৰনত্থমেৰ ৰুত্তং. ইতরম্পি পন লব্ভতেৰ. এৰং ততিযৰাদেপি যুত্তং গহেতব্বং. অযঞ্চ সব্বাপি পটিসন্ধিজনকস্সেৰ কম্মস্স ৰিপাকং সন্ধায তদারম্মণকথা. ‘সহেতুকং ভৰঙ্গং অহেতুকস্স ভৰঙ্গস্স অনন্তরপচ্চযেন পচ্চযো’তি (পট্ঠা. ৩.১.১০২) ৰচনতো পন নানাকম্মেন অহেতুকপটিসন্ধিকস্সাপি সহেতুকৰিপাকং তদারম্মণং উপ্পজ্জতি. তস্স উপ্পত্তিৰিধানং মহাপকরণে আৰি ভৰিস্সতীতি.

কামাৰচরকুসলৰিপাককথা নিট্ঠিতা.

রূপাৰচরারূপাৰচরৰিপাককথা

৪৯৯. ইদানি রূপাৰচরাদিৰিপাকং দস্সেতুং পুন কতমে ধম্মা অব্যাকতাতিআদি আরদ্ধং. তত্থ যস্মা কামাৰচরৰিপাকং অত্তনো কুসলেন সদিসম্পি হোতি, অসদিসম্পি, তস্মা ন তং কুসলানুগতিকং কত্ৰা ভাজিতং. রূপাৰচরারূপাৰচরৰিপাকং পন যথা হত্থিঅস্সপব্বতাদীনং ছাযা হত্থিআদিসদিসাৰ হোন্তি, তথা অত্তনো কুসলসদিসমেৰ হোতীতি কুসলানুগতিকং কত্ৰা ভাজিতং. কামাৰচরকম্মঞ্চ যদা কদাচি ৰিপাকং দেতি, রূপাৰচরারূপাৰচরং পন অনন্তরাযেন, দুতিযস্মিংযেৰ অত্তভাৰে, ৰিপাকং দেতীতিপি কুসলানুগতিকমেৰ কত্ৰা ভাজিতং. সেসং কুসলে ৰুত্তনযেনেৰ ৰেদিতব্বং. অযং পন ৰিসেসো – পটিপদাদিভেদো চ হীনপণীতমজ্ঝিমভাৰো চ এতেসু ঝানাগমনতো ৰেদিতব্বো. ছন্দাদীনং পন অঞ্ঞতরং ধুরং কত্ৰা অনুপ্পাদনীযত্তা নিরধিপতিকানেৰ এতানীতি.

রূপাৰচরারূপাৰচরৰিপাককথা নিট্ঠিতা.

লোকুত্তরৰিপাককথা

৫০৫. লোকুত্তরৰিপাকম্পি কুসলসদিসত্তা কুসলানুগতিকমেৰ কত্ৰা ভাজিতং. যস্মা পন তেভূমককুসলং চুতিপটিসন্ধিৰসেন ৰট্টং আচিনাতি ৰড্ঢেতি, তস্মা তত্থ কতত্তা উপচিতত্তাতি ৰুত্তং. লোকুত্তরং পন তেন আচিতম্পি অপচিনাতি, সযম্পি চুতিপটিসন্ধিৰসেন ন আচিনাতি, তেনেত্থ ‘কতত্তা উপচিতত্তা’তি অৰত্ৰা কতত্তা ভাৰিতত্তাতি ৰুত্তং.

সুঞ্ঞতন্তিআদীসু ‘মগ্গো’ তাৰ ‘আগমনতো সগুণতো আরম্মণতোতি তীহি কারণেহি নামং লভতী’তি, ইদং হেট্ঠা কুসলাধিকারে ৰিত্থারিতং. তত্থ সুত্তন্তিকপরিযাযেন সগুণতোপি আরম্মণতোপি নামং লভতি. পরিযাযদেসনা হেসা. অভিধম্মকথা পন নিপ্পরিযাযদেসনা. তস্মা ইধ সগুণতো ৰা আরম্মণতো ৰা নামং ন লভতি, আগমনতোৰ লভতি. আগমনমেৰ হি ধুরং. তং দুৰিধং হোতি – ৰিপস্সনাগমনং মগ্গাগমনন্তি.

তত্থ মগ্গস্স আগতট্ঠানে ৰিপস্সনাগমনং ধুরং, ফলস্স আগতট্ঠানে মগ্গাগমনং ধুরন্তি, ইদম্পি হেট্ঠা ৰুত্তমেৰ. তেসু ইদং ফলস্স আগতট্ঠানং, তস্মা ইধ মগ্গাগমনং ধুরন্তি ৰেদিতব্বং. সো পনেস মগ্গো আগমনতো ‘সুঞ্ঞত’ন্তি নামং লভিত্ৰা সগুণতো চ আরম্মণতো চ ‘অনিমিত্তো’‘অপ্পণিহিতো’তিপি ৰুচ্চতি. তস্মা সযং আগমনীযট্ঠানে ঠত্ৰা অত্তনো ফলস্স তীণি নামানি দেতি. কথং? অযঞ্হি সুদ্ধাগমনৰসেনেৰ লদ্ধনামো ‘সুঞ্ঞতমগ্গো’ সযং আগমনীযট্ঠানে ঠত্ৰা অত্তনো ফলস্স নামং দদমানো ‘সুঞ্ঞত’ন্তি নামং অকাসি. ‘সুঞ্ঞতঅনিমিত্তমগ্গো’ সযং আগমনীযট্ঠানে ঠত্ৰা অত্তনো ফলস্স নামং দদমানো ‘অনিমিত্ত’ন্তি নামং অকাসি. ‘সুঞ্ঞতঅপ্পণিহিতমগ্গো’ সযং আগমনীযট্ঠানে ঠত্ৰা অত্তনো ফলস্স নামং দদমানো ‘অপ্পণিহিত’ন্তি নামং অকাসি. ইমানি পন তীণি নামানি মগ্গানন্তরে ফলচিত্তস্মিংযেৰ ইমিনা নযেন লব্ভন্তি, নো অপরভাগে ৰল়ঞ্জনকফলসমাপত্তিযা. অপরভাগে পন অনিচ্চতাদীহি তীহি ৰিপস্সনাহি ৰিপস্সিতুং সক্কোতি. অথস্স ৰুট্ঠিতৰুট্ঠিতৰিপস্সনাৰসেন অনিমিত্তঅপ্পণিহিতসুঞ্ঞতসঙ্খাতানি তীণি ফলানি উপ্পজ্জন্তি. তেসং তানেৰ সঙ্খারারম্মণানি. অনিচ্চানুপস্সনাদীনি ঞাণানি অনুলোমঞাণানি নাম হোন্তি.

যো চাযং সুঞ্ঞতমগ্গে ৰুত্তো. অপ্পণিহিতমগ্গেপি এসেৰ নযো. অযম্পি হি সুদ্ধাগমনৰসেন লদ্ধনামো ‘অপ্পণিহিতমগ্গো’ সযং আগমনীযট্ঠানে ঠত্ৰা অত্তনো ফলস্স নামং দদমানো ‘অপ্পণিহিত’ন্তি নামং অকাসি. ‘অপ্পণিহিতঅনিমিত্তমগ্গো’ সযং আগমনীযট্ঠানে ঠত্ৰা অত্তনো ফলস্স নামং দদমানো ‘অনিমিত্ত’ন্তি নামং অকাসি. ‘অপ্পণিহিতসুঞ্ঞতমগ্গো’ সযং আগমনীযট্ঠানে ঠত্ৰা অত্তনো ফলস্স নামং দদমানো ‘সুঞ্ঞত’ন্তি নামং অকাসি. ইমানিপি তীণি নামানি মগ্গানন্তরে ফলচিত্তস্মিংযেৰ ইমিনা নযেন লব্ভন্তি, ন অপরভাগে ৰল়ঞ্জনকফলসমাপত্তিযাতি. এৰং ইমস্মিং ৰিপাকনিদ্দেসে কুসলচিত্তেহি তিগুণানি ৰিপাকচিত্তানি ৰেদিতব্বানি.

যথা পন তেভূমককুসলানি অত্তনো ৰিপাকং অধিপতিং লভাপেতুং ন সক্কোন্তি, ন এৰং লোকুত্তরকুসলানি. কস্মা? তেভূমককুসলানঞ্হি অঞ্ঞো আযূহনকালো অঞ্ঞো ৰিপচ্চনকালো. তেন তানি অত্তনো ৰিপাকং অধিপতিং লভাপেতুং ন সক্কোন্তি. লোকুত্তরানি পন তায সদ্ধায, তস্মিং ৰীরিযে, তায সতিযা, তস্মিং সমাধিম্হি, তায পঞ্ঞায অৰূপসন্তায, অপণ্ণকং অৰিরদ্ধং মগ্গানন্তরমেৰ ৰিপাকং পটিলভন্তি, তেন অত্তনো ৰিপাকং অধিপতিং লভাপেতুং সক্কোন্তি.

যথা হি পরিত্তকস্স অগ্গিনো গতট্ঠানে অগ্গিস্মিং নিব্বুতমত্তেযেৰ উণ্হাকারো নিব্বাযিত্ৰা কিঞ্চি ন হোতি, মহন্তং পন আদিত্তং অগ্গিক্খন্ধং নিব্বাপেত্ৰা গোমযপরিভণ্ডে কতেপি উণ্হাকারো অৰূপসন্তোৰ হোতি, এৰমেৰ তেভূমককুসলে অঞ্ঞো কম্মক্খণো অঞ্ঞো ৰিপাকক্খণো পরিত্তঅগ্গিট্ঠানে উণ্হভাৰনিব্বুতকালো ৰিয হোতি. তস্মা তং অত্তনো ৰিপাকং অধিপতিং লভাপেতুং ন সক্কোতি. লোকুত্তরে পন তায সদ্ধায…পে… তায পঞ্ঞায অৰূপসন্তায, মগ্গানন্তরমেৰ ফলং উপ্পজ্জতি, তস্মা তং অত্তনো ৰিপাকং অধিপতিং লভাপেতীতি ৰেদিতব্বং. তেনাহু পোরাণা – ‘ৰিপাকে অধিপতি নত্থি ঠপেত্ৰা লোকুত্তর’ন্তি.

৫৫৫. চতুত্থফলনিদ্দেসে অঞ্ঞাতাৰিন্দ্রিযন্তি অঞ্ঞাতাৰিনো চতূসু সচ্চেসু নিট্ঠিতঞাণকিচ্চস্স ইন্দ্রিযং, অঞ্ঞাতাৰীনং ৰা চতূসু সচ্চেসু নিট্ঠিতকিচ্চানং চত্তারি সচ্চানি ঞত্ৰা পটিৰিজ্ঝিত্ৰা ঠিতানং ধম্মানং অব্ভন্তরে ইন্দট্ঠসাধনেন ইন্দ্রিযং. নিদ্দেসৰারেপিস্স অঞ্ঞাতাৰীনন্তি আজানিত্ৰা ঠিতানং. ধম্মানন্তি সম্পযুত্তধম্মানং অব্ভন্তরে. অঞ্ঞাতি আজাননা, পঞ্ঞা পজাননাতিআদীনি ৰুত্তত্থানেৰ. মগ্গঙ্গং মগ্গপরিযাপন্নন্তি ফলমগ্গস্স অঙ্গং, ফলমগ্গে চ পরিযাপন্নন্তি অত্থো.

অপিচেত্থ ইদং পকিণ্ণকং – একং ইন্দ্রিযং একং ঠানং গচ্ছতি, একং ছ ঠানানি গচ্ছতি, একং একং ঠানং গচ্ছতি. একঞ্হি ‘অনঞ্ঞাতঞ্ঞস্সামীতিন্দ্রিযং’ একং ঠানং গচ্ছতি সোতাপত্তিমগ্গং. একং ‘অঞ্ঞিন্দ্রিযং’ হেট্ঠা তীণি ফলানি, উপরি তযো মগ্গেতি ছ ঠানানি গচ্ছতি. একং ‘অঞ্ঞাতাৰিন্দ্রিযং’ একং ঠানং গচ্ছতি অরহত্তফলং. সব্বেসুপি মগ্গফলেসু অত্থতো অট্ঠ অট্ঠ ইন্দ্রিযানীতি চতুসট্ঠি লোকুত্তরিন্দ্রিযানি কথিতানি. পাল়িতো পন নৰ নৰ কত্ৰা দ্ৰাসত্ততি হোন্তি. মগ্গে মগ্গঙ্গন্তি ৰুত্তং. ফলেপি মগ্গঙ্গং. মগ্গে বোজ্ঝঙ্গোতি ৰুত্তো ফলেপি বোজ্ঝঙ্গো. মগ্গক্খণে আরতি ৰিরতীতি ৰুত্তা ফলক্খণেপি আরতি ৰিরতীতি. তত্থ মগ্গো মগ্গভাৰেনেৰ মগ্গো, ফলং পন মগ্গং উপাদায মগ্গো নাম; ফলঙ্গং ফলপরিযাপন্নন্তি ৰত্তুম্পি ৰট্টতি. মগ্গে বুজ্ঝনকস্স অঙ্গোতি সম্বোজ্ঝঙ্গো, ফলে বুদ্ধস্স অঙ্গোতি সম্বোজ্ঝঙ্গো. মগ্গে আরমণৰিরমণৰসেনেৰ আরতি ৰিরতি. ফলে পন আরতিৰিরতিৰসেনাতি.

লোকুত্তরৰিপাককথা নিট্ঠিতা.

অকুসলৰিপাককথা

৫৫৬. ইতো পরানি অকুসলৰিপাকানি – পঞ্চ চক্খুসোতঘানজিৰ্হাকাযৰিঞ্ঞাণানি, একা মনোধাতু, একা মনোৰিঞ্ঞাণধাতূতি ইমানি সত্ত চিত্তানি – পাল়িতো চ অত্থতো চ হেট্ঠা ৰুত্তেহি তাদিসেহেৰ কুসলৰিপাকচিত্তেহি সদিসানি.

কেৰলঞ্হি তানি কুসলকম্মপচ্চযানি ইমানি অকুসলকম্মপচ্চযানি. তানি চ ইট্ঠইট্ঠমজ্ঝত্তেসু আরম্মণেসু ৰত্তন্তি, ইমানি অনিট্ঠঅনিট্ঠমজ্ঝত্তেসু. তত্থ চ সুখসহগতং কাযৰিঞ্ঞাণং, ইধ দুক্খসহগতং. তত্থ চ উপেক্খাসহগতা মনোৰিঞ্ঞাণধাতু মনুস্সেসু জচ্চন্ধাদীনং পটিসন্ধিং আদিং কত্ৰা পঞ্চসু ঠানেসু ৰিপচ্চতি. ইধ পন একাদসৰিধেনাপি অকুসলচিত্তেন কম্মে আযূহিতে কম্মকম্মনিমিত্তগতিনিমিত্তেসু অঞ্ঞতরং আরম্মণং কত্ৰা চতূসু অপাযেসু পটিসন্ধি হুত্ৰা ৰিপচ্চতি; দুতিযৰারতো পট্ঠায যাৰতাযুকং ভৰঙ্গং হুত্ৰা, অনিট্ঠঅনিট্ঠমজ্ঝত্তারম্মণায পঞ্চৰিঞ্ঞাণৰীথিযা সন্তীরণং হুত্ৰা, বলৰারম্মণে ছসু দ্ৰারেসু তদারম্মণং হুত্ৰা, মরণকালে চুতি হুত্ৰাতি, এৰং পঞ্চসু এৰ ঠানেসু ৰিপচ্চতীতি.

অকুসলৰিপাককথা নিট্ঠিতা.