১০. আনিসংসৰগ্গো

১-২. পাতুভাৰসুত্তাদিৰণ্ণনা

৯৬-৯৭. দসমস্স পঠমে অরিযাযতনেতি মজ্ঝিমদেসে. ইন্দ্রিযানন্তি মনচ্ছট্ঠানং. দুতিযে সদ্ধম্মনিযতোতি সাসনসদ্ধম্মে নিযতো. অসাধারণেনাতি পুথুজ্জনেহি অসাধারণেন.

৭. অনৰত্থিতসুত্তৰণ্ণনা

১০২. সত্তমে অনোধিং করিত্ৰাতি ‘‘এত্তকাৰ সঙ্খারা অনিচ্চা, ন ইতো পরে’’তি এৰং সীমং মরিযাদং অকত্ৰা. অনৰত্থিতাতি অৰত্থিতায রহিতা, ভিজ্জমানাৰ হুত্ৰা উপট্ঠহিস্সন্তীতি অত্থো. সব্বলোকেতি সকলে তেধাতুকে. সামঞ্ঞেনাতি সমণভাৰেন, অরিযমগ্গেনাতি অত্থো.

৮. উক্খিত্তাসিকসুত্তৰণ্ণনা

১০৩. অট্ঠমে মেত্তাৰতাযাতি মেত্তাযুত্তায পারিচরিযায. সত্ত হি সেখা তথাগতং মেত্তাৰতায পরিচরন্তি, খীণাসৰো পরিচিণ্ণসত্থুকো.

৯. অতম্মযসুত্তৰণ্ণনা

১০৪. নৰমে অতম্মযোতি তম্মযা ৰুচ্চন্তি তণ্হাদিট্ঠিযো, তাহি রহিতো. অহংকারাতি অহংকারদিট্ঠি. মমংকারাতি মমংকারতণ্হা. সেসং সব্বত্থ উত্তানমেৰাতি.

আনিসংসৰগ্গো দসমো.