৫. পঞ্চমপণ্ণাসকং

(২১) ১. সপ্পুরিসৰগ্গো

১-৬. সিক্খাপদসুত্তৰণ্ণনা

২০১. পঞ্চমস্স পঠমে অসপ্পুরিসন্তি লামকপুরিসং তুচ্ছপুরিসং মূল়্হপুরিসং অৰিজ্জায অন্ধীকতং বালং. অসপ্পুরিসতরন্তি অতিরেকেন অসপ্পুরিসং. ইতরে দ্ৰে ৰুত্তপটিপক্খৰসেন ৰেদিতব্বা. সেসমেত্থ উত্তানত্থমেৰ. যথা চেত্থ, এৰং ইতো পরেসু পঞ্চসু. এতেসু হি পঠমং পঞ্চৰেরৰসেন দেসিতং, দুতিযং অস্সদ্ধম্মৰসেন, ততিযং কাযৰচীদ্ৰারৰসেন, চতুত্থং মনোদ্ৰারৰসেন, পঞ্চমং অট্ঠমিচ্ছত্তৰসেন, ছট্ঠং দসমিচ্ছত্তৰসেন.

৭-১০. পাপধম্মসুত্তচতুক্কৰণ্ণনা

২০৭-২১০. সত্তমে পাপন্তি লামকং সংকিলিট্ঠপুগ্গলং. কল্যাণন্তি ভদ্দকং অনৰজ্জপুগ্গলং. সেসমেত্থ উত্তানত্থমেৰ. অট্ঠমেপি এসেৰ নযো. নৰমে পাপধম্মন্তি লামকধম্মং. কল্যাণধম্মন্তি অনৰজ্জধম্মং. সেসমেত্থ উত্তানত্থমেৰ. দসমেপি এসেৰ নযো. ইমস্মিং ৰগ্গে দসসুপি সুত্তেসু অগারিযপ্পটিপদা কথিতা. সচেপি সোতাপন্নসকদাগামিনো হোন্তি, ৰট্টতিযেৰাতি.

সপ্পুরিসৰগ্গো পঠমো.

(২২) ২. পরিসাৰগ্গো

১. পরিসাসুত্তৰণ্ণনা

২১১. দুতিযস্স পঠমে পরিসং দূসেন্তীতি পরিসদূসনা. পরিসং সোভেন্তীতি পরিসসোভনা.

২. দিট্ঠিসুত্তৰণ্ণনা

২১২. দুতিযে মনোদুচ্চরিতে পরিযাপন্নাপি মিচ্ছাদিট্ঠি মহাসাৰজ্জতায ৰিসুং ৰুত্তা, তস্সা চ পটিপক্খৰসেন সম্মাদিট্ঠি.

৩. অকতঞ্ঞুতাসুত্তৰণ্ণনা

২১৩. ততিযে অকতঞ্ঞুতা অকতৰেদিতাতি অকতঞ্ঞুতায অকতৰেদিতায. উভযম্পেতং অত্থতো একমেৰ. সুক্কপক্খেপি এসেৰ নযো.

৪-৭. পাণাতিপাতীসুত্তাদিৰণ্ণনা

২১৪-২১৭. চতুত্থং চতুন্নং কম্মকিলেসানং তপ্পটিপক্খস্স চ ৰসেন ৰুত্তং, পঞ্চমং সুক্কপক্খানং আদিতো চতুন্নং মিচ্ছত্তানং ৰসেন, ছট্ঠং অৰসেসানং চতুন্নং, সত্তমং অনরিযৰোহারঅরিযৰোহারানং. তথা অট্ঠমনৰমদসমানি সপ্পটিপক্খানং অস্সদ্ধম্মানং ৰসেন ৰুত্তানি. সব্বসুত্তেসু পন সুক্কপক্খধম্মা লোকিযলোকুত্তরমিস্সকাৰ কথিতা. নৰসু সুত্তেসু কিঞ্চাপি ‘‘সগ্গে’’তি ৰুত্তং, তযো পন মগ্গা তীণি চ ফলানি লব্ভন্তিযেৰাতি.

পরিসাৰগ্গো দুতিযো.

(২৩) ৩. দুচ্চরিতৰগ্গৰণ্ণনা

২২১-২৩১. ততিযস্স পঠমাদীনি উত্তানত্থানেৰ. দসমে যো চিন্তেত্ৰা কব্যং করোতি, অযং চিন্তাকৰি নাম. যো সুত্ৰা করোতি, অযং সুতকৰি নাম. যো একং অত্থং নিস্সায করোতি, অযং অত্থকৰি নাম. যো তঙ্খণঞ্ঞেৰ ৰঙ্গীসত্থেরো ৰিয অত্তনো পটিভানেন করোতি, অযং পটিভানকৰি নামাতি.

দুচ্চরিতৰগ্গো ততিযো.

(২৪) ৪. কম্মৰগ্গো

১. সংখিত্তসুত্তৰণ্ণনা

২৩২. চতুত্থস্স পঠমে কণ্হন্তি কাল়কং দসঅকুসলকম্মপথকম্মং. কণ্হৰিপাকন্তি অপাযে নিব্বত্তনতো কাল়কৰিপাকং. সুক্কন্তি পণ্ডরকং কুসলকম্মপথকম্মং. সুক্কৰিপাকন্তি সগ্গে নিব্বত্তনতো পণ্ডরকৰিপাকং. কণ্হসুক্কন্তি মিস্সককম্মং. কণ্হসুক্কৰিপাকন্তি সুখদুক্খৰিপাকং. মিস্সককম্মঞ্হি কত্ৰা অকুসলেন তিরচ্ছানযোনিযং মঙ্গলহত্থিট্ঠানাদীসু উপ্পন্নো কুসলেন পৰত্তে সুখং ৰেদিযতি. কুসলেন রাজকুলেপি নিব্বত্তো অকুসলেন পৰত্তে দুক্খং ৰেদিযতি. অকণ্হং অসুক্কন্তি কম্মক্খযকরং চতুমগ্গঞাণং অধিপ্পেতং. তঞ্হি যদি কণ্হং ভৰেয্য, কণ্হৰিপাকং দদেয্য. যদি সুক্কং ভৰেয্য, সুক্কৰিপাকং দদেয্য. উভযৰিপাকস্স পন অপ্পদানতো অকণ্হং অসুক্কন্তি অযমেত্থ অত্থো.

২. ৰিত্থারসুত্তৰণ্ণনা

২৩৩. দুতিযে সব্যাবজ্ঝন্তি সদোসং. কাযসঙ্খারন্তি কাযদ্ৰারচেতনং. অভিসঙ্খরোতীতি আযূহতি সম্পিণ্ডেতি. সেসদ্ৰযেপি এসেৰ নযো. সব্যাবজ্ঝং লোকন্তি সদুক্খং লোকং. সব্যাবজ্ঝা ফস্সাতি সদুক্খা ৰিপাকফস্সা. সব্যাবজ্ঝং ৰেদনং ৰেদিযতীতি সাবাধং ৰিপাকৰেদনং ৰেদিযতি. একন্তদুক্খন্তি একন্তেনেৰ দুক্খং, ন সুখসম্মিস্সং. সেয্যথাপি সত্তা নেরযিকাতি এত্থ সেয্যথাপীতি নিদস্সনত্থে নিপাতো. তেন কেৰলং নেরযিকসত্তে দস্সেতি, অঞ্ঞে পন তংসরিক্খকা নাম নত্থি. ইমিনা উপাযেন সব্বত্থ অত্থো ৰেদিতব্বো. সেয্যথাপি মনুস্সাতিআদীসু পন মনুস্সানং তাৰ কালেন সুখা ৰেদনা উপ্পজ্জতি, কালেন দুক্খা ৰেদনা. একচ্চে চ দেৰাতি এত্থ পন কামাৰচরদেৰা দট্ঠব্বা. তেসঞ্হি মহেসক্খতরা দেৰতা দিস্ৰা নিসিন্নাসনতো ৰুট্ঠানং, পারুতউত্তরাসঙ্গস্স ওতারণং, অঞ্জলিপগ্গণ্হনন্তিআদীনং ৰসেন কালেন দুক্খং উপ্পজ্জতি, দিব্বসম্পত্তিং অনুভৰন্তানং কালেন সুখং. একচ্চে চ ৰিনিপাতিকাতি এত্থ ৰেমানিকপেতা দট্ঠব্বা. তে নিরন্তরমেৰ একস্মিং কালে সুখং, একস্মিং কালে দুক্খং ৰেদিযন্তি. নাগসুপণ্ণহত্থিঅস্সাদযো পন মনুস্সা ৰিয ৰোকিণ্ণসুখদুক্খাৰ হোন্তি. পহানায যা চেতনাতি এত্থ ৰিৰট্টগামিনী মগ্গচেতনা ৰেদিতব্বা. সা হি কম্মক্খযায সংৰত্ততীতি.

৩. সোণকাযনসুত্তৰণ্ণনা

২৩৪. ততিযে সিখামোগ্গল্লানোতি সীসমজ্ঝে ঠিতায মহতিযা সিখায সমন্নাগতো মোগ্গল্লানগোত্তো ব্রাহ্মণো. পুরিমানীতি অতীতানন্তরদিৰসতো পট্ঠায পুরিমানি, দুতিযাদিতো পট্ঠায পুরিমতরানি ৰেদিতব্বানি. সোণকাযনোতি তস্সেৰ অন্তেৰাসিকো. কম্মসচ্চাযং ভো লোকোতি ভো অযং লোকো কম্মসভাৰো. কম্মসমারম্ভট্ঠাযীতি কম্মসমারম্ভেন তিট্ঠতি. কম্মং আযূহন্তোৰ তিট্ঠতি, অনাযূহন্তো উচ্ছিজ্জতীতি দীপেতি. সেসং হেট্ঠা ৰুত্তনযমেৰ.

৪-৯. সিক্খাপদসুত্তাদিৰণ্ণনা

২৩৫. চতুত্থাদীনিপি উত্তানত্থানেৰ. মগ্গঙ্গেসু পন যস্মা সতিযা উপট্ঠপেত্ৰা পঞ্ঞায পরিচ্ছিন্দতি, তস্মা উভযমেৰ কম্মং. সেসা অঙ্গানেৰ হোন্তি, নো কম্মন্তি ৰুত্তং. বোজ্ঝঙ্গেসুপি এসেৰ নযো. অভিধম্মে পন সব্বম্পেতং অৰিসেসেন চেতনাসম্পযুত্তকম্মন্তেৰ ৰণ্ণিতং.

১০. সমণসুত্তৰণ্ণনা

২৪১. দসমে ইধেৰাতি ইমস্মিংযেৰ সাসনে. অযং পন নিযমো সেসপদেসুপি ৰেদিতব্বো. দুতিযাদযোপি হি সমণা ইধেৰ, ন অঞ্ঞত্থ. সুঞ্ঞাতি রিত্তা তুচ্ছা. পরপ্পৰাদাতি চত্তারো সস্সতৰাদা, চত্তারো একচ্চসস্সতিকা, চত্তারো অন্তানন্তিকা, চত্তারো অমরাৰিক্খেপিকা, দ্ৰে অধিচ্চসমুপ্পন্নিকা, সোল়স সঞ্ঞিৰাদা, অট্ঠ অসঞ্ঞিৰাদা, অট্ঠ নেৰসঞ্ঞিনাসঞ্ঞিৰাদা, সত্ত উচ্ছেদৰাদা, পঞ্চ দিট্ঠধম্মনিব্বানৰাদাতি ইমে সব্বেপি ব্রহ্মজালে আগতদ্ৰাসট্ঠিদিট্ঠিযো ইতো বাহিরানং পরেসং পৰাদা পরপ্পৰাদা নাম. তে সব্বেপি ইমেহি চতূহি ফলট্ঠকসমণেহি সুঞ্ঞা. ন হি তে এত্থ সন্তি. ন কেৰলঞ্চ এতেহেৰ সুঞ্ঞা, চতূহি পন মগ্গট্ঠকসমণেহিপি, চতুন্নং মগ্গানং অত্থায আরদ্ধৰিপস্সকেহিপীতি দ্ৰাদসহিপি সমণেহি সুঞ্ঞা এৰ. ইদমেৰ অত্থং সন্ধায ভগৰতা মহাপরিনিব্বানে (দী. নি. ২.২১৪) ৰুত্তং –

‘‘একূনতিংসো ৰযসা সুভদ্দ,

যং পব্বজিং কিংকুসলানুএসী;

ৰস্সানি পঞ্ঞাস সমাধিকানি,

যতো অহং পব্বজিতো সুভদ্দ;

ঞাযস্স ধম্মস্স পদেসৰত্তী,

ইতো বহিদ্ধা সমণোপি নত্থি’’.

‘‘দুতিযোপি সমণো নত্থি, ততিযোপি সমণো নত্থি, চতুত্থোপি সমণো নত্থি, সুঞ্ঞা পরপ্পৰাদা সমণেহি অঞ্ঞেহী’’তি. এত্থ হি পদেসৰত্তীতি আরদ্ধৰিপস্সকো অধিপ্পেতো. তস্মা সোতাপত্তিমগ্গস্স আরদ্ধৰিপস্সকং মগ্গট্ঠং ফলট্ঠন্তি তযোপি একতো কত্ৰা ‘‘সমণোপি নত্থী’’তি আহ, সকদাগামিমগ্গস্স আরদ্ধৰিপস্সকং মগ্গট্ঠং ফলট্ঠন্তি তযোপি একতো কত্ৰা ‘‘দুতিযোপি সমণো নত্থী’’তি আহ. ইতরেসুপি দ্ৰীসু এসেৰ নযো. একাদসমং উত্তানত্থমেৰাতি.

কম্মৰগ্গো চতুত্থো.

(২৫) ৫. আপত্তিভযৰগ্গো

১. সঙ্ঘভেদকসুত্তৰণ্ণনা

২৪৩. পঞ্চমস্স পঠমে অপি নু তং, আনন্দ, অধিকরণন্তি ৰিৰাদাধিকরণাদীসু অঞ্ঞতরং অধিকরণং ভিক্খুসঙ্ঘস্স উপ্পজ্জি, সত্থা তস্স ৰূপসন্তভাৰং পুচ্ছন্তো এৰমাহ. কুতো তং, ভন্তেতি, ভন্তে, কুতো কিন্তি কেন কারণেন তং অধিকরণং ৰূপসমিস্সতীতি ৰদতি. কেৰলকপ্পন্তি সকলং সমন্ততো. সঙ্ঘভেদায ঠিতোতি সঙ্ঘেন সদ্ধিং ৰাদত্থায কথিতং পটিকথেন্তোৰ ঠিতো. তত্রাযস্মাতি তস্মিং এৰং ঠিতে আযস্মা অনুরুদ্ধো. ন একৰাচিকম্পি ভণিতব্বং মঞ্ঞতীতি ‘‘মা, আৰুসো, সঙ্ঘেন সদ্ধিং এৰং অৰচা’’তি একৰচনম্পি ৰত্তব্বং ন মঞ্ঞতি. ৰোযুঞ্জতীতি অনুযুঞ্জতি অনুযোগং আপজ্জতি. অত্থৰসেতি কারণৰসে. নাসেস্সন্তীতি উপোসথপ্পৰারণং উপগন্তুং অদত্ৰা নিক্কড্ঢিস্সন্তি. সেসং পাল়িৰসেনেৰ ৰেদিতব্বং.

২. আপত্তিভযসুত্তৰণ্ণনা

২৪৪. দুতিযে খুরমুণ্ডং করিত্ৰাতি পঞ্চ সিখণ্ডকে ঠপেত্ৰা খুরেন মুণ্ডং করিত্ৰা. খরস্সরেনাতি কক্খল়সদ্দেন. পণৰেনাতি ৰজ্ঝভেরিযা. থলট্ঠস্সাতি একমন্তে ঠিতস্স. সীসচ্ছেজ্জন্তি সীসচ্ছেদারহং. যত্র হি নামাতি যং নাম. সো ৰতস্সাহন্তি সো ৰত অহং অস্সং, যং এৰরূপং পাপং ন করেয্যন্তি অত্থো. যথাধম্মং পটিকরিস্সতীতি ধম্মানুরূপং পটিকরিস্সতি, সামণেরভূমিযং ঠস্সতীতি অত্থো. কাল়ৰত্থং পরিধাযাতি কাল়পিলোতিকং নিৰাসেত্ৰা. মোসল্লন্তি মুসলাভিপাতারহং. যথাধম্মন্তি ইধ আপত্তিতো ৰুট্ঠায সুদ্ধন্তে পতিট্ঠহন্তো যথাধম্মং করোতি নাম. ভস্মপুটন্তি ছারিকাভণ্ডিকং. গারয্হং ভস্মপুটন্তি গরহিতব্বছারিকাপুটেন মত্থকে অভিঘাতারহং. যথাধম্মন্তি ইধ আপত্তিং দেসেন্তো যথাধম্মং পটিকরোতি নাম. উপৰজ্জন্তি উপৰাদারহং. পাটিদেসনীযেসূতি পটিদেসেতব্বেসু. ইমিনা সব্বাপি সেসাপত্তিযো সঙ্গহিতা. ইমানি খো, ভিক্খৰে, চত্তারি আপত্তিভযানীতি, ভিক্খৰে, ইমানি চত্তারি আপত্তিং নিস্সায উপ্পজ্জনকভযানি নামাতি.

৩. সিক্খানিসংসসুত্তৰণ্ণনা

২৪৫. ততিযে সিক্খা আনিসংসা এত্থাতি সিক্খানিসংসং. পঞ্ঞা উত্তরা এত্থাতি পঞ্ঞুত্তরং. ৰিমুত্তি সারো এত্থাতি ৰিমুত্তিসারং. সতি আধিপতেয্যা এত্থাতি সতাধিপতেয্যং. এতেসং হি সিক্খাদিসঙ্খাতানং আনিসংসাদীনং অত্থায ৰুস্সতীতি ৰুত্তং হোতি. আভিসমাচারিকাতি উত্তমসমাচারিকা. ৰত্তৰসেন পঞ্ঞত্তসীলস্সেতং অধিৰচনং. তথা তথা সো তস্সা সিক্খাযাতি তথা তথা সো সিক্খাকামো ভিক্খু তস্মিং সিক্খাপদে.

আদিব্রহ্মচরিযিকাতি মগ্গব্রহ্মচরিযস্স আদিভূতানং চতুন্নং মহাসীলানমেতং অধিৰচনং. সব্বসোতি সব্বাকারেন. ধম্মাতি চতুসচ্চধম্মা. পঞ্ঞায সমৰেক্খিতা হোন্তীতি সহৰিপস্সনায মগ্গপঞ্ঞায সুদিট্ঠা হোন্তি. ৰিমুত্তিযা ফুসিতা হোন্তীতি অরহত্তফলৰিমুত্তিযা ঞাণফস্সেন ফুট্ঠা হোন্তি. অজ্ঝত্তংযেৰ সতি সূপট্ঠিতা হোতীতি নিযকজ্ঝত্তেযেৰ সতি সুট্ঠু উপট্ঠিতা হোতি. পঞ্ঞায অনুগ্গহেস্সামীতি ৰিপস্সনাপঞ্ঞায অনুগ্গহেস্সামি. পঞ্ঞায সমৰেক্খিস্সামীতি ইধাপি ৰিপস্সনাপঞ্ঞা অধিপ্পেতা. ফুসিতং ৰা ধম্মং তত্থ তত্থ পঞ্ঞায অনুগ্গহেস্সামীতি এত্থ পন মগ্গপঞ্ঞাৰ অধিপ্পেতা.

৪. সেয্যাসুত্তৰণ্ণনা

২৪৬. চতুত্থে পেতাতি কালকতা ৰুচ্চন্তি. উত্তানা সেন্তীতি তে যেভুয্যেন উত্তানকাৰ সযন্তি. অথ ৰা পেত্তিৰিসযে নিব্বত্তা পেতা নাম, তে অপ্পমংসলোহিতত্তা অট্ঠিসঙ্ঘাতজটিতা একেন পস্সেন সযিতুং ন সক্কোন্তি, উত্তানাৰ সেন্তি. অনত্তমনো হোতীতি তেজুস্সদত্তা সীহো মিগরাজা দ্ৰে পুরিমপাদে একস্মিং, পচ্ছিমপাদে একস্মিং ঠানে ঠপেত্ৰা নঙ্গুট্ঠং অন্তরসত্থিম্হি পক্খিপিত্ৰা পুরিমপাদপচ্ছিমপাদনঙ্গুট্ঠানং ঠিতোকাসং সল্লক্খেত্ৰা দ্ৰিন্নং পুরিমপাদানং মত্থকে সীসং ঠপেত্ৰা সযতি. দিৰসম্পি সযিত্ৰা পবুজ্ঝমানো ন উত্তসন্তো পবুজ্ঝতি, সীসং পন উক্খিপিত্ৰা পুরিমপাদাদীনং ঠিতোকাসং সল্লক্খেত্ৰা সচে কিঞ্চি ঠানং ৰিজহিত্ৰা ঠিতং হোতি, ‘‘নযিদং তুয্হং জাতিযা, ন সূরভাৰস্স অনুরূপ’’ন্তি অনত্তমনো হুত্ৰা তত্থেৰ সযতি, ন গোচরায পক্কমতি. ইদং সন্ধায ৰুত্তং – ‘‘অনত্তমনো হোতী’’তি. অৰিজহিত্ৰা ঠিতে পন ‘‘তুয্হং জাতিযা চ সূরভাৰস্স চ অনুরূপমিদ’’ন্তি হট্ঠতুট্ঠো উট্ঠায সীহৰিজম্ভনং ৰিজম্ভিত্ৰা কেসরভারং ৰিধুনিত্ৰা তিক্খত্তুং সীহনাদং নদিত্ৰা গোচরায পক্কমতি. তেন ৰুত্তং – ‘‘অত্তমনো হোতী’’তি.

৫. থূপারহসুত্তৰণ্ণনা

২৪৭. পঞ্চমে রাজা চক্কৰত্তীতি এত্থ কস্মা ভগৰা অগারমজ্ঝে ৰসিত্ৰা কালকতস্স রঞ্ঞো থূপকরণং অনুজানাতি, ন সীলৰতো পুথুজ্জনভিক্খুস্সাতি? অনচ্ছরিযত্তা. পুথুজ্জনভিক্খূনঞ্হি থূপে অনুঞ্ঞাযমানে তম্বপণ্ণিদীপে তাৰ থূপানং ওকাসো ন ভৰেয্য, তথা অঞ্ঞেসু ঠানেসু. তস্মা ‘‘অনচ্ছরিযা তে ভৰিস্সন্তী’’তি নানুজানাতি. চক্কৰত্তী রাজা একোৰ নিব্বত্ততি, তেনস্স থূপো অচ্ছরিযো হোতি. পুথুজ্জনসীলৰতো পন পরিনিব্বুতভিক্খুনো ৰিয মহন্তম্পি সক্কারং কাতুং ৰট্টতিযেৰ. ছট্ঠসত্তমানি উত্তানত্থানেৰ.

৮. পঠমৰোহারসুত্তৰণ্ণনা

২৫০. অট্ঠমে অনরিযৰোহারাতি অনরিযানং কথা. সেসেসুপি এসেৰ নযো.

আপত্তিভযৰগ্গো পঞ্চমো.

পঞ্চমপণ্ণাসকং নিট্ঠিতং.