(২৬) ৬. অভিঞ্ঞাৰগ্গো

১-৩. অভিঞ্ঞাসুত্তাদিৰণ্ণনা

২৫৪-২৫৬. ছট্ঠস্স পঠমে অভিঞ্ঞাযাতি জানিত্ৰা. সমথো চ ৰিপস্সনা চাতি চিত্তেকগ্গতা চ সঙ্খারপরিগ্গহৰিপস্সনাঞাণঞ্চ. ৰিজ্জা চ ৰিমুত্তি চাতি মগ্গঞাণৰিজ্জা চ সেসা সম্পযুত্তকধম্মা চ. দুতিযে অনরিযপরিযেসনাতি অনরিযানং এসনা গৰেসনা. জরাধম্মন্তি জরাসভাৰং. সেসেসুপি এসেৰ নযো. ততিযং উত্তানমেৰ.

৪. মালুক্যপুত্তসুত্তৰণ্ণনা

২৫৭. চতুত্থে মালুক্যপুত্তোতি মালুক্যব্রাহ্মণিযা পুত্তো. এত্থাতি এতস্মিং তৰ ওৰাদযাচনে. ইমিনা থেরং অপসাদেতিপি উস্সাদেতিপি. কথং? অযং কির দহরকালে পচ্চযেসু লগ্গো হুত্ৰা পচ্ছা মহল্লককালে অরঞ্ঞৰাসং পত্থেন্তো কম্মট্ঠানং যাচতি. অথ ভগৰা ‘‘এত্থ দহরে কিং ৰক্খাম, মালুক্যপুত্তো ৰিয তুম্হেপি তরুণকালে পচ্চযেসু লগ্গিত্ৰা মহল্লককালে অরঞ্ঞং পৰিসিত্ৰা সমণধম্মং করেয্যাথা’’তি ইমিনা অধিপ্পাযেন ভণন্তো থেরং অপসাদেতি নাম. যস্মা পন থেরো মহল্লককালেৰ অরঞ্ঞং পৰিসিত্ৰা সমণধম্মং কাতুকামো, তস্মা ভগৰা ‘‘এত্থ দহরে কিং ৰক্খাম, অযং অম্হাকং মালুক্যপুত্তো মহল্লককালেপি অরঞ্ঞং পৰিসিত্ৰা সমণধম্মং কাতুকামো কম্মট্ঠানং যাচতি. তুম্হে তাৰ তরুণকালেপি ৰীরিযং ন করোথা’’তি ইমিনা অধিপ্পাযেন ভণন্তো থেরং উস্সাদেতি নামাতি যোজনা.

৫-১০. কুলসুত্তাদিৰণ্ণনা

২৫৮-২৬৩. পঞ্চমে আধিপচ্চে ঠপেন্তীতি ভণ্ডাগারিকট্ঠানে ঠপেন্তি. ছট্ঠে ৰণ্ণসম্পন্নোতি সরীরৰণ্ণেন সমন্নাগতো. বলসম্পন্নোতি কাযবলেন সমন্নাগতো. ভিক্খুৰারে ৰণ্ণসম্পন্নোতি গুণৰণ্ণেন সমন্নাগতো. বলসম্পন্নোতি ৰীরিযবলেন সমন্নাগতো. জৰসম্পন্নোতি ঞাণজৰেন সমন্নাগতো. সত্তমেপি এসেৰ নযো. সেসমেত্থ উত্তানমেৰাতি.

অভিঞ্ঞাৰগ্গো ছট্ঠো.