(১৯) ৪. ব্রাহ্মণৰগ্গো

১. যোধাজীৰসুত্তৰণ্ণনা

১৮১. চতুত্থস্স পঠমে ঠানকুসলোতি যেন ঠানেন ঠিতো অৰিরাধেত্ৰা ৰিজ্ঝিতুং সক্কোতি, তস্মিং ঠানে কুসলো. সেসং হেট্ঠা ৰুত্তনযেনেৰ ৰেদিতব্বং.

২. পাটিভোগসুত্তৰণ্ণনা

১৮২. দুতিযে নত্থি কোচি পাটিভোগোতি অহং তে পাটিভোগোতি এৰং পাটিভোগো ভৰিতুং সমত্থো নাম নত্থি. জরাধম্মন্তি জরাসভাৰং. এস নযো সব্বত্থ.

৩. সুতসুত্তৰণ্ণনা

১৮৩. ততিযে নত্থি ততো দোসোতি তস্মিং দোসো নাম নত্থীতি অত্থো.

৪. অভযসুত্তৰণ্ণনা

১৮৪. চতুত্থে কিচ্ছাজীৰিতকারণট্ঠেন রোগোৰ রোগাতঙ্কো নাম. ফুট্ঠস্সাতি তেন রোগাতঙ্কেন সমন্নাগতস্স. উরত্তাল়িং কন্দতীতি উরং তাল়েত্ৰা রোদতি. অকতকল্যাণোতিআদীসু কল্যাণং ৰুচ্চতি পুঞ্ঞকম্মং, তং অকতং এতেনাতি অকতকল্যাণো. সেসপদেসুপি এসেৰ নযো. পুঞ্ঞকম্মমেৰ হি কোসল্লসম্ভূতত্তা কুসলং, ভীতস্স পরিত্তাযকত্তা ভীরুত্তাণন্তি ৰুচ্চতি. কতপাপোতিআদীসু পাপং ৰুচ্চতি লামকং অকুসলকম্মং. লুদ্দন্তি কক্খল়কম্মং. কিব্বিসন্তি সমলং অপরিসুদ্ধকম্মং. কঙ্খী হোতীতি বুদ্ধধম্মসঙ্ঘগুণেসু চেৰ সিক্খায চ পুব্বন্তে চ অপরন্তে চ পুব্বন্তাপরন্তে চ পটিচ্চসমুপ্পাদে চাতি অট্ঠসু ঠানেসু কঙ্খায সমন্নাগতো হোতি. ৰিচিকিচ্ছীতি ৰিচিকিচ্ছায সমন্নাগতো সাসনসদ্ধম্মে ন নিট্ঠং গতো, উগ্গহপরিপুচ্ছাৰসেন নিট্ঠং গন্তুং ন সক্কোতি. ইমিনা নযেন সব্বত্থ অত্থো ৰেদিতব্বো.

৫. ব্রাহ্মণসচ্চসুত্তৰণ্ণনা

১৮৫. পঞ্চমে ব্রাহ্মণসচ্চানীতি ব্রাহ্মণানং সচ্চানি তথানি. সো তেন ন সমণোতি মঞ্ঞতীতি সো খীণাসৰো তেন সচ্চেন ‘‘অহং সমণো’’তি তণ্হামানদিট্ঠীহি ন মঞ্ঞতি. সেসপদেসুপি এসেৰ নযো. যদেৰ তত্থ সচ্চং, তদভিঞ্ঞাযাতি যং তত্থ ‘‘সব্বে পাণা অৰজ্ঝা’’তি পটিপত্তিযা সচ্চং তথং অৰিপরীতং. ইমিনা ৰচীসচ্চং অব্ভন্তরং কত্ৰা পরমত্থসচ্চং নিব্বানং দস্সেতি. তদভিঞ্ঞাযাতি তং উভযম্পি অভিৰিসিট্ঠায পঞ্ঞায জানিত্ৰা. অনুদ্দযায অনুকম্পায পটিপন্নো হোতীতি অনুদ্দযত্থায চ অনুকম্পত্থায চ যা পটিপদা, তং পটিপন্নো হোতি, পূরেত্ৰা ঠিতোতি অত্থো. সেসপটিপদাসুপি এসেৰ নযো.

সব্বে কামাতি সব্বে ৰত্থুকামকিলেসকামা. ইতি ৰদং ব্রাহ্মণো সচ্চমাহাতি এৰম্পি ৰদন্তো খীণাসৰব্রাহ্মণো সচ্চমেৰ আহ. সব্বে ভৰাতি কামভৰাদযো তযোপি. নাহং ক্ৰচনীতি এত্থ পন চতুক্কোটিকসুঞ্ঞতা কথিতা. অযঞ্হি ‘‘নাহং ক্ৰচনী’’তি ক্ৰচি অত্তানং ন পস্সতি, কস্সচি কিঞ্চনতস্মিন্তি অত্তনো অত্তানং কস্সচি পরস্স কিঞ্চনভাৰে উপনেতব্বং ন পস্সতি, ভাতিট্ঠানে ভাতরং, সহাযট্ঠানে সহাযং, পরিক্খারট্ঠানে ৰা পরিক্খারং মঞ্ঞিত্ৰা উপনেতব্বং ন পস্সতীতি অত্থো. ন চ মম ক্ৰচনীতি এত্থ মমসদ্দং তাৰ ঠপেত্ৰা ‘‘ন চ ক্ৰচনি পরস্স চ অত্তানং ক্ৰচি ন পস্সতী’’তি অযমত্থো. ইদানি ‘‘মমসদ্দং আহরিত্ৰা মম কিস্মিঞ্চি কিঞ্চনং নত্থী’’তি সো পরস্স অত্তা মম কিস্মিঞ্চি কিঞ্চনভাৰে অত্থীতি ন পস্সতি, অত্তনো ভাতিট্ঠানে ভাতরং, সহাযট্ঠানে সহাযং, পরিক্খারট্ঠানে ৰা পরিক্খারন্তি কিস্মিঞ্চি ঠানে পরস্স অত্তানং ইমিনা কিঞ্চনভাৰেন উপনেতব্বং ন পস্সতীতি অত্থো. এৰমযং যস্মা নেৰ কত্থচি অত্তানং পস্সতি, ন তং পরস্স কিঞ্চনভাৰে উপনেতব্বং পস্সতি, ন পরস্স অত্তানং পস্সতি, ন পরস্স অত্তানং অত্তনো কিঞ্চনভাৰে উপনেতব্বং পস্সতীতি. ইতি ৰদং ব্রাহ্মণোতি এৰং চতুক্কোটিকং সুঞ্ঞতং ৰদন্তোপি খীণাসৰব্রাহ্মণো তস্সা পটিপদায সম্মা পটিৰিদ্ধত্তা সচ্চমেৰ আহ, ন মুসাতি সব্বেসুপি ৰারেসু মঞ্ঞনানং পহীনত্তাযেৰ ন মঞ্ঞতীতি চ অত্থো ৰেদিতব্বো. আকিঞ্চঞ্ঞংযেৰ পটিপদন্তি কিঞ্চনভাৰৰিরহিতং নিপ্পলিবোধং নিগ্গহণমেৰ পটিপদং পটিপন্নো হোতি পূরেত্ৰা ঠিতো.

ইমানি খো পরিব্বাজকা চত্তারি ব্রাহ্মণসচ্চানি মযা সযং অভিঞ্ঞা সচ্ছিকত্ৰা পৰেদিতানীতি যানি তুম্হে ভোৰাদিব্রাহ্মণানং সচ্চানি ৰদেথ, তেহি অঞ্ঞানি মযা ইমানি বাহিতপাপব্রাহ্মণস্স চত্তারি সচ্চানি চতূহি মগ্গেহি সোল়সৰিধেন কিচ্চেন জানিত্ৰা পচ্চক্খং কত্ৰা পৰেদিতানি দেসিতানি জোতিতানীতি অত্থো. ইতি ইমস্মিং সুত্তে চতূসুপি ঠানেসু খীণাসৰস্স ৰচীসচ্চমেৰ কথিতন্তি.

৬. উম্মগ্গসুত্তৰণ্ণনা

১৮৬. ছট্ঠে পরিকস্সতীতি আকড্ঢিযতি. উম্মগ্গোতি উম্মুজ্জনং, পঞ্ঞাগমনন্তি অত্থো. পঞ্ঞা এৰ ৰা উম্মুজ্জনট্ঠেন উম্মগ্গোতি ৰুচ্চতি. সাৰ পটিভানট্ঠেন পটিভানং. চিত্তস্স উপ্পন্নস্স ৰসং গচ্ছতীতি যে চিত্তস্স ৰসং গচ্ছন্তি, তেসংযেৰেত্থ গহণং ৰেদিতব্বং. অত্থমঞ্ঞায ধম্মমঞ্ঞাযাতি অত্থঞ্চ পাল়িঞ্চ জানিত্ৰা. ধম্মানুধম্মপ্পটিপন্নো হোতীতি লোকুত্তরধম্মস্স অনুচ্ছৰিকধম্মং সহ সীলেন পুব্বভাগপ্পটিপদং পটিপন্নো হোতি. নিব্বেধিকপঞ্ঞোতি নিব্বিজ্ঝনকপঞ্ঞো. ইদং দুক্খন্তি ঠপেত্ৰা তণ্হং সেসং তেভূমকক্খন্ধপঞ্চকং দুক্খন্তি সুতং হোতি. পঞ্ঞাযাতি মগ্গপঞ্ঞায. অযং দুক্খসমুদযোতি ৰট্টমূলকতণ্হা তস্স দুক্খস্স সমুদযোতি সুতং হোতি. ইমিনা উপাযেন সেসদ্ৰযেপি অত্থো ৰেদিতব্বো. চতুত্থপঞ্হৰিস্সজ্জনেন অরহত্তফলং কথিতন্তি ৰেদিতব্বং.

৭. ৰস্সকারসুত্তৰণ্ণনা

১৮৭. সত্তমে তোদেয্যস্সাতি তুদিগামৰাসিকস্স. পরিসতীতি সন্নিপতিতায পরিসায. পরূপারম্ভং ৰত্তেন্তীতি পরগরহং পৰত্তেন্তি কথেন্তি. বালো অযং রাজাতিআদি যং তে উপারম্ভং ৰত্তেন্তি, তস্স দস্সনত্থং ৰুত্তং. সমণে রামপুত্তেতি উদকে রামপুত্তে. অভিপ্পসন্নোতি অতিক্কম্ম পসন্নো. পরমনিপচ্চকারন্তি উত্তমনিপাতকিরিযং নীচৰুত্তিং. পরিহারকাতি পরিচারকা. যমকোতিআদীনি তেসং নামানি. তেসু হি একো যমকো নাম, একো মোগ্গল্লো নাম, একো উগ্গো নাম, একো নাৰিন্দকী নাম, একো গন্ধব্বো নাম, একো অগ্গিৰেস্সো নাম. ত্যাস্সুদন্তি এত্থ অস্সুদন্তি নিপাতমত্তং, তে অত্তনো পরিসতি নিসিন্নেতি অত্থো. ইমিনা নযেন নেতীতি ইমিনা কারণেন অনুনেতি জানাপেতি. করণীযাধিকরণীযেসূতি পণ্ডিতেহি কত্তব্বকিচ্চেসু চ অতিরেককত্তব্বকিচ্চেসু চ. ৰচনীযাধিৰচনীযেসূতি ৰত্তব্বেসু চ অতিরেকৰত্তব্বেসু চ. অলমত্থদসতরেহীতি এত্থ অত্থে পস্সিতুং সমত্থা অলমত্থদসা, তে অতিসিত্ৰা ঠিতা অলমত্থদসতরা, তেহি অলমত্থদসতরেহি. অলমত্থদসতরোতি অলমত্থদসতায উত্তরিতরো, ছেকেহি ছেকতরো পণ্ডিতেহি পণ্ডিততরোতি পুচ্ছন্তো এৰমাহ. অথস্স তে পটিপুচ্ছন্তা এৰং ভোতিআদিমাহংসু. ইতি ব্রাহ্মণো অত্তনো সপ্পুরিসতায তং এল়েয্যরাজানম্পি তস্স পরিৰারিকেপি উদকম্পি রামপুত্তং পসংসি. অন্ধো ৰিয হি অসপ্পুরিসো, চক্খুমা ৰিয সপ্পুরিসো. যথা অন্ধো নেৰ অনন্ধং ন অন্ধং পস্সতি, এৰং অসপ্পুরিসো নেৰ সপ্পুরিসং ন অসপ্পুরিসং জানাতি. যথা চক্খুমা অন্ধম্পি অনন্ধম্পি পস্সতি, এৰং সপ্পুরিসো সপ্পুরিসম্পি অসপ্পুরিসম্পি জানাতি. তোদেয্যোপি সপ্পুরিসতায অসপ্পুরিসে অঞ্ঞাসীতি ইমমত্থৰসং পটিচ্চ তুট্ঠমানসো ব্রাহ্মণো অচ্ছরিযং ভো, গোতমাতিআদীনি ৰত্ৰা তথাগতস্স ভাসিতং অনুমোদিত্ৰা পক্কামি.

৮. উপকসুত্তৰণ্ণনা

১৮৮. অট্ঠমে উপকোতি তস্স নামং. মণ্ডিকাপুত্তোতি মণ্ডিকায পুত্তো. উপসঙ্কমীতি সো কির দেৰদত্তস্স উপট্ঠাকো, ‘‘কিং নু খো সত্থা মযি অত্তনো সন্তিকং উপগতে ৰণ্ণং কথেস্সতি, উদাহু অৰণ্ণ’’ন্তি পরিগ্গণ্হনত্থং উপসঙ্কমি. ‘‘নেরযিকো দেৰদত্তো কপ্পট্ঠো অতেকিচ্ছো’’তি (চূল়ৰ. ৩৪৮) ৰচনং সুত্ৰা সত্থারং ঘট্টেতুকামো উপসঙ্কমীতিপি ৰদন্তি. পরূপারম্ভং ৰত্তেতীতি পরগরহং কথেতি. সব্বো সো ন উপপাদেতীতি সব্বোপি সো কুসলধম্মং ন উপ্পাদেতি, অত্তনো ৰা ৰচনং উপপাদেতুং অনুচ্ছৰিকং কাতুং ন সক্কোতি. অনুপপাদেন্তো গারয্হো হোতীতি কুসলং ধম্মং উপ্পাদেতুং অসক্কোন্তো অত্তনো চ ৰচনং উপপন্নং অনুচ্ছৰিকং কাতুং অসক্কোন্তো গারয্হো হোতি. উপৰজ্জোতি উপৰদিতব্বো চ হোতি, ৰজ্জেন ৰা উপেতো হোতি, সদোসো হোতীতি অত্থো.

অথ ভগৰা তস্স ৰাদং গহেত্ৰা তস্সেৰ গীৰায পটিমুঞ্চন্তো পরূপারম্ভন্তিআদিমাহ. উম্মুজ্জমানকংযেৰাতি উদকতো সীসং উক্খিপন্তংযেৰ. তত্থ অপরিমাণা পদাতিআদীসু তস্মিং অকুসলন্তি পঞ্ঞাপনে পদানিপি অক্খরানিপি ধম্মদেসনাপি অপরিমাণাযেৰ. ইতিপিদং অকুসলন্তি ইদম্পি অকুসলং ইদম্পি অকুসলং ইমিনাপি কারণেন ইমিনাপি কারণেন অকুসলন্তি এৰং অকুসলপঞ্ঞত্তিযং আগতানিপি অপরিমাণানি. অথাপি অঞ্ঞেনাকারেন তথাগতো তং ধম্মং দেসেয্য, এৰম্পিস্স দেসনা অপরিমাণা ভৰেয্য. যথাহ – ‘‘অপরিযাদিন্নাৰস্স তথাগতস্স ধম্মদেসনা, অপরিযাদিন্নং ধম্মপদব্যঞ্জন’’ন্তি (ম. নি. ১.১৬১). ইমিনা উপাযেন সব্বৰারেসু অত্থো ৰেদিতব্বো. যাৰ ধংসী ৰতাযন্তি যাৰ গুণধংসী ৰত অযং. লোণকারদারকোতি লোণকারগামদারকো. যত্র হি নামাতি যো হি নাম. আসাদেতব্বং মঞ্ঞিস্সতীতি ঘট্টেতব্বং মঞ্ঞিস্সতি. অপেহীতি অপগচ্ছ, মা মে পুরতো অট্ঠাসি. এৰঞ্চ পন ৰত্ৰা গীৰায গণ্হাপেত্ৰা নিক্কড্ঢাপেসিযেৰাতি.

৯. সচ্ছিকরণীযসুত্তৰণ্ণনা

১৮৯. নৰমে কাযেনাতি নামকাযেন. সচ্ছিকরণীযাতি পচ্চক্খং কাতব্বা. সতিযাতি পুব্বেনিৰাসানুস্সতিযা. চক্খুনাতি দিব্বচক্খুনা. পঞ্ঞাযাতি ঝানপঞ্ঞায ৰিপস্সনাপঞ্ঞা সচ্ছিকাতব্বা, ৰিপস্সনাপঞ্ঞায মগ্গপঞ্ঞা, মগ্গপঞ্ঞায ফলপঞ্ঞা, ফলপঞ্ঞায পচ্চৰেক্খণপঞ্ঞা সচ্ছিকাতব্বা, পত্তব্বাতি অত্থো. আসৰানং খযসঙ্খাতং পন অরহত্তং পচ্চৰেক্খণৰসেন পচ্চৰেক্খণপঞ্ঞায সচ্ছিকরণীযং নামাতি.

১০. উপোসথসুত্তৰণ্ণনা

১৯০. দসমে তুণ্হীভূতং তুণ্হীভূতন্তি যতো যতো অনুৰিলোকেতি, ততো ততো তুণ্হীভূতমেৰ. ভিক্খূ আমন্তেসীতি পটিপত্তিসম্পন্নে ভিক্খূ পসন্নেহি চক্খূহি অনুৰিলোকেত্ৰা উপ্পন্নধম্মপামোজ্জো থোমেতুকামতায আমন্তেসি. অপলাপাতি পলাপরহিতা. ইতরং তস্সেৰ ৰেৰচনং. সুদ্ধাতি নিম্মলা. সারে পতিট্ঠিতাতি সীলাদিসারে পতিট্ঠিতা. অলন্তি যুত্তং. যোজনগণনানীতি একং যোজনং যোজনমেৰ, দসপি যোজনানি যোজনানেৰ. ততো উদ্ধং ‘‘যোজনগণনানী’’তি ৰুচ্চতি. ইধ পন যোজনসতম্পি যোজনসহস্সম্পি অধিপ্পেতং. পুটোসেনাপীতি পুটোসং ৰুচ্চতি পাথেয্যং, পাথেয্যং গহেত্ৰাপি উপসঙ্কমিতুং যুত্তমেৰাতি অত্থো. পুটংসেনাতিপি পাঠো. তস্সত্থো – পুটো অংসে অস্সাতি পুটংসো, তেন পুটংসেন, অংসেন পাথেয্যপুটং ৰহন্তেনাপীতি ৰুত্তং হোতি.

ইদানি এৰরূপেহি এৰরূপেহি চ গুণেহি সমন্নাগতা এত্থ ভিক্খূ অত্থীতি দস্সেতুং সন্তি ভিক্খৰেতিআদিমাহ. তত্থ দেৰপ্পত্তাতি উপপত্তিদেৰনিব্বত্তকং দিব্বৰিহারং দিব্বৰিহারেন চ অরহত্তং পত্তা. ব্রহ্মপ্পত্তাতি নিদ্দোসট্ঠেন ব্রহ্মভাৰসাধকং ব্রহ্মৰিহারং ব্রহ্মৰিহারেন চ অরহত্তং পত্তা. আনেঞ্জপ্পত্তাতি অনিঞ্জনভাৰসাধকং আনেঞ্জং আনেঞ্জেন চ অরহত্তং পত্তা. অরিযপ্পত্তাতি পুথুজ্জনভাৰং অতিক্কম্ম অরিযভাৰং পত্তা. এৰং খো, ভিক্খৰে, ভিক্খু দেৰপ্পত্তো হোতীতিআদীসু এৰং রূপাৰচরচতুত্থজ্ঝানে ঠত্ৰা চিত্তং ৰিৰট্টেত্ৰা অরহত্তং পত্তো দেৰপ্পত্তো নাম হোতি, চতূসু ব্রহ্মৰিহারেসু ঠত্ৰা চিত্তং ৰিৰট্টেত্ৰা অরহত্তং পত্তো ব্রহ্মপ্পত্তো নাম, চতূসু অরূপজ্ঝানেসু ঠত্ৰা চিত্তং ৰিৰট্টেত্ৰা অরহত্তং পত্তো আনেঞ্জপ্পত্তো নাম. ইদং দুক্খন্তিআদীহি চতূহি সচ্চেহি চত্তারো মগ্গা তীণি চ ফলানি কথিতানি. তস্মা ইমং অরিযধম্মং পত্তো ভিক্খু অরিযপ্পত্তো নাম হোতীতি.

ব্রাহ্মণৰগ্গো চতুত্থো.