(১৬) ১. ইন্দ্রিযৰগ্গো

১. ইন্দ্রিযসুত্তাদিৰণ্ণনা

১৫১. চতুত্থস্স পঠমে সদ্ধাধুরেন ইন্দট্ঠং করোতীতি সদ্ধিন্দ্রিযং. সেসেসুপি এসেৰ নযো. দুতিযে অস্সদ্ধিযে অকম্পনট্ঠেন সদ্ধাবলং. সেসেসুপি এসেৰ নযো. ততিযে অনৰজ্জবলন্তি নিদ্দোসবলং. সঙ্গহবলন্তি সঙ্গণ্হিতব্বযুত্তকানং সঙ্গণ্হনবলং. চতুত্থপঞ্চমানি উত্তানানেৰ.

৬. কপ্পসুত্তৰণ্ণনা

১৫৬. ছট্ঠে সংৰট্টতীতি এত্থ তযো সংৰট্টা আপোসংৰট্টো, তেজোসংৰট্টো, ৰাযোসংৰট্টোতি. তিস্সো সংৰট্টসীমা আভস্সরা, সুভকিণ্হা, ৰেহপ্ফলাতি. যদা কপ্পো তেজেন সংৰট্টতি, আভস্সরতো হেট্ঠা অগ্গিনা ডয্হতি. যদা আপেন সংৰট্টতি, সুভকিণ্হতো হেট্ঠা উদকেন ৰিলীযতি. যদা ৰাতেন সংৰট্টতি, ৰেহপ্ফলতো হেট্ঠা ৰাতেন ৰিদ্ধংসতি. ৰিত্থারতো পন সদাপি একং বুদ্ধক্খেত্তং ৰিনস্সতি. অযমেত্থ সঙ্খেপো, ৰিত্থারকথা পন ৰিসুদ্ধিমগ্গে (ৰিসুদ্ধি. ২.৪০৩-৪০৪ আদযো) ৰুত্তনযেনেৰ ৰেদিতব্বা.

৭. রোগসুত্তৰণ্ণনা

১৫৭. সত্তমে ৰিঘাতৰাতি মহিচ্ছাপচ্চযেন ৰিঘাতেন দুক্খেন সমন্নাগতো. অসন্তুট্ঠোতি চতূসু পচ্চযেসু তীহি সন্তোসেহি অসন্তুট্ঠো. অনৰঞ্ঞপ্পটিলাভাযাতি পরেহি অনৰজাননস্স পটিলাভত্থায. লাভসক্কারসিলোকপ্পটিলাভাযাতি সুসঙ্খতচতুপচ্চযসঙ্খাতস্স লাভসক্কারস্স চেৰ ৰণ্ণভণনসঙ্খাতস্স সিলোকস্স চ পটিলাভত্থায. সঙ্খায কুলানি উপসঙ্কমতীতি ‘‘ইতি মং এতে জানিস্সন্তী’’তি জাননত্থায কুলানি উপসঙ্কমতি. সেসপদেসুপি এসেৰ নযো.

৮. পরিহানিসুত্তৰণ্ণনা

১৫৮. অট্ঠমে গম্ভীরেসূতি অত্থগম্ভীরেসু. ঠানাঠানেসূতি কারণাকারণেসু. ন কমতীতি নাৰগাহতি নপ্পৰত্ততি. পঞ্ঞাচক্খূতি এত্থ উগ্গহপরিপুচ্ছাপঞ্ঞাপি ৰট্টতি, সম্মসনপ্পটিৰেধপঞ্ঞাপি ৰট্টতিযেৰ.

৯. ভিক্খুনীসুত্তৰণ্ণনা

১৫৯. নৰমে এহি ত্ৰন্তি থেরে পটিবদ্ধচিত্তা তং পহিণিতুং এৰমাহ. সসীসং পারুপিত্ৰাতি সহ সীসেন কাযং পারুপিত্ৰা. মঞ্চকে নিপজ্জীতি ৰেগেন মঞ্চকং পঞ্ঞাপেত্ৰা তত্থ নিপজ্জি. এতদৰোচাতি তস্সাকারং সল্লক্খেত্ৰা লোভপ্পহানত্থায সণ্হেনেৰ অসুভকথং কথেতুং এতং অৰোচ. আহারসম্ভূতোতি আহারেন সম্ভূতো আহারং নিস্সায ৰড্ঢিতো. আহারং নিস্সায আহারং পজহতীতি পচ্চুপ্পন্নং কবল়ীকারাহারং নিস্সায তং এৰং যোনিসো সেৰমানো পুব্বকম্মসঙ্খাতং আহারং পজহতি. পচ্চুপ্পন্নেপি পন কবল়ীকারাহারে নিকন্তিতণ্হা পজহিতব্বা.

তণ্হং পজহতীতি ইদানি এৰং পৰত্তং পচ্চুপ্পন্নতণ্হং নিস্সায ৰট্টমূলিকং পুব্বতণ্হং পজহতি. অযং পন পচ্চুপ্পন্নতণ্হা কুসলা অকুসলাতি? অকুসলা. সেৰিতব্বা ন সেৰিতব্বাতি? সেৰিতব্বা. পটিসন্ধিং আকড্ঢতি নাকড্ঢতীতি? নাকড্ঢতি. এতিস্সাপি পন পচ্চুপ্পন্নায সেৰিতব্বতণ্হায নিকন্তি পজহিতব্বাযেৰ. সো হি নাম আযস্মা আসৰানং খযা উপসম্পজ্জ ৰিহরিস্সতি, কিমঙ্গং পনাহন্তি এত্থ কিমঙ্গং পনাতি কারণপরিৰিতক্কনমেতং. ইদং ৰুত্তং হোতি – সো আযস্মা অরহত্তফলং সচ্ছিকত্ৰা ৰিহরিস্সতি, অহং কেন কারণেন ন সচ্ছিকত্ৰা ৰিহরিস্সামি. সোপি হি আযস্মা সম্মাসম্বুদ্ধস্সেৰ পুত্তো, অহম্পি সম্মাসম্বুদ্ধস্সেৰ পুত্তো, ময্হম্পেতং উপ্পজ্জিস্সতীতি. মানং নিস্সাযাতি ইদং এৰং উপ্পন্নসেৰিতব্বমানং নিস্সায. মানং পজহতীতি ৰট্টমূলকং পুব্বমানং পজহতি. যং নিস্সায পনেস তং পজহতি, সোপি তণ্হা ৰিয অকুসলো চেৰ সেৰিতব্বো চ, নো চ পটিসন্ধিং আকড্ঢতি. নিকন্তি পন তস্মিম্পি পজহিতব্বাৰ.

সেতুঘাতো ৰুত্তো ভগৰতাতি পদঘাতো পচ্চযঘাতো বুদ্ধেন ভগৰতা কথিতো. ইতি ইমেহি চতূহি অঙ্গেহি থেরে দেসনং ৰিনিৰট্টেন্তে তস্সা ভিক্খুনিযা থেরং আরব্ভ উপ্পন্নো ছন্দরাগো অপগঞ্ছি. সাপি থেরং খমাপেতুং অচ্চযং দেসেসি, থেরোপিস্সা পটিগ্গণ্হি. তং দস্সেতুং অথ খো সা ভিক্খুনীতিআদি ৰুত্তং.

১০. সুগতৰিনযসুত্তৰণ্ণনা

১৬০. দসমে দুগ্গহিতন্তি উপ্পটিপাটিযা গহিতং. পরিযাপুণন্তীতি ৰল়ঞ্জেন্তি কথেন্তি. পদব্যঞ্জনেহীতি এত্থ পদমেৰ অত্থস্স ব্যঞ্জনতো ব্যঞ্জনন্তি ৰুত্তং. দুন্নিক্খিত্তস্সাতি দুট্ঠু নিক্খিত্তস্স উপ্পটিপাটিযা ঠপিতস্স. অত্থোপি দুন্নযো হোতীতি অট্ঠকথা নীহরিত্ৰা কথেতুং ন সক্কা হোতি. ছিন্নমূলকোতি মূলভূতানং ভিক্খূনং উপচ্ছিন্নত্তা ছিন্নমূলকো. অপ্পটিসরণোতি অপ্পতিট্ঠো. বাহুলিকাতি পচ্চযবাহুল্লায পটিপন্না. সাথলিকাতি তিস্সো সিক্খা সিথিলগ্গহণেন গণ্হনকা. ওক্কমনে পুব্বঙ্গমাতি পঞ্চ নীৰরণানি অৰগমনতো ওক্কমনন্তি ৰুচ্চন্তি, তত্থ পুব্বঙ্গমাতি অত্থো. পৰিৰেকেতি তিৰিধে ৰিৰেকে. নিক্খিত্তধুরাতি নিব্বীরিযা. ইমিনা নযেন পন সব্বত্থ অত্থো ৰেদিতব্বো.

ইন্দ্রিযৰগ্গো পঠমো.