(১৪) ৪. পুগ্গলৰগ্গো

১. সংযোজনসুত্তৰণ্ণনা

১৩১. চতুত্থস্স পঠমে উপপত্তিপটিলাভিযানীতি যেহি অনন্তরা উপপত্তিং পটিলভতি. ভৰপটিলাভিযানীতি উপপত্তিভৰস্স পটিলাভায পচ্চযানি. সকদাগামিস্সাতি ইদং অপ্পহীনসংযোজনেসু অরিযেসু উত্তমকোটিযা গহিতং. যস্মা পন অন্তরাপরিনিব্বাযিস্স অন্তরা উপপত্তি নত্থি, যং পন সো তত্থ ঝানং সমাপজ্জতি, তং কুসলত্তা ‘‘উপপত্তিভৰস্স পচ্চযো’’ তেৰ সঙ্খ্যং গচ্ছতি. তস্মাস্স ‘‘উপপত্তিপটিলাভিযানি সংযোজনানি পহীনানি, ভৰপটিলাভিযানি সংযোজনানি অপ্পহীনানী’’তি ৰুত্তং. ওরম্ভাগিযেসু চ অপ্পহীনং উপাদায সকদাগামিস্স অৰিসেসেন ‘‘ওরম্ভাগিযানি সংযোজনানি অপ্পহীনানী’’তি ৰুত্তং. সেসমেত্থ উত্তানমেৰ.

২. পটিভানসুত্তৰণ্ণনা

১৩২. দুতিযে যুত্তপ্পটিভানো নো মুত্তপ্পটিভানোতি পঞ্হং কথেন্তো যুত্তমেৰ কথেতি, সীঘং পন ন কথেতি, সণিকমেৰ কথেতীতি অত্থো. ইমিনা নযেন সব্বপদানি ৰেদিতব্বানি.

৩. উগ্ঘটিতঞ্ঞূসুত্তৰণ্ণনা

১৩৩. ততিযে চতুন্নম্পি পুগ্গলানং ইমিনা সুত্তেন ৰিসেসো ৰেদিতব্বো –

‘‘কতমো চ পুগ্গলো উগ্ঘটিতঞ্ঞূ, যস্স পুগ্গলস্স সহ উদাহটৰেলায ধম্মাভিসমযো হোতি, অযং ৰুচ্চতি পুগ্গলো উগ্ঘটিতঞ্ঞূ. কতমো চ পুগ্গলো ৰিপঞ্চিতঞ্ঞূ, যস্স পুগ্গলস্স ৰিত্থারেন অত্থে ৰিভজিযমানে ধম্মাভিসমযো হোতি, অযং ৰুচ্চতি পুগ্গলো ৰিপঞ্চিতঞ্ঞূ. কতমো চ পুগ্গলো নেয্যো, যস্স পুগ্গলস্স উদ্দেসতো পরিপুচ্ছতো যোনিসোমনসিকরোতো কল্যাণমিত্তে সেৰতো ভজতো পযিরুপাসতো অনুপুব্বেন ধম্মাভিসমযো হোতি, অযং ৰুচ্চতি পুগ্গলো নেয্যো. কতমো চ পুগ্গলো পদপরমো, যস্স পুগ্গলস্স বহুম্পি সুণতো বহুম্পি ভণতো বহুম্পি ধারযতো বহুম্পি ৰাচযতো ন তায জাতিযা ধম্মাভিসমযো হোতি, অযং ৰুচ্চতি পুগ্গলো পদপরমো’’তি (পু. প. ১৪৮-১৫১).

৪. উট্ঠানফলসুত্তৰণ্ণনা

১৩৪. চতুত্থে উট্ঠানৰীরিযেনেৰ দিৰসং ৰীতিনামেত্ৰা তস্স নিস্সন্দফলমত্তং কিঞ্চিদেৰ লভিত্ৰা জীৰিকং কপ্পেতি, তং পন উট্ঠানং আগম্ম কিঞ্চি পুঞ্ঞফলং নপ্পটিলভতি, অযং উট্ঠানফলূপজীৰী ন কম্মফলূপজীৰী নাম. চাতুমহারাজিকে পন দেৰে আদিং কত্ৰা সব্বেপি দেৰা উট্ঠানৰীরিযেন ৰিনা পুঞ্ঞফলস্সেৰ উপজীৰনতো কম্মফলূপজীৰিনো ন উট্ঠানফলূপজীৰিনো নাম. রাজরাজমহামত্তাদযো উট্ঠানফলূপজীৰিনো চ কম্মফলূপজীৰিনো চ. নেরযিকসত্তা নেৰ উট্ঠানফলূপজীৰিনো ন কম্মফলূপজীৰিনো. ইমস্মিং সুত্তে পুঞ্ঞফলমেৰ কম্মফলন্তি অধিপ্পেতং, তঞ্চ তেসং নত্থি.

৫. সাৰজ্জসুত্তৰণ্ণনা

১৩৫. পঞ্চমে পঠমো অন্ধবালপুথুজ্জনো, দুতিযো অন্তরন্তরা কুসলকারকো লোকিযপুথুজ্জনো, ততিযো সোতাপন্নো, সকদাগামিঅনাগামিনোপি এতেনেৰ সঙ্গহিতা. চতুত্থো খীণাসৰো. সো হি একন্তেনেৰ অনৰজ্জো.

৬-৭. সীলসুত্তাদিৰণ্ণনা

১৩৬-১৩৭. ছট্ঠে পঠমো লোকিযমহাজনো, দুতিযো সুক্খৰিপস্সকো সোতাপন্নো চ সকদাগামী চ, ততিযো অনাগামী. সো হি যস্মা তঙ্খণিকম্পি উপপত্তিনিমিত্তকং ঝানং পটিলভতিযেৰ, তস্মা সুক্খৰিপস্সকোপি সমাধিস্মিং পরিপূরকারীযেৰ. চতুত্থো খীণাসৰোযেৰ. সো হি সব্বেসং সীলাদিপচ্চনীকানং পহীনত্তা সব্বত্থ পরিপূরকারী নাম. সত্তমেপি ছট্ঠে ৰুত্তনযেনেৰ পুগ্গলপরিচ্ছেদো ৰেদিতব্বো.

৮. নিকট্ঠসুত্তৰণ্ণনা

১৩৮. অট্ঠমে নিকট্ঠকাযোতি নিগ্গতকাযো. অনিকট্ঠচিত্তোতি অনুপৰিট্ঠচিত্তো. কাযেনেৰ গামতো নিক্খন্তো, চিত্তেন অরঞ্ঞে ৰসন্তোপি গামমেৰ পৰিট্ঠোতি ৰুত্তং হোতি. ইমিনা নযেন সব্বত্থ অত্থো ৰেদিতব্বো.

৯. ধম্মকথিকসুত্তৰণ্ণনা

১৩৯. নৰমে অসহিতন্তি অত্থেন অসংযুত্তং. ন কুসলা হোতীতি ন ছেকা হোতি. সহিতাসহিতস্সাতি অত্থনিস্সিতস্স ৰা অনিস্সিতস্স ৰা. এৰং সব্বত্থ অত্থো ৰেদিতব্বো.

১০. ৰাদীসুত্তৰণ্ণনা

১৪০. দসমে অত্থতো পরিযাদানং গচ্ছতীতি অট্ঠকথং পুচ্ছিতো পরিযাদানং পরিক্খযং গচ্ছতি, কথেতুং ন সক্কোতি. নো ব্যঞ্জনতোতি ব্যঞ্জনং পনস্স পৰত্ততি ন পরিযাদিযতি. এসেৰ নযো সব্বত্থাতি.

পুগ্গলৰগ্গো চতুত্থো.