(১৪) ৪. যোধাজীৰৰগ্গো

১. যোধাজীৰসুত্তৰণ্ণনা

১৩৪. চতুত্থস্স পঠমে যুদ্ধং উপজীৰতীতি যোধাজীৰো. রাজারহোতি রঞ্ঞো অনুচ্ছৰিকো. রাজভোগ্গোতি রঞ্ঞো উপভোগপরিভোগো. অঙ্গন্তেৰ সঙ্খ্যং গচ্ছতীতি হত্থো ৰিয পাদো ৰিয চ অৰস্সং ইচ্ছিতব্বত্তা অঙ্গন্তি সঙ্খ্যং গচ্ছতি. দূরে পাতী হোতীতি উদকে উসভমত্তং, থলে অট্ঠুসভমত্তং, ততো ৰা উত্তরিন্তি দূরে কণ্ডং পাতেতি. দুট্ঠগামণিঅভযস্স হি যোধাজীৰো নৰউসভমত্তং কণ্ডং পাতেসি, পচ্ছিমভৰে বোধিসত্তো যোজনপ্পমাণং. অক্খণৰেধীতি অৰিরাধিতৰেধী, অক্খণং ৰা ৰিজ্জু ৰিজ্জন্তরিকায ৰিজ্ঝিতুং সমত্থোতি অত্থো. মহতো কাযস্স পদালেতাতি একতোবদ্ধং ফলকসতম্পি মহিংসচম্মসতম্পি অঙ্গুট্ঠপমাণবহলং লোহপট্টম্পি চতুরঙ্গুলবহলং অসনপদরম্পি ৰিদত্থিবহলং উদুম্বরপদরম্পি দীঘন্তেন ৰালিকসকটম্পি ৰিনিৰিজ্ঝিতুং সমত্থোতি অত্থো. যংকিঞ্চি রূপন্তিআদি ৰিসুদ্ধিমগ্গে ৰিত্থারিতমেৰ. নেতং মমাতিআদি তণ্হামানদিট্ঠিপটিক্খেপৰসেন ৰুত্তং. সম্মপ্পঞ্ঞায পস্সতীতি সম্মা হেতুনা কারণেন সহৰিপস্সনায মগ্গপঞ্ঞায পস্সতি. পদালেতীতি অরহত্তমগ্গেন পদালেতি.

২. পরিসাসুত্তৰণ্ণনা

১৩৫. দুতিযে উক্কাচিতৰিনীতাতি অপ্পটিপুচ্ছিত্ৰা ৰিনীতা দুব্বিনীতপরিসা. পটিপুচ্ছাৰিনীতাতি পুচ্ছিত্ৰা ৰিনীতা সুৰিনীতপরিসা. যাৰতাৰিনীতাতি পমাণৰসেন ৰিনীতা, পমাণং ঞত্ৰা ৰিনীতপরিসাতি অত্থো. ‘‘যাৰতজ্ঝা’’তি পাল়িযা পন যাৰ অজ্ঝাসযাতি অত্থো, অজ্ঝাসযং ঞত্ৰা ৰিনীতপরিসাতি ৰুত্তং হোতি. ততিযং উত্তানমেৰ.

৪. উপ্পাদাসুত্তৰণ্ণনা

১৩৭. চতুত্থে ধম্মট্ঠিততাতি সভাৰট্ঠিততা. ধম্মনিযামতাতি সভাৰনিযামতা. সব্বে সঙ্খারাতি চতুভূমকসঙ্খারা. অনিচ্চাতি হুত্ৰা অভাৰট্ঠেন অনিচ্চা. দুক্খাতি সম্পটিপীল়নট্ঠেন দুক্খা. অনত্তাতি অৰসৰত্তনট্ঠেন অনত্তা. ইতি ইমস্মিং সুত্তে তীণি লক্খণানি মিস্সকানি কথিতানি.

৫. কেসকম্বলসুত্তৰণ্ণনা

১৩৮. পঞ্চমে তন্তাৰুতানং ৰত্থানন্তি পচ্চত্তে সামিৰচনং, তন্তেহি ৰাযিতৰত্থানীতি অত্থো. কেসকম্বলোতি মনুস্সকেসেহি ৰাযিতকম্বলো. পুথুসমণব্রাহ্মণৰাদানন্তি ইদম্পি পচ্চত্তে সামিৰচনং. পটিকিট্ঠোতি পচ্ছিমকো লামকো. মোঘপুরিসোতি তুচ্ছপুরিসো. পটিবাহতীতি পটিসেধেতি. খিপ্পং উড্ডেয্যাতি কুমিনং ওড্ডেয্য. ছট্ঠসত্তমানি উত্তানত্থানেৰ.

৮. অস্সখল়ুঙ্কসুত্তৰণ্ণনা

১৪১. অট্ঠমে অস্সখল়ুঙ্কোতি অস্সপোতো. ইদমস্স জৰস্মিং ৰদামীতি অযমস্স ঞাণজৰোতি ৰদামি. ইদমস্স ৰণ্ণস্মিং ৰদামীতি অযমস্স গুণৰণ্ণোতি ৰদামি. ইদমস্স আরোহপরিণাহস্মিন্তি অযমস্স উচ্চভাৰো পরিমণ্ডলভাৰোতি ৰদামীতি.

৯. অস্সপরস্সসুত্তৰণ্ণনা

১৪২. নৰমে অস্সপরস্সেতি অস্সেসু পরস্সে. পুরিসপরস্সেতি পুরিসেসু পরস্সে, পুরিসপুরিসেতি অত্থো. ইমস্মিং সুত্তে তীণি মগ্গফলানি কথিতানি. তত্থ অযং তীহি মগ্গেহি ঞাণজৰসম্পন্নোতি ৰেদিতব্বো.

১০. অস্সাজানীযসুত্তৰণ্ণনা

১৪৩. দসমে ভদ্রেতি ভদ্দকে. অস্সাজানীযেতি কারণাকারণং জাননকে অস্সে. পুরিসাজানীযেসুপি এসেৰ নযো. ইমস্মিং সুত্তে অরহত্তফলং কথিতং. তত্রাযং অরহত্তমগ্গেন ঞাণজৰসম্পন্নোতি ৰেদিতব্বো.

১১. পঠমমোরনিৰাপসুত্তৰণ্ণনা

১৪৪. একাদসমে অচ্চন্তনিট্ঠোতি অন্তং অতিক্কন্তনিট্ঠো, অকুপ্পনিট্ঠো ধুৰনিট্ঠোতি অত্থো. সেসং সদিসমেৰ.

১২. দুতিযমোরনিৰাপসুত্তৰণ্ণনা

১৪৫. দ্ৰাদসমে ইদ্ধিপাটিহারিযেনাতি ইজ্ঝনকপাটিহারিযেন. আদেসনাপাটিহারিযেনাতি আদিসিত্ৰা অপদিসিত্ৰা কথনঅনুকথনকথাপাটিহারিযেন.

১৩. ততিযমোরনিৰাপসুত্তৰণ্ণনা

১৪৬. তেরসমে সম্মাদিট্ঠিযাতি ফলসমাপত্তত্থায সম্মাদিট্ঠিযা. সম্মাঞাণেনাতি ফলঞাণেন. সম্মাৰিমুত্তিযাতি সেসেহি ফলসমাপত্তিধম্মেহি. ইমেসু তীসুপি সুত্তেসু খীণাসৰোৰ কথিতোতি.

যোধাজীৰৰগ্গো চতুত্থো.