৩. সঙ্খারসুত্তৰণ্ণনা

২৩. ততিযে সব্যাবজ্ঝন্তি সদুক্খং. কাযসঙ্খারন্তি কাযদ্ৰারে চেতনারাসিং. অভিসঙ্খরোতীতি আযূহতি রাসিং করোতি পিণ্ডং করোতি. ৰচীমনোদ্ৰারেসুপি এসেৰ নযো. সব্যাবজ্ঝং লোকন্তি সদুক্খং লোকং. সব্যাবজ্ঝা ফস্সা ফুসন্তীতি সদুক্খা ৰিপাকফস্সা ফুসন্তি. সব্যাবজ্ঝং ৰেদনং ৰেদিযতীতি সদুক্খং ৰিপাকৰেদনং ৰেদিযতি, সাবাধং নিরস্সাদন্তি অত্থো. সেয্যথাপি সত্তা নেরযিকাতি যথা নিরযে নিব্বত্তসত্তা একন্তদুক্খং ৰেদনং ৰেদিযন্তি, এৰং ৰেদিযতীতি অত্থো. কিং পন তত্থ উপেক্খাৰেদনা নত্থীতি? অত্থি, দুক্খৰেদনায পন বলৰভাৰেন সা অব্বোহারিকট্ঠানে ঠিতা. ইতি নিরযোৰ নিরযস্স উপমং কত্ৰা আহটো. তত্র পটিভাগউপমা নাম কির এসা.

সেয্যথাপি দেৰা সুভকিণ্হাতি ইধাপি দেৰলোকোৰ দেৰলোকস্স উপমং কত্ৰা আহটো. যস্মা পন হেট্ঠিমেসু ব্রহ্মলোকেসু সপ্পীতিকজ্ঝানৰিপাকো ৰত্ততি, সুভকিণ্হেসু নিপ্পীতিকো একন্তসুখোৰ, তস্মা তে অগ্গহেত্ৰা সুভকিণ্হাৰ কথিতা. ইতি অযম্পি তত্র পটিভাগউপমা নামাতি ৰেদিতব্বা.

ৰোকিণ্ণসুখদুক্খন্তি ৰোমিস্সকসুখদুক্খং. সেয্যথাপি মনুস্সাতি মনুস্সানং হি কালেন সুখং হোতি, কালেন দুক্খং. একচ্চে চ দেৰাতি কামাৰচরদেৰা. তেসম্পি কালেন সুখং হোতি, কালেন দুক্খং. তেসং হি হীনতরানং মহেসক্খতরা দেৰতা দিস্ৰা আসনা ৰুট্ঠাতব্বং হোতি, মগ্গা উক্কমিতব্বং, পারুতৰত্থং অপনেতব্বং, অঞ্জলিকম্মং কাতব্বন্তি তং সব্বম্পি দুক্খং নাম হোতি. একচ্চে চ ৰিনিপাতিকাতি ৰেমানিকপেতা. তে হি কালেন সম্পত্তিং অনুভৰন্তি কালেন কম্মন্তি ৰোকিণ্ণসুখদুক্খাৰ হোন্তি. ইতি ইমস্মিং সুত্তে তীণি সুচরিতানি লোকিযলোকুত্তরমিস্সকানি কথিতানীতি ৰেদিতব্বানি.