৩. পুগ্গলৰগ্গো

১. সমিদ্ধসুত্তৰণ্ণনা

২১. ততিযস্স পঠমে ঝানফস্সং পঠমং ফুসতি, পচ্ছা নিরোধং নিব্বানং সচ্ছিকরোতীতি কাযসক্খি. দিট্ঠন্তং পত্তোতি দিট্ঠিপ্পত্তো. সদ্দহন্তো ৰিমুত্তোতি সদ্ধাৰিমুত্তো. খমতীতি রুচ্চতি. অভিক্কন্ততরোতি অতিসুন্দরতরো. পণীততরোতি অতিপণীততরো. সদ্ধিন্দ্রিযং অধিমত্তং হোতীতি সমিদ্ধত্থেরস্স কির অরহত্তমগ্গক্খণে সদ্ধিন্দ্রিযং ধুরং অহোসি, সেসানি চত্তারি সহজাতিন্দ্রিযানি তস্সেৰ পরিৰারানি অহেসুং. ইতি থেরো অত্তনা পটিৰিদ্ধমগ্গং কথেন্তো এৰমাহ. মহাকোট্ঠিকত্থেরস্স পন অরহত্তমগ্গক্খণে সমাধিন্দ্রিযং ধুরং অহোসি, সেসানি চত্তারি ইন্দ্রিযানি তস্সেৰ পরিৰারানি অহেসুং. তস্মা সোপি সমাধিন্দ্রিযং অধিমত্তন্তি কথেন্তো অত্তনা পটিৰিদ্ধমগ্গমেৰ কথেসি. সারিপুত্তত্থেরস্স পন অরহত্তমগ্গক্খণে পঞ্ঞিন্দ্রিযং ধুরং অহোসি. সেসানি চত্তারি ইন্দ্রিযানি তস্সেৰ পরিৰারানি অহেসুং. তস্মা সোপি পঞ্ঞিন্দ্রিযং অধিমত্তন্তি কথেন্তো অত্তনা পটিৰিদ্ধমগ্গমেৰ কথেসি.

ন খ্ৰেত্থাতি ন খো এত্থ. একংসেন ব্যাকাতুন্তি একন্তেন ব্যাকরিতুং. অরহত্তায পটিপন্নোতি অরহত্তমগ্গসমঙ্গিং দস্সেতি. এৰমেতস্মিং সুত্তে তীহিপি থেরেহি অত্তনা পটিৰিদ্ধমগ্গোৰ কথিতো, সম্মাসম্বুদ্ধো পন ভুম্মন্তরেনেৰ কথেসি.

২. গিলানসুত্তৰণ্ণনা

২২. দুতিযে সপ্পাযানীতি হিতানি ৰুদ্ধিকরানি. পতিরূপন্তি অনুচ্ছৰিকং. নেৰ ৰুট্ঠাতি তম্হা আবাধাতি ইমিনা অতেকিচ্ছেন ৰাতাপমারাদিনা রোগেন সমন্নাগতো নিট্ঠাপত্তগিলানো কথিতো. ৰুট্ঠাতি তম্হা আবাধাতি ইমিনা খিপিতককচ্ছুতিণপুপ্ফকজরাদিভেদো অপ্পমত্তআবাধো কথিতো. লভন্তো সপ্পাযানি ভোজনানি নো অলভন্তোতি ইমিনা পন যেসং পটিজগ্গনেন ফাসুকং হোতি, সব্বেপি তে আবাধা কথিতা. এত্থ চ পতিরূপো উপট্ঠাকো নাম গিলানুপট্ঠাকঅঙ্গেহি সমন্নাগতো পণ্ডিতো দক্খো অনলসো ৰেদিতব্বো. গিলানুপট্ঠাকো অনুঞ্ঞাতোতি ভিক্খুসঙ্ঘেন দাতব্বোতি অনুঞ্ঞাতো. তস্মিঞ্হি গিলানে অত্তনো ধম্মতায যাপেতুং অসক্কোন্তে ভিক্খুসঙ্ঘেন তস্স ভিক্খুনো একো ভিক্খু চ সামণেরো চ ‘‘ইমং পটিজগ্গথা’’তি অপলোকেত্ৰা দাতব্বা. যাৰ পন তে তং পটিজগ্গন্তি, তাৰ গিলানস্স চ তেসঞ্চ দ্ৰিন্নং যেনত্থো, সব্বং ভিক্খুসঙ্ঘস্সেৰ ভারো.

অঞ্ঞেপি গিলানা উপট্ঠাতব্বাতি ইতরেপি দ্ৰে গিলানা উপট্ঠাপেতব্বা. কিং কারণা? যোপি হি নিট্ঠপত্তগিলানো, সো অনুপট্ঠিযমানো ‘‘সচে মং পটিজগ্গেয্যুং, ফাসুকং মে ভৰেয্য. ন খো পন মং পটিজগ্গন্তী’’তি মনোপদোসং কত্ৰা অপাযে নিব্বত্তেয্য. পটিজগ্গিযমানস্স পনস্স এৰং হোতি ‘‘ভিক্খুসঙ্ঘেন যং কাতব্বং, তং কতং. ময্হং পন কম্মৰিপাকো ঈদিসো’’তি. সো ভিক্খুসঙ্ঘে মেত্তং পচ্চুপট্ঠাপেত্ৰা সগ্গে নিব্বত্তিস্সতি. যো পন অপ্পমত্তকেন ব্যাধিনা সমন্নাগতো লভন্তোপি অলভন্তোপি ৰুট্ঠাতিযেৰ, তস্স ৰিনাপি ভেসজ্জেন ৰূপসমনব্যাধি ভেসজ্জে কতে খিপ্পতরং ৰূপসম্মতি. সো ততো বুদ্ধৰচনং ৰা উগ্গণ্হিতুং সক্খিস্সতি, সমণধম্মং ৰা কাতুং সক্খিস্সতি. ইমিনা কারণেন ‘‘অঞ্ঞেপি গিলানা উপট্ঠাতব্বা’’তি ৰুত্তং.

নেৰ ওক্কমতীতি নেৰ পৰিসতি. নিযামং কুসলেসু ধম্মেসু সম্মত্তন্তি কুসলেসু ধম্মেসু মগ্গনিযামসঙ্খাতং সম্মত্তং. ইমিনা পদপরমো পুগ্গলো কথিতো. দুতিযৰারেন উগ্ঘটিতঞ্ঞূ গহিতো সাসনে নালকত্থেরসদিসো বুদ্ধন্তরে একৰারং পচ্চেকবুদ্ধানং সন্তিকে ওৰাদং লভিত্ৰা পটিৰিদ্ধপচ্চেকবোধিঞাণো চ. ততিযৰারেন ৰিপঞ্চিতঞ্ঞূ পুগ্গলো কথিতো, নেয্যো পন তন্নিস্সিতোৰ হোতি.

ধম্মদেসনা অনুঞ্ঞাতাতি মাসস্স অট্ঠ ৰারে ধম্মকথা অনুঞ্ঞাতা. অঞ্ঞেসম্পি ধম্মো দেসেতব্বোতি ইতরেসম্পি ধম্মো কথেতব্বো. কিং কারণা? পদপরমস্স হি ইমস্মিং অত্তভাৰে ধম্মং পটিৰিজ্ঝিতুং অসক্কোন্তস্সাপি অনাগতে পচ্চযো ভৰিস্সতি. যো পন তথাগতস্স রূপদস্সনং লভন্তোপি অলভন্তোপি ধম্মৰিনযঞ্চ সৰনায লভন্তোপি অলভন্তোপি ধম্মং অভিসমেতি, সো অলভন্তো তাৰ অভিসমেতি. লভন্তো পন খিপ্পমেৰ অভিসমেস্সতীতি ইমিনা কারণেন তেসং ধম্মো দেসেতব্বো. ততিযস্স পন পুনপ্পুনং দেসেতব্বোৰ.

৩. সঙ্খারসুত্তৰণ্ণনা

২৩. ততিযে সব্যাবজ্ঝন্তি সদুক্খং. কাযসঙ্খারন্তি কাযদ্ৰারে চেতনারাসিং. অভিসঙ্খরোতীতি আযূহতি রাসিং করোতি পিণ্ডং করোতি. ৰচীমনোদ্ৰারেসুপি এসেৰ নযো. সব্যাবজ্ঝং লোকন্তি সদুক্খং লোকং. সব্যাবজ্ঝা ফস্সা ফুসন্তীতি সদুক্খা ৰিপাকফস্সা ফুসন্তি. সব্যাবজ্ঝং ৰেদনং ৰেদিযতীতি সদুক্খং ৰিপাকৰেদনং ৰেদিযতি, সাবাধং নিরস্সাদন্তি অত্থো. সেয্যথাপি সত্তা নেরযিকাতি যথা নিরযে নিব্বত্তসত্তা একন্তদুক্খং ৰেদনং ৰেদিযন্তি, এৰং ৰেদিযতীতি অত্থো. কিং পন তত্থ উপেক্খাৰেদনা নত্থীতি? অত্থি, দুক্খৰেদনায পন বলৰভাৰেন সা অব্বোহারিকট্ঠানে ঠিতা. ইতি নিরযোৰ নিরযস্স উপমং কত্ৰা আহটো. তত্র পটিভাগউপমা নাম কির এসা.

সেয্যথাপি দেৰা সুভকিণ্হাতি ইধাপি দেৰলোকোৰ দেৰলোকস্স উপমং কত্ৰা আহটো. যস্মা পন হেট্ঠিমেসু ব্রহ্মলোকেসু সপ্পীতিকজ্ঝানৰিপাকো ৰত্ততি, সুভকিণ্হেসু নিপ্পীতিকো একন্তসুখোৰ, তস্মা তে অগ্গহেত্ৰা সুভকিণ্হাৰ কথিতা. ইতি অযম্পি তত্র পটিভাগউপমা নামাতি ৰেদিতব্বা.

ৰোকিণ্ণসুখদুক্খন্তি ৰোমিস্সকসুখদুক্খং. সেয্যথাপি মনুস্সাতি মনুস্সানং হি কালেন সুখং হোতি, কালেন দুক্খং. একচ্চে চ দেৰাতি কামাৰচরদেৰা. তেসম্পি কালেন সুখং হোতি, কালেন দুক্খং. তেসং হি হীনতরানং মহেসক্খতরা দেৰতা দিস্ৰা আসনা ৰুট্ঠাতব্বং হোতি, মগ্গা উক্কমিতব্বং, পারুতৰত্থং অপনেতব্বং, অঞ্জলিকম্মং কাতব্বন্তি তং সব্বম্পি দুক্খং নাম হোতি. একচ্চে চ ৰিনিপাতিকাতি ৰেমানিকপেতা. তে হি কালেন সম্পত্তিং অনুভৰন্তি কালেন কম্মন্তি ৰোকিণ্ণসুখদুক্খাৰ হোন্তি. ইতি ইমস্মিং সুত্তে তীণি সুচরিতানি লোকিযলোকুত্তরমিস্সকানি কথিতানীতি ৰেদিতব্বানি.

৪. বহুকারসুত্তৰণ্ণনা

২৪. চতুত্থে তযোমে, ভিক্খৰে, পুগ্গলাতি তযো আচরিযপুগ্গলা. পুগ্গলস্স বহুকারাতি অন্তেৰাসিকপুগ্গলস্স বহূপকারা. বুদ্ধন্তি সব্বঞ্ঞুবুদ্ধং. সরণং গতো হোতীতি অৰস্সযং গতো হোতি. ধম্মন্তি সতন্তিকং নৰলোকুত্তরধম্মং. সঙ্ঘন্তি অট্ঠঅরিযপুগ্গলসমূহং. ইদঞ্চ পন সরণগমনং অগ্গহিতসরণপুব্বস্স অকতাভিনিৰেসস্স ৰসেন ৰুত্তং. ইতি ইমস্মিং সুত্তে সরণদাযকো সোতাপত্তিমগ্গসম্পাপকো অরহত্তমগ্গসম্পাপকোতি তযো আচরিযা বহুকারাতি আগতা, পব্বজ্জাদাযকো বুদ্ধৰচনদাযকো কম্মৰাচাচরিযো সকদাগামিমগ্গসম্পাপকো অনাগামিমগ্গসম্পাপকোতি ইমে আচরিযা ন আগতা, কিং এতে ন বহুকারাতি? নো, ন বহুকারা. অযং পন দেসনা দুৰিধেন পরিচ্ছিন্না. তস্মা সব্বেপেতে বহুকারা. তেসু সরণগমনস্মিংযেৰ অকতাভিনিৰেসো ৰট্টতি, চতুপারিসুদ্ধিসীলকসিণপরিকম্মৰিপস্সনাঞাণানি পন পঠমমগ্গসন্নিস্সিতানি হোন্তি, উপরি দ্ৰে মগ্গা চ ফলানি চ অরহত্তমগ্গসন্নিস্সিতানীতি ৰেদিতব্বানি.

ইমিনা পুগ্গলেনাতি ইমিনা অন্তেৰাসিকপুগ্গলেন. ন সুপ্পতিকারং ৰদামীতি পতিকারং কাতুং ন সুকরন্তি ৰদামি. অভিৰাদনাদীসু অনেকসতৰারং অনেকসহস্সৰারম্পি হি পঞ্চপতিট্ঠিতেন নিপতিত্ৰা ৰন্দন্তো আসনা ৰুট্ঠায পচ্চুগ্গচ্ছন্তো দিট্ঠদিট্ঠক্খণে অঞ্জলিং পগ্গণ্হন্তো অনুচ্ছৰিকং সামীচিকম্মং করোন্তো দিৰসে দিৰসে চীৰরসতং চীৰরসহস্সং পিণ্ডপাতসতং পিণ্ডপাতসহস্সং দদমানো চক্কৰাল়পরিযন্তেন সব্বরতনমযং আৰাসং করোন্তো সপ্পিনৰনীতাদিনানপ্পকারং ভেসজ্জং অনুপ্পদজ্জমানো নেৰ সক্কোতি আচরিযেন কতস্স পতিকারং নাম কাতুন্তি এৰমত্থো ৰেদিতব্বো.

৫. ৰজিরূপমসুত্তৰণ্ণনা

২৫. পঞ্চমে অরুকূপমচিত্তোতি পুরাণৰণসদিসচিত্তো. ৰিজ্জূপমচিত্তোতি ইত্তরকালোভাসনেন ৰিজ্জুসদিসচিত্তো. ৰজিরূপমচিত্তোতি কিলেসানং মূলঘাতকরণসমত্থতায ৰজিরেন সদিসচিত্তো. অভিসজ্জতীতি লগ্গতি. কুপ্পতীতি কোপৰসেন কুপ্পতি. ব্যাপজ্জতীতি পকতিভাৰং পজহতি, পূতিকো হোতি. পতিত্থীযতীতি থিনভাৰং থদ্ধভাৰং আপজ্জতি. কোপন্তি দুব্বলকোধং. দোসন্তি দুস্সনৰসেন ততো বলৰতরং. অপ্পচ্চযন্তি অতুট্ঠাকারং দোমনস্সং. দুট্ঠারুকোতি পুরাণৰণো. কট্ঠেনাতি দণ্ডককোটিযা. কঠলেনাতি কপালেন. আসৰং দেতীতি অপরাপরং সৰতি. পুরাণৰণো হি অত্তনো ধম্মতাযেৰ পুব্বং লোহিতং যূসন্তি ইমানি তীণি সৰতি, ঘট্টিতো পন তানি অধিকতরং সৰতি.

এৰমেৰ খোতি এত্থ ইদং ওপম্মসংসন্দনং – দুট্ঠারুকো ৰিয হি কোধনপুগ্গলো, তস্স অত্তনো ধম্মতায সৰনং ৰিয কোধনস্সপি অত্তনো ধম্মতায উদ্ধুমাতস্স ৰিয চণ্ডিকতস্স চরণং, কট্ঠেন ৰা কঠলায ৰা ঘট্টনং ৰিয অপ্পমত্তং ৰচনং, ভিয্যোসোমত্তায সৰনং ৰিয ‘‘মাদিসং নাম এস এৰং ৰদতী’’তি ভিয্যোসোমত্তায উদ্ধুমাযনভাৰো দট্ঠব্বো.

রত্তন্ধকারতিমিসাযন্তি রত্তিং চক্খুৰিঞ্ঞাণুপ্পত্তিনিৰারণেন অন্ধভাৰকরণে বহলতমে. ৰিজ্জন্তরিকাযাতি ৰিজ্জুপ্পত্তিক্খণে. ইধাপি ইদং ওপম্মসংসন্দনং – চক্খুমা পুরিসো ৰিয হি যোগাৰচরো দট্ঠব্বো, অন্ধকারং ৰিয সোতাপত্তিমগ্গৰজ্ঝা কিলেসা, ৰিজ্জুসঞ্চরণং ৰিয সোতাপত্তিমগ্গঞাণস্স উপ্পত্তিকালো, ৰিজ্জন্তরিকায চক্খুমতো পুরিসস্স সমন্তা রূপদস্সনং ৰিয সোতাপত্তিমগ্গক্খণে নিব্বানদস্সনং, পুন অন্ধকারাৰত্থরণং ৰিয সকদাগামিমগ্গৰজ্ঝা কিলেসা, পুন ৰিজ্জুসঞ্চরণং ৰিয সকদাগামিমগ্গঞাণস্স উপ্পাদো, ৰিজ্জন্তরিকায চক্খুমতো পুরিসস্স সমন্তা রূপদস্সনং ৰিয সকদাগামিমগ্গক্খণে নিব্বানদস্সনং, পুন অন্ধকারাৰত্থরণং ৰিয অনাগামিমগ্গৰজ্ঝা কিলেসা, পুন ৰিজ্জুসঞ্চরণং ৰিয অনাগামিমগ্গঞাণস্স উপ্পাদো, ৰিজ্জন্তরিকায চক্খুমতো পুরিসস্স সমন্তা রূপদস্সনং ৰিয অনাগামিমগ্গক্খণে নিব্বানদস্সনং ৰেদিতব্বং.

ৰজিরূপমচিত্ততাযপি ইদং ওপম্মসংসন্দনং – ৰজিরং ৰিয হি অরহত্তমগ্গঞাণং দট্ঠব্বং, মণিগণ্ঠিপাসাণগণ্ঠি ৰিয অরহত্তমগ্গৰজ্ঝা কিলেসা, ৰজিরস্স মণিগণ্ঠিম্পি ৰা পাসাণগণ্ঠিম্পি ৰা ৰিনিৰিজ্ঝিত্ৰা অগমনভাৰস্স নত্থিতা ৰিয অরহত্তমগ্গঞাণেন অচ্ছেজ্জানং কিলেসানং নত্থিভাৰো, ৰজিরেন নিব্বিদ্ধৰেধস্স পুন অপতিপূরণং ৰিয অরহত্তমগ্গেন ছিন্নানং কিলেসানং পুন অনুপ্পাদো দট্ঠব্বোতি.

৬. সেৰিতব্বসুত্তৰণ্ণনা

২৬. ছট্ঠে সেৰিতব্বোতি উপসঙ্কমিতব্বো. ভজিতব্বোতি অল্লীযিতব্বো. পযিরুপাসিতব্বোতি সন্তিকে নিসীদনৰসেন পুনপ্পুনং উপাসিতব্বো. সক্কত্ৰা গরুং কত্ৰাতি সক্কারঞ্চেৰ গরুকারঞ্চ কত্ৰা. হীনো হোতি সীলেনাতিআদীসু উপাদাযুপাদায হীনতা ৰেদিতব্বা. তত্থ যো হি পঞ্চ সীলানি রক্খতি, সো দস সীলানি রক্খন্তেন ন সেৰিতব্বো. যো দস সীলানি রক্খতি, সো চতুপারিসুদ্ধিসীলং রক্খন্তেন ন সেৰিতব্বো. অঞ্ঞত্র অনুদ্দযা অঞ্ঞত্র অনুকম্পাতি ঠপেত্ৰা অনুদ্দযঞ্চ অনুকম্পঞ্চ. অত্তনো অত্থাযেৰ হি এৰরূপো পুগ্গলো ন সেৰিতব্বো, অনুদ্দযানুকম্পাৰসেন পন তং উপসঙ্কমিতুং ৰট্টতি.

সীলসামঞ্ঞগতানং সতন্তি সীলেন সমানভাৰং গতানং সন্তানং. সীলকথা চ নো ভৰিস্সতীতি এৰং সমানসীলানং অম্হাকং সীলমেৰ আরব্ভ কথা ভৰিস্সতি. সা চ নো পৰত্তিনী ভৰিস্সতীতি সা চ অম্হাকং কথা দিৰসম্পি কথেন্তানং পৰত্তিস্সতি ন পটিহঞ্ঞিস্সতি. সা চ নো ফাসু ভৰিস্সতীতি সা চ দিৰসম্পি পৰত্তমানা সীলকথা অম্হাকং ফাসুৰিহারো সুখৰিহারো ভৰিস্সতি. সমাধিপঞ্ঞাকথাসুপি এসেৰ নযো.

সীলক্খন্ধন্তি সীলরাসিং. তত্থ তত্থ পঞ্ঞায অনুগ্গহেস্সামীতি এত্থ সীলস্স অসপ্পাযে অনুপকারধম্মে ৰজ্জেত্ৰা সপ্পাযে উপকারধম্মে সেৰন্তো তস্মিং তস্মিং ঠানে সীলক্খন্ধং পঞ্ঞায অনুগ্গণ্হাতি নাম. সমাধিপঞ্ঞাক্খন্ধেসুপি এসেৰ নযো. নিহীযতীতি অত্তনো হীনতরং পুগ্গলং সেৰন্তো খারপরিস্সাৰনে আসিত্তউদকং ৰিয সততং সমিতং হাযতি পরিহাযতি. তুল্যসেৰীতি অত্তনা সমানসেৰী. সেট্ঠমুপনমন্তি সেট্ঠং পুগ্গলং ওণমন্তো. উদেতি খিপ্পন্তি খিপ্পমেৰ ৰড্ঢতি. তস্মা অত্তনো উত্তরিং ভজেথাতি যস্মা সেট্ঠং পুগ্গলং উপনমন্তো উদেতি খিপ্পং, তস্মা অত্তনো উত্তরিতরং ৰিসিট্ঠতরং ভজেথ.

৭. জিগুচ্ছিতব্বসুত্তৰণ্ণনা

২৭. সত্তমে জিগুচ্ছিতব্বোতি গূথং ৰিয জিগুচ্ছিতব্বো. অথ খো নন্তি অথ খো অস্স. কিত্তিসদ্দোতি কথাসদ্দো. এৰমেৰ খোতি এত্থ গূথকূপো ৰিয দুস্সীল্যং দট্ঠব্বং. গূথকূপে পতিত্ৰা ঠিতো ধম্মনিঅহি ৰিয দুস্সীলপুগ্গলো. গূথকূপতো উদ্ধরিযমানেন তেন অহিনা পুরিসস্স সরীরং আরুল়্হেনাপি অদট্ঠভাৰো ৰিয দুস্সীলং সেৰমানস্সাপি তস্স কিরিযায অকরণভাৰো. সরীরং গূথেন মক্খেত্ৰা অহিনা গতকালো ৰিয দুস্সীলং সেৰমানস্স পাপকিত্তিসদ্দঅব্ভুগ্গমনকালো ৰেদিতব্বো.

তিন্দুকালাতন্তি তিন্দুকরুক্খঅলাতং. ভিয্যোসোমত্তায চিচ্চিটাযতীতি তং হি ঝাযমানং পকতিযাপি পপটিকাযো মুঞ্চন্তং চিচ্চিটাতি ‘‘চিটিচিটা’’তি সদ্দং করোতি, ঘট্টিতং পন অধিমত্তং করোতীতি অত্থো. এৰমেৰ খোতি এৰমেৰং কোধনো অত্তনো ধম্মতাযপি উদ্ধতো চণ্ডিকতো হুত্ৰা চরতি, অপ্পমত্তকং পন ৰচনং সুতকালে ‘‘মাদিসং নাম এৰং ৰদতি এৰং ৰদতী’’তি অতিরেকতরং উদ্ধতো চণ্ডিকতো হুত্ৰা চরতি. গূথকূপোতি গূথপুণ্ণকূপো, গূথরাসিযেৰ ৰা. ওপম্মসংসন্দনং পনেত্থ পুরিমনযেনেৰ ৰেদিতব্বং. তস্মা এৰরূপো পুগ্গলো অজ্ঝুপেক্খিতব্বো ন সেৰিতব্বোতি যস্মা কোধনো অতিসেৰিযমানো অতিউপসঙ্কমিযমানোপি কুজ্ঝতিযেৰ, ‘‘কিং ইমিনা’’তি পটিক্কমন্তেপি কুজ্ঝতিযেৰ. তস্মা পলালগ্গি ৰিয অজ্ঝুপেক্খিতব্বো ন সেৰিতব্বো ন ভজিতব্বো. কিং ৰুত্তং হোতি? যো হি পলালগ্গিং অতিউপসঙ্কমিত্ৰা তপ্পতি, তস্স সরীরং ঝাযতি. যো অতিপটিক্কমিত্ৰা তপ্পতি, তস্স সীতং ন ৰূপসম্মতি. অনুপসঙ্কমিত্ৰা অপটিক্কমিত্ৰা পন মজ্ঝত্তভাৰেন তপ্পন্তস্স সীতং ৰূপসম্মতি, তস্মা পলালগ্গি ৰিয কোধনো পুগ্গলো মজ্ঝত্তভাৰেন অজ্ঝুপেক্খিতব্বো, ন সেৰিতব্বো ন ভজিতব্বো ন পযিরুপাসিতব্বো.

কল্যাণমিত্তোতি সুচিমিত্তো. কল্যাণসহাযোতি সুচিসহাযো. সহাযা নাম সহগামিনো সদ্ধিংচরা. কল্যাণসম্পৰঙ্কোতি কল্যাণেসু সুচিপুগ্গলেসু সম্পৰঙ্কো, তন্নিন্নতপ্পোণতপ্পব্ভারমানসোতি অত্থো.

৮. গূথভাণীসুত্তৰণ্ণনা

২৮. অট্ঠমে গূথভাণীতি যো গূথং ৰিয দুগ্গন্ধকথং কথেতি. পুপ্ফভাণীতি যো পুপ্ফানি ৰিয সুগন্ধকথং কথেতি. মধুভাণীতি যো মধু ৰিয মধুরকথং কথেতি. সভগ্গতোতি সভায ঠিতো. পরিসগ্গতোতি গামপরিসায ঠিতো. ঞাতিমজ্ঝগতোতি ঞাতীনং মজ্ঝে ঠিতো. পূগমজ্ঝগতোতি সেণীনং মজ্ঝে ঠিতো. রাজকুলমজ্ঝগতোতি রাজকুলস্স মজ্ঝে মহাৰিনিচ্ছযে ঠিতো. অভিনীতোতি পুচ্ছনত্থাযানীতো. সক্খিপুট্ঠোতি সক্খিং কত্ৰা পুচ্ছিতো. এহম্ভো পুরিসাতি আলপনমেতং. অত্তহেতু ৰা পরহেতু ৰাতি অত্তনো ৰা পরস্স ৰা হত্থপাদাদিহেতু ৰা ধনহেতু ৰা. আমিসকিঞ্চিক্খহেতু ৰাতি এত্থ আমিসন্তি লঞ্জো অধিপ্পেতো. কিঞ্চিক্খন্তি যং ৰা তং ৰা অপ্পমত্তকং অন্তমসো তিত্তিরিযৰট্টকসপ্পিপিণ্ডনৰনীতপিণ্ডাদিমত্তকস্স লঞ্জস্স হেতূতি অত্থো. সম্পজানমুসা ভাসিতা হোতীতি জানন্তোযেৰ মুসাৰাদং কত্তা হোতি.

নেলাতি এলং ৰুচ্চতি দোসো, নাস্স এলন্তি নেলা, নিদ্দোসাতি অত্থো. ‘‘নেলঙ্গো সেতপচ্ছাদো’’তি (উদা. ৬৫) এত্থ ৰুত্তসীলং ৰিয. কণ্ণসুখাতি ব্যঞ্জনমধুরতায কণ্ণানং সুখা, সূচিৰিজ্ঝনং ৰিয কণ্ণসূলং ন জনেতি. অত্থমধুরতায সকলসরীরে কোপং অজনেত্ৰা পেমং জনেতীতি পেমনীযা. হদযং গচ্ছতি অপ্পটিহঞ্ঞমানা সুখেন চিত্তং পৰিসতীতি হদযঙ্গমা. গুণপরিপুণ্ণতায পুরে ভৰাতি পোরী. পুরে সংৰড্ঢনারী ৰিয সুকুমারাতিপি পোরী. পুরস্স এসাতিপি পোরী. পুরস্স এসাতি নগরৰাসীনং কথাতি অত্থো. নগরৰাসিনো হি যুত্তকথা হোন্তি, পিতিমত্তং পিতাতি, মাতিমত্তং মাতাতি, ভাতিমত্তং ভাতাতি ৰদন্তি. এৰরূপী কথা বহুনো জনস্স কন্তা হোতীতি বহুজনকন্তা. কন্তভাৰেনেৰ বহুনো জনস্স মনাপা চিত্তৰুদ্ধিকরাতি বহুজনমনাপা.

৯. অন্ধসুত্তৰণ্ণনা

২৯. নৰমে চক্খু ন হোতীতি পঞ্ঞাচক্খু ন হোতি. ফাতিং করেয্যাতি ফীতং ৰড্ঢিতং করেয্য. সাৰজ্জানৰজ্জেতি সদোসনিদ্দোসে. হীনপ্পণীতেতি অধমুত্তমে. কণ্হসুক্কসপ্পটিভাগেতি কণ্হসুক্কাযেৰ অঞ্ঞমঞ্ঞং পটিবাহনতো পটিপক্খৰসেন সপ্পটিভাগাতি ৰুচ্চন্তি. অযং পনেত্থ সঙ্খেপো – কুসলে ধম্মে ‘‘কুসলা ধম্মা’’তি জানেয্য, অকুসলে ধম্মে ‘‘অকুসলা ধম্মা’’তি জানেয্য. সাৰজ্জাদীসুপি এসেৰ নযো. কণ্হসুক্কসপ্পটিভাগেসু পন কণ্হধম্মে ‘‘সুক্কসপ্পটিভাগা’’তি জানেয্য, সুক্কধম্মে ‘‘কণ্হসপ্পটিভাগা’’তি যেন পঞ্ঞাচক্খুনা জানেয্য, তথারূপম্পিস্স চক্খু ন হোতীতি. ইমিনা নযেন সেসৰারেসুপি অত্থো ৰেদিতব্বো.

ন চেৰ ভোগা তথারূপাতি তথাজাতিকা ভোগাপিস্স ন হোন্তি. ন চ পুঞ্ঞানি কুব্বতীতি পুঞ্ঞানি চ ন করোতি. এত্তাৰতা ভোগুপ্পাদনচক্খুনো চ পুঞ্ঞকরণচক্খুনো চ অভাৰো ৰুত্তো. উভযত্থ কলিগ্গাহোতি ইধলোকে চ পরলোকে চাতি উভযস্মিম্পি অপরদ্ধগ্গাহো, পরাজযগ্গাহো হোতীতি অত্থো. অথ ৰা উভযত্থ কলিগ্গাহোতি উভযেসম্পি দিট্ঠধম্মিকসম্পরাযিকানং অত্থানং কলিগ্গাহো, পরাজযগ্গাহোতি অত্থো. ধম্মাধম্মেনাতি দসকুসলকম্মপথধম্মেনপি দসঅকুসলকম্মপথঅধম্মেনপি. সঠোতি কেরাটিকো. ভোগানি পরিযেসতীতি ভোগে গৰেসতি. থেয্যেন কূটকম্মেন, মুসাৰাদেন চূভযন্তি থেয্যাদীসু উভযেন পরিযেসতীতি অত্থো. কথং? থেয্যেন কূটকম্মেন চ পরিযেসতি, থেয্যেন মুসাৰাদেন চ পরিযেসতি, কূটকম্মেন মুসাৰাদেন চ পরিযেসতি. সঙ্ঘাতুন্তি সঙ্ঘরিতুং. ধম্মলদ্ধেহীতি দসকুসলকম্মপথধম্মং অকোপেত্ৰা লদ্ধেহি. উট্ঠানাধিগতন্তি ৰীরিযেন অধিগতং. অব্যগ্ঘমানসোতি নিব্বিচিকিচ্ছচিত্তো. ভদ্দকং ঠানন্তি সেট্ঠং দেৰট্ঠানং. ন সোচতীতি যস্মিং ঠানে অন্তোসোকেন ন সোচতি.

১০. অৰকুজ্জসুত্তৰণ্ণনা

৩০. দসমে অৰকুজ্জপঞ্ঞোতি অধোমুখপঞ্ঞো. উচ্ছঙ্গপঞ্ঞোতি উচ্ছঙ্গসদিসপঞ্ঞো. পুথুপঞ্ঞোতি ৰিত্থারিকপঞ্ঞো. আদিকল্যাণন্তিআদীসু আদীতি পুব্বপট্ঠপনা. মজ্ঝন্তি কথাৰেমজ্ঝং. পরিযোসানন্তি সন্নিট্ঠানং. ইতিস্স তে ধম্মং কথেন্তা পুব্বপট্ঠপনেপি কল্যাণং ভদ্দকং অনৰজ্জমেৰ কত্ৰা কথেন্তি, ৰেমজ্ঝেপি পরিযোসানেপি. এত্থ চ অত্থি দেসনায আদিমজ্ঝপরিযোসানানি, অত্থি সাসনস্স. তত্থ দেসনায তাৰ চতুপ্পদিকগাথায পঠমপদং আদি, দ্ৰে পদানি মজ্ঝং, অৰসানপদং পরিযোসানং. একানুসন্ধিকস্স সুত্তস্স নিদানং আদি, অনুসন্ধি মজ্ঝং, ইদমৰোচাতি অপ্পনা পরিযোসানং. অনেকানুসন্ধিকস্স পঠমো অনুসন্ধি আদি, ততো পরং একো ৰা অনেকে ৰা মজ্ঝং, পচ্ছিমো পরিযোসানং. অযং তাৰ দেসনায নযো. সাসনস্স পন সীলং আদি, সমাধি মজ্ঝং, ৰিপস্সনা পরিযোসানং. সমাধি ৰা আদি, ৰিপস্সনা মজ্ঝং, মগ্গো পরিযোসানং. ৰিপস্সনা ৰা আদি, মগ্গো মজ্ঝং, ফলং পরিযোসানং. মগ্গো ৰা আদি, ফলং মজ্ঝং, নিব্বানং পরিযোসানং. দ্ৰে দ্ৰে ৰা কযিরমানে সীলসমাধযো আদি, ৰিপস্সনামগ্গা মজ্ঝং, ফলনিব্বানানি পরিযোসানং.

সাত্থন্তি সাত্থকং কত্ৰা দেসেন্তি. সব্যঞ্জনন্তি অক্খরপারিপূরিং কত্ৰা দেসেন্তি. কেৰলপরিপুণ্ণন্তি সকলপরিপুণ্ণং অনূনং কত্ৰা দেসেন্তি. পরিসুদ্ধন্তি পরিসুদ্ধং নিজ্জটং নিগ্গণ্ঠিং কত্ৰা দেসেন্তি. ব্রহ্মচরিযং পকাসেন্তীতি এৰং দেসেন্তা চ সেট্ঠচরিযভূতং সিক্খত্তযসঙ্গহিতং অরিযং অট্ঠঙ্গিকং মগ্গং পকাসেন্তি. নেৰ আদিং মনসি করোতীতি নেৰ পুব্বপট্ঠপনং মনসি করোতি.

কুম্ভোতি ঘটো. নিকুজ্জোতি অধোমুখো ঠপিতো. এৰমেৰ খোতি এত্থ কুম্ভো নিকুজ্জো ৰিয অৰকুজ্জপঞ্ঞো পুগ্গলো দট্ঠব্বো, উদকাসিঞ্চনকালো ৰিয ধম্মদেসনায লদ্ধকালো, উদকস্স ৰিৰট্টনকালো ৰিয তস্মিং আসনে নিসিন্নস্স উগ্গহেতুং অসমত্থকালো, উদকস্স অসণ্ঠানকালো ৰিয ৰুট্ঠহিত্ৰা অসল্লক্খণকালো ৰেদিতব্বো.

আকিণ্ণানীতি পক্খিত্তানি. সতিসম্মোসায পকিরেয্যাতি মুট্ঠস্সতিতায ৰিকিরেয্য. এৰমেৰ খোতি এত্থ উচ্ছঙ্গো ৰিয উচ্ছঙ্গপঞ্ঞো পুগ্গলো দট্ঠব্বো, নানাখজ্জকানি ৰিয নানপ্পকারং বুদ্ধৰচনং, উচ্ছঙ্গে নানাখজ্জকানি খাদন্তস্স নিসিন্নকালো ৰিয তস্মিং আসনে নিসিন্নস্স উগ্গণ্হনকালো, ৰুট্ঠহন্তস্স সতিসম্মোসা পকিরণকালো ৰিয তস্মা আসনা ৰুট্ঠায গচ্ছন্তস্স অসল্লক্খণকালো ৰেদিতব্বো.

উক্কুজ্জোতি উপরিমুখো ঠপিতো. সণ্ঠাতীতি পতিট্ঠহতি. এৰমেৰ খোতি এত্থ উপরিমুখো ঠপিতো কুম্ভো ৰিয পুথুপঞ্ঞো পুগ্গলো দট্ঠব্বো, উদকস্স আসিত্তকালো ৰিয দেসনায লদ্ধকালো, উদকস্স সণ্ঠানকালো ৰিয তত্থ নিসিন্নস্স উগ্গণ্হনকালো, নো ৰিৰট্টনকালো ৰিয ৰুট্ঠায গচ্ছন্তস্স সল্লক্খণকালো ৰেদিতব্বো.

দুম্মেধোতি নিপ্পঞ্ঞো. অৰিচক্খণোতি সংৰিদহনপঞ্ঞায রহিতো. গন্তাতি গমনসীলো. সেয্যো এতেন ৰুচ্চতীতি এতস্মা পুগ্গলা উত্তরিতরোতি ৰুচ্চতি. ধম্মানুধম্মপ্পটিপন্নোতি নৰলোকুত্তরধম্মস্স অনুধম্মং সহ সীলেন পুব্বভাগপটিপদং পটিপন্নো. দুক্খস্সাতি ৰট্টদুক্খস্স. অন্তকরো সিযাতি কোটিকরো পরিচ্ছেদকরো পরিৰটুমকরো ভৰেয্যাতি.

পুগ্গলৰগ্গো ততিযো.