অনুরুদ্ধত্থেরৰত্থু

১৯২. পঞ্চমে দিব্বচক্খুকানং যদিদং অনুরুদ্ধোতি দিব্বচক্খুকভিক্খূনং অনুরুদ্ধত্থেরো অগ্গোতি ৰদতি. তস্স চিণ্ণৰসিতায অগ্গভাৰো ৰেদিতব্বো. থেরো কির ভোজনপপঞ্চমত্তং ঠপেত্ৰা সেসকালং আলোকং ৰড্ঢেত্ৰা দিব্বচক্খুনা সত্তে ওলোকেন্তোৰ ৰিহরতি. ইতি অহোরত্তং চিণ্ণৰসিতায এস দিব্বচক্খুকানং অগ্গো নাম জাতো. অপিচ কপ্পসতসহস্সং পত্থিতভাৰেনপেস দিব্বচক্খুকানং অগ্গোৰ জাতো.

তত্রস্স পঞ্হকম্মে অযমনুপুব্বিকথা – অযম্পি হি কুলপুত্তো পদুমুত্তরস্সেৰ ভগৰতো কালে পচ্ছাভত্তং ধম্মস্সৰনত্থং ৰিহারং গচ্ছন্তেন মহাজনেন সদ্ধিং অগমাসি. অযং হি তদা অঞ্ঞতরো অপাকটনামো ইস্সরকুটুম্বিকো অহোসি. সো দসবলং ৰন্দিত্ৰা পরিসপরিযন্তে ঠিতো ধম্মকথং সুণাতি. সত্থা দেসনং যথানুসন্ধিকং ঘটেত্ৰা একং দিব্বচক্খুকং ভিক্খুং এতদগ্গট্ঠানে ঠপেসি.

ততো কুটুম্বিকস্স এতদহোসি – ‘‘মহা ৰতাযং ভিক্খু, যং এৰং সত্থা সযং দিব্বচক্খুকানং অগ্গট্ঠানে ঠপেসি. অহো ৰতাহম্পি অনাগতে উপ্পজ্জনকবুদ্ধস্স সাসনে দিব্বচক্খুকানং অগ্গো ভৰেয্য’’ন্তি চিত্তং উপ্পাদেত্ৰা পরিসন্তরেন গন্ত্ৰা স্ৰাতনায ভগৰন্তং ভিক্খুসঙ্ঘেন সদ্ধিং নিমন্তেত্ৰা পুনদিৰসে বুদ্ধপ্পমুখস্স ভিক্খুসঙ্ঘস্স মহাদানং দত্ৰা ‘‘মহন্তং ঠানন্তরং মযা পত্থিত’’ন্তি তেনেৰ নিযামেন অজ্জতনায স্ৰাতনাযাতি নিমন্তেত্ৰা সত্ত দিৰসানি মহাদানং পৰত্তেত্ৰা সপরিৰারস্স ভগৰতো উত্তমৰত্থানি দত্ৰা ‘‘ভগৰা নাহং ইমং সক্কারং দিব্বসম্পত্তিযা ন মনুস্সসম্পত্তিযা অত্থায করোমি. যং পন তুম্হে ইতো সত্তদিৰসমত্থকে ভিক্খুং দিব্বচক্খুকানং অগ্গট্ঠানে ঠপযিত্থ, অহম্পি অনাগতে একস্স বুদ্ধস্স সাসনে সো ভিক্খু ৰিয দিব্বচক্খুকানং অগ্গো ভৰেয্য’’ন্তি পত্থনং কত্ৰা পাদমূলে নিপজ্জি. সত্থা অনাগতং ওলোকেত্ৰা তস্স পত্থনায সমিজ্ঝনভাৰং ঞত্ৰা এৰমাহ – ‘‘অম্ভো পুরিস, অনাগতে কপ্পসতসহস্সপরিযোসানে গোতমো নাম বুদ্ধো উপ্পজ্জিস্সতি, তস্স সাসনে ত্ৰং দিব্বচক্খুকানং অগ্গো অনুরুদ্ধো নাম ভৰিস্সসী’’তি. এৰঞ্চ পন ৰত্ৰা ভত্তানুমোদনং কত্ৰা ৰিহারমেৰ অগমাসি.

কুটুম্বিকোপি যাৰ বুদ্ধো ধরতি, তাৰ অৰিজহিতমেৰ কল্যাণকম্মং কত্ৰা পরিনিব্বুতে সত্থরি নিট্ঠিতে সত্তযোজনিকে সুৰণ্ণচেতিযে ভিক্খুসঙ্ঘং উপসঙ্কমিত্ৰা, ‘‘ভন্তে, কিং দিব্বচক্খুস্স পরিকম্ম’’ন্তি পুচ্ছি. পদীপদানং নাম দাতুং ৰট্টতি উপাসকাতি. সাধু, ভন্তে, করিস্সামীতি সহস্সদীপানংযেৰ তাৰ দীপরুক্খানং সহস্সং কারেসি, তদনন্তরং ততো পরিত্ততরে, তদনন্তরং ততো পরিযত্ততরেতি অনেকসহস্সে দীপরুক্খে কারেসি. সেসপদীপা পন অপরিমাণা অহেসুং.

এৰং যাৰজীৰং কল্যাণকম্মং কত্ৰা দেৰেসু চ মনুস্সেসু চ সংসরন্তো কপ্পসতসহস্সং অতিক্কমিত্ৰা কস্সপসম্মাসম্বুদ্ধস্স কালে বারাণসিযং কুটুম্বিযগেহে নিব্বত্তিত্ৰা পরিনিব্বুতে সত্থরি নিট্ঠিতে যোজনিকে চেতিযে বহু কংসপাতিযো কারাপেত্ৰা সপ্পিমণ্ডস্স পূরেত্ৰা মজ্ঝে একেকং গুল়পিণ্ডং ঠপেত্ৰা উজ্জালেত্ৰা মুখৰট্টিযা মুখৰট্টিং ফুসাপেন্তো চেতিযং পরিক্খিপাপেত্ৰা অত্তনো সব্বমহন্তং কংসপাতিং কারেত্ৰা সপ্পিমণ্ডস্স পূরেত্ৰা তস্সা মুখৰট্টিযং সমন্ততো ৰট্টিসহস্সং জালাপেত্ৰা মজ্ঝট্ঠানে থূপিকং পিলোতিকায ৰেঠেত্ৰা জালাপেত্ৰা কংসপাতিং সীসেনাদায সব্বরত্তিং যোজনিকং চেতিযং অনুপরিযাযি. এৰং তেনাপি অত্তভাৰেন যাৰজীৰং কল্যাণকম্মং কত্ৰা দেৰলোকে নিব্বত্তো.

পুন অনুপ্পন্নে বুদ্ধে তস্মিংযেৰ নগরে দুগ্গতকুলস্স গেহে পটিসন্ধিং গণ্হিত্ৰা সুমনসেট্ঠিং নাম নিস্সায ৰসি, অন্নভারোতিস্স নামং অহোসি. সো পন সুমনসেট্ঠি দেৰসিকং কপণদ্ধিকৰণিব্বকযাচকানং গেহদ্ৰারে মহাদানং দেতি. অথেকদিৰসং উপরিট্ঠো নাম পচ্চেকবুদ্ধো গন্ধমাদনপব্বতে নিরোধসমাপত্তিং সমাপন্নো. ততো ৰুট্ঠায ‘‘অজ্জ কস্স অনুগ্গহং কাতুং ৰট্টতী’’তি ৰীমংসি. পচ্চেকবুদ্ধা চ নাম দুগ্গতানুকম্পকা হোন্তি. সো ‘‘অজ্জ মযা অন্নভারস্স অনুগ্গহং কাতুং ৰট্টতী’’তি চিন্তেত্ৰা ‘‘ইদানি অন্নভারো অটৰিতো অত্তনো গেহং আগমিস্সতী’’তি ঞত্ৰা পত্তচীৰরমাদায গন্ধমাদনপব্বতা ৰেহাসং অব্ভুগ্গন্ত্ৰা গামদ্ৰারে অন্নভারস্স সম্মুখে পচ্চুট্ঠাসি.

অন্নভারো পচ্চেকবুদ্ধং তুচ্ছপত্তহত্থং দিস্ৰা পচ্চেকবুদ্ধং অভিৰাদেত্ৰা ‘‘অপি, ভন্তে, ভিক্খং লভিত্থা’’তি পুচ্ছি. লভিস্সাম মহাপুঞ্ঞাতি. ‘‘ভন্তে, থোকং ইধেৰ হোথা’’তি ৰেগেন গন্ত্ৰা অত্তনো গেহে মাতুগামং পুচ্ছি – ‘‘ভদ্দে, ময্হং ঠপিতং ভাগভত্তং অত্থি, নত্থী’’তি? অত্থি সামীতি. সো ততোৰ গন্ত্ৰা পচ্চেকবুদ্ধস্স হত্থতো পত্তমাদায আগন্ত্ৰা ‘‘ভদ্দে, মযং পুরিমভৰে কল্যাণকম্মস্স অকতত্তা ভত্তং পচ্চাসীসমানা ৰিহরাম, অম্হাকং দাতুকামতায সতি দেয্যধম্মো ন হোতি, দেয্যধম্মে সতি পটিগ্গাহকং ন লভাম, অজ্জ মে উপরিট্ঠপচ্চেকবুদ্ধো দিট্ঠো, ভাগভত্তঞ্চ অত্থি, ময্হং ভাগভত্তং ইমস্মিং পত্তে পক্খিপাহী’’তি.

ব্যত্তা ইত্থী ‘‘যতো ময্হং সামিকো ভাগভত্তং দেতি, মযাপি ইমস্মিং দানে ভাগিনিযা ভৰিতব্ব’’ন্তি অত্তনো ভাগভত্তম্পি উপরিট্ঠস্স পচ্চেকবুদ্ধস্স পত্তে পতিট্ঠপেত্ৰা অদাসি. অন্নভারো পত্তং আহরিত্ৰা পচ্চেকবুদ্ধস্স হত্থে ঠপেত্ৰা, ‘‘ভন্তে, এৰরূপা দুজ্জীৰিতা মুচ্চামা’’তি আহ. এৰং হোতু, মহাপুঞ্ঞাতি. সো অত্তনো উত্তরসাটকং একস্মিং পদেসে অত্থরিত্ৰা, ‘‘ভন্তে, ইধ নিসীদিত্ৰা পরিভুঞ্জথা’’তি আহ. পচ্চেকবুদ্ধো তত্থ নিসীদিত্ৰা নৰৰিধং পাটিকূল্যং পচ্চৰেক্খন্তো পরিভুঞ্জি. পরিভুত্তকালে অন্নভারো পত্তধোৰনউদকং অদাসি. পচ্চেকবুদ্ধো নিট্ঠিতভত্তকিচ্চো –

‘‘ইচ্ছিতং পত্থিতং তুয্হং, সব্বমেৰ সমিজ্ঝতু;

সব্বে পূরেন্তু সঙ্কপ্পা, চন্দো পন্নরসো যথা’’তি. –

অনুমোদনং কত্ৰা মগ্গং পটিপজ্জি. সুমনসেট্ঠিস্স ছত্তে অধিৰত্থা দেৰতা ‘‘অহো দানং পরমদানং উপরিট্ঠে সুপ্পতিট্ঠিত’’ন্তি তিক্খত্তুং ৰত্ৰা সাধুকারং অদাসি. সুমনসেট্ঠি ‘‘কিং ত্ৰং মং এত্তকং কালং দানং দদমানং ন পস্সসী’’তি আহ. নাহং তৰ দানে সাধুকারং দেমি, অন্নভারেন উপরিট্ঠপচ্চেকবুদ্ধস্স দিন্নপিণ্ডপাতে পসীদিত্ৰা সাধুকারং দেমীতি.

সুমনসেট্ঠি চিন্তেসি – ‘‘অচ্ছরিযং ৰতিদং, অহং এত্তকং কালং দানং দেন্তো দেৰতং সাধুকারং দাপেতুং নাসক্খিং. অযং অন্নভারো মং নিস্সায ৰসন্তো অনুরূপস্স পটিগ্গাহকপুগ্গলস্স লদ্ধত্তা একপিণ্ডপাতদানেনেৰ সাধুকারং দাপেসি, এতস্স অনুচ্ছৰিকং দত্ৰা এতং পিণ্ডপাতং মম সন্তকং কাতুং ৰট্টতী’’তি অন্নভারং পক্কোসাপেত্ৰা ‘‘অজ্জ তযা কস্সচি কিঞ্চি দানং দিন্ন’’ন্তি পুচ্ছি. আম, অয্য, উপরিট্ঠপচ্চেকবুদ্ধস্স মে অত্তনো ভাগভত্তং দিন্নন্তি. হন্দ, ভো, কহাপণং গণ্হিত্ৰা এতং পিণ্ডপাতং ময্হং দেহীতি. ন দেমি অয্যাতি. সো যাৰ সহস্সং ৰড্ঢেসি, অন্নভারো ‘‘সহস্সেনাপি ন দেমী’’তি আহ. হোতু, ভো, যদি পিণ্ডপাতং ন দেসি, সহস্সং গণ্হিত্ৰা পত্তিং মে দেহীতি. ‘‘এতম্পি দাতুং যুত্তং ৰা অযুত্তং ৰা ন জানামি, অয্যং পন উপরিট্ঠপচ্চেকবুদ্ধং পুচ্ছিত্ৰা সচে দাতুং যুত্তং ভৰিস্সতি, দস্সামী’’তি গন্ত্ৰা পচ্চেকবুদ্ধং সম্পাপুণিত্ৰা, ‘‘ভন্তে, সুমনসেট্ঠি ময্হং সহস্সং দত্ৰা তুম্হাকং দিন্নপিণ্ডপাতে পত্তিং যাচতি, দম্মি ৰা ন দম্মি ৰা’’তি. উপমং তে পণ্ডিত করিস্সামি. সেয্যথাপি কুলসতিকে গামে একস্মিংযেৰ ঘরে দীপং জালেয্য, সেসা অত্তনো অত্তনো তেলেন ৰট্টিং তেমেত্ৰা জালাপেত্ৰা গণ্হেয্যুং, পুরিমদীপস্স পভা অত্থি, নত্থীতি. অতিরেকতরা, ভন্তে, পভা হোতীতি. এৰমেৰ পণ্ডিত উল়ুঙ্কযাগু ৰা হোতু কটচ্ছুভিক্খা ৰা, অত্তনো পিণ্ডপাতে পরেসং পত্তিং দেন্তস্স সতস্স ৰা দেতু সহস্সস্স ৰা, যত্তকানং দেতি, তত্তকানং পুঞ্ঞং ৰড্ঢতি. ত্ৰং দেন্তো একমেৰ পিণ্ডপাতং অদাসি, সুমনসেট্ঠিস্স পন পত্তিযা দিন্নায দ্ৰে পিণ্ডপাতা হোন্তি একো তৰ, একো চ তস্সাতি.

সো পচ্চেকবুদ্ধং অভিৰাদেত্ৰা সুমনসেট্ঠিস্স সন্তিকং গন্ত্ৰা ‘‘পিণ্ডপাতে পত্তিং গণ্হ সামী’’তি আহ. হন্দ, কহাপণসহস্সং গণ্হাতি. নাহং পিণ্ডপাতং ৰিক্কিণামি, সদ্ধায পন তুম্হাকং পত্তিং দেমীতি. তাত, ত্ৰং ময্হং সদ্ধায পত্তিং দেসি, অহং পন তুয্হং গুণং পূজেন্তো সহস্সং দেমি, গণ্হ, তাতাতি. সো ‘‘এৰং হোতূ’’তি সহস্সং গণ্হি. তাত, তুয্হং সহস্সং লদ্ধকালতো পট্ঠায সহত্থা কম্মকরণকিচ্চং নত্থি, ৰীথিযং ঘরং মাপেত্ৰা ৰস. যেন তুয্হং অত্থো, তং মং আহরাপেত্ৰা গণ্হাহীতি. নিরোধসমাপত্তিতো ৰুট্ঠিতপচ্চেকবুদ্ধস্স দিন্নপিণ্ডপাতো নাম তংদিৰসমেৰ ৰিপাকং দেতি. তস্মা সুমনসেট্ঠি অঞ্ঞং দিৰসং অন্নভারং গহেত্ৰা রাজকুলং অগচ্ছন্তোপি তংদিৰসং গহেত্ৰাৰ গতো.

অন্নভারস্স পুঞ্ঞং আগম্ম রাজা সেট্ঠিং অনোলোকেত্ৰা অন্নভারমেৰ ওলোকেসি. কিং, দেৰ, ইমং পুরিসং অতিৰিয ওলোকেসীতি? অঞ্ঞং দিৰসং অদিট্ঠপুব্বত্তা ওলোকেমীতি. ওলোকেতব্বযুত্তকো এস দেৰাতি. কো পনস্স ওলোকেতব্বযুত্তকো গুণোতি? অজ্জ অত্তনো ভাগভত্তং সযং অভুঞ্জিত্ৰা উপরিট্ঠপচ্চেকবুদ্ধস্স দিন্নত্তা মম হত্থতো সহস্সং লভি দেৰাতি. কোনামো এসোতি? অন্নভারো নাম দেৰাতি. ‘‘তৰ হত্থতো লদ্ধত্তা মমপি হত্থতো লদ্ধুং অরহতি, অহম্পিস্স পূজং করিস্সামী’’তি ৰত্ৰা সহস্সং অদাসি. এতস্স ৰসনগেহং জানাথ ভণেতি? সাধু দেৰাতি একং গেহট্ঠানং সোধেন্তা কুদ্দালেন আহতাহতট্ঠানে নিধিকুম্ভিযো গীৰায গীৰং আহচ্চ ঠিতা দিস্ৰা রঞ্ঞো আরোচযিংসু. রাজা ‘‘তেন হি গন্ত্ৰা খনথা’’তি আহ. তেসং খনন্তানং খনন্তানং হেট্ঠা গচ্ছন্তি. পুন গন্ত্ৰা রঞ্ঞো আরোচযিংসু. রাজা ‘‘অন্নভারস্স ৰচনেন খনথা’’তি আহ. তে গন্ত্ৰা ‘‘অন্নভারস্সেৰ ৰচন’’ন্তি খনিংসু. কুদ্দালেন আহতাহতট্ঠানে অহিচ্ছত্তকমকুল়ানি ৰিয কুম্ভিযো উট্ঠহিংসু. তে ধনং আহরিত্ৰা রঞ্ঞো সন্তিকে রাসিং অকংসু. রাজা অমচ্চে সন্নিপাতেত্ৰা ‘‘ইমস্মিং নগরে কস্স অঞ্ঞস্স এত্তকং ধনং অত্থী’’তি পুচ্ছি. নত্থি কস্সচি দেৰাতি. তেন হি অযং অন্নভারো ইমস্মিং নগরে ধনসেট্ঠি নাম হোতূতি. তংদিৰসমেৰ সেট্ঠিচ্ছত্তং লভি.

সো ততো পট্ঠায যাৰজীৰং কল্যাণকম্মং কত্ৰা ততো চুতো দেৰলোকে নিব্বত্তো. দীঘরত্তং দেৰমনুস্সেসু সংসরিত্ৰা অম্হাকং সত্থু উপ্পজ্জনকালে কপিলৰত্থুনগরে অমিত্তোদনসক্কস্স গেহে পটিসন্ধিং গণ্হি. নামগ্গহণদিৰসে পনস্স অনুরুদ্ধোতি নামং অকংসু. মহানামসক্কস্স কনিট্ঠভাতা সত্থু চূল়পিতুপুত্তো পরমসুখুমালো মহাপুঞ্ঞো অহোসি. সুৰণ্ণপাতিযংযেৰস্স ভত্তং উপ্পজ্জি. অথস্স মাতা একদিৰসং ‘‘মম পুত্তং নত্থীতি পদং জানাপেস্সামী’’তি একং সুৰণ্ণপাতিং অঞ্ঞায সুৰণ্ণপাতিযা পিদহিত্ৰা তুচ্ছকংযেৰ পেসেসি. অন্তরামগ্গে দেৰতা দিব্বপূৰেহি পূরেসুং. এৰং মহাপুঞ্ঞো অহোসি. তিণ্ণং উতূনং অনুচ্ছৰিকেসু তীসু পাসাদেসু অলঙ্কতনাটকিত্থীহি পরিৰুতো দেৰো ৰিয সম্পত্তিং অনুভৰি.

অম্হাকম্পি বোধিসত্তো তস্মিং সমযে তুসিতপুরা চৰিত্ৰা সুদ্ধোদনমহারাজস্স অগ্গমহেসিযা কুচ্ছিস্মিং পটিসন্ধিং গহেত্ৰা অনুক্কমেন ৰুদ্ধিপ্পত্তো একূনতিংস ৰস্সানি অগারমজ্ঝে ৰসিত্ৰা মহাভিনিক্খমনং নিক্খমিত্ৰা অনুক্কমেন পটিৰিদ্ধসব্বঞ্ঞুতঞ্ঞাণো বোধিমণ্ডে সত্তসত্তাহং ৰীতিনামেত্ৰা ইসিপতনে মিগদাযে ধম্মচক্কপ্পত্তনং পৰত্তেত্ৰা লোকানুগ্গহং করোন্তো রাজগহং আগম্ম ‘‘পুত্তো মে রাজগহং আগতো’’তি সুত্ৰা ‘‘গচ্ছথ ভণে মম পুত্তং আনেথা’’তি পিতরা পহিতে সহস্সসহস্সপরিৰারে দস অমচ্চে এহিভিক্খুপব্বজ্জায পব্বাজেত্ৰা কাল়ুদাযিত্থেরেন চারিকাগমনং আযাচিতো রাজগহতো ৰীসতিসহস্সভিক্খুপরিৰারো নিক্খমিত্ৰা কপিলৰত্থুপুরং গন্ত্ৰা ঞাতিসমাগমে অনেকেহি ইদ্ধিপাটিহারিযেহি সপ্পাটিহারিযং ৰিচিত্রধম্মদেসনং কত্ৰা মহাজনং অমতপানং পাযেত্ৰা দুতিযদিৰসে পত্তচীৰরমাদায নগরদ্ৰারে ঠত্ৰা ‘‘কিং নু খো কুলনগরং আগতানং সব্বঞ্ঞুবুদ্ধানং আচিণ্ণ’’ন্তি আৰজ্জমানো ‘‘সপদানং পিণ্ডায চরণং আচিণ্ণ’’ন্তি ঞত্ৰা সপদানং পিণ্ডায চরন্তো ‘‘পুত্তো মে পিণ্ডায চরতী’’তি সুত্ৰা আগতস্স রঞ্ঞো ধম্মং কথেত্ৰা তেন সকনিৰেসনং পৰেসেত্ৰা কতসক্কারসম্মানো তত্থ কাতব্বং ঞাতিজনানুগ্গহং কত্ৰা রাহুলকুমারং পব্বাজেত্ৰা নচিরস্সেৰ কপিলৰত্থুপুরতো মল্লরট্ঠে চারিকং চরমানো অনুপিযঅম্বৰনং অগমাসি.

তস্মিং সমযে সুদ্ধোদনমহারাজা সাকিযজনং সন্নিপাতেত্ৰা আহ – ‘‘সচে মম পুত্তো অগারং অজ্ঝাৰসিস্স, রাজা অভৰিস্স চক্কৰত্তী সত্তরতনসমন্নাগতো. নত্তাপি মে রাহুলকুমারো খত্তিযগণেন সদ্ধিং তং পরিৰারেত্ৰা অচরিস্স, তুম্হেপি এতমত্থং জানাথ. ইদানি পন মে পুত্তো বুদ্ধো জাতো, খত্তিযাৰস্স পরিৰারা হোন্তু. তুম্হে একেককুলতো একেকং দারকং দেথা’’তি. এৰং ৰুত্তে একপ্পহারেনেৰ সহস্সখত্তিযকুমারা পব্বজিংসু. তস্মিং সমযে মহানামো কুটুম্বসামিকো হোতি. সো অনুরুদ্ধসক্কং উপসঙ্কমিত্ৰা এতদৰোচ – ‘‘এতরহি, তাত অনুরুদ্ধ, অভিঞ্ঞাতা অভিঞ্ঞাতা সক্যকুমারা ভগৰন্তং পব্বজিতং অনুপব্বজন্তি, অম্হাকং কুলে নত্থি কোচি অগারস্মা অনগারিযং পব্বজিতো. তেন হি ত্ৰং ৰা পব্বজ, অহং ৰা পব্বজিস্সামী’’তি. সো তস্স ৰচনং সুত্ৰা ঘরাৰাসে রুচিং অকত্ৰা অত্তসত্তমো অগারস্মা অনগারিযং পব্বজিতো. তস্স পব্বজ্জানুক্কমো সঙ্ঘভেদকক্খন্ধকে (চূল়ৰ. ৩৩০ আদযো) আগতোৰ.

এৰং অনুপিযঅম্বৰনং গন্ত্ৰা পব্বজিতেসু পন তেসু তস্মিংযেৰ অন্তোৰস্সে ভদ্দিযত্থেরো অরহত্তং পাপুণি. অনুরুদ্ধত্থেরো দিব্বচক্খুং নিব্বত্তেসি, দেৰদত্তো অট্ঠ সমাপত্তিযো নিব্বত্তেসি, আনন্দত্থেরো সোতাপত্তিফলে পতিট্ঠাসি, ভগুত্থেরো চ কিমিলত্থেরো চ পচ্ছা অরহত্তং পাপুণিংসু. তেসং পন সব্বেসম্পি থেরানং অত্তনো অত্তনো আগতট্ঠানে পুব্বপত্থনাভিনীহারো আগমিস্সতি. অযং পন অনুরুদ্ধত্থেরো ধম্মসেনাপতিস্স সন্তিকে কম্মট্ঠানং গহেত্ৰা চেতিযরট্ঠে পাচীনৰংসমিগদাযং গন্ত্ৰা সমণধম্মং করোন্তো সত্ত মহাপুরিসৰিতক্কে ৰিতক্কেসি, অট্ঠমে কিলমতি. সত্থা ‘‘অনুরুদ্ধো অট্ঠমে মহাপুরিসৰিতক্কে কিলমতী’’তি ঞত্ৰা ‘‘তস্স সঙ্কপ্পং পূরেস্সামী’’তি তত্থ গন্ত্ৰা পঞ্ঞত্তৰরবুদ্ধাসনে নিসিন্নো অট্ঠমং মহাপুরিসৰিতক্কং পূরেত্ৰা চতুপচ্চযসন্তোসভাৰনারামপটিমণ্ডিতং মহাঅরিযৰংসপটিপদং (অ. নি. ৮.৩০) কথেত্ৰা আকাসে উপ্পতিত্ৰা ভেসকলাৰনমেৰ গতো.

থেরো তথাগতে গতমত্তেযেৰ তেৰিজ্জো মহাখীণাসৰো হুত্ৰা ‘‘সত্থা ময্হং মনং জানিত্ৰা আগন্ত্ৰা অট্ঠমং মহাপুরিসৰিতক্কং পূরেত্ৰা অদাসি. সো চ মে মনোরথো মত্থকং পত্তো’’তি বুদ্ধানং ধম্মদেসনং অত্তনো চ পটিৰিদ্ধধম্মং আরব্ভ ইমা গাথা অভাসি –

‘‘মম সঙ্কপ্পমঞ্ঞায, সত্থা লোকে অনুত্তরো;

মনোমযেন কাযেন, ইদ্ধিযা উপসঙ্কমি.

‘‘যথা মে অহু সঙ্কপ্পো, ততো উত্তরি দেসযি;

নিপ্পপঞ্চরতো বুদ্ধো, নিপ্পপঞ্চমদেসযি.

‘‘তস্সাহং ধম্মমঞ্ঞায, ৰিহাসিং সাসনে রতো;

তিস্সো ৰিজ্জা অনুপ্পত্তো, কতং বুদ্ধস্স সাসন’’ন্তি. (থেরগা. ৯০১-৯০৩);

অথ নং অপরভাগে সত্থা জেতৰনমহাৰিহারে ৰিহরন্তো ‘‘মম সাসনে দিব্বচক্খুকানং অনুরুদ্ধো অগ্গো’’তি অগ্গট্ঠানে ঠপেসি.